Skip to content

Skip to table of contents

Olombangi Via Yehova

Select language Umbundu

 OCIPAMA CEKŨI LAMOSI

Wa lavulula kuenda wa talamẽla

Wa lavulula kuenda wa talamẽla

1, 2. Ocitangi cipi ka ca lelukile Eliya a liyaka laco, kuenda etepiso lipi lia kala pokati kaye la Ahava?

ELIYA wa yonguile oku kala pokolika oco a likutilile ku Isiaye wokilu. Pole, owiñi wa kala ponele yaye eci wa mola ndomo a pinga ondalu ya tunda kilu wa yonguile oku sanga ohenda yaye, momo wa limbukile okuti, uprofeto wocili. Pole, osimbu handi Eliya ka endele Komunda Karimeli oku likutilila ku Yehova Suku, wa linga ocina cimue ka ca lelukile. Eye wa sukilile oku vangula la Soma Ahava.

2 Kavali kavo va litepele calua kovituwa. Ahava wa walele uwalo wolosoma, haeye wa kala onanguluke, kuenda wa kuata ocipululu, lovituwa vĩvi. Eliya puãi wa walele uwalo wovaprofeto okuti, ocikutu cocipa colongamelo ale colohombo. Eye wa kala ukuotõi, ukuepandi haeye ukuekolelo. Eteke liaco lia kala lioku situlula ovituwa vialume vaco vavali.

3, 4. (a) Momo lie Ahava kumue lafendeli vakuavo va Baale va kutisiwila osõi? (b) Apulilo api tu konomuisa?

3 Koloneke viaco, Ahava kumue lafendeli va Baale, va kutisiwa osõi. Efendelo lia vakualofeka lina lia tumbikiwile la Ahava kumue la Nasoma Isievele kapata ekũi o ko Isareli, liesanda. Kuenje, uhembi wa Baale wa situluiwa. Omo okuti osuku yaco ka yi kuete omuenyo, ka ya tẽlele oku tambulula apingilo ovaprofeto vaye vesanda, ndaño va ci linga lolomiluko kuenda ocituwa coku li tãla tãla lolomoko toke eci va papuka osonde. Baale ka tẽlele oku teyuila kenyõleho ci soka 450 kovaprofeto vaye. Osuku yaco yesanda ya lembuavo oku linga ocina cikuavo, kuenda uhembi wayo wa laikele oku pitĩla kesulilo. Vokuenda kueci ci pitãhala anyamo atatu ovaprofeto vesanda va pinga kosuku yavo Baale, oco yi imũle ocitenya lohali ya kala vofeka, puãi Baale ka tambuluile. Pole, Yehova wa lekisa unene waye wa velapo poku malako ocitenya.—1 Olos. 16:30–17:1; 18:1-40.

4 Otembo yipi Yehova a lekisa unene waye? Ocituwa cipi Eliya a lekisa? Kuenda nye tu lilongisila kekolelo liaye? Tu konomuisi ulandu waco.—Tanga 1 Olosoma 18:41-46.

Ocituwa Coku Likutilila

5. Nye Eliya a sapuila Ahava okuti oco a sukilile oku linga, kuenda Ahava wa lilongisila hẽ kovina via pita keteke liaco?

5 Eliya wa amela ku Ahava kuenje, wo sapuila hati: “Lamana, lia, nyua. Momo ku yevala okuõla kuombela ya lua.” Anga hẽ Ahava, okuti wa kala ondingaĩvi wa lilongisila kovina via pita keteke liaco? Ulandu waco ka u ci lombolola, pole tu limbuka okuti olondaka viaye ka vi lekisa onjongole yoku likekembela, pamue oku pinga kuprofeto oco o kuatise oku amela ku Yehova, ale oku pinga ongecelo. Ahava “wa katuka ha li loku nyua.” (1 Olos. 18:41, 42) Nye Eliya a linga?

6, 7. Eliya wa likutilila nye, kuenda momo lie?

