Skip to content

Skip to table of contents

Olombangi Via Yehova

Select language Umbundu

 OCIPAMA CEKŨI LECELÃLA

Ndi Sukila hẽ Oku Tumbika Omuenyo Wange ku Suku Loku Papatisiwa?

Ndi Sukila hẽ Oku Tumbika Omuenyo Wange ku Suku Loku Papatisiwa?

1. Nye pamue o sima noke yoku lilongisa lutate elivulu lilo?

VOKUENDA kuelilongiso liove velivulu lilo, wa lilongisa ovina vialua viocili viatiamẽla Kembimbiliya ndeci: Ohuminyo ya Suku yoku kuata omuenyo ko pui, ekalo liomanu va fa, kuenda elavoko liepinduko. (Ukundi 9:5; Luka 23:43; Yoano 5:28, 29; Esituluilo 21:3, 4) Citava okuti wa fetika oku endaenda kolohongele Violombangi Via Yehova, kuenje o tava okuti vi kuãi efendelo liocili. (Yoano 13:35) Citavavo okuti wa fetika oku kuata ukamba la Yehova,  kuenje wa nõlapo oku u vumba. Pamue o sima ndoco: ‘Nye ndi sukila oku linga cilo oco ndi vumbe Suku?’

2. Momo lie ulume umue wo kofeka yo Etiopia a lekisila onjongole yoku papatisiwa?

2 Ulume umue wa kala kotembo ya Yesu, wa kuatelevo ocisimĩlo ca tukuiwa ndeti. Noke liotembo yimue tunde eci Yesu a pinduiwa, ondonge yimue ya Yesu o tukuiwa hati Filipu, wa kundila ulume waco. Filipu wa eca uvangi wokuti, Yesu eye Mesiya. Omo liaco, ulume wo kofeka yo Etiopia wa vetiyiwa lovina a lilongisa, kuenje wa popia hati: “Ovava ya; nye ci nateka oku papatisiwa?”Ovilinga 8:26-36.

3. (a) Ocihandeleko cipi Yesu a ecele kolondonge viaye? (b) Omunu o sukila oku papatisiwa ndati?

3 Embimbiliya li longisa okuti, nda o yongola oku vumba Yehova o sukila oku papatisiwa. Yesu wa sapuila kolondonge viaye hati: ‘Ka longisi omanu vo kolofeka viosi oco va linge olondonge, va papatisi.’ (Mateo 28:19) Yesu wa tu sila ongangu yiwa eci a papatisiwa. Momo, ka vo pesilile ovava vutue eci a papatisiwa, pole, wa iñisiwa vovava. (Mateo 3:16) Koloneke vilo, nda omunu umue o papatisiwa, o sukilavo oku iñisiwa vovava.

4. Epapatiso liove li lekisa nye komanu?

4 Eci o papatisiwa o lekisa komanu vakuavo okuti, o yongola oku kala ekamba lia Suku, kuenda o yongola oku u vumba. (Osamo 40:7, 8) Omo liaco, o pondola oku lipula ndoco: ‘Nye ndi sukila oku linga oco ndi papatisiwe?’

UKŨLĨHĨSO KUENDA EKOLELO

5. (a) Nye o sukila oku linga tete osimbu kua papatisiwile? (b) Momo lie olohongele Viakristão vi kuetele esilivilo?

5 Osimbu kua papatisiwile handi, o sukila oku kũlĩha Yehova kuenda Yesu. Ove wa fetika  ale oku ci linga poku lilongisa Embimbiliya. (Tanga Yoano 17:3.) Pole, hacoko lika o sukila oku linga. Embimbiliya li popia okuti o sukila oku “yukisua lukũlĩhĩso wa suapo” wocipango ca Yehova. (Va Kolosai 1:9) Olohongele Violombangi Via Yehova vi ka ku kuatisa oku kuata ukamba la Yehova. Eli olio esunga lieci o sukilila oku endaenda kolohongele olonjanja viosi.—Va Heveru 10:24, 25.

Osimbu kua papatisiwile o sukila oku lilongisa Embimbiliya

6. Ovina vipi viatiamẽla Kembimbiliya o sukila oku kũlĩha osimbu kua papatisiwile?

6 Yehova ka kevelela okuti ove o kũlĩha ovina viosi vi kasi Vembimbiliya osimbu kua papatisiwile. Eye ka kevelile okuti ulume wo kofeka yo Etiopia o kũlĩha ovina viosi osimbu ka papatisiwile. (Ovilinga 8:30, 31) Momo, tu ka amamako oku lilongisa ovina viatiamẽla ku Suku otembo ka yi pui. (Ukundi 3:11) Pole, oco o papatisiwe o sukila oku kũlĩha alongiso Embimbiliya, kuenda oku tava kovina viaco.—Va Heveru 5:12.

