يەر شارى ۋەيران بولۇپ كېتەمدۇ؟
مۇقەددەس كىتابنىڭ جاۋابى
ياق، يەر يۈزى ھەرگىز ۋەيران بولۇپ كەتمەيدۇ، ئوتتا كۆيۈپ كۈل بولمايدۇ ياكى خۇدا يەر شارىنىڭ ئورنىغا باشقا بىر سەييارىنى ياراتمايدۇ. مۇقەددەس كىتاب بىزگە، خۇدانىڭ يەر شارىنى ئىنسانلار ئۈچۈن مەڭگۈلۈك ماكان قىلىپ ياراتقانلىقىنى ئېيتىدۇ.
«ھەققانىيلار يەر يۈزىگە ئىگە بولار، ئۇلار يەردە مەڭگۈ ياشار».—زەبۇر 37:29.
«سەن [خۇدا] يەر يۈزىنى ئۇللىرى ئۈستىگە مۇستەھكەم ئورناتقانسەن؛ ئۇ ئەبەدىل-ئەبەد، مەڭگۈ تەۋرەنمەس».—زەبۇر 104:5.
«يەر يۈزى مەڭگۈگە قالار».—ۋەز 1:4.
«يەر شارىنى شەكىلگە كەلتۈرۈپ، ئۇنى ياساپ، ئۆز ئورنىغا مۇستەھكەم ئورناتقان، ئۇنى بىكارغا ئەمەس، ئىنسانلارنىڭ ياشىشى ئۈچۈن ياراتقان».—يەشايا 45:18.
ئىنسانلار يەر-يۈزىنى گۇمران قىلامدۇ؟
ئىنسانلار ئۇرۇشلار ياكى باشقا يوللار بىلەن يەر شارىنى پۈتۈنلەي گۇمران قىلىۋېتىشىگە خۇدا يول قويمايدۇ. ئەمەلىيەتتە، خۇدا مۇنداق ۋەدە بەرگەن: «يەر يۈزىنى گۇمران قىلغۇچىلارنى گۇمران قىلىدۇ».—ۋەھىيلەر 11:18. ئۇ بۇنى قانداق قىلىدۇ؟
خۇدا يەر يۈزىنى ياخشى ئاسراپ قوغدىيالمىغان بارلىق ھۆكۈمەتلەرنى يوق قىلىپ، ئورنىغا ئاسماندىكى مۇكەممەل ھۆكۈمەت، خۇدا پادىشاھلىقىنى تىكلەيدۇ (دانىيال 2:44؛ مەتتا 6:9، 10). خۇدانىڭ ئوغلى، ئەيسا مەسىھ بۇ پادىشاھلىقنىڭ پادىشاھى بولىدۇ (يەشايا 9:6، 7). ئەيسا مەسىھ يەر يۈزىدە ياشىغاندا، مۆجىزە ئارقىلىق تەبىئەت دۇنياسىدىكى كۈچلەرنى تىنچلاندۇرغان (ماركۇس 4:35–41). خۇدا پادىشاھلىقىنىڭ پادىشاھى سۈپىتىدە ئەيسا مەسىھ يەر يۈزى ۋە تەبىئەت كۈچلىرىنى باشقۇرىدۇ. ئۇ يەر يۈزىنىڭ مۇھىت شارائىتلىرىنى يېڭىلاپ، يەر شارىنى ئېرەم بېغىغا ئوخشاش ھالەتكە كەلتۈرىدۇ.—مەتتا 19:28؛ لۇقا 23:43.
مۇقەددەس كىتاب يەر يۈزى ئوتتا كۆيدۈرۈلۈپ كۈل بولىدۇ دەمدۇ؟
ياق. بەزىلەر مۇقەددەس كىتابنىڭ 2-پېترۇس 3:7-ئايىتىدىكى «ھازىرقى ئاسمانلار ۋە يەر ... ئوت ئۈچۈن، ... ساقلىنىپ تۇرىدۇ» دېگەن سۆزلەرنى خاتا چۈشەنگەچكە، كۆيۈپ كۈل بولىدۇ دەپ ئويلايدۇ. مۇشۇ ئايەتتىكى سۆزلەرنىڭ مەنىسىنى چۈشىنىشكە ياردەم بېرىدىغان ئىككى مۇھىم نۇقتىغا دىققەت قىلايلى:
مۇقەددەس كىتابتا «ئاسمانلار»، «يەر» ۋە «ئوت» دېگەن سۆزلەر بىر مەنىدە ئەمەس، كەڭ مەنىدە قوللىنىلغان. مەسىلەن، يارىتىلىش 11:1-ئايەتتە: «پۈتكۈل يەر بىر تىلدا سۆزلىشەتتى ۋە سۆزلىرى بىر خىل ئىدى»،— دەپ يېزىلغان. ئۇ ئايەتتىكى «يەر» دېگەن سۆز ئىنسانلار جەمئىيىتىنى بىلدۈرىدۇ.