6 “Eliya wa lamanela komunda Karimele. Wa nyoñamẽla posi kuenda wa kapa ocipala caye pokati kolongolo.” Osimbu Ahava a kala oku lia, Eliya wa likutilila ku Yehova. Sokolola umbombe Eliya a lekisa poku petamisa utue waye pokati kolongolo. Nye Eliya a linga? Ka tu sukila oku sokolola calua. Embimbiliya kelivulu lia Tiago 5:18, li tu sapuila okuti Eliya wa likutilila oco ocitenya ci imũhe. Eye wa lingila ohutililo yaco kilu Liomunda Karimele.

Ohutililo Eliya a linga ya lekisa onjongole yaye yoku mola oku tẽlisiwa kuocipango ca Suku

7 Yehova wa popele hati: “Cilo ndokisa ombela kilu lieve.” (1 Olos. 18:1) Eliya wa likutilila oco ocipango ca Yehova ci lingiwe, ndeci Yesu eya oku longisa olondonge viaye oku likutilila, noke yoku pita ci soka ohulukãi yanyamo.—Mat. 6:9, 10.

8. Nye tu lilongisila kongangu ya Eliya ya tiamẽla kohutililo?

8 Ongangu ya Eliya yi tu longisa ovina vialua viatiamẽla kolohutililo. Eye wa yonguile okuti, ocipango ca Suku ci lingiwa. Poku linga olohutililo, tu sukilavo oku ivaluka okuti: ‘Nda tu pinga cimue ca sungulukila ocipango ca Suku, eye o tu yeva.’ (1 Yoa. 5:14) Eci ci lekisa okuti, tu sukila oku lilongisa Embimbiliya eteke leteke, loku kũlĩha ocipango ca Suku oco olohutililo vietu vi yeviwe. Eliya wa yonguilevo oku mola esulilo liocitenya, momo ca kokelele ohali ya piãla omanu vo vofeka yaye. Eye wa eca olopandu poku mola ocikomo Yehova a linga keteke liaco. Etu tu yongolavo okuti volohutililo vietu tu eca olopandu kuenda oku likutilililako vakuetu.—Tanga 2 Va Korindo 1:11; Va Filipoi 4:6.

Wa Kolela Kuenda wa Lavulula

9. Eliya wa tumile ukuenje waye oku linga nye, kuenda ovituwa vipi vivali tu konomuisa?

9 Eliya wa kolelele okuti Yehova o ka malako ocitenya, pole ka kũlĩhĩle otembo Yehova a laikele oku ci linga. Oco hẽ, nye uprofeto a linga vokatembo kaco? Kũlĩhĩsa eci ulandu waco u popia, kuna tu tanga ndoco: “Wa popia lukuenje waye hati, Londa handi, vanja kokalunga. Oco wa londa, wa vanjako, kuenje hati, Ka kuli cimue. Eliya hati, Kuendeko vali olonjanja epanduvali.” (1 Olos. 18:43) Ulandu wa Eliya u tu longisa ovina vivali. Catete, tu konomuisa ekolelo uprofeto a kuata. Cavali, ocituwa caye coku lavulula.

Eliya wa yonguile oku mola ondimbukiso yokuti Yehova wa laikele oku tẽlisa ohuminyo yaye

10, 11. (a) Eliya wa lekisa ndati okuti wa kolelele kohuminyo ya Yehova? (b) Momo lie tu sukilila oku kuata ekolelo ndeli lia Eliya?

10 Oco Eliya a kũlĩhe okuti Yehova wa laikele oku tẽlisa ohuminyo yaye, wa sanda ondimbukiso yokuti, Yehova o nena ombela. Eye wa tuma ukuenje waye kocitumãlo ca lepa oku vanja nda kilu kua kaile ondimbukiso yombela. Eci ukuenje a tiuka, wa nena esapulo limue li sumuisa hati: “Ka kuli cimue.” Kilu ka kua kaile alende. Kaliye, o tẽla hẽ oku limbuka ocina cimue ci komõhisa? Ivaluka okuti Eliya wa sapuila Soma Ahava hati: “Ku yevala okuõla kuombela yalua.” Momo lie uprofeto a popela olondaka viaco, nda kilu handi ka kua kaile alende ombela?