7. Elilongiso liove Liembimbiliya lia ku kuatisa ndati?

7 Embimbiliya li popia hati: “Oku sanjuisa Suku ka ku tẽliwa te lekolelo.” (Va Heveru 11:6) Osimbu kua papatisiwile o sukila oku lekisa ekolelo. Embimbiliya li tu sapuila okuti kosimbu omanu vamue va kala volupale luo Korindo, eci va yeva ovina olondonge via Yesu via longisa, va vetiyiwa oku “tava, kuenje va papatisiwa.” (Ovilinga 18:8) Cimuamue haico o sukila oku linga okuti, elilongiso liove Liembimbiliya li ku kuatisa oku lekisa ekolelo kolohuminyo via Suku, kuenda kunene wocisembi ca Yesu okuti, ci pondola oku tu yovola kekandu kuenda kolofa.—Yehosua 23:14; Ovilinga 4:12; 2 Timoteo 3:16, 17.

SAPELA LOMANU VAKUAVO CATIAMẼLA KOCILI CEMBIMBILIYA

8. Nye ci pondola oku ku vetiya oku sapuila komanu vakuavo catiamẽla kovina o kasi oku lilongisa?

8 Osimbu amamako oku lilongisa ovina vialua viatiamẽla Kembimbiliya loku limbuka ndomo vi ku  kuatisa komuenyo wove, ekolelo liove li pamisiwa. Noke o ka kuata onjongole yoku sapuila komanu vakuavo catiamẽla kovina o kasi oku lilongisa. (Yeremiya 20:9; 2 Va Korindo 4:13) Komanu vapi o sukila oku sapuila ovina wa lilongisa?

Ekolelo li ku vetiya oku sapuila komanu vakuavo catiamẽla kovina wa lilongisa

9, 10. (a) Komanu vapi o sukila oku sapuila ovina wa lilongisa? (b) Nye o sukila oku linga nda o yongola oku kundila kumosi la vamanji vekongelo?

9 Citava okuti ovina o kasi oku lilongisa, o yongola oku vi sapuila kepata liove, kakamba vove, komanu va lisungue love, ale komanu o talavaya lavo kupange woku sanda eteku. Oku linga ovina viaco ciwa, pole o sukila oku lekisa esumbilo kuenda ocisola. Noke o ka fetika oku kundila kumosi la vamanji vekongelo. Eci o limbuka okuti wa lipongiya, o pondola oku sapela la manji o kasi oku ku longisa Embimbiliya poku u sapuila hati, o yongolavo oku endaenda kupange woku kunda la vamanji vekongelo. Nda ulongisi wove wa limbuka okuti, ove wa lipongiya ciwa kuenda wa kapako olonumbi Viembimbiliya, akulu vavali vekongelo va ka linga esokiyo lioku sapela love kumue lulongisi wove.

10 Nye akulu vekongelo va ka linga vesokiyo liaco? Akulu vekongelo va ka sapela love oco va limbuke nda o kuete elomboloko liovina wa lilongisa, o tava kalongiso Embimbiliya, o pokola kovina viaco, kuenda o yongola oku linga Ombangi ya Yehova. Ivaluka okuti, akulu vekongelo va kapako vamanji vosi vekongelo oku kongelamo ove. Omo liaco, ku ka kuate usumba woku sapela lavo. (Ovilinga 20:28; 1 Petulu 5:2, 3) Eci akulu vekongelo va mala oku sapela love, va ka ku sapuila nda citava oku fetika oku kundila kumosi la vamanji vekongelo.

11. Momo lie ci kuetele esilivilo oku linga apongoloko osimbu kua fetikile oku kundila kumosi la vamanji vekongelo?

11 Akulu vekongelo pamue va ku sapuila okuti, o sukila  oku linga apongoloko amue osimbu kua fetikile oku kundila kumosi la vamanji vekongelo. Momo lie ci kuetele esilivilo oku linga apongoloko aco? Momo, eci tu sapela lomanu vakuavo catiamẽla ku Yehova Suku tu lekisa okuti tulonumiwa viaye, kuenda tu sukila oku ambata omuenyo weca esivayo kokuaye.—1 Va Korindo 6:9, 10; Va Galatia 5:19-21.

