Skip to content

Skip to table of contents

Olombangi Via Yehova

Select language Umbundu

 EPULILO 1

Ame Elie?

Ame Elie?

ESUNGA LIECI OKU SOKOLOLA EPULILO ELI CI KUETELE ESILIVILO

Oku kũlĩha ciwa ekalo liove, ci ku kuatisa oku nõla onjila o sukila oku kuama, eci o vetiyiwa oku linga ovina ka via sungulukile.

NYE O SUKILA OKU LINGA?

Sokolola ulandu u kuãimo ndoco: Pa pita lika ekũi kakukutu tunde eci ufeko umue o tukuiwa hati, Karen, a pitĩla kocipito cimue. Noke, o yeva ondaka yimue a kũlĩha yi popia hati:

“Nye o kasi oku linga kocipito cilo likaliove?”

Eci Karen a ñualapo, wa limbuka okuti, ekamba liaye Jessica. Pole, o kuete peka olongalafa vivali vioserveja via yuluka. Noke, Jessica eca ongalafa yimue ku Karen, kuenje, u sapuila hati: “Tambula ño. Ove ukulu. O kuete utunga woku linga ovina vi nena esanju!”

Noke Karen o sokolola lutate, momo ka yongola oku tambula oserveja. Pole, ka yongola okuti ekamba liaye li limbuka okuti, ka kapeleko ocisimĩlo caye. Momo, Jessica ekamba liaye, kuenda ufeko umue “uwa.” Nda Jessica o kasi oku nyua ovina vi koluisa ka cu nenela ovitangi. Noke, Karen o sima ndoco: ‘Citava okuti ndi nyua oserveja yimosi. Momo, oku ci linga, ka ci sokisiwa loku nyua olodroga.’

Nda ulandu wa Karen wa pitile love, nye nda wa linga?

SOKOLOLA LUTATE!

Oco o nõle onjila ya sunguluka poku liyaka locitangi ca tukuiwa ndeti, o sukila oku limbuka ekalo liove. Momo, li ku kuatisa oku kũlĩha ndomo wa tuwa, kuenda ovina wa kapako. Oku limbuka ekalo liove ku sokisiwa locimalẽho cimue ci ku kuatisa oku lava ekalo liove. Kuenje, ku ecelela okuti, akamba vove ovo va nõla onjila o sukila oku kuama.—1 Va Korindo 9:26, 27.

Ove hẽ o pondola oku kuata utõi woku ci linga? Apulilo a kuãimo, a pondola oku ku kuatisa oku ci linga.

 1 OVINA VIPI NDA VELISAPO?

Nda omunu wa kũlĩha ciwa ekalo liaye, o sokisiwa luti u kuete olombombo via pama okuti, via kakatela posi. Momo, ndaño kueya ofela yalua uti waco ka u teka

ULANDU WEMBIMBILIYA: Upostolo Paulu wa popia hati: “Ndaño sia loñolohele koku vangula, pole, kukũlĩhĩso [nda loñoloha].” (2 Va Korindo 11:6) Paulu ka ecelele okuti, olondaka ka via sungulukile omanu va enda oku popia, vi tepulula ekolelo liaye. Omo okuti wa kuatele ukũlĩhĩso Wembimbiliya, wa tẽla oku pandikisa lekolelo, eci omanu vakuavo va enda oku u popia ovina ka via sungulukile.—2 Va Korindo 10:10; 11:5.

KŨLĨHĨSA CIWA EKALO LIOVE: Ponepa yilo, sonehapo uloño umue, ale ocina cimue o tẽla oku linga.

Ocituwa cipi ca velapo o kuete? Ci lombolola. (Ove hẽ o kuete ocisola? Ukuacali? Wa koleliwa? Ukualondunge?)

2 OVISIMĨLO VIPI KA VIA SUNGULUKILE NDA SIATA OKU KUATA?

Ovisimĩlo ka via sungulukile, vi sokisiwa longuyu okuti, yi pondola oku li sanduila kocikuata cimue, kuenje ci nyolẽha. Nda wa ecelela oku yapuisiwa lovisimĩlo ka via sungulukile, vi pondola oku nyõla ekalo liove.

