Skip to content

Skip to table of contents

Olombangi Via Yehova

Select language Umbundu

 OCIPAMA CAVALI

‘Eye wa Endaenda la Suku Yocili’

‘Eye wa Endaenda la Suku Yocili’

1, 2. Upange upi Noha kumue lepata liaye va linga, kuenda ovitangi vipi va liyaka lavio?

NOHA wa ketulũla onyima kuenda wolõla ovoko aye. Sokolola ndomo a tumãlele kevaya osimbu a kala oku puyuka loku vanja ocimbaluku cinene. Elemba liocikokoto kuenda onjuela yoku songa avaya via lisanduila vofela. Pocitumãlo Noha a tumãlele ca tavele oku mola ndomo omãla vaye va sakalala loku valela avaya. Ukãi, lomãla vaye, kuenda akãi vomãla vaye, va kuatisa kupange waco vokuenda kuanyamo alua. Ovo va lingile ale upange walua, pole kua ka kambele handi ovina vialua via sukilile oku lingiwa oco va malusule ocimbaluku!

2 Omanu va simile okuti Noha kumue lepata liaye, va linga ayui. Osimbu va kala oku tunga ocimbaluku, omanu va va yola epembe loku sima vati lalimue eteke voluali mu keya etande. Elungulo Noha a ecaile lia tiamẽla kocilunga caco, kokuavo lia kala nduveke! Ovo ka va kũlĩhĩle esunga lieci Noha kumue lepata liaye va pesila otembo yavo kupange waco. Pole Yehova, Suku ya Noha ko tendele okuti, eyui.

3. Noha wa endaenda ndati la Suku yocili?

3 Ondaka ya Suku yi popia ndoco: ‘Noha wa endaenda la Suku yocili.’ (Tanga Efetikilo 6:9.) Ondaka eyi yi lomboloka nye? Ondaka yaco ka yi lomboloka okuti Suku weyile palo posi, ale Noha eye wa endele kilu. Omo okuti Noha wa pokola ku Suku, kuenda wo kuatela ocisola calua, ca kala ndu okuti eye kumue la Yehova, va endaila pamosi ndeci omunu a linga lekamba liaye. Noke yanyamo alua, Embimbiliya lia tukula Noha ndoco: ‘Omo a kala lekolelo, wa pisa oluali.’ (Va Hev. 11:7) Wa ci linga ndati? Koloneke vilo, tu setukula ndati ekolelo liaye?

Ulume Umue wa Pua Etondelo Voluali Lua Vĩha

4, 5. Evĩho lia kala voluali koloneke via Noha lia li vokiyile ndati?

4 Noha wa kulila voluali lumue okuti evĩho lia kala oku livokiya calua. Evĩho liaco lia fetikila koloneke via Enoke, una wa kala sekulu ya Noha haeye ulume umue ukuesunga wa endaenda la Suku. Enoke wa popele hati, eteke liesombiso lia laikele oku iya kolondingaĩvi voluali. Kuenje, koloneke via Noha evĩho liaco lia li vokiyile calua. Ocili okuti, oluali lua vĩhile calua kovaso a Yehova, momo lue yukile ungangala. (Efet. 5:22; 6:11; Yuda 14, 15) Nye ca pitako okuti oco ca nena evĩho liaco?

5 Pokati kovangelo kilu okuti omãla va Suku, pa pita ocitangi cimue cinene. Umue pokati kovangelo vaco, wa lingilile usuanji Yehova, eci o lundila poku vetiya Adama la Eva oku linga ekandu, kuenje wa linga Satana Eliapu. Koloneke via Noha ovangelo vakuavo va lingilavo usuanji Yehova poku likongela kusuanji waco. Ovo va siapo ocitumãlo cavo kilu cina Suku a va ĩhile, veya palo posi, va lipongolola vatimba omanu, kuenda va nõla akãi va posoka oco va likuele lavo. Epela, lusesiame, kuenda esino liovangelo vaco, lia kala ndowule pokati komanu.—Efet. 6:1, 2; Yuda 6, 7.

