Skip to content

Skip to table of contents

Olombangi Via Yehova

Select language Umbundu

 EPULILO 8

Nye Ndi Sukila Oku Kũlĩha Catiamẽla Koku Yonjiwa Loku Pekeliwa Lomunu Umue

Nye Ndi Sukila Oku Kũlĩha Catiamẽla Koku Yonjiwa Loku Pekeliwa Lomunu Umue

ESUNGA LIECI OKU SOKOLOLA EPULILO ELI CI KUETELE ESILIVILO

Anyamo osi omanu valua va siata oku yonjiwa ale oku pekeliwa la umue. Amalẽhe ovo va siata oku liyaka calua lovitangi viaco.

NYE O SUKILA OKU LINGA?

Ufeko umue o tukuiwa hati, Annette, wa kuatiwile lulume umue. Kuenje, osimbu ka limbukile ocitangi caco, wa mola okuti wa kupukila posi. Eye wa popia hati: “Nda seteka oku linga ovina vialua oco ndi li teyuile. Nda kaluka, pole, ondaka yange ka ya yevalele. Nda leñula ulume waco, ndo tipula, kuenda ndo suya. Pole, nda limbuka okuti, o kasi oku ndi toma lomoko. Noke, sia kuatele ongusu.”

Nda ove wa pitile locitangi caco nda nye wa linga?

SOKOLOLA LUTATE!

Citava okuti o kuete ocituwa coku lavulula okuti, o yuvula oku enda likaliove kuteke. Ndaño wa siata oku lavulula, pole, citava okuti, o pita lovitangi vimue. Embimbiliya li popia hati: “Okuyula koku litunda ka ku kasi kukualupesi, kuenda okuyula vocilunga ka ku kasi kukualohõlo, ndaño okulia hakuvakualondungeko, ndaño ipako haviava valungukako; ndaño omangu hayava valoñolõhãko, puãi cosi ciya ño ci veta ño.”—Ukundi 9:11.

Omanu vamue va siata oku kuatiwa la vana ka va kũlĩhĩle, ndeci ca pita lufeko umue o tukuiwa hati, Annette. Omanu vakuavo va siata oku kuatiwa la vana va kũlĩha, ale la umue ukuepata liavo. Ufeko umue o tukuiwa hati Natalie, eci a kuata ekũi kanyamo, wa kuatiwile lukuenje umue wa kala ocipepi lonjo yavo, kuenje wa lipekela laye. Eye wa popia hati: “Omo okuti nda kuata usumba walua, kuenda osõi, sia kuatele utõi woku sapuila ocitangi caco komunu umue.”

 Ku Kuete Ekolelo

Umalẽhe Annette wa tukuiwa ndeti, toke cilo o kasi oku liyaka lovisimĩlo viokuti, eye o kuete eko, omo licitangi a pita laco. Eye wa popia hati: “Toke cilo, nda siata oku sokolola ocitangi nda pita laco kuteke waco, kuenda ci kasi ndofilme yimue omunu a tala okuti, ka tẽla oku ivala ovina a mola. Kuenje, nda siata oku kuata ovisimĩlo viokuti, nda sukilile oku linga ovina vikuavo oco ndi liteyuile. Pole, eci va ndi toma omoko, nda kuata usumba walua, kuenje, sia tẽlele oku linga cimue oco ndi liteyuile. Kuenje, sia kuatele ongusu yoku yaka. Ndi sima okuti, nda sukilile oku linga cimue oco ndi liteyuile.”

Umalẽhe ukuavo o tukuiwa hati Natalie, wa siatavo oku liyaka lovisimĩlo viokuti, eye o kuete eko omo liocitangi a pita laco. Eye wa popia hati: “Nda sukilile oku lavulula. Momo, olonjali viange via enda oku ndi sapuila hati, nda sukilile lika oku papalela vokololo nda ndi kasi la manjange. Omo okuti sia pokuile, nda limbuka okuti, nda eca epuluvi kukuenje tu lisungue laye, kuenje wa lipekela lame. Ovina viaco via kokela ovitangi kepata liange, kuenje, ndi sima okuti, ame ndi kuete eko omo liovitangi va kasi oku liyaka lavio. Ovina viaco via ndi nenela esumuo lialua.”

