Skip to content

Skip to table of contents

Olombangi Via Yehova

Select language Umbundu

 OCIPAMA 73

Esapulo Lia Yoano Upapatisi

Esapulo Lia Yoano Upapatisi

Yoano omõla a Sakariya la Elisavete, eci a kula wa linga uprofeto. Yehova wa nõla Yoano oco a longise omanu okuti Mesiya o laika oku iya. Yoano ka longasaile volosunangonga ale valupale, pole, wa kundila vekalasoko. Omanu va tunda ko Yerusalãi lo ko Yudea yosi oco va longisiwe la Yoano. Eye wa va longisa okuti oco va sanjuise Suku, va sukila oku liwekapo oku linga ovina vĩvi. Noke yoku yevelela Yoano, omanu valua va likekembela akandu avo kuenda Yoano wa va papatisa Volui Yordão.

Yoano wambatele omuenyo umue wa leluka. Eye wa walaile uwalo wovonya ongamelo kuenda wa lialia apange lowiki wombula. Omanu va yonguile oku kũlĩha Yoano. Va Fariseo vakuepela la va Sadukeo veyavo oco vo mole. Yoano wa va sapuila hati: ‘Vu sukila oku pongolola ovituwa viene kuenda oku likekembela. Ko ka simi okuti ene vu likasi omo vu popia hati vumãla va Avirahama. Eci ka ci lomboloka okuti ene vumãla va Suku.’

Omanu valua veya ku Yoano kuenje vo pula vati: ‘Nye tu sukila oku linga oco tu sanjuise Suku?’ Yoano wa sapuila va Yudea hati: ‘Nda ene vu kuete ovowalo avali, tepeliko una ka kuete.’ Ove hẽ wa kũlĩha esunga lieci eye a popela olondaka evi? Eye wa yonguile okuti olondonge viaye vi kũlĩha okuti oco va sanjuise Suku va sukila oku sola omanu.

Yoano wa sapuila vakuakutambula elisimu hati: ‘Ko ka vokiyiko kelisimu kuenda ko ka pingi eci ka ca kisikiwile.’ Eye wa sapuila asualali hati: ‘Ko ka tambuli ovitukiko ale oku vangula uhembi.’

 Ovitunda la va Lewi veyavo ku Yoano kuenje vo pula vati: ‘Ove elie? Omanu vosi va yongola oku ku kũlĩha.’ Yoano wa popia hati: ‘Ame ndi ndaka yimue vekalasoko, ndi tuala omanu ku Yehova, ndeci ca popele uprofeto Isaya.’

Omanu va sola ovina Yoano a kala oku va longisa. Kuenje valua va kala oku lipula nda Yoano eye Mesiya. Pole, eye wa va sapuila hati: ‘Una wa velapo vali o kasi oku iya. Ame sia velelepo kuenda si sesamẽla oku kutulula olohaku viaye. Ame ndi papatisa lovava, pole, eye o ka papatisa lespiritu sandu.’

“Ulume waco weya ndombangi, oco a imbe uvangi wocinyi, okuti omanu vosi va kolela mekonda liaye.”—Yoano 1:7