Skip to content

Skip to table of contents

Olombangi Via Yehova

Select language Umbundu

 OCIPAMA CATETE

Suku Helie?

Suku Helie?

1, 2. Apulilo api omanu va siata oku linga?

OMÃLA va siata oku linga apulilo alua. Citava okuti eci o va lomboluila ovina vimue, va ku pula vati: ‘Momo lie?’ Eci weca etambululo kokuavo, pamue va pula vali vati: ‘Momo lie?’

2 Cikale okuti tuamalẽhe ale tuakulu, vosi yetu tu kuete apulilo. Pamue tu kuete apulilo atiamẽla kovina tu yongola okulia, oku wala, ale oku landa. Pamue tua siata oku linga apulilo atiamẽla komuenyo, kuenda kekalo lio kovaso yoloneke. Pole, nda ka tua sangele atambululo tu sukila atiamẽla kapulilo etu, pamue tu liwekapo oku sandiliya atambululo aco.

3. Momo lie omanu valua va siatela oku sima okuti ka va pondola oku sanga atambululo kapulilo avo a kuete esilivilo lia velapo?

3 Anga hẽ Vembimbiliya tu sangamo atambululo apulilo a kuete esilivilo lia velapo tua siata oku linga? Omanu vamue va siata oku sima okuti mu sangiwa, pole, va simavo okuti ka ca lelukile oku kuata elomboloko Liembimbiliya. Pamue va simavo okuti, alongisi ale asongui vetavo, ovo lika va pondola oku eca atambululo. Omanu vakuavo va kuete osõi yoku tava okuti, ka va tẽla oku eca atambululo aco. Ove nye o sima?

4, 5. Apulilo api a kuete esilivilo lia velapo o kuete? Momo lie o sukilila oku amamako oku sandiliya atambululo?

4 Citava okuti o yongola oku sanga atambululo kapulilo amue ndeci: Momo lie ndi kasilili palo? Nye ci ka pita lame eci ndi fa? Suku wa tuwa ndati? Yesu ulongisi wa velapo, wa popia hati: “Lipiliki oku pinga kuenje vo wĩhi; lipiliki oku sandiliya kuenje vu sanga; kuenda lipiliki oku totola kuenje  vo yuluili.” (Mateo 7:7) Ku ka liwekepo oku sandiliya atambululo o pondola oku kolela.

5 Nda wamamako oku ‘sandiliya,’ o pondola oku sanga atambululo Vembimbiliya. (Olosapo 2:1-5) Ka ca tĩlile oku kuata elomboloko liatambululo aco. Ovina o lilongisa, vi pondola oku ku nenela esanju cilo, kuenda elavoko liwa kovaso yoloneke. Omo liaco, cilo tu konomuisa epulilo limue lia siata oku nena atatahãi komanu valua.

ANGA HẼ SUKU WA TU KAPAKO, ALE ONGANGALA?

6. Momo lie omanu vamue va siatela oku sima okuti Suku ka kapeleko ohali yavo?

6 Omanu valua va siata oku sima okuti Suku ka tu kapeleko. Ovo va sima okuti nda Suku wa tu kapeleko, voluali nda muli ekalo liwa. Momo, tua siata oku mola ovoyaki, esuvu pokati komanu, kuenda uhukũi voluali luosi. Omanu va siata oku vela, oku tala ohali, kuenda oku fa. Omo liaco, omanu vamue va siata oku li pula ndoco: ‘Nda Suku wa tu kapako, momo lie ka tatekela ovitangi viosi tua siata oku liyaka lavio?’

7. (a) Asongui vatavo esanda va siata oku longisa ndati komanu okuti Suku ongangala? (b) Momo lie tu tavela okuti Suku ka kuete eko liovina vĩvi via siata oku pita voluali?

7 Asongui vatavo esanda olonjanja vimue va siata oku vetiya omanu oco va tave okuti Suku ongangala. Eci ku pita ocitangi cimue va popia vati, ocipango ca Suku. Va siatavo oku popia okuti, Suku o yongola okuti ku pita ocitangi caco. Eci va popia ovina viaco, ci lekisa okuti, va kasi oku lundila Suku. Pole, Embimbiliya li longisa okuti, Suku hayeko wa siata oku koka ovina viaco vĩvi. Ukanda wa Tiago 1:13 u tu sapuila okuti, Suku hayeko wa siata oku kapa omanu voseteko. Owo u popia ndoco: “Eci umue a setekiwa, ka ka popie hati: ‘Ñasi oku setekiwa la Suku.’ Momo Suku ka setekiwa leci cĩvi kuenda eye ka seteka umue.” Olondaka evi vi lomboloka okuti ndaño Suku ka kasi oku tateka oco ovina vĩvi ka vi ka  amameko, pole hayeko wa siata oku vi koka. (Tanga Yovi 34:10-12.) Omo liaco, tu konomuisi ulandu umue.

