نېمە ئۈچۈن يەھۇدىي چوڭ قىرغىنچىلىقى يۈز بەرگەن؟ نېمە ئۈچۈن خۇدا ئۇنى توختاتمىغان؟
بۇ سوئالنى سورايدىغانلارنىڭ كۆپىنچىلىرى يېقىنلىرىدىن ئايرىلىپ، قاتتىق قايغۇ-ھەسرەتنى چەككەن كىشىلەر. ئۇلار بۇ سوئالغا جاۋاب تېپىشتىن باشقا، كۆڭلىگە تەسەللى ئىزدەيدۇ. باشقىلار بولسا، يۈز بەرگەن يەھۇدىي چوڭ قىرغىنچىلىقىنىڭ ئەڭ دەھشەتلىك، ۋەھشىي جىنايەت دەپ قارىغاچقا، ئۇلارنىڭ خۇدانىڭ بارلىقىغا ئىشەنگۈسى كەلمەيدۇ.
خۇدا ۋە يەھۇدىي چوڭ قىرغىنچىلىقى توغرىسىدىكى كەڭ تارقالغان ناتوغرا ئوي-پىكىرلەر
ناتوغرا ئوي-پىكىر: نېمە ئۈچۈن خۇدا يەھۇدىي چوڭ قىرغىنچىلىقىنىڭ يۈز بەرگەنلىكىگە يول قويغان دېگەن سوئالنى سوراش ناتوغرا.
ھەقىقەت: خۇداغا چىن دىلىدىن ئىشىنىدىغان كىشىلەر نېمە ئۈچۈن خۇدا ئازاب-ئوقۇبەتلەرگە يول قويىدۇ دېگەن سوئالنى سورىغان. مەسىلەن، ھاباققۇق پەيغەمبەر خۇدادىن مۇنداق سورىغان: «نېمە ئۈچۈن ماڭا ئازاب-ئوقۇبەتلىك ئىشلارنى كۆرسىتىسەن؟ نېمە ئۈچۈن سەن زورلۇق-زومبۇلۇققا چىداپ تۇرىسەن؟ نېمە ئۈچۈن كۆز ئالدىمدا قىرغىنچىلىق ۋە زوراۋانلىق بار؟ نېمە ئۈچۈن ئۇرۇش-جىدەل ۋە توقۇنۇشلار شۇنچە كۆپ؟» (ھاباققۇق 1:3). بىراق، خۇدا ھاباققۇقنى ئەيىبلىمىگەن، ئەكسىچە ئۇنىڭ سورىغان سوئاللىرىنى بارچە ئىنسانلارنىڭ ئوقۇشى ئۈچۈن مۇقەددەس كىتابقا يازدۇرغان.
ناتوغرا ئوي-پىكىر: خۇدا ئىنسانلارنىڭ ئازاب-ئوقۇبەتلىرىگە پەرۋا قىلمايدۇ.
ھەقىقەت: خۇدا يامانلىقنى ۋە يامانلىق پەيدا قىلغان ئازاب-ئوقۇبەتلەرنى ئۆچ كۆرىدۇ (پەندى-نەسىھەت 6:16–19). نۇھ پەيغەمبەرنىڭ كۈنلىرىدە دۇنيانىڭ زوراۋانلىققا تولغانلىقىنى كۆرگەندە، خۇدا ئەپسۇسلىنىپ، كۆڭلى ئازابلانغانىدى (يارىتىلىش 6:5، 6). شەك-شۈبھىسىزكى، يۈز بەرگەن يەھۇدىي چوڭ قىرغىنچىلىقىمۇ خۇدانى ناھايىتى ئازابلىغان.—مالاكى 3:6.
ناتوغرا ئوي-پىكىر: يەھۇدىي چوڭ قىرغىنچىلىقى خۇدانىڭ يەھۇدىيلارغا ئەۋەتكەن جازاسى.
ھەقىقەت: خۇدا بىرىنچى ئەسىردە رىملىقلارنىڭ يېرۇسالىم شەھىرىنى ۋەيران قىلىشىغا يول قويغان (مەتتا 23:37–24:2) شۇ زاماندىن بېرى، خۇدا مەلۇم بىر خەلققە ئالاھىدە ئېتىبار بېرىش ياكى جازالاش ئۈچۈن پەرقلىق مۇئامىلە قىلمايدىغان بولغان. خۇدانىڭ كۆز ئالدىدا يەھۇدىي بىلەن باشقا مىللەت خەلقىنىڭ ئارىسىدا ھېچقانداق پەرق يوق. ئۇ بارچە مىللەت خەلقىگە تەڭ باراۋەر قارايدۇ.—رىملىقلار 10:12.
ناتوغرا ئوي-پىكىر: ئەگەر ھەممىگە قادىر، مېھىر-شەپقەتلىك خۇدا بار بولسا، ئۇ يەھۇدىي چوڭ قىرغىنچىلىقىنىڭ يۈز بېرىشىگە يول قويمىغان بولاتتى.
ھەقىقەت: خۇدا ھەرگىزمۇ ئىنسانلارنى ئازاب-ئوقۇبەتلەرگە دۇچار قىلمايدۇ، بىراق ئۇ بەزىدە ئىنسانلارنىڭ ۋاقتىنچە ئازاب-ئوقۇبەتلەرنى چېكىشىگە يول قويىدۇ.—ياقۇپ 1:13؛ 5:11.