ULANDU WEMBIMBILIYA: Paulu wa kũlĩhĩle okuti, wa enda oku kuata ovisimĩlo ka via sungulukile. Omo liaco, wa soneha ndoco: “Vutima wange ndi sanjukila ocihandeleko ca Suku, puãi ndete ocihandeleko cikuavo vetimba liange [okuti,] ci liyaka locihandeleko cutima wange.”—Va Roma 7:22, 23.

KŨLĨHĨSA EKALO LIOVE: Ovisimĩlo vipi ka via sungulukile o sukila oku liyaka lavio?

 3 OVIMÃHO VIPI NDI KUETE?

Ove hẽ o tava oku londa vekãlu limue, kuenje, o pinga komunu o liendisa oco a ñuale ñuale pocitumãlo cimuamue toke eci ongasolina yi puamo? Oku ci linga uveke, kuenda ci nena ovitangi!

Ulandu owu u tu longisa okuti, omunu wa kũlĩha kocitumãlo a yongola oku enda, ka ñuale ñuala pocitumãlo cimuamue okuti, ka limbuka oku a loña. Nda ove wa kũlĩha kocitumãlo o yongola oku enda, ci ku kuatisa oku limbuka onjila o sukila oku kuama oco o pitĩle kocitumãlo caco.

ULANDU WEMBIMBILIYA: Paulu wa soneha ndoco: “Si yoloka loku tatãla.” (1 Va Korindo 9:26) Paulu ka kuatele owesi woku linga ovina vimue komuenyo waye. Pole, wa enda oku linga esokiyo liovina a yongola oku linga, kuenda oku tẽlisa esokiyo liaco.—Va Filipoi 3:12-14.

KŨLĨHĨSA EKALO LIOVE: Ponepa yilo, sonehapo ovimãho vitatu o yongola oku tẽlisa vokuenda kunyamo umosi.

4 OVINA VIPI NDI TAVA?

Oku kũlĩha ovina o tẽla oku linga, kuenda ovina wa velisapo, ci ku kuatisa oku kuata utõi.

Nda omunu ka kũlĩhĩle ovina a tava, ka limbuka eci a yongola oku linga. Ndeci ci pita leleñalo okuti, “li pongolola avala aye,” umalẽhe o pondolavo oku kuama ovituwa viakamba vaye. Omunu o linga ovina viaco, ka tẽla oku limbuka ekalo liaye.

Nda ovilinga viove vi likuata lonjila o yongola oku kuama, ci ku kuatisa oku kuata ekalo liwa. Kuenje, kuecelela oku yapuisiwa lovituwa viomanu vakuavo.

ULANDU WEMBIMBILIYA: Eci uprofeto Daniele a kala umalẽhe, wa tepiwile kepata liaye. Pole, ‘wa nõlelepo’ oku pokola kolonumbi via Yehova. (Daniele 1:8) Poku ci linga, co kuatisa oku amamako oku kakatela konjila a nõlelepo.

KŨLĨHĨSA EKALO LIOVE: Onjila yipi o yongola oku kuama? Ove hẽ o tava okuti kuli Suku? Momo lie o tavela? Uvangi upi u ku vetiya oku tava okuti, kuli Suku?

O tava hẽ okuti oku pokola kolonumbi via Suku oco ci kuete esilivilo lia velapo kokuove? Momo lie?

Ove hẽ o yongola oku kala nduti umue wa pama okuti, ndaño kueya ofela yalua ka u teka, ale o kala ndemẽla lia kukuta okuti, ca leluka oku patuka vuti, kuenje liambatiwa lofela? Nda wa kũlĩha ovina o yongola oku linga, o kala nduti wa tukuiwa ndeti okuti, u kuete olombombo via pama. Nda wa ci linga, ci ku kuatisa oku eca etambululo kepulilo liokuti: Ame elie?