8, 9. Momo lie ka ca sungulukilile oku lundila Suku omo liovitangi vietu? Tukula ulandu umue.

8 Sokolola umalẽhe umue o kasi handi konjo yolonjali viaye. Isiaye u sole calua, kuenda wo longisa ndomo a pondola oku nõla onjila ya sunguluka. Noke umalẽhe waco o lekisa esino ku isiaye, kuenje o tunda konjo. Pole, noke o linga ovina vĩvi kuenda o kuata ovitangi. Ove hẽ o lundila isia omo liovitangi omõla a kasi oku liyaka lavio omo okuti ko tatekele oco ka ka tunde konjo? Sio, ku lundila! (Luka 15:11-13) Ndeci ci pita lonjali, Suku ka tatekele omanu eci va nõlapo oku lekisa esino loku linga ovina vĩvi. Omo liaco, eci ku pita ovina vĩvi, tu sukila oku ivaluka okuti, Suku hayeko wa siata oku vi koka. Ka ca sungulukile oku lundila Suku.

9 Kuli esunga lieci Suku ka siatelele oku tateka oco omanu ka va ka pite lovina vĩvi. Kocipama 11, o ka lilongisa eci Embimbiliya li popia catiamẽla kondaka yaco. Pole, o sukila oku kolela okuti, Suku o tu sole, kuenda hayeko wa siata oku tu kokela ovitangi. Momo, Eye lika o pondola oku tetulula ovitangi viaco.Isaya 33:2.

10. Momo lie tu kuetele ekolelo liokuti Suku o ka tetulula ovina viosi ka via sungulukile omanu vakuevĩho va siata oku linga?

10 Suku o kola. (Isaya 6:3) Eye wa lipua kovina viosi, kuenda uwa. Omo liaco, tu pondola oku kolela kokuaye. Eye ka sokisiwa lomanu. Momo, olonjanja vimue va siata oku linga ovina ka via sungulukile. Olombiali vina tu sima okuti vakuacili, ka vi kuete unene woku tetulula ovina viosi omanu vakuevĩho va siata oku linga. Lomue o kuete unene ndowu wa Suku. Eye o ka tetulula ovina viosi vĩvi omanu vakuevĩho va siata oku linga,  momo o pondola oku ci linga. Eye o ka malako ovina viosi vĩvi.—Tanga Osamo 37:9-11.

NYE SUKU A YEVA VUTIMA ECI OMANU VA TALA OHALI?

11. Nye Suku a yeva vutima catiamẽla kohali wa siata oku liyaka layo?

11 Nye Suku a yeva vutima eci a mola ovina vi kasi oku pita voluali lulo kuenda ovitangi wa siata oku liyaka lavio? Embimbiliya li longisa okuti, Suku “o sole esunga.” (Osamo 37:28) Omo liaco, wa kapako ovina viwa, pole o lekisa esakalalo kovina vĩvi. Eye ka sole nda omanu va tala ohali. Embimbiliya li popiavo okuti, kosimbu eci Suku a limbuka okuti kulo kilu lieve kue yuka evĩho, “co vala vutima.” (Efetikilo 6:5, 6) Suku ka pongolokele. (Malakiya 3:6) Embimbiliya li lekisa okuti Suku wa siata oku ku tata.—Tanga 1 Petulu 5:7.

Embimbiliya li longisa okuti, Yehova eye Ululiki woluali luosi, kuenda ukuacisola

12, 13. (a) Momo lie tua siatela oku lekisa ocisola komanu vakuavo loku va tata ciwa, kuenda nye tu yevite vutima catiamẽla kohali ya siata oku pita voluali? (b) Momo lie tu kuetele ekolelo liokuti Suku o ka malako ohali yosi kuenda ekambo liesunga?

12 Embimbiliya li popia okuti, Suku wa tu lulika lesetahãlo liaye. (Efetikilo 1:26) Eci ci lomboloka okuti, Suku wa tu lulika lovituwa viwa ndevi viaye. Nda ove wa siata oku sumua eci o mola omanu va tala ohali ndaño ka va kuete eko, Suku o sumua vali calua eci a mola ovina viaco! Tua ci kũlĩha ndati?

