Skip to content

Skip to table of contents

Olombangi Via Yehova

Select language Umbundu

 OCIPAMA 80

Yesu o Nõla 12 Kovapostolo

Yesu o Nõla 12 Kovapostolo

Yesu noke yoku kunda vokuenda kueci ci soka unyamo lolosãi epandu, wa sukilile oku nõla onjila yimue yi kuete esilivilo lia velapo. Velie a ponduile oku nõla oco va talavaye kumue laye? Velie a ponduile oku pindisa oco va songuile ekongelo Liakristão? Oco a nõle olonjila viaco, Yesu wa yonguile oku songuiwa la Yehova. Omo liaco, eye wa enda komunda yimue kuna a ponduile oku kala lika liaye kuenje wa likutilila vokuenda kuteke wosi. Komẽle, Yesu wa vilikiya vamue pokati kolondonge viaye kuenje wa nõlapo 12 kovapostolo. Olonduko vipi viavo ove wa kũlĩha? Olonduko viavo vievi: Petulu, Andereu, Tiago, Yoano, Filipu, Bartolomeu, Tomasi, Mateo, Tiago omõla a Alfeo, Tadeo, Simono kuenda Yuda Isikariote.

Andrew, Peter, Philip, James

Ovapostolo 12 va ponduile oku linga ungende kumue la Yesu. Noke yoku va pindisa wa va tuma oco va ka kunde. Yehova wa eca kokuavo unene woku tundisa olondele kuenda oku sakula omanu va vela.

Yoano, Mateo, Bartolomeu, Tomasi

Yesu wa tukula ovaspostolo 12 hati, akamba vaye kuenda wa va kolelele. Va Fariseo va sima okuti ovapostolo va kala omanu vaño haivo ka va longisiwile. Pole, Yesu wa va pindisa oco va linge upange  waco. Ovo va laikele oku kala la Yesu vepuluvi lia velapo liomuenyo waye, ndeci osimbu ka file kuenda noke liepinduko liaye. Valua pokati kovapostolo 12 va kala vo ko Galilea, ndeci Yesu. Vamue pokati kavo va kuelele.

Tiago omõla a Alfeo, Yuda Isikariote, Tadeo, Simono

Ovapostolo ka va lipuile kuenda va enda oku lueya. Olonjanja vimue va enda oku popia lonjila yimue okuti ka va sokolola vali kuenda va enda oku nõla olonjila ka via sungulukile. Vapuluvi amue ka va endaele oku lekisa epandi. Va enda oku lihoyisa catiamẽla komunu wa velapo pokati kavo. Pole, va kala omanu vawa okuti va solele Yehova. Ovo va laikele oku songuila ekongelo Liakristão noke yoku tiukila kua Yesu kilu.

“Ndu tukuli akamba, momo ndo sapuili ovina viosi nda yeva ku Isiange.”—Yoano 15:15