Skip to content

Skip to table of contents

Olombangi Via Yehova

Select language Umbundu

Oku Sulako

Oku Sulako

‘Setukuli vana okuti omo liekolelo kuenda epandi, va piñala olohuminyo.’—HEVEREU 6:12.

1, 2. Momo lie ci kuetele esilivilo oku pamisa ekolelo lietu cilo? Tukula ocindekaise cimue.

EKOLELO. Ondaka yaco ya fina, haiyo yi vetiya calua. Pole, eci tu yeva ondaka yaco, tu sukila oku sokolola ondaka yikuavo yokuti: “Onjanga!” Nda ka tu kuete ekolelo, tu sukila oku li sandiliya lonjanga. Pole, nda tu kuete ale ekolelo, tu sukila oku li teyuila lonjanga kuenda oku li tekula ciwa. Momo lie?

2 Sokolola ndu okuti o kasi oku pita vekalasoko limue linene. Ove o sukila ovava. Eci o sanga ovava amue, o sukila oku a teyuila kutanya oco ka a ka takate. Noke o yukisa ocikuata cove lovava aco okuti a pondola oku ku kuatisa toke eci o pitĩla oku wa loña. Koloneke vilo, tu sangiwa vekalasoko lioluali luomanu vana ka va yongola oku kũlĩha Yehova, loku kuata ekolelo liocili. Ekalasoko liaco li sokisiwa loku ambata ovava a tĩla okuti nda ka tu a teyuila loku a kapa vovikuata, a takata lonjanga. Ndeci tu sukila ovava oco tu kale komuenyo, cimuamue haico tu sukila oku linga okuti, nda ka tu kuete ekolelo, ka tu puluka kenyolẽho.—Va Rom. 1:17.

3. Eliangiliyo lipi Yehova a linga oco li tu kuatise oku pamisa ekolelo? Ovina vipi vivali tu sukila oku ivaluka?

3 Yehova wa kũlĩha okuti, tu sukila oku kuata lonjanga ekolelo, kuenda o ci okuti, koloneke vilo ka ca lelukile oku lekisa ekolelo. Eli olio esunga lieci a tu ĩhila ovolandu omanu vakuekolelo oco tu va setukule. Yehova wa vetiya upostolo Paulu oku soneha ndoco: ‘Setukuli vana okuti omo liekolelo kuenda epandi va piñala olohuminyo.’ (Va Hev. 6:12) Eli olio esunga lieci ocisoko ca Yehova ci tu vetiyila oku setukula ongangu yalume kumue lakãi vakuekolelo, tua konomuisa velivulu lilo. Nye tu sukila oku linga cilo? Tu ivaluki ovina vivali ndeci: (1) Oku pamisa ekolelo lietu kuenda, (2) oku amamako lelavoko lietu.

4. Satana wa siata oku lekisa ndati okuti unyãli wekolelo, kuenda momo lie ka tu sukilila oku kuata usumba laye?

4 Pamisa ekolelo liove. Ekolelo olio unyãli wa velapo wa Satana. Ombiali yoluali lulo lua vĩha, ya kapa ovina vialua vi sokisiwa lekalasoko okuti ka ca lelukile oku amamako oku lekisa ekolelo. Eliapu lia pama calua okuti, etu ci sule. Anga hẽ ci tu kokela usumba okuti ka tu pondola oku pamisa ekolelo lietu? Hacoko! Yehova eye Ekamba lia vosi va sandiliya oku lekisa ekolelo liocili. Eye wa likuminya okuti, o tu kuatisa oco tu tamãlale Leliapu kuenje, li tu tila. (Tia. 4:7) Tu pondola oku tamãlala Leliapu eteke leteke poku pamisa ekolelo lietu. Tu ci linga ndati?

5. Alume lakãi va kuekolelo va tukuiwa Vembimbiliya va kuata ndati ekolelo? Ci lombolola.

5 Ndomo tua ci konomuisa ale, alume lakãi vakuekolelo va tukuiwa Vembimbiliya, ka va citiwile lekolelo liaco. Pole, omuenyo wavo wa eca uvangi wokuti, ekolelo liaco epako liespiritu sandu lia Yehova. (Va Gal. 5:22, 23) Ovo va pinga ekuatiso volohutililo kuenje, Yehova wa pamisa ekolelo liavo. Omo liaco, tu lingi ndeci ovo va linga. Lalimue eteke ka tu ka ivaliko okuti, Yehova ecaeca espiritu liaye kuava vo pinga, haivo va likolisilako oku linga ovina va pinga volohutililo. (Luka 11:13) Anga hẽ kuli vali ovina vikuavo tu sukila oku linga?

6. Tu kuatisiwa ndati lovolandu omanu va tukuiwa Vembimbiliya?

6 Velivulu lilo, tua konomuisa lika ongangu yomanu vamue vakuekolelo. Kuli handi ovolandu omanu valua! (Tanga Va Heveru 11:32.) Ovo va lekisa ovituwa vialua viwa tu sukila oku setukula poku linga elilongiso lietu lio pokolika, loku linga olohutililo. Nda poku tanga ovolandu omanu vakuekolelo va tukuiwa Vembimbiliya ka tu sokolola vali lutate, ka tu pamisa ekolelo lietu. Oco tu upe esilivilo kovina tu tanga, tu sukila oku pita otembo yalua loku konomuisa ondongosi ovolandu omanu va tukuiwa Vembimbiliya. Nda tu ivaluka okuti alume lakãi vaco va kala omanu ka va lipuile, kuenda va kuata ‘ovituwa ndevi vietu,’ ovolandu avo a pondola oku tu vetiya calua. (Tia. 5:17) Tu pondola oku va kuatela ohenda poku sokolola ndomo va liyaka loloseteko kuenda ovitangi vikuavo, ndevi tua siata oku liyaka lavio.

