Skip to content

Skip to table of contents

Olombangi Via Yehova

Select language Umbundu

 OCIPAMA 63

Ocisonehua Vocimano

Ocisonehua Vocimano

Vokuenda kuotembo, Belsiatare wa linga osoma yo Bavulono. Vuteke umue eye wa laleka ohulukãi yomanu va velapo vofeka, kocipito cimue. Eye wa tuma akuenje vaye oco va nene olokopo viulu vina Nevukandesa o pile vonembele ya Yehova. Belsiatare kuenda omanu vana a laleka, va nyuila volokopo viaco kuenda va sivaya olosuku viavo. Vocipikipiki eka liomunu umue lia molẽha vocimano cohondo yoku lila kuenje lia fetika oku soneha olondaka vimue vi komohĩsa.

Belsiatare wa kuata usumba walua. Eye wa vilikiya alume vaye vakualumbu kuenje wa va likuminya hati: ‘Nda umue wa tẽla oku lombolola olondaka evi, ndu lingisa ulume watatu wa velapo vo Bavulono.’ Va seteka oku lombolola olondaka viaco, pole, lomue wa tẽla oku vi lombolola. Noke, nasoma wa iñila kuenje wa popia hati: ‘Kuli ulume umue o tukuiwa hati, Daniele una wa enda oku lombolola ovina vimue ku Nevukandesa. Eye o pondola oku lombolola kokuove olondaka evi.’

Daniele weya ku soma Belsiatare. Soma wo sapuila hati: ‘Nda wa tẽla oku tanga ovisonehua evi, loku vi lombolola ame ndu ku ĩha omota yimue yulu kuenda hu lingisa ulume watatu wa velapo vo Bavulono.’ Daniele wa popia hati: ‘Si yongola olombanjaile viove, pole, u sapuila eci olondaka evi vi lomboloka. Isia yove Nevukandesa wa kala ukuepela kuenje Yehova wo yambula. Ove wa kũlĩha ovina viosi via pita laye, pole, ove wa sinila Yehova poku nyuila ovinyu volokopo viulu via tunda vonembele ya Yehova. Kuenje Suku wa soneha olondaka evi viokuti: Mene, Mene, Tekel kuenda Ufarsin. Olondaka evi vi lomboloka okuti, o Media kuenda o Persia yi ka lundula o Bavulono kuenje ove ku kala vali osoma.’

Ca kala ndu okuti lomue wa ponduile oku lundula o Bavulono. Olupale luaco, lua teyuiwile lovimano via pama kuenda olui lua longa. Pole, vuteke waco va Media kuenda va Persia va lundula o Bavulono. Soma yo Persia, Kuro, wa  papula ovava ovolui oco asualali vaye va pondole oku pitĩla toke kolombundi violupale. Eci va pitĩla, olombundi viaco va vi sanga upulule! Asualali va lundula olupale kuenje va ponda soma. Noke Kuro wa linga ombiali yo Bavulono.

Vokati kunyamo Kuro wa imba oluiya hati: ‘Yehova wa ndi sapuila oco ku tungiwe onembele yaye vo Yerusalãi. Ufendeli wosi wa Yehova okuti o yongola oku kuatisa, citava oku enda.’ Ndeci Yehova a ci likuminyile, valua va Yudea va tiukila kolonjo noke ya 70 kanyamo tunde eci o Yerusalãi ya nyoliwa. Kuro wa tuma oku tiula ulu lolokopo viopalata kuenda ovikuata Nevukandesa opile vonembele. O pondola hẽ oku limbuka ndomo Yehova vonduko ya Kuro a kuatisa afendeli vaye?

“O Bavulono Yinene ya kupuka! Oyo ya kupuka, ya linga ocitumãlo colondele.”—Esituluilo 18:2