6. Ovindululu via vokiya ndati evĩho voluali, kuenda nye Yehova a sokiyile oku linga?

6 Elitokeko liovangelo lakãi vomanu, lia koka oku cita omãla vanene haivo va kuata ongusu yalua. Embimbiliya li va tukula hati Ovindululu ci lomboloka okuti, “Vakuakulundula” omo va enda oku kupuila omanu posi. Omo liungangala wavo, Ovindululu via vokiya evĩho voluali. Ovina viaco via vetiya Ululiki oku tenda okuti, “ũvi womanu wa lova kilu lieve, lovisimĩlo viosi vi simaiwa vovitima viavo via vĩha ño oloneke viosi.” Omo liaco, Yehova wa sokiyile okuti, vokuenda kueci ci soka 120 kanyamo, o kundula olondingãvi viosi kilu lieve.—Tanga Efetikilo 6:3-5.

7. Ovitangi vipi Noha kumue lukãi waye va liyaka lavio poku teyuila omãla vavo kovituwa vĩvi vio koloneke viavo?

7 Sokolola ndomo ka ca lelukile oku tata epata voluali luaco! Eci oco Noha a linga. Eye wa kuelele ukãi umue uwa. Eci Noha a tẽlisa 500 kanyamo, ukãi waye wa cita omãla vatatu okuti, Semi, Hama, la Yafete. * Kavali kavo va likolisilako oku teyuila omãla vavo kevĩho lia kala kolonele viosi. Omãla vatito va komõha loku kuatela usumba ‘omanu va pama haivo va kemãla’ calua, pole Ovindululu oco via kala. Ka ca lelukile ku Noha kumue lukãi waye oku teyuila omãla vavo kovolandu osi a tiamẽla kovina vĩvi via enda oku lingiwa lovindululu, pole va ponduile oku va longisa ocili catiamẽla ku Yehova Suku, una wa suvuka evĩho liosi. Ovo va kuatisa omãla vavo oku limbuka okuti, Yehova wa sumuĩle calua omo liungangala kuenda esino lia kala voluali.—Efet. 6:6.

Noha kumue lukãi waye va teyuila omãla vavo kovilinga vĩvi

8. Koloneke vilo, olonjali vi pondola oku setukula ndati ongangu ya Noha kumue lukãi waye?

8 Olonjali vio koloneke vilo, vi pondola oku kuata elomboloko liomuenyo wa Noha kumue lukãi waye. Voluali mue yuka ungangala lesino li sokisiwa lowule. Olonjanja vialua valupale mue yuka amalẽhe va lingainga umbuahuku. Ndaño muẽle olomapalo, vi vetiya amalẽhe oku linga ungangala. Pole, olonjali vi kuete olondunge, vi pondola oku kuatisa omãla vavo kovina evi poku va longisa eci catiamẽla ku Yehova, Suku ukuambembua, una o ka mãlako evĩho liosi. (Osa. 11:5; 37:10, 11) Nda va ci linga, va kuata onima yiwa! Noha kumue lukãi waye va kuata onima yiwa. Omãla vavo va kula ciwa kuenje, va kuela akãi va velisilepo upange wa Yehova, Suku yocili.

“Litungila Ocimbaluku”

9, 10. (a) Ocihandeleko cipi ca Yehova ca pongolola omuenyo wa Noha? (b) Ovina vipi Yehova a situluila Noha poku sokiya oloseteko viocimbaluku locimãho ca kuata?

9 Eteke limue omuenyo wa Noha wa pita vepongoloko linene. Yehova wa sapela laye catiamẽla kocipango caye coku mãlako olondingaĩvi via kala voluali koloneke viaco. Suku wa sapuila Noha hati: “Litungila ocimbaluku lovinendele.”—Efet. 6:14.

10 Ocimbaluku caco hanaviyuko ndeci vamue va siata oku popia. Ka ca kaile ndongonjo yimue, ka ca kuatele upungu, ndaño ocipando coku tapula ovava ndeci conaviyu. Pole, ca kala ndocikasia cinene haico ca miuha. Yehova wa ecele ku Noha oloseteko viocimbaluku caco, lolonumbi ndomo a ponduile oku ci panga, loku ci laña ocikokoto vokati lo koñoño yaco. Kuenje, wa sapuila Noha esunga liaco hati: “Ndokisa kilu lieve etande liovava . . . cosi ci kasi kilu lieve ci fa.” Pole, Yehova wa lisila la Noha poku u sapuila hati: ‘Iñila vocimbaluku, ove lomãla vove, lukãi wove, lakãi vomãla vove.’ Noha wa iñisavo vimue pokati kapata osi ovinyama. Vana va kala vocimbaluku, ovo lika va ponduile oku puluka Ketande lia laikele oku iya!—Efet. 6:17-20.