13 Embimbiliya li tu longisa okuti, “Suku eye ocisola.” (1 Yoano 4:8) Ovina viosi Suku a linga, vi vetiyiwa locisola caye. Omo liaco, tua siata oku lekisa ocisola omo okuti, Suku ukuacisola. Sokolola epulilo eli: Nda ove wa kuatele unene, nda wa malako ohali yosi kuenda ekambo liesunga voluali lulo? Ocili okuti nda wa ci linga, momo o sole omanu. Nye ci popiwa catiamẽla ku Suku? Omo okuti eye o kuete unene kuenda o tu kuetele ocisola, o ka malako ohali yosi lekambo liesunga. O pondola oku kolela okuti  olohuminyo via Suku via tukuiwa kefetikilo lielivulu lilo, vi ka tẽlisiwa! Pole, oco o kolele kolohuminyo viaco, o sukila oku kũlĩha ovina vialua viatiamẽla ku Suku.

SUKU O YONGOLA OKUTI U KŨLĨHA

Nda ove o yongola oku kala ekamba liomunu umue, o sukila oku u sapuila onduko yove. Suku o tu sapuilavo onduko yaye Vembimbiliya

14. Onduko ya Suku helie, kuenda tua kũlĩha ndati okuti tu sukila oku yi tukula?

14 Nda o yongola oku linga ekamba liomunu umue nye tete o sukila oku u sapuila? Tete, u sapuila onduko yove. Anga hẽ Suku o kuete onduko? Atavo alua esanda a siata oku longisa okuti, onduko yaye Suku ale Ñala. Olondaka evi ka vi lomboloka olonduko. Pole, vi lomboloka lika olonduko viesumbilo ndeci tua siata oku tukula omunu umue hati, “soma” ale “ombiali.” Suku o tu sapuila hati, onduko yaye Yehova. Osamo 83:18 yi popia ndoco: “Ove, onduko yove Yehova, ove, lika wove, Tõlo koluali luosi.” Asonehi Vembimbiliya va soneha onduko ya Suku olonjanja vialua. Yehova o yongola okuti o kũlĩha onduko yaye kuenda o yi tukula. Eye o ku sapuila onduko yaye oco o linge ekamba liaye.

15. Onduko Yehova yi lomboloka nye?

15 Onduko ya Suku okuti Yehova, yi kuete elomboloko lia velapo. Oyo yi lomboloka okuti, Suku o pondola oku tẽlisa olohuminyo viosi a linga, kuenda o pondolavo oku tẽlisa ocipango caye. Lacimue ci  pondola oku u tateka. Yehova eye lika o kuete onduko yaco. *

16, 17. Nye ci lomboloka olondaka viokuti: (a) “Ukuonene Wosi”? (b) “Soma yonahũlũlua”? (c) “Ululiki”?

16 Ndomo tua konomuisa vocipama cilo kocinimbu cekũi lakuãla, Osamo 83:18 yi popia eci catiamẽla ku Yehova ndoco: “Ove, lika wove, Tõlo.” Elivulu Liesituluilo 15:3, li popia ndoco: “A  Yehova, Suku Ukuonene Wosi, ovilinga viove vinene haivio vi komõhisa. Olonjila viove viesunga haivio viocili, a Soma yonahũlũlua.” Ondaka “Ukuonene Wosi” yi lomboloka nye? Yi lomboloka okuti, Yehova eye lika ukuonene wa velapo okuti, ka sokisiwa lomunu umue voluali luosi. Ondaka yokuti, “Soma yonahũlũlua,” yi lomboloka okuti, Yehova o kasi otembo ka yi pui. Osamo 90:2 yi lombolola okuti, Yehova o kasi tunde ka ku ci toke ka ku ci. Ovina viaco vi komõhisa calua!

17 Yehova eye Ululiki wetu. Elivulu Liesituluilo 4:11 li tu sapuila ndoco: “A Yehova Suku yetu, ove o sesamẽla oku tambula ulamba, lesivayo kuenda unene, momo ove wa lulika ovina viosi, ovio vi kasilili kuenda via lulikiwa omo liocipango cove.” Oku upisa kovangelo va kasi kilu, olombungululu vio kilu, apako a kasi voviti, kuenda olõsi vio vokalunga, ovina evi viosi Yehova wa vi lulika oco o vi sokolole!

 O PONDOLA HẼ OKU KALA EKAMBA LIA YEHOVA?

18. Momo lie omanu vamue va siatela oku sima okuti ka va pondola oku kala akamba va Suku? Nye Embimbiliya li popia catiamẽla kondaka yaco?

18 Eci omanu vamue va tanga ovina viatiamẽla kovituwa vi komõhisa via Yehova, va kuata usumba, kuenda va sima ndoco: ‘Nda Yehova Suku ukuonene wa velapo, kuenda o kasi ocipãla, momo lie a siatela oku ndi tata?’ Yehova Suku o yongola hẽ okuti ove o kuata ovisimĩlo viaco? Sio. Yehova o yongola okuti amẽla kokuetu. Embimbiliya li tu sapuila okuti, Suku “ka kasi ocipãla letu.” (Ovilinga 17:27) Suku o yongola okuti ove amẽla kokuaye. Eye wa likuminya hati, o pondola oku ‘amẽla kokuove.’Tiago 4:8.