11 Eliya wa kũlĩhĩle ohuminyo ya Yehova. Omo wa kala uprofeto, wa kolelele okuti Yehova Suku o ka tẽlisa ondaka Yaye. Ekolelo Eliya a kuata, lia kala ndu okuti o yevite ale ovilemĩlo viombela. Ulandu waye, u tu ivaluisa olondaka Viembimbiliya viatiamẽla ku Mose, hati: “Wa pandikisa ndu o lete una ka muiwa lovaso ositu.” Ove hẽ o tava okuti kuli muẽle Suku? Eye o tu ĩha esunga lialua lioku kolela kolohuminyo viaye.—Va Hev. 11:1, 27.

12. Eliya wa lekisa ndati okuti wa kala oku lavulula, kuenda eci vo sapuila okuti kua molẽha okalende kamue katito wa kala ndati?

12 Kaliye, kũlĩhĩsa ndomo Eliya a lavulula. Eye ka tumile lika ukuenje waye olonjanja vivali, pole wo tuma olonjanja epanduvali! Tu sokololi ekavo ukuenje waco a yeva omo liovongende a linga olonjanja vialua. Pole, Eliya ka liwekelepo oku talamẽla ondimbukiso. Konjanja yepanduvali, ukuenje waye wa popia hati: “Ota, kokalunga ku kasi oku temũha okalende ­kamue, ka soka ndeka liomunu.” O tẽla hẽ oku sokolola ndomo ukuenje a kala poku seteka leka liaye elende lia molẽha kilu Liokalunga Kanene? Citava okuti, ukuenje waye wa tendele okalende kaco ndocina cimue ci kuete esilivilo. Pole ku Eliya, okalende kaco, ka kuata esilivilo lialua. Noke, Eliya wa tuma ukuenje waye hati: “Kuende sapuila Ahava huti, angiliya ekãlu liove loka, sanga ombela yi ku tateka.”—1 Olos. 18:44.

13, 14. (a) Tu setukula ndati ocituwa ca Eliya coku lavulula? (b) Ovina vipi vi tu vetiya oku lekisa ocituwa conjanga?

13 Eliya wa tu sila ongangu yiwa. Momo tu kasi oku lavoka otembo Suku a ka tẽlisa ocipango caye. Ndeci Eliya a talamẽla esulilo liocitenya, afendeli va Suku koloneke vilo, va kasivo oku talamẽla esulilo lioluali lulo lua vĩha. (1 Yoa. 2:17) Osimbu Yehova Suku ka nenele esulilo lioluali lulo, tu sukila oku lavulula ndeci Eliya a linga. Yesu, Omõla a Suku, wa lungula olondonge viaye hati: “Lavululi, momo ka wa kũlĩhili eteke Ñala yene eya.” (Mat. 24:42) Anga hẽ Yesu wa lekisa okuti olondonge viaye ka via ponduile oku limbuka eci esulilo liya? Sio, eye wa tukula ovina via laikele oku pita voluali, osimbu handi esulilo ka lieyile. Omo liaco, vosi yetu tu pondola oku mola ondimbukiso “yesulilo lioluali.”—Tanga Mateo 24:3-7.

Okalende kamue katito, ka vetiya Eliya oku kolela okuti Yehova o tẽlisa ohuminyo yaye. Ondimbukiso yoloneke via sulako, yi tu ĩha esunga lioku kuata ocituwa conjanga

14 Eteke leteke tu lete olondimbukiso vi pamisa ekolelo lietu. Ekolelo liaco ka li tu vetiya hẽ oku kuata onjanga kupange wa Yehova? Okalende kamosi ka molẽha kilu, ka pamisa ekolelo lia Eliya liokuti, Yehova wa laikele oku tẽlisa ohuminyo yaye. Anga hẽ uprofeto ukuekolelo wa sumuisiwa?

Yehova o Nena Ekavuluko Lasumũlũho

15, 16. Ovina vipi via pita lonjanga, kuenda nye pamue Eliya a lipula catiamẽla ku Ahava?