Noha kumue lepata liaye va likuata omunga koku tẽlisa olonumbi via Suku

11, 12. Upange upi unene Noha a kuata, kuenda wa potolola ndati ocitangi caco?

11 Noha wa kuatele upange walua. Momo ocimbaluku caco ca sukilile oku kuata oloseteko evi: 133 kolometulu vusõvi, 22 kolometulu voku tanda, kuenda 13 kolometulu voku lepa. Ocimbaluku caco, ca kala cinene calua okuti olonaviyu vio koloneke vilo vi sule. Anga hẽ Noha wa yonguile oku likala poku lisiõsiõla okuti upange waco wa tatama loku seteka oku tepulula oloseteko viaco? Embimbiliya li tambulula ndoco: “Noha wa linga cosi Suku o sapuila.”—Efet. 6:22, NW.

12 Upange woku tunga ocimbaluku wa lingiwa vanyamo 40, ale 50 kanyamo. Ca sukilile oku teta oviti loku vi ambata, kuenda oku teta olomangaluwa, oku vi sokiya ciwa loku vi tokeka. Ocimbaluku caco ca sukilile oku kuata olosapalalo vitatu, lolohondo vialua kuenda epito limue konele. Citava okuti ocipepi lolusoka luaco kua kala olonjanela okuti eci ombela yi loka, ovava ka a iñila vokati.—Efet. 6:14-16.

13. Ocina cipi ca tĩlile calua kupange wa Noha okuti oku tunga ocimbaluku ci sule, kuenda omanu va tambuluiya ndati?

13 Osimbu ocimbaluku ca tungiwa, Noha wa kuata esanju omo lioku kuatisiwa lepata liaye! Pole, kua kala onepa yikuavo yupange ya sukilile oku lingiwa okuti oku tunga ocimbaluku ci sule. Embimbiliya li tu sapuila hati, Noha “wa sapula esunga.” (Tanga 2 Petulu 2:5.) Lutõi walua, wa lungula omanu va enda oku linga evĩho, catiamẽla kenyõleho lia kala ocipepi. Nye omanu va linga poku yeva elungulo liaco? Noke, Yesu Kristu wa ivaluka otembo yaco poku popia hati, “ka va limbukile cimue.” Kuenje, wa amisako hati, va sakalalele lika lovopange avo eteke leteke, ndeci oku lia, oku nyua, kuenda oku kuela, kuenje ka va yevelile ondaka Noha a va sapuila. (Mat. 24:37-39) Valua va sepula Noha kumue lepata liaye. Citava okuti vamue vo tata lãvi kuenda vo lambalala. Pamue va seteka oku tateka upange woku tunga ocimbaluku.

Ndaño omanu va mola ndomo Suku a kala oku sumũlũisa Noha, haimo lumue vo sepula, kuenda ka va tavele esapulo a va kundila

14. Koloneke vilo, nye apata Akristão va lilongisila kongangu ya Noha kumue lepata liaye?

14 Noha kumue lepata liaye ka va liwekelepo. Ndaño omanu koloneke viaco va velisilepo lika olonjongole viavo, loku tenda oku tunga ocimbaluku ndocina cimue ka ci silivila haico uveke, puãi lopo Noha wa amamako oku linga upange waco. Apata Akristão koloneke vilo, va pondola oku lilongisa ovina vialua viatiamẽla kekolelo lia Noha leli liepata liaye. Handi vali, tu kasi kotembo yina ya tukuiwa Vembimbiliya okuti, ‘oloneke via sulako’ violuali lulo lua vĩha. (2 Tim. 3:1) Yesu wa popia hati, otembo yetu, yi sokisiwa loloneke Noha a tunga ocimbaluku. Nda omanu va tambulula lowesi esapulo Liusoma wa Suku, va yola epembe, ale va suanguila, Akristão va sukila oku ivaluka ongangu ya Noha. Momo havoko omanu vatete va liyaka lovitangi viaco.