LIKEKEMBELI KUENDA PONGOLOKI

12. Momo lie omanu vosi va sukilila oku likekembela?

12 Kuli ocina cikuavo o sukila oku linga osimbu kua papatisiwile handi. Upostolo Petulu wa popia hati: “Likekembeli, pongoloki oco akandu ene a ecelue.” (Ovilinga 3:19) Oku likekembela ku lomboloka nye? Ku lomboloka oku pinga ongecelo omo liocina cimue ka ca sungulukile tua linga. Nda wa kuatele ocituwa coku linga ukahonga, o sukila oku likekembela. Ndaño okuti pamue wa siata oku likolisilako oku linga ovina via sunguluka, pole, o sukila oku likekembela. Momo, vosi yetu tua siata oku lueya, kuenda tu sukila oku pinga ongecelo ku Suku.—Va Roma 3:23; 5:1.

13. Oku ‘pongoloka’ ku lomboloka nye?

13 Anga hẽ o sukila lika oku popia hati nda likekembela omo liovina vĩvi nda linga? Sio. Petulu wa popia hati, o sukilavo oku ‘pongoloka.’ Eci ci lomboloka okuti, o sukila oku yuvula ovituwa viosi vĩvi, kuenje, o fetika oku linga ovina via sunguluka. Sokolola ndeci okuti, o kasi oku enda kocitumãlo cimue onjanja yatete. Noke liotembo yimue, o limbuka okuti o kasi oku enda lonjila yikuavo. Nye o sukila oku linga? O sukila oku talama kuenda oku ñualapo oco ende lonjila o yongola. Cimuamue haico o sukila oku linga okuti, osimbu amamako oku lilongisa Embimbiliya, pamue o limbuka okuti o kuete ovituwa vimue o  sukila oku siapo. Oku lekisa onjongole yoku ‘pongoloka,’ ci lomboloka oku siapo ovituwa vĩvi, kuenje o fetika oku linga ovina via sunguluka.

LITUMBIKA KU SUKU

Wa likuminya hẽ ku Yehova okuti eye lika o vumba?

14. O litumbika ndati ku Suku?

14 Ocina cikuavo ci kuete esilivilo lia velapo ove o sukila oku linga osimbu kua papatisiwile, oku litumbika ku Yehova. O litumbika ku Yehova eci o linga ohutililo yoku likuminya okuti, eye lika o fendela. Kuenje, o lekisa okuti oku linga ocipango caye oco ocina ca velapo komuenyo wove.Esinumuĩlo 6:15.

15, 16. Nye ci vetiya omunu oku litumbika ku Suku?

15 Oku likuminya oku vumba lika Yehova ku sokisiwa loku likuminya omunu umue ove o sole okuti, o kala laye vokuenda kuomuenyo wove wosi. Sokolola ndeci okuti, ulume umue o kasi oku namulãla lukãi umue. Osimbu ulume amamako oku kũlĩha ciwa ukãi waco, ocisola o kuetele ci livokiya, kuenje cu vetiya oku tokekisa laye olohuela. Ndaño okuti ka ca lelukile oku nõla onjila yaco, pole ulume o lekisa onjongole yoku tava ocikele caco omo liocisola o kuetele.

16 Osimbu amamako oku lilongisa eci catiamẽla ku Yehova, ocisola cove kokuaye ci livokiya, kuenje o likolisilako oku linga ovina viwa oco u vumbe. Kuenje, vohutililo o linga o likuminya okuti, eye lika o vumba. Embimbiliya li popia hati, omunu wosi o yongola oku kuama Yesu, “ka ka lisokolole vali eye muẽle.” (Marko 8:34) Olondaka evi vi lomboloka nye? Vi lomboloka okuti epokolo liove ku Yehova olio li kuete esilivilo lia velapo komuenyo wove. Momo, ovina Yehova a yongola ovio vi kuete esilivilo lia velapo okuti, olonjongole viove kumue lovimãho viove vi sule.—Tanga 1 Petulu 4:2.

KU KA KUATE USUMBA OMO LIOKU LUEYA

17. Momo lie omanu vamue ka va litumbikila ku Yehova?

17 Omanu vamue ka va siatele oku litumbika ku Yehova omo liusumba wokuti, ka va pondola oku tẽlisa ohuminyo va linga yoku u vumba. Ovo ka va yongola oku sumuisa  Yehova, ale pamue va sima okuti, Yehova ka kapiko ovina va linga nda ka va litumbikile kokuaye.