2-پېترۇس 3:7-ئايەتنىڭ ئالدىنقى ۋە كەينىدىكى ئايەتلەر ئاسمانلار، يەر ۋە ئوت دېگەن سۆزلەرنىڭ مەنىسىنى چۈشەندۈرىدۇ. 5-ۋە 6-ئايەتلەردە، نۇھ پەيغەمبەرنىڭ زامانىدىكى توپان سۈيى ھەققىدە يېزىلغان. شۇ توپان سۈيىدە يەر شارى ئەمەس، قەدىمكى زاماندىكى دۇنيا يوق قىلىنغان ئىدى. شۇ چاغدا، توپان سۈيى «يەر»، يەنى رەزىللىككە تولغان ئىنسانلار جەمىيىتىنى ھالاك قىلغان (يارىتىلىش 6:11). ئۇنىڭدىن باشقا، توپان سۈيى «ئاسمانلار»، يەنى شۇ زاماندىكى ھۆكۈمرانلىق قىلىدىغان ئىنسانلارنىمۇ ھالاك قىلغانىدى. شۇڭا، بىز ياشايدىغان يەر شارى ئەمەس، رەزىل ئادەملەر گۇمران قىلىنىدۇ. نۇھ پەيغەمبەر ۋە ئۇنىڭ ئائىلىسى توپان سۈيىدىن ئامان قالغاندىن كېيىن، ئەۋلادلىرى بىلەن پۈتۈن يەر يۈزىنى تولدۇرغان.—يارىتىلىش 8:15–18.
توپان سۈيىگە ئوخشاش، 2-پېترۇس 3:7-ئايەتتىكى «ئوت» يەر شارىنى ئەمەس، بەلكى بۇ دۇنيادىكى رەزىل ئىنسانلارنى يوق قىلىدۇ. خۇدا «يېڭى ئاسمانلار ۋە يېڭى يەرنى» ۋەدە قىلغان بولۇپ، «ئۇلاردا ئادالەت ئورۇن ئالىدۇ» (2-پېترۇس 3:13). «يېڭى ئاسمانلار»، يەنى خۇدا پادىشاھلىقى «يېڭى يەر» يەنى، يېڭى ئىنسانلار جەمئىيىتى ئۈستىدىن ھۆكۈمرانلىق قىلىدۇ. بۇ پادىشاھلىقنىڭ ھۆكۈمرانلىقى ئاستىدىكى يەر يۈزىدە تىنچلىق ھۆكۈم سۈرىدۇ ۋە ئۇ ئاجايىپ جەننەتكە ئايلىنىدۇ.—ۋەھىيلەر 21:1–4.
بۇلارغىمۇ قىزىقىشىڭىز مۇمكىن
مۇقەددەس كىتابنىڭ ئاساسىي تەلىملىرى
خۇدا يەرنى نېمە ئۈچۈن ياراتتى؟
بىزنىڭ ئالەم ئاجايىپ چىرايلىق يارىتىلغان. ئۇ يەرنى قۇياشتىن نەق توغرا ئارىلىققا قويۇپ، قۇياش ئەتراپىدا ئايلىنىشىنىڭ دەل توغرا ئىلداملىقىنى ئورۇنلاشتۇردى. نېمىشقا خۇدا گۈزەل يەرنى يارىتىش ئۈچۈن شۇنچە كۆپ كۈچ چىقارغان؟
مۇقەددەس كىتابنىڭ ئاساسىي تەلىملىرى
خۇدا پادىشاھلىقى دېگەن نېمە؟
ئەيسا پەيغەمبەر يەردە خىزمەت قىلغاندا، ئاساسەن خۇدا پادىشاھلىقى ھەققىدە تەلىم بەرگەن. ئەسىرلەر بويى ئۇنىڭ شاگىرتلىرى خۇدا پادىشاھلىقى كەلسۇن دەپ دۇئا قىلغان.
بىز ھەققىدە
ئۇچرىشىشنى ئىلتىماس قىلىڭ
مۇقەددەس كىتابتىكى سوئالنى مۇھاكىمە قىلىڭ ياكى يەھۋا گۇۋاھچىلىرى توغرۇلۇق كۆپرەك بىلىڭ.