15 Ulandu waco u tu sapuila ndoco: “Okasimbu ka ka luile, ilu liosi lia tekãva lalende ofela ya sika, kuenje ombela ya lua ya loka Ahava wa wila vekãlu, kuenje wa enda ko Yesirele.” (1 Olos. 18:45) Ovina viaco via fetika vocipikipiki. Osimbu ukuenje wa Eliya a lombololuila Ahava esapulo liaco, ilu liosi lia tekãva lalende. Ofela ya fetika oku sika calua. Noke yanyamo atatu kolosãi epandu, ombela ya fetika oku loka ko Isareli. Osi ya kukutile, ya yula mbui. Osimbu ombela ya loka, olui Kisione lue yuka to lovava ambata osonde yovaprofeto va Baale va pondiwa. Va Isareli vakuesino va kuatavo epuluvi lioku siapo efendelo lia Baale.

“Ombela ya lua ya loka”

16 Eliya wa kolelele okuti efendelo lia Baale li imũha! Citava okuti wa lipula ndomo Ahava a ponduile oku tambuluiya kovina via laikele oku pita. Anga hẽ ca vetiya Ahava oku likekembela loku siapo efendelo lia Baale? Ulandu wa pita keteke liaco, nda co kuatisa oku linga apongoloko. Ocili okuti ka tua kũlĩhĩle ovisimĩlo Ahava a kuata kepuluvi liaco. Pole, ulandu waco u tu sapuila lika okuti, ‘wa wila vekãlu liaye, kuenje wa enda ko Yesirele.’ Eye wopako hẽ ulunge? Anga hẽ wa pongolola ovisimĩlo viaye? Ulandu waco u lekisa okuti ka lingile apongoloko komuenyo waye. Pole, eteke liaco handi ka lia pitilĩle kesulilo, ci kale ku Eliya kuenda Ahava.

17, 18. (a) Nye ca pita la Eliya osimbu a kala vonjila yo ko Yesirele? (b) Ocina cipi ci komõhisa catiamẽla kolupesi lua Eliya poku tunda ko Karimele toke ko Yesirele? (Tala etosi pombuelo yemẽla.)

17 Uprofeto wa Yehova wa fetika oku endela vonjila yimuamue mua pita Ahava. Kovaso a kala oku enda kua tekãvele mbu lowelema. Kuenda kua laikele oku pita ocina cimue ci komõhisa.

18 ‘Eka lia Yehova lia kala la Eliya, kuenje wa itika uwalo waye vombunda, yu wa lupukila kovaso ya Ahava, toke ko Yesirele.’ (1 Olos. 18:46) Ocili okuti “eka lia Yehova” lia kala la Eliya lonjila yimue yi komõhisa. Oku tunda ko Karimeli toke ko Yesirele, pa kala eci ci soka 30 kolokilometulu. * Ivaluka okuti uprofeto wa itika uwalo waye vombunda oco cu wecelele oku lupuka, osimbu a endela vetapalo mue yuka ovava ombela, toke eci a sanga soma wa kala oku endela kekãlu kuenje wo pitahãla!

19. (a) Ongusu lolohõlo Suku a eca ku Eliya yi tu ivaluisa ocitumasuku cipi? (b) Osimbu Eliya a lupukila ko Yesirele, wa kolelele nye?

19 Eliya wa kuata esumũlũho linene! Eye wa kuata ongusu kuenda wa pamẽle calua okuti vutila ci sule. Eci ci tu ivaluisa uhayele kuenda olohõlo vakuepokolo va ka kuata Vofeka yelau palo posi. (Tanga Isaya 35:6; Luka 23:43) Osimbu Eliya a endela vonjila ya sielena, wa kolelele okuti Isiaye Yehova, Suku yocili, wa kala laye!

20. Tu tambula ndati asumũlũho a Yehova?

20 Yehova o yongola oku tu sumũlũisa. Oco tu tambule asumũlũho aco, tu sukila oku likolisilako. Omo okuti Yehova ndopo o ka nyõla oluali lulo lũvi, tu sukila oku lavulula ndeci Eliya a linga. Tu kuete esunga lioku kolela kolohuminyo via Yehova, “Suku yocili” ndeci Eliya a linga.—Osa. 31:5.

^ tini. 18 Noke yovina evi, Yehova wa tuma Eliya oku pindisa Elisia, una wa enda oku itila “ovava povaka a Eliya.” (2 Olos. 3:11) Elisia wa kala oñuatisi ya Eliya okuti otembo yaco Eliya wa kukile ale.