“Iñila Vocimbaluku”

15. Epese lipi Noha a pita lalio osimbu a panda koku tẽlisa 600 kanyamo?

15 Anyamo a kala oku pita, kuenje ocimbaluku ca malusuiwa. Osimbu Noha a panda koku tẽlisa 600 kanyamo, wa pita lepese linene. Isiaye Lameke wa fa. * Noke yanyamo atãlo, Metusele, isia ya Lameke haeye sekulu ya Noha, wa fa eci a tẽlisa 969 kanyamo. Embimbiliya li lekisa okuti Metusele eye lika wa kala komuenyo otembo yalua. (Efet. 5:27) Metusele la Lameke va citiwa kotembo ya Adama, ulume watete kilu lieve.

16, 17. (a) Esapulo lipi liokaliye Noha a tambula eci a tẽlisa 600 kanyamo? (b) Lombolola ovina via posoka Noha kumue lepata liaye va mola via kala onjivaluko yiwa.

16 Noha eci a tẽlisa 600 kanyamo, wa tambula esapulo likuavo ku Yehova Suku liokuti: “Iñila vocimbaluku, ove lonjo yove yosi.” Kepuluvi liaco Suku wa sapuila Noha oku nõla vimue pokati kapata osi ovinyama okuti, povinyama vina via yela, o nõlapo epanduvali okuti ci tava oku vi lumba. Pole, povinyama ka via yelele o nõlapo ño vivali vivali.—Efet. 7:1-3.

17 Oku vanja ovinyama viaco ca kala onjivaluko yimue yiwa. Eye wa muĩla ocipãla ndomo olohuluwa lolohuluwa viovinyama via kala oku enda, ndomo olonjila via palãla, lomo ovinyama vikuavo via li koka posi, evi vi enda levando, vitito levi vinene, via kuata avala a litepa, lovituwa via litepa. Ka tu pondola oku sokolola upange Noha a kuata poku ongolola ovinyama viaco, oku vi senga oco vi iñile vocimbaluku. Ulandu waco u lekisa okuti, “via iñila la Noha vocimbaluku.”—Efet. 7:9.

18, 19. (a) Tu pondola oku tambulula ndati apulilo a siata oku lingiwa la vakuatatahãi a tiamẽla kovolandu a pita koloneke via Noha? (b) Tu limbuka ndati olondunge via Yehova konjila a nõla poku popela oviendalomuenyo viaye?

18 Omanu vamue vakuatatahãi va siata oku pula ndoco: ‘Noha wa ponduile oku linga ndati upange waco? Kuenda citava ndati oku kongela pamosi ovinyama viosi okuti vi kala lombembua?’ Kũlĩhĩsa ndoco: Anga hẽ Ululiki woluali ka kuete unene woku pokuisa oviendalomuenyo? Ivaluka okuti Yehova Suku, eye wa lulika ovinyama. Noke yotembo yalua weya oku tepa pokati Okalunga Kakusuka, kuenda wa talamisa ekumbi vongunji. Oco hẽ ka ponduile oku linga ovina viosi via lomboluiwa vulandu wa Noha? Eye wa ponduile oku ci linga, kuenda wa ci linga muẽle!

19 Suku wa ponduile oku popela oviendalomuenyo viaye lonjila yikuavo. Pole, omo liolondunge viaye, wa nõla onjila yimue yi tu ivaluisa okuti, kefetikilo wa ecele komanu ocikele coku tata oviendalomuenyo viosi palo posi. (Efet. 1:28) Koloneke vilo, olonjali vialua via siata oku tukula ulandu wa Noha oco vi longise omãla vavo okuti, Yehova wa kapako ovinyama kuenda omanu a lulika.