7-9. (a) Alume lakãi vakuekolelo va tukuiwa Vembimbiliya, nda va kala ndati nda va kuatele epuluvi lioku fendela Yehova ndeci tua siata oku linga koloneke vilo? (b) Momo lie tu sukilila oku pamisa ekolelo lietu lovilinga?

7 Tu pondolavo oku pamisa ekolelo lietu lovilinga. Momo, nda ‘ekolelo ka li kuete ovilinga, lia fa.’ (Tia. 2:26) Sokolola esanju alume lakãi tua konomuisa velivulu lilo nda va kuata, nda va tambuile upange Yehova a tu ĩha koloneke vilo, oco tu u tẽlise!

8 Nye ci popiwa catiamẽla ku Avirahama nda vo sapuilile vati, ka fendelela vali kutala wovawe wa tungiwile vekalasoko, pole o ci linga kumue lafendeli va Yehova Vonjango Yusoma ya posoka, kuenda kolohongele viofeka okuti, olohuminyo vina a “muila ocipãla” vi kasi oku tẽlisiwa? (Tanga Va Heveru 11:13.) Nye ci popiwa catiamẽla ku Eliya nda vo sapuilile okuti, ka sukila vali oku ponda ovaprofeto va Baale, kuenda ka vumbila vali Yehova vemẽhi liosoma yimue yĩvi, pole o pasuisa omanu lombembua loku va ĩha esapulo limue lielembeleko hailio li eca elavoko? Nda alume lakãi vakuekolelo va tukuiwa Vembimbiliya, va kuatele epuluvi lioku fendela Yehova ndeci tua siata oku linga koloneke vilo, nda ka va pilukile hẽ lesanju?

9 Tu pamisi ekolelo lietu lovilinga. Nda tua ci linga, tu kapako ongangu yekolelo yalume kumue lakãi va tukuiwa Vondaka ya Suku. Ndomo ca lekisiwa Vulandu wefetikilo, tu pondola oku vetiyiwa oku kala akamba vomanu vaco. Kuenje, ukamba waco u kala wocili.

10. Esanju lipi tu ka kuata Voluali luokaliye palo posi?

10 Elavoko li kale vutima wove. Alume lakãi vakuekolelo, olonjanja viosi va imbile ovaso ku Suku ukuakueca elavoko. Anga hẽ oco ove wa siata oku linga? Sokolola esanju o pondola oku kuata poku ka lisanga lafendeli va Suku vakuekolelo vana va ka tambula “epinduko lia vakuesunga.” (Tanga Ovilinga 24:15.) Apulilo api o yongola oku linga kokuavo?

11, 12. Voluali luokaliye ovina vipi o yongola oku pulisa (a) ku Havele? (b) ku Noha? (c) ku Avirahama? (d) ku Ruti? (e) ku Avigaile? (f) kuenda ku Ester?

11 Poku lisanga la Havele, o yongola hẽ oku u pulisa ndomo epata liaye lia kala? Citava okuti, o ko pulisa ndoco: “Wa enda oku sapela olonjanja vialua la va keruvi vana va lava onjila yenda vocumbo Cedene? Ovo va ku tambolola ndati?” Nye ci popiwa ku Noha? Citava okuti o ko pulisa ndoco: “Wa enda hẽ oku kuatela usumba Ovindululu? Wa tata ndati ovinyama viosi osimbu wa kali vocimbaluku?” Poku lisanga la Avirahama, citava okuti o ko pulisa ndoco: “Anga hẽ wa enda oku sapela la Semi? Helie wa ku longisa ovina viatiamẽla ku Yehova? Ca lelukile hẽ kokuove oku siapo olupale luo Uri?”

12 Kũlĩhĩsavo apulilo amue o yongola oku linga kakãi vakuekolelo vana va ka pinduiwa. Citava okuti o pulisa ndoco Ruti: “Nye ca ku vetiya oku linga ufendeli wa Yehova?” Ove pamue o ka pulisa ndoco Avigaile: “Anga hẽ kua kuatele usumba woku sapuila Nabala okuti wa kuatisa Daviti?” Citava okuti o ka pulisavo Ester ndoco: “Nye ca pita love kuenda Mordekai, noke yulandu wa tukuiwa Vembimbiliya?”

13. (a) Apulilo api omanu va ka pinduiwa va ka ku linga? (b) O tenda ndati oku lisanga lalume kumue lakãi vakuekolelo va kala kosimbu?

13 Alume kumue lakãi vakuekolelo pamue va ka lingavo apulilo alua kokuove. Ci ka nena esanju lialua oku va sapuila ovina viatiamẽla koloneke via sulako, kuenda ndomo Yehova a sumũlũisa afendeli vaye kotembo yaco! Ocili okuti ovo va ka yongola oku kũlĩha ndomo Yehova a tẽlisa olohuminyo viaye viosi. Voluali luokaliye luna lu kasi ocipepi, tu ka kũlĩha afendeli va Suku vakuekolelo va tukuiwa Vembimbiliya. Ovo va ka kala kumue letu Voluali luokaliye palo posi! Omo liaco, sokolola ovina viosi o pondola oku linga cilo oco omanu vaco va linge akamba vove. Amamako oku setukula ekolelo liavo. Nda wa ci linga, o ka sanjukila oku vumba Yehova kumue lavo otembo ka yi pui!