Skip to content

Skip to table of contents

Olombangi Via Yehova

Select language Umbundu

 OCIPAMA 67

Ovimbaka Vio Yerusalãi

Ovimbaka Vio Yerusalãi

Tu sokololi konyima. Nehemiya okuti ukuenje umue wa Soma Aretasesete, wa kala u Isareli kuenda wa kala ko Persia volupale luo Siusana. Manji a Nehemiya wa tunda ko Yuda lasapulo ãvi hati: ‘Omanu vana va tiukila ko Yerusalãi ka va kolelepo. Ovimbaka violupale kuenda olombundi vina va Bavulono va nyõla ka via tumbuluiwile.’ Nehemiya wa sumuile calua. Eye wa yonguile oku enda ko Yerusalãi oco a va kuatise kuenje wa likutilila oco soma o wecelele oku enda.

Noke, soma wa limbuka okuti Nehemiya wa sumua. Soma wa popia hati: ‘Lalimue eteke nda ku muile ndoco. Nye ci kasi oku pita love?’ Nehemiya wa popia hati: ‘Ocipala cange ka ci sumua ndati osimbu imbo liange, o Yerusalãi lia linga elunda?’ Soma wa pula hati: ‘Nye o yongola okuti oco ndu ku lingila?’ Vepuluvi liaco, Nehemiya wa linga ohutililo yo vutima. Noke wa popia hati: ‘Linga ohenda, ecelela okuti ngenda ko Yerusalãi oku ka tumbulula ovimbaka.’ Soma Aretasesete wa sapuila Nehemiya okuti citava oku enda kuenje wa linga esokiyo liokuti Nehemiya o kolapo vungende waye unene. Eye wa lingisavo Nehemiya oco a kale nguluvulu yo Yuda kuenda wa eca kokuaye avaya oku linga apito o volupale.

Eci Nehemiya a pitĩla ko Yerusalãi wa kũlĩhĩsa ovimbaka violupale. Noke wongolola ovitunda kuenda olombiali kuenje wa va sapuila hati: ‘Eci cĩvi. Tu sukila oku fetika oku linga upange.’ Omanu va tava kuenje va fetika oku tumbulula ovimbaka.

Pole, vamue pokati kovanyali va va Isareli va fetika oku va yola epembe kuenje va popia vati: ‘Ombulu yimue yi pondola oku undumula lulelu ocimbaka cavo covawe.’ Olonalavayi ka via kapeleko olondaka viaco kuenje viamamako oku tunga. Ovimbaka via kula kuenda via pama.

Ovanyali va nõlapo oku tunda kolonepa via litepa kuenda oku katukila o Yerusalãi okuti omanu ka va ci limbuka. Eci va Yudea va yeva ovina viatiamẽla kongombo yaco, va kuata usumba. Pole, Nehemiya wa va sapuila hati: ‘Ko ka kuati usumba. Yehova o kasi letu.’ Nehemiya wa kapa olondavululi oco vi teyuile olonalavayi kuenje ovanyali ka va tẽlele oku va katukila.

 Vokuenda kueci ci soka 52 koloneke, ovimbaka kuenda olombundi via tungiwa. Nehemiya wa tuala va Lewi vosi ko Yerusalãi oco va tumbike onembele. Eye wa sokiya ovimunga vivali violonjimbi. Ovo va londa losikata kocimbaka Kombundi Yokono kuenje va ñuala olupale okuti ava va enda kondio vakuavo kepĩli. Ovo va sika alumbeta, olosimbalu, olohalupa kuenda va imbila ovisungo Yehova. Esera wa enda locimunga cimue kuenda Nehemiya wa enda locimunga cikuavo toke eci va lisanga vonembele. Omanu vosi alume lakãi kuenda omãla va eca ovilumba ku Yehova kuenda va linga ocipito. Ocileñi colondaka viavo vionjolela, via ponduile oku yevala kupãla.

“Lacimue ocimãleho ca pangiwila oku yaka love ci ku linga cimue.”—Isaya 54:17