20. Upange upi Noha kumue lepata liaye va sakalalele lawo vosemana ya sulako osimbu Etande ka lieyile?

20 Yehova wa sapuila Noha hati, Etande liya vokuenda kuosemana. Citava okuti ulandu waco wa nenela esakalalo epata. Sokolola upange woku senga ovinyama viosi, loku longeka okulia kuovinyama, oku sokiya ciwa ocitumãlo cepata, kuenda oku kapa ovikuata viavo vokati kaco. Citava okuti ukãi wa Noha kumue lakãi vomãla vavo Semi, la Hama, kuenda Yafete, va talavaya calua oco vokati kocimbaluku mu posoke ciwa okuti citava oku kalamo.

21, 22. (a) Momo lie ka tu komõhela ekambo lionjongole omanu va kuata koloneke via Noha? (b) Otembo yipi etombo Noha kumue lepata liaye va liyaka lalio lia sulila?

21 Nye ci popiwa komanu vakuavo? Ovo “ka va limbukile cimue” ndaño va mola ndomo Yehova a kala oku sumũlũisa alikolisilo a Noha. Ndaño va mola ndomo ovinyama via iñila vocimbaluku pole, ka vo kuatisile. Ka tu komõha esunga lieci ka va lekisilile onjongole. Cimamue haico ci pita lomanu koloneke vilo okuti, ka va limbukile ondimbukiso yoloneke via sulako violuali lulo lua vĩha. Kuenda ndomo upostolo Petulu a ci popele, vakuetombo va siata oku sepula vana va kasi oku kapako elungulo lia Suku. (Tanga 2 Petulu 3:3-6.) Ocili okuti, kosimbu omanu va tomba Noha kumue lepata liaye.

22 Otembo yipi etombo liaco lia sulila? Ulandu waco u lekisa okuti, eci Noha lepata liaye kumue lovinyama va iñila vocimbaluku, “Yehova wa yika epito.” Nda okuti umue pokati ka vakuetombo wa kala ocipepi locimbaluku, elinga lia Suku lio kutisa osõi. Nda hacoko, eci ombela ya fetika oku loka wa fa, momo ya loka muẽle! Oyo ya li vokiya katito, katito, kuenje ya linga etande lia li sanduila voluali luosi ndeci Yehova a popele.—Efet. 7:16-21.

23. (a) Tua kũlĩha ndati okuti Yehova ka sanjukilile olofa violondingaĩvi via kala koloneke via Noha? (b) Momo lie ci kuetele esilivilo oku setukula ekolelo lia Noha koloneke vilo?

23 Anga hẽ Yehova wa sanjukila olofa violondingaĩvi viaco? Sio! (Esek. 33:11) Eye wa va ĩhile otembo yalua oco va liwekepo oku linga eci cĩvi ha va lingi eci ciwa. Anga hẽ va siapo ovilinga viavo? Ulandu womuenyo wa Noha, u tambulula epulilo eli. Noha poku endaenda la Yehova Suku, loku pokola kovina viosi o sapuila, wa lekisa okuti omanu va pondola oku popeliwa. Ekolelo lia Noha lia pisa omanu vo koloneke viaye. Ovilinga viaye via lekisa okuti, nda omanu va silepo evĩho, nda va popeliwa. Noha kumue lepata liaye va popeliwa omo liekolelo liavo. Nda ove wa setukula ekolelo lia Noha, o ka popela omuenyo wove lowu wepata liove. O pondola oku endaenda la Suku Ndekamba liove, ndeci Noha a linga. Kuenda ukamba waco u ka kala otembo ka yi pui!

^ tini. 7 Omanu koloneke viaco va enda oku kala komuenyo otembo yalua okuti koloneke vilo ci sule. Ovo va kala komuenyo anyamo alua omo lioku kala ocipepi loku li pua kuna Adama la Heva va pumba.

^ tini. 15 Lameke wa luka onduko ya Noha komõlaye ulume, ci lomboloka “Epuyuko” ale “Elembeleko,” kuenje wa imba owanji wokuti, Noha wa laikele oku tẽlisa elomboloko lionduko yaye poku nenela omanu epuyuko kupange wavo, omo liosi ya siñaliwa. (Efet. 5:28, 29) Lameke ka muĩle oku tẽlisiwa kuocitumasuku caco. Citava okuti ina ya Noha, kumue la vamanjaye valume lava vakãi vosi va fa Letande.