Skip to content

Skip to table of contents

Olombangi Via Yehova

Select language Umbundu

 OCIPAMA 74

Yesu o Linga Mesiya

Yesu o Linga Mesiya

Yoano wa kala oku kunda hati: ‘Omunu umue wa velapo okuti ame ndi sule, o laika oku iya.’ Eci Yesu a kuata 30 kanyamo, wa tunda ko Galilea oco a ende Kolui Yordão kuna Yoano a kala oku papatisa omanu. Yesu wa yonguile okuti Yoano u papatisa, pole, Yoano wa popia hati: ‘Ame si sesamẽla oku ku papatisa. Ove, ove o sesamẽla oku ndi papatisa.’ Yesu wa sapuila Yoano hati: ‘Yehova o yongola okuti ove o ndi papatisa.’ Omo liaco, ovo va iñila Volui Yordão kuenje Yoano wa yuvika Yesu vovava.

Eci Yesu a tunda vovava, wa likutilila. Vepuluvi liaco, ilu lia yuluka kuenje espiritu sandu lia Suku lia lokila kokuaye ndopomba. Kuenje okupisa kilu Yehova wa popia hati: “Ove Vumõlange wa soliwa; nda ku sanjukila.”

Eci espiritu lia Yehova lia lokila ku Yesu, eye wa linga Kristu ale Mesiya. Kaliye eye wa laikele oku fetika upange una Yehova o tumile oku linga palo posi.

Vepuluvi liaco, noke yepapatiso liaye, Yesu wa enda vekalasoko kuenje wa kalako 40 koloneke. Eci a tiuka wa enda oku ka nyula Yoano. Osimbu Yesu a panda ocipepi laye, Yoano wa popia hati: ‘U eye Kameme ka Suku, una upa akandu oluali.’ Poku popia olondaka viaco, Yoano wa situluila komanu okuti Yesu eye Mesiya. Ove hẽ wa kũlĩha ovina via pita la Yesu osimbu a kala vekalasoko? Tu ci kũlĩhĩsi.

“Noke kilu kua tunda ondaka yiti: ‘Ove Vumõlange wa soliwa; nda ku sanjukila.’”—Marko 1:11