Skip to content

Skip to table of contents

Olombangi Via Yehova

Select language Umbundu

 OCIPAMA 85

Yesu o Sakula Veteke Liesambata

Yesu o Sakula Veteke Liesambata

Va Fariseo va suvukile Yesu kuenda va yonguile oku sanga esunga limue lioku u kuata. Va popia okuti Yesu ka sesamẽlele oku sakula omanu veteke Liesambata. Keteke Liesambata Yesu wa sanga ulume umue omeke wa kala oku pinga osimola konele yonjila. Eye wa sapuila olondonge viaye hati: ‘Tali ndomo unene wa Suku u kuatisa ulume u.’ Yesu wa tama eve lovate aye oco a linge onata kuenje wa yi laña vovaso wulume. Noke Yesu wa sapuila ulume hati: ‘Kuende ka puse vovaso ove vociva co ko Siloama.’ Ulume wa ci linga kuenje wa fetika oku vanja. Ya kala onjanja yatete vomuenyo waye oku vanja.

Omanu va komõha kuenje va popia vati: ‘Anga u eye ulume una wa enda oku tumãla oku pinga osimola, ale omunu umue wa lisetãhala laye?’ Ulume wa popia hati: ‘Ame muẽle una wa citiwa omeke!’ Omanu vo pula vati: ‘Ovaso ove a patuluka ndati?’ Eci a va sapuila ovina via pita laye, vo tuala ku va Fariseo.

Ulume wa sapuila va Fariseo hati: ‘Yesu wa laña onata vovaso ange, kuenje wa ndi sapuila oco ngende oku pusa onata yaco. Nda ci linga kuenje kaliye ndi lete.’ Va Fariseo va popia vati: ‘Nda Yesu o sakula Kesambata unene waye ka wa tundile ku Suku.’ Pole, omanu vakuavo va popia vati: ‘Nda unene waye ka wa tundile ku Suku, nda ka tẽlele oku sakula.’

Va Fariseo va vilikiya olonjali viulume kuenda va pula vati: ‘Ndamupi okuti cilo  omõlene o tẽla oku vanja?’ Olonjali viaye via kuata usumba, momo va Fariseo va popele okuti omunu wosi o kolela ku Yesu, o tundisiwa Vosunangonga. Kuenje ovo va tambulula vati: ‘Ka tua ci kũlĩhĩle. U pulisi ene muẽle.’ Va Fariseo va linga apulilo alua kulume toke eci a popia hati: ‘Nda ku sapuili ale ovina viosi nda kũlĩha. Momo lie vu kasilili oku amamako oku ndi pula?’ Va Fariseo va kuata onyeño kuenje vo tundisila posamua Yosunangonga.

Yesu wa sanga ulume kuenje wo pula hati: ‘Ove hẽ wa kolela Mesiya?’ Ulume wa tambulula hati: ‘Ame, nda ndo kũlĩhĩle, nda nda kolela kokuaye.’ Omo liaco, Yesu wa popia hati: ‘Ame muẽle Mesiya.’ Eci ka ci lekisa hẽ okuti Yesu wo kuatela ohenda? Yesu ka sakuile lika ulume, pole, wo kuatisavo oku kuata ekolelo.

“Puãi Yesu wa va kumbulula hati, Wa lueyi omo ka wa kũlĩhili Ovisonehua, ndaño unene wa Suku.”—Mateo 22:29