19. (a) O pondola oku kala ndati ekamba lia Suku? (b) Ovituwa vipi via Yehova o sole calua?

19 O pondola oku kala ndati ekamba lia Suku? Yesu wa popia hati: “Omuenyo ko pui u lomboloka okuti ovo va ku kũlĩha okuti ove lika wu Suku yocili kuenda una ove wa tuma, Yesu Kristu.” (Yoano 17:3) Nda wamamako oku lilongisa, o pondola oku kũlĩha Yehova kuenda Yesu. Nda wa ci linga, o pondola oku kuata omuenyo ko pui. Tua lilongisa ale okuti, “Suku [eye] ocisola.” (1 Yoano 4:16) Pole, o kuetevo ovituwa vialua viwa. Embimbiliya li tu sapuila okuti Yehova eye “Suku yohenda, ukuacali, ukuakulivala konyeño, ukuacisola calua haeye ukuacili.” (Etundilo 34:6) Yehova ‘wa sunguluka haeye ukuakuecela.’ (Osamo 86:5) Eye ukuepandi, kuenda ukuacili. (2 Petulu 3:9; Esituluilo 15:4) O pondola oku lilongisa ovituwa vikuavo via Yehova, osimbu amamako oku lilongisa Embimbiliya.

20-22. (a) Tu amẽla ndati ku Suku nda ka tu pondola oku u mola? (b) Nye o sukila oku linga nda omanu vakuavo va yongola oku ku tateka oku lilongisa Embimbiliya?

20 Amẽla ndati ku Suku nda ku pondola oku u  mola? (Yoano 1:18; 4:24; 1 Timoteo 1:17) Eci o tanga Vembimbiliya ovina viatiamẽla ku Yehova, o pondola oku u kũlĩha ciwa Ndomunu umue o letiwe. (Osamo 27:4; Va Roma 1:20) Osimbu amamako oku lilongisa ovina viatiamẽla ku Yehova, o pondola oku lekisa ocisola calua kokuaye, kuenda o pamisa ukamba wove laye.

Isia o sole omãla vaye, pole Isietu wo kilu o tu sole vali calua

21 O pondola oku kuata elomboloko liokuti Yehova eye Isietu. (Mateo 6:9) Eye wa tu ĩha omuenyo, kuenda o yongola okuti tu kuata ekalo liwa komuenyo. Eci oco isia umue ukuacisola a yonguila komãla vaye. (Osamo 36:9) Embimbiliya li tu longisa okuti, o pondola oku kala ekamba lia Yehova. (Tiago 2:23) Sokolola oku kala ekamba liaye. Yehova, Ululiki woluali luosi, o yongola okuti o linga ekamba liaye!

22 Omanu vamue va yongola okuti o liwekapo oku lilongisa Embimbiliya. Momo, va kuete usumba wokuti o ka siapo etavo liove. Pole, ku ka ecelele okuti umue oku tateka oku kala ekamba lia Yehova. Momo, eye Ekamba lia velapo o sukila oku kuata.

23, 24. (a) Momo lie o sukilila oku amamako oku linga apulilo? (b) Nye tu ka konomuisa vocipama ci kuãimo?

23 Osimbu amamako oku lilongisa Embimbiliya o ka limbuka ovina vimue okuti, ku kuete elomboloko liaco. Pole, ku ka kuate osõi yoku linga apulilo ale oku pinga ekuatiso. Yesu wa popia hati, tu sukila oku lekisa umbombe ndomãla vatito. (Mateo 18:2-4) Omãla va siata oku linga apulilo alua. Suku o yongola okuti o sanga atambululo. Omo liaco, lilongisa Embimbiliya lutate oco o limbuke okuti ovina o kasi oku lilongisa viocili.Tanga Ovilinga 17:11.

24 Onjila ya velapo yoku kũlĩha Yehova, oku lilongisa Embimbiliya. Vocipama ci kuãimo, tu ka lilongisa esunga lieci Embimbiliya ka li sokisiwila lalivulu akuavo.

^ tini. 15 Nda Vembimbiliya liove ka mu sangiwa onduko Yehova, ale nda o yongola oku kuata alomboluilo akuavo atiamẽla kelomboloko liaco kuenda ndomo onduko ya Suku yi tukuiwa, tala Etosi 1 kesulilo lielivulu lilo.