Nda o kasi oku liyakavo lovisimĩlo viokuti ove o kuete eko omo liocitangi cimue, ivaluka okuti, nda omunu umue o kuatiwa, kuenje va lipekela laye, ka ci lomboloka okuti, wa kuata onjongole yoku pita locitangi caco.  Omanu vamue va siata oku sima okuti, ca sunguluka oku pita locitangi caco. Pamue va popia vati, alume ovo va kuete ocituwa coku lipekela lakãi. Olonjanja vikuavo va popia vati, omunu va lipekela laye, eye wa ecelela oku pita locitangi caco. Pole, lomue omunu o sesamẽla oku kuatiwa locimãho coku lipekela laye. Nda omunu umue wa ku kisika oku lipekela love, ivaluka okuti, ku kuete eko!

Pamue ove o sokolola ndoco: ‘Oku vangula ovina viatiamẽla kocitangi caco, ca leluka, pole, ka ca lelukile oku tava kondaka yaco!’ Omanu vamue ka va siatele oku lombolola ovitangi va pita lavio, kuenje, va tala ohali omo liovisimĩlo vioku livetela evelo, kuenda ovina vikuavo ka via sungulukile. Helie o kuata onima nda kua sapuilileko ondaka yaco komunu umue? Ove hẽ, o kuata onima yaco, ale omunu wa lipekela love? Ocina ca velapo o sukila oku linga, oku sapela lomunu umue catiamẽla kocitangi caco.

OKU SAPUILAKO OMUNU UMUE CI KUATISA

Yovi wa liyaka locitangi cimue. Eci a liyaka lesumuo omo liocitangi caco wa popia hati: ‘Omo okuti vutima mua sanya, oco mopia.’ (Yovi 10:1) Oku sapela lomunu umue ove wa kolela catiamẽla kocitangi o kasi oku liyaka laco, ci ku kuatisa oku liyaka laco. Ci pondolavo oku ku kuatisa oku yuvula ovisimĩlo viokuti, ove o kuete eko.

Esumuo liove li pondola oku kala ndocikuata cimue ci lema okuti, ku tẽla oku cambata likaliove. Momo lie ku sapelela lomunu umue wa kolela oco a ku kuatise?

Omo okuti Annette wa kuama onumbi ya tukuiwa ndeti, wa kuatisiwa calua. Eye wa popia hati: “Nda sapela lekamba liange. Kuenje, wa ndi vetiya oco ndi sapele lakulu vavali vekongelo. Kuenje, nda va lomboluila ocitangi cange. Noke, va sapela lame olonjanja vialua, kuenje, va ndi lomboluila olondaka nda yonguile oku yeva viokuti: Si kuete eko liocitangi nda pita laco.”

Umalẽhe Natalie wa sapela lolonjali viaye catiamẽla kukuenje wa lipekela laye. Eye wa popia hati: “Olonjali via ndi kuatisa calua, kuenda via ndi vetiya oku sapela ovina viatiamẽla kocitangi nda pita laco. Elembeleko liavo lia ndi kuatisa oku yuvula onyeño kuenda esumuo.”

Ocina cikuavo ca kuatisa Natalie, oku likutilila olonjanja viosi. Eye wa popia hati: “Oku sapela la Yehova ca ndi kuatisa calua. Ca piãla enene kapuluvi ana okuti, si yongola oku sapela lomunu umue catiamẽla kondaka yaco. Eci ndi likutilila, ndi situlula ovina viosi vi kasi vutima wange. Kuenje ndi tulumuha, kuenda ndi kuata ombembua.”

