ئەيسا پەيغەمبەرنىڭ تاشقى كۆرۈنۈشى قانداق بولغان؟
مۇقەددەس كىتابنىڭ جاۋابى
مۇقەددەس كىتابتا بۇ توغرۇلۇق ھېچ نەرسە تىلغا ئېلىنمىغان. شۇڭا، ھېچكىم ئەيسا مەسىھنىڭ تاشقى كۆرۈنۈشى قانداق بولغانلىقىنى ئېنىق بىلمەيدۇ. دېمەك، ئەيسا مەسىھنىڭ تاشقى كۆرