Skip to content

Skip to table of contents

Olombangi Via Yehova

Select language Umbundu

 OCIPAMA CEKŨI LATÃLO

Onjila ya Sunguluka Yoku Fendela Suku

Onjila ya Sunguluka Yoku Fendela Suku

1. Helie o pondola oku tu sapuila onjila ya sunguluka yoku fendela Suku?

ATAVO alua a siata oku popia hati, a kasi oku longisa ocili catiamẽla ku Suku. Pole, olondaka viaco haviociliko, momo atavo a siata oku longisa ovina vialua via litepa viatiamẽla ku Suku, kuenda ndomo tu sukila oku u fendela. Tu pondola oku kũlĩha ndati onjila ya sunguluka yoku fendela Suku? Yehova eye lika o pondola oku tu sapuila ndomo tu sukila oku u fendela.

2. O pondola oku lilongisa ndati onjila ya sunguluka yoku fendela Suku?

2 Yehova wa tu ĩha Embimbiliya oco tu lilongise onjila ya sunguluka yoku u fendela. Omo liaco, lilongisa Embimbiliya, kuenje Yehova o ku kuatisa oco o kũlĩhe alongiso aye, momo o kuete onjongole yoku ku kuatisa.—Isaya 48:17.

3. Nye Suku a yongola okuti oco tu linga?

3 Omanu vamue va siata oku popia vati, Suku o tava atavo osi. Pole, Yesu ka tu longisile ovina viaco. Eye wa popia hati: “Havosiko va nukula vati, a ‘Ñala, a Ñala,’ va iñila Vusoma wo kilu, te lika una o linga ocipango ca Isiange o kasi kilu.” Omo liaco, tu sukila oku lilongisa catiamẽla kocipango ca Suku, kuenda oku ci linga. Olondaka evi vi kuete esilivilo lia velapo, momo Yesu wa sokisa omanu vana ka va pokola ku Suku ndolongangala poku va tukula hati, ‘olondingakandu.’—Mateo 7:21-23.

4. Nye Yesu a popia catiamẽla koku linga ocipango ca Suku?

4 Yesu wa tu lungula hati, nda tu yongola oku linga  ocipango ca Suku, tu ka liyaka lovitangi. Eye wa popia hati: “Likolisili oku iñila vombundi ya sukatela, momo ombundi ya sanjavala haiyo ya tanda yi tuala kenyõleho kuenje valua va endelamo; osimbu okuti ombundi ya sukatela haiyo ya likupika oyo onjila yi tuala komuenyo kuenje vañami ñami va yi sanga.” (Mateo 7:13, 14) Ombundi ya sukatela, ale onjila ya sunguluka yoku fendela Suku, yi tuala komuenyo ko pui. Ombundi ya sanjavala, ale onjila ka ya sungulukile yoku fendela Suku, yi tuala kolofa. Pole, Yehova ka yongola okuti, omunu umue o fa. Eye eca komanu vosi epuluvi lioku lilongisa ovina viatiamẽla kokuaye.—2 Petulu 3:9.

ONJILA YA SUNGULUKA YOKU FENDELA SUKU

5. O pondola oku limbuka ndati omanu vana va kasi oku fendela Suku lonjila yimue ya sunguluka?

5 Yesu wa popia hati, tu pondola oku limbuka omanu va kasi oku fendela Suku lonjila ya sunguluka. Tu ci linga poku konomuisa ovina va tava, kuenda evi va linga. Eye wa popia hati: “Vu va limbukila kapako avo.” Noke wa amisako hati: “Uti uwa wima epako liwa.” (Mateo 7:16, 17) Olondaka evi ka vi lomboloka okuti, omanu va kasi oku fendela Suku va li pua. Pole, afendeli va Suku va siata oku likolisilako oku linga eci ca sunguluka. Cilo tu konomuisa ovina vi tu kuatisa oku limbuka omanu va kasi oku fendela Suku lonjila yimue ya sunguluka.

6, 7. Momo lie efendelo liocili li tiamisiwilila Vembimbiliya? Ongangu ya Yesu yi tu longisa nye?

6 Efendelo lietu li sukila oku tiamisiwila Vembimbiliya. Embimbiliya li popia hati: “Ovina viosi via sonehiwa Vovisonehua vi Kola, vi tunda ku Suku kuenje ovio vi silivila koku tu longisa, koku tu pisa, koku suñamisa ovina loku tu pindisila vesunga, okuti omunu wa Suku o loñoloha loku liangiliyila upange wosi uwa.” (2 Timoteo 3:16,  17) Upostolo Paulu wa sonehela Akristão ndoco: “Eci wa tambuli ondaka ya Suku, yina wa yevi kokuetu, ka wa yi taveli ndondaka yomanu, pole, wa yi tambuli ndomo ci kasi ocili okuti ondaka ya Suku.” (1 Va Tesalonike 2:13) Efendelo liocili li tiamisiwila lika kondaka ya Suku okuti, Embimbiliya. Pole, olio ka li tiamisiwila kovisimĩlo viomanu, kovihilahila, ale kocina cimue cikuavo.

7 Ovina viosi Yesu a longisa, vi sangiwa Vondaka ya Suku. (Tanga Yoano 17:17.) Eye wa enda oku tukula Ovisonehua olonjanja viosi. (Mateo 4:4, 7, 10) Afendeli vocili va Suku va kuãi ongangu ya Yesu, kuenda ovina viosi va siata oku longisa vi sangiwa Vembimbiliya.

8. Nye Yesu a tu longisa catiamẽla koku fendela Yehova?

8 Tu sukila oku fendela lika Yehova. Osamo 83:18 yi popia hati: “Oco va limbuka okuti ove, onduko yove Yehova, ove, lika wove, Tõlo koluali luosi.” Yesu wa yonguile okuti omanu va kũlĩha ciwa Suku yocili, kuenda wa va longisa onduko ya Suku. (Tanga Yoano 17:6.) Yesu wa popia hati: “Fendela Yehova, Suku yove, eye lika o vumba.” (Mateo 4:10) Omo okuti tuafendeli va Yehova, tu kuãi ongangu ya Yesu. Tu fendela lika Yehova, tu tukula onduko yaye, tua siata oku longisa komanu vakuavo onduko ya Suku, kuenda ovina a ka tu lingila kovaso yoloneke.

9, 10. Tu lekisa ndati okuti tu lisole pokati?

9 Tu sukila oku lekisa ocisola cocili komanu. Yesu wa longisa olondonge viaye oco vi lisole pokati. (Tanga Yoano 13:35.) Ndaño okuti tua tunda kovitumãlo via litepa, kapata alitepa, tulohuasi ale tulohukũi, pole, ocisola tu likuetele pokati oco ci lekisa okuti tuvamanji. (Va Kolosai 3:14) Omo liaco, ka tu endi kovoyaki, kuenda ka tu pondi omanu. Embimbiliya li popia ndoco: “Omãla va Suku, lomãla  Veliapu va limbukiwa ndoco: Wosi ka lingainga esunga ka tundi ku Suku, ndaño una ka sole manjaye.” Olio liamisako hati: “Tu sukila oku lisola pokati; handeciko Kaini, una wa tunda kondingaĩvi kuenje wa ponda manjaye.”1 Yoano 3:10-12; 4:20, 21.

10 Tu sukila oku pesela otembo yetu, ongusu yetu kuenda ovina tu kuete oco tu likuatise pokati, loku livetiya. (Va Heveru 10:24, 25) Tu “lingi eci ciwa komanu vosi.”Va Galatia 6:10.

11. Momo lie tu tavela okuti Yesu eye onjila yoku kũlĩha Suku?

11 Tu sukila oku pokola ku Yesu, momo eye onjila yoku kũlĩha Suku. Embimbiliya li popia hati: “Vemehi lilu ka muli onduko yikuavo ya eciwa komanu okuti tu popeliwa layo kuenje ka kuli epopelo komunu ukuavo.” (Ovilinga 4:12) Kocipama 5 celivulu lilo, tua lilongisa okuti Yehova wa tuma Yesu oco a ece omuenyo waye ndocisembi komanu vakuepokolo. (Mateo 20:28) Yehova wa nõla Yesu oco a kale Osoma yoluali luosi. Eli olio esunga lieci Embimbiliya li tu sapuilila hati, nda tu yongola oku kala otembo ka yi pui, tu sukila oku pokola ku Yesu.Tanga Yoano 3:36.

12. Momo lie ka tu litengela vopulitika?

12 Tu sukila oku yuvula oku litenga vopulitika. Yesu ka litengele vopulitika. Eci a kala oku talisiwa ohali wa sapuila ku Pilato ombiali yo Roma hati: “Usoma wange ka wa tiamẽlele koluali lulo.” (Tanga Yoano 18:36.) Ndeci Yesu a linga, tua kolela Kusoma wa Suku wo kilu. Omo liaco, kovitumãlo viosi tu sangiwa ka tu litengi vopulitika. Embimbiliya li tu handeleka hati, tu sukila oku pokola “kolombiali” okuti,  omanu va kuete omoko yoku viala. (Va Roma 13:1) Tu pokola kovihandeleko viofeka tu kasi. Ocili okuti, nda ocihandeleko cimue ka ci litava lovihandeleko via Suku, tu sukila oku setukula ongangu yovapostolo va popia vati: “Cetu oku pokola ku Suku ndombiali, komanu hakoko.”Ovilinga 5:29; Marko 12:17.

13. Nye tua siata oku kunda catiamẽla Kusoma wa Suku?

13 Tu tava okuti, Usoma wa Suku owo lika u ka tetulula ovitangi violuali. Yesu wa popia hati, “olondaka evi viwa Viusoma” via laikele oku kundiwila voluali luosi. (Tanga Mateo 24:14.) Ka kuli uviali womanu u pondola oku linga ovina Usoma wa Suku u ka tu lingila. (Osamo 146:3) Yesu wa tu longisa oku likutilila catiamẽla Kusoma wa Suku eci a popia hati: “Usoma wove wiye. Ocipango cove ci lingiwe palo posi, ndeci ci lingiwa kilu.” (Mateo 6:10) Embimbiliya li tu sapuila okuti, Usoma wa Suku u ka kundula ovoviali osi omanu, kuenje u ka “kala muẽle hũ oloneke ka vi pui.”Daniele 2:44.

14. Velie o tava okuti ovo va kasi oku fendela Suku lonjila yimue ya sunguluka?

14 Noke yoku lilongisa atosi tua konomuisa ndeti, lipula ndoco: ‘Velie va tiamisila alongiso avo Vembimbiliya? Velie va siata oku sapuila komanu vakuavo catiamẽla konduko ya Suku? Velie va siata oku likuatela ocisola pokati kuenda va tava okuti Suku wa tuma Yesu oco a tu yovole? Velie ka va siatele oku litenga vopulitika? Velie va kasi oku kunda okuti Usoma wa Suku owo lika u pondola oku tetulula ovitangi vietu?’ Olombangi Via Yehova ovio lika via siata oku ci linga.—Isaya 43:10-12.

NYE O KA LINGA?

15. Nye tu sukila oku linga nda tu yongola okuti Suku o tava efendelo lietu?

15 Omunu ka sukila lika oku tava okuti kuli Suku. Momo, olondele vi tavavo okuti kuli Suku, pole, ka via siatele oku pokola kokuaye. (Tiago 2:19) Oco efendelo lietu li taviwe, ka tu sukila lika oku tava okuti kuli Suku,  pole, tu sukilavo oku linga eci a popia.

16. Momo lie tu sukilila oku yuvula etavo liesanda?

16 Oco Suku a tave efendelo lietu, tu sukila oku yuvula etavo liesanda. Uprofeto Isaya wa soneha ndoco: “Tundi vokati kayo . . . Liyelisi.” (Isaya 52:11; 2 Va Korindo 6:17) Eli olio esunga lieci tu sukilila oku yuvula ovina viosi viatiamẽla kefendelo liesanda.

17, 18. O “Bavulono Yinene” yi lomboloka nye, kuenda momo lie oku tundamo lonjanga ci kuetele esilivilo?

17 Etavo liesanda li lomboloka nye? Etavo limue li tu longisa oku fendela Suku lonjila yimue ka yi likuata Londaka yaye. Embimbiliya li tukula atavo osi esanda hati: “Bavulono Yinene.” (Esituluilo 17:5) Momo lie? Momo, noke Lietande lia pita koloneke via Noha, alongiso alua atavo esanda a fetikila volupale luo Bavulono. Noke, alongiso aco esanda a lisanduila kolonepa viosi violuali. Ovolandu a lekisa okuti, omanu va kala volupale luo Bavulono va enda oku fendela ovimunga violosuku vitatu. Koloneke vilo atavo alua a siatavo oku longisa okuti, Suku Umosi Muvatatu, pole, Embimbiliya li longisa okuti, kuli lika Suku umosi wocili okuti Yehova, kuenda Yesu Omõlaye. (Yoano 17:3) Omanu va kala volupale luo Bavulono va tavelevo kelongiso liokuti, onepa yimue yomunu yamamako oku kala lomuenyo noke yolofa, kuenda onepa yaco yi pondola oku talisiwa ohali vondalu yifelu. Pole, ovina viaco haviociliko.—Tala Etosi 14, 17, kuenda 18 kesulilo lielivulu lilo.

18 Suku wa popia hati, ndopo o ka kundula atavo osi esanda. (Esituluilo 18:8) Ove hẽ wa kũlĩha esunga lieci oku tunda lonjanga vetavo liesanda ci kuetele esilivilo? Yehova o yongola okuti o tunda vetavo liaco, osimbu kuli otembo yoku ci linga.—Esituluilo 18:4.

O pondola oku panga onepa kepata limue voluali luosi, poku vumba Yehova kumue lafendeli vaye

19. Nda wa nõlapo oku vumba Yehova, o ka ku tata ndati?

19 Eci o nõlapo oku tunda vetavo  liesanda oco o vumbe Yehova, vamue pokati kakamba vove ale epata liove pamue ka va kuata elomboloko lionjila wa nõla kuenje va pondola oku ku lambalala. Pole, Yehova lalimue eteke a ka ku yanduluka. Ove o ka panga onepa kepata liomanu va li kuetele ocisola cocili voluali luosi, kuenda o ka kuata elavoko lioku kala otembo ka yi pui voluali luokaliye lua Suku palo posi. (Marko 10:28-30) Ndaño okuti akamba vove kumue lepata liove va kasi oku ku lambalala omo lioku fendela Yehova, citava okuti noke va ka nõlapo oku lilongisa Embimbiliya.

20. Momo lie oku fendela Suku lonjila yimue ya sunguluka ci kuetele esilivilo?

20 Ndopo Suku o ka kundula olondingaĩvi viosi, kuenje, Usoma waye u ka viala oluali luosi. (2 Petulu 3:9, 13) Kotembo yaco omanu va ka kuata esanju lialua! Omanu vosi va ka fendela Yehova ndomo a yongola. Omo liaco, ci kuete esilivilo lia velapo oku nõlapo cilo oku fendela Suku lonjila yimue ya sunguluka..