Ndaño okuti ove wa sumua omo liocitangi caco, pole ivalua okuti, ku keya ‘otembo yoku sakula.’ (Ukundi 3:3) Osimbu olavoka o tembo yaco, linga ovina viecelela oku kuata uhayele ketimba, kuenda ovisimĩlo via sunguluka. Sokiya otembo yoku puyuka, kuenda amamako oku kolela ku Yehova Suku yelembeleko.—2 Va Korindo 1:3, 4.

 ULANDU WA LOÑA KAFEKO VA KUETE UTUNGA WOKU NAMULÃLA

Nda ukuenje o kasi oku namulãla love oku kisika oku linga ovina Suku a nyãle, o sukila oku u sapuila ndoco: “Si yongola!” O pondolavo oku popia hati: “Ku ka ndi lambe!” Yuvula ovisimĩlo viokuti, nda wo sapuila olondaka viaco, o liwekapo oku namulãla love. Nda ukuenje waco wa liwekapo oku namulãla love omo liolondaka wo sapuila, ci lekisa okuti, ka kuete onjongole yoku amamako oku namulãla love. Ove o sesamẽla oku namulãla lukuenje umue o kuete olondunge okuti, o sumbila etimba liove, kuenda o tava kovisimĩlo viove.

NDI KASI HẼ OKU YONJIWA OCO VA LIPEKELE LAME?

Ufeko umue o tukuiwa hati Coretta, wa popia hati: “Eci nda kala oku lilongisila kosikola ya pita pokati, akamba vange vo kosikola va enda oku nala osutiãu yange, loku ndi sapuila olondaka vimue ka via sungulukile. Momo va enda oku popia vati, nda nda tava oku lipekela lavo, ndi kuata ekalo liwa komuenyo.”

Ove o sima okuti, akuenje vaco va enda oku linga ovina vimue ndeci

  1. Oku mangala

  2. Oku vetiya ufeko oco va namulãle laye

  3. Oku yonja ufeko oco a lipekele laye

Ufeko ukuavo o tukuiwa hati Candice, wa popia hati: “Eteke limue eci nda kala oku endela vokalela, ukuenje umue wa fetika oku ndi sisita, loku vangula ovina vimue ka via sungulukile. Omo liaco, ndo veta kokuokuo kuaco, kuenda ndo sapuila oco a liwekepo oku ndi sisita. Eci a vanja kokuange wa sima okuti, si kuete olondunge.”

Ove o sima okuti, ukuenje waco wa kala:

  1. Oku mangala

  2. Oku vetiya ufeko oco a namulãle laye

  3. Oku yonja ufeko oco a lipekele laye

Ufeko umue o tukuiwa hati Bethany, wa popia hati: “Unyamo wa pita, ukuenje umue wa enda oku ndi sapuila hati, o ndi sole calua, kuenda o yongola oku ka ñuala ñuala lame. Pole, sia tavele kelaleko liaye. Olonjanja vimue wa enda oku ndi sisita vokuokuo. Ndaño ndo lungula oco a liwekepo oku ndi sisita, pole, wamamako oku ci linga. Eteke limue eci nda kala oku itika olosapato viange, wa pita ponele yange, kuenje, wa ndi veta kombunda.”

Ove o sima okuti, ukuenje waco wa kala:

  1. Oku mangala

  2. Oku vetiya ufeko oco va namulãle laye

  3. Oku yonja ufeko oco a lipekele laye

Pokati kovolandu a tukuiwa ndeti, etambululo liocili li sangiwa koletala C.

Momo lie oku yonja ufeko oco va lipekele laye kua li tepela loku mangala, ale oku vetiya ufeko oco va namulãle laye?

Oku yonjilwa kuaco, mua kongela oku kisika omunu, ndaño ka kuete onjongole yoku ci linga

Oku yonja omunu kua siata oku nene ovitangi vialua. Omanu va kuete ocituwa caco, pamue va kisika una va yonja, toke eci va lipekela laye.