خۇدا نېمە ئۈچۈن يەھۇدىي چوڭ قىرغىنچىلىقىغا يول قويغان؟
خۇدا ئۇزۇن زامانلار ئىلگىرى ئوتتۇرغا چىققان بەزى ئەخلاقىي مەسىلىلەرنى ھەل قىلىش ئۈچۈن يەھۇدىي چوڭ قىرغىنچىلىقىغا ۋە ئىنسانىيەتنىڭ بارچە ئازاب-ئوقۇبەتلىرىگە يول قويغان. مۇقەددەس كىتابتا ئېنىق كۆرسىتىلگەندەك، بۇ دۇنيانى خۇدا ئەمەس، شەيتان باشقۇرىدۇ (لۇقا 4:1، 2، 6؛ يۇھاننا 12:31). مۇقەددەس كىتابتىكى ئىككى ئاساسىي ئوي-پىكىر خۇدانىڭ نېمە ئۈچۈن يەھۇدىي چوڭ قىرغىنچىلىقىنىڭ يۈز بېرىشىگە يول قويغانلىقىنى چۈشىنىشكە ياردەم بېرەلەيدۇ.
خۇدا ئىنسانلارنى تاللاش ئەركىنلىكى بىلەن ياراتقان. خۇدا تۇنجى ئىنسانلار بولغان ئادەم-ئاتا بىلەن ھاۋا-ئانىغا ئۆزىنىڭ ئۇلاردىن نېمىنى كۈتىدىغانلىقىنى ئېيتقان. لېكىن، ئۇ ئۇلارنى ئۆزىگە بويسۇنۇشقا مەجبۇرلىمىغان. ئۇلار نېمىنىڭ ياخشى، نېمىنىڭ يامان ئىكەنلىكىنى ئېنىقلاشنى ئۆزلىرى قارار قىلغان. تۇنجى ئىنسانلارنىڭ ناتوغرا قارارى ۋە ئەۋلادلىرىنىڭ ئەسىرلەر بويى چىقىرىپ كېلىۋاتقان قارارلىرى پۈتكۈل ئىنسانىيەتكە ئېغىر ئاقىۋەتلەرنى كەلتۈرۈپ كېلىۋاتىدۇ (يارىتىلىش 2:17؛ 3:6؛ رىملىقلار 5:12) يەھۇدىيلار ھەققىدىكى بىر كىتابتا مۇنداق سۆزلەر يېزىلغان: «دۇنيادا كۆپلىگەن ئازاب-ئوقۇبەتلەر ئەمەلىيەتتە خۇدا سوۋغات قىلغان تاللاش ئەركىنلىكىمىزنى قالايمىقان ئىشلەتكەنلىكىمىزنىڭ نەتىجىسىدۇر» (Statement of Principles of Conservative Judaism). خۇدا ئىنسانلارنى تاللاش ئەركىنلىكىدىن مەھرۇم قىلمىغان، ئەكسىنچە ئۇلارنىڭ ئۆز ئالدىغا مۇستەقىل ياشىشى ئۈچۈن ۋاقىت بەرگەن.
خۇدا يەھۇدىي چوڭ قىرغىنچىلىقى پەيدا قىلغان بارچە ئازاب-ئوقۇبەتلەرنى يوق قىلىشقا قادىر ۋە ئۇ بۇنى چوقۇم قىلىدۇ. تەڭرى يەھۋا ئۆلۈپ كەتكەن مىليونلىغان كىشىلەرنى، شۇ جۈملىدىن يەھۇدىي چوڭ قىرغىنچىلىقىدا قەتل قىلىنغانلارنى قايتا تىرىلدۈرىدىغانلىقىنى ۋەدە بەرگەن. يەنە ئۇ شۇ يەھۇدىي چوڭ قىرغىنچىلىقىنى باشتىن ئۆتكۈزگەن كىشىلەرنىڭ ئازاب-ئوقۇبەتلىك ئەسلىمىلىرىنى يوق قىلىدۇ (يەشايا 65:17؛ ئەلچىلەر 24:15). خۇدانىڭ ئىنسانلارغا بولغان سۆيگۈ-مۇھەببىتى ئۇنىڭ بارلىق ۋەدىلىرىنىڭ جەزمەن ئەمەلگە ئاشۇرۇلىدىغانلىقىنىڭ كاپالىتىدۇر.—يۇھاننا 3:16.
يەھۇدىي چوڭ قىرغىنچىلىقىدا ئامان قالغانلارنىڭ نۇرغۇنلىرى مۇقەددەس كىتابنى تەتقىق قىلىپ ئۆگەنگەندىن كېيىن، خۇدا نېمە ئۈچۈن ئازاب-ئوقۇبەتلەرگە يول قويغانلىقىنى ۋە ئۇلارنى قانداق يوق قىلىدىغانلىقىنى چۈشىنىپ، ھازىر ئۇلار خۇداغا چىن كۆڭلىدىن ئىشەنچ باغلىدى ۋە ھاياتنىڭ ھەقىقىي مەنىسىنى تاپتى.
بۇلارغىمۇ قىزىقىشىڭىز مۇمكىن
مۇقەددەس كىتابنىڭ ئاساسىي تەلىملىرى
خۇدا نېمە ئۈچۈن ئازاب-ئوقۇبەتلەرگە يول قويىدۇ؟
مۇقەددەس كىتابتا قانائەتلەندۈرىدىغان ۋە تەسەللى بېرىدىغان جاۋاپلار بار.
بىز ھەققىدە
ئۇچرىشىشنى ئىلتىماس قىلىڭ
مۇقەددەس كىتابتىكى سوئالنى مۇھاكىمە قىلىڭ ياكى يەھۋا گۇۋاھچىلىرى توغرۇلۇق كۆپرەك بىلىڭ.
مۇقەددەس كىتاب تەلىملىرى
سىناپ كۆرەي
تەلىم بەرگۈچى بىلەن مۇقەددەس يازمىلاردىن ھەقسىز بىلىم ئاشۇرۇڭ