18. Nye ci pondola oku ku kuatisa oco o yule usumba woku linga ocina cimue ci sumuisa Yehova?

18 Ocisola o kuetele Yehova ci ku kuatisa oku yula usumba woku u sumuisa. Omo okuti u kuetele ocisola, o likolisilako oku tẽlisa ohuminyo wa linga kokuaye. (Ukundi 5:4; Va Kolosai 1:10) Ku kuata ovisimĩlo viokuti, ka ca lelukile oku linga ocipango ca Yehova. Upostolo Yoano wa soneha ndoco: “Eci oco ci lomboloka ocisola ca Suku okuti, tu pokola kovihandeleko viaye; puãi ovihandeleko viaye ka vi lemi.”—1 Yoano 5:3.

19. Momo lie ku sukilila oku kuata usumba woku litumbika ku Yehova?

19 Oco o litumbike ku Yehova ku sukila oku li pua. Eye ka kevelela okuti tu linga ovina ka tu tẽla. (Osamo 103:14) Yehova o ku kuatisa oku linga eci ca sunguluka. (Isaya 41:10) Kolela ku Yehova lutima wove wosi, kuenje eye “o suñamisa olonjila viove.”—Olosapo 3:5, 6.

OKU SAPULA ONDAKA YI TUALA KEPOPELO

20. Nye o sukila oku linga noke yoku litumbika ku Suku?

20 O sima hẽ okuti wa lipongiya oco o litumbike ku Yehova? Noke yoku litumbika ku Yehova, o lekisa okuti wa lipongiya oco ece enanga likuavo. O sukila oku papatisiwa.

21, 22. O pondola oku linga ndati ‘esapulo liondaka’ yekolelo liove?

21 Mitavaso yakulu vekongelo o sukila oku kũlĩha okuti  wa litumbika ku Yehova kuenda o yongola oku papatisiwa. Noke, eye o ka linga esokiyo liokuti, akulu vamue vekongelo va ka pitulule love alongiso amue Embimbiliya. Nda akulu vekongelo va limbuka okuti wa lipongiya, va ka ku sapuila okuti, o ka papatisiwa kohongele yimbo ale yofeka Yolombangi Via Yehova. Kohongele yaco, ku ka lingiwa ohundo yi situlula elomboloko liepapatiso. Manji  o linga ohundo, o ka linga apulilo avali a leluka ku vana va lipongiya oco va papatisiwe. Poku tambulula apulilo aco, ove o lekisa okuti o ka “sapula ondaka” yekolelo liove.—Va Roma 10:10.

22 Noke, o ka papatisiwa. Poku ci linga, o ka iñisiwa vovava. Epapatiso li ka lekisa  komanu vosi okuti, wa litumbika ku Yehova, kuenda cilo wa linga Ombangi ya Yehova.

ELOMBOLOKO LIEPAPATISO LIOVE

23. Oku papatisiwa “vonduko ya Tate la Mõla kuenda espiritu sandu” ci lomboloka nye?

23 Yesu wa popia hati, olondonge viaye via sukilile oku papatisiwa “vonduko ya Tate la Mõla kuenda espiritu sandu.” (Tanga Mateo 28:19.) Eci ci lomboloka nye? Ci lomboloka okuti, ove wa kapako omoko ya Yehova locikele Yesu a kuete vocipango ca Yehova, kuenda ndomo espiritu sandu lia siata oku kuatisa koku tẽlisiwa kuocipango caye.—Osamo 83:18; Mateo 28:18; Va Galatia 5:22, 23; 2 Petulu 1:21.

Eci o papatisiwa o lekisa okuti o yongola oku linga ocipango ca Yehova Suku

24, 25. (a) Epapatiso li lomboloka nye? (b) Nye tu ka konomuisa vocipama ca sulako celivulu lilo?

24 Epapatiso li lomboloka ocina cimue ci kuete esilivilo lia velapo. Eci iñisiwa vovava, ci lomboloka okuti, wa siapo ovituwa vĩvi wa enda oku linga. Eci o tunda vovava ci lekisa okuti, o ka fetika omuenyo wokaliye poku linga ocipango ca Suku. Vepuluvi liaco o lekisa okuti, wa fetika oku vumba Yehova. Ivaluka okuti, kua litumbikile komunu umue, kocisoko cimue, ale kupange umue. Pole, wa tumbika omuenyo wove ku Yehova.

25 Elitumbiko liove li ku kuatisa oku kuata ukamba la Suku. (Osamo 25:14) Pole, ka ci lomboloka okuti omunu o ka popeliwa omo lioku papatisiwa. Upostolo Paulu wa soneha ndoco: “Kolisiko oku linga eci ci koka epopelo liene lusumba loku luluma.” (Va Filipoi 2:12) Epapatiso olio efetikilo. Pole, tu pondola oku kuata ndati ukamba la Yehova? Ocipama ca sulako celivulu lilo ci ka tambulula epulilo eli.