Skip to content

Skip to table of contents

Olombangi Via Yehova

Select language Umbundu

 OCIPAMA 61

Ovo ka va Tavele Oku Kekama

Ovo ka va Tavele Oku Kekama

Noke yotembo yimue tunde eci Nevukandesa a kuata onjoi yatiamẽla kociñumañuma, eye wa tunga ociñumañuma cimue cinene culu. Kuenje wa ci kapa ketapi lia Dura kuenda wa kovonga omanu va velapo vofeka oku kongelamo Sadrake, Mesake kuenda Aved-Nego oco va liongoluile kovaso yociñumañuma caco. Soma wa handeleka hati: ‘Eci vu yeva ocileñi calumbeta lolohalupa kuenda ovisikilo viñi viñi, kekamẽli ociñumañuma! Omunu wosi ka kekamẽla ociñumañuma, imbiwa velungulungu liondalu vofolono.’ Amalẽhe vatatu va Heveru va ponduile hẽ oku kekamẽla ociñumañuma, ale nda va fendela Yehova?

Noke Soma wa handeleka oco ku yevalisiwe ocileñi covisikilo. Omanu vosi va wila posi kuenje va fendela ociñumañuma, pole, Sadrake Mesake kuenda Aved-Nego ka va ci lingile. Vamue pokati kalume va soma va ci mola kuenje va sapuila soma vati: ‘Amalẽhe ava vatatu va Heveru va likala oku fendela ociñumañuma cove.’ Nevukandesa wa tuma oku ka vopa kuenje wa va sapuila hati: ‘Ngeca kokuene epuluvi likuavo lioku fendela ociñumañuma. Pole, nda ka vu fendela, ndu wimbi vokati kofolono. Ka kuli osuku yi pondola oku vu popeli peka liange.’ Ovo va tambulula vati: ‘Etu ka tu sukila epuluvi likuavo. Suku yetu o pondola oku tu popela. Pole, ndaño ka tu popela, a Soma, etu ka tu tava oku fendela ociñumañuma.’

Nevukandesa wa temele calua. Eye wa sapuila alume vaye hati: ‘Tokotisi ofolono olonjanja epanduvali okuti oku tokota kuaco kuluapo vali!’ Kuenje wa handeleka asualali  vaye hati: ‘Kuti alume ava loku va imba vokati kofolono!’ Ofolono ya tokotele calua okuti eci asualali va amela ocipepi lofolono vepuluvi liaco haico va fa. Amalẽhe vatatu va Heveru va imbiwa vofolono. Pole, eci Nevukandesa a vanja vokati, wa mola okuti ka mua kalele alume vatatu, pole, mua kala alume vakuãla va kala oku endela vokati kofolono. Eye wa kuata usumba kuenje wa pula va kesongo kaye hati: ‘Ka tua imbile hẽ alume vatatu vofolono? Ndete alume vakuãla, kuenda umue pokati kavo o mõlẽha ndungelo!’

Nevukandesa wamela ocipepi lofolono kuenje wa vilikiya lolukandi hati: ‘Tundi enjui, ene akuenje va Suku Tõlo!’ Omanu vosi va komõha eci va mola okuti Sadrake Mesake kuenda Aved-Nego va tunda vokati kondalu, pole, ka ya va lingile cimue. Ositu yavo, esinga liavo kuenda uwalo wavo ka wa pile ndaño muẽle oku lehã ondalu.

Nevukandesa wa popia hati: ‘Suku ya Sadrake la Mesake kuenda Aved-Nego wa velapo! Eye wa tuma ungelo waye kuenje wa va popela. Ka kuli osuku yikuavo ndeyi yavo.’

Ndeci ca pita lamalẽhe vatatu va Heveru ove hẽ wa likapelako oku kala ukuacili ku Yehova ndaño lovitangi?

“Fendela Yehova, Suku yove, eye lika o vumba.”​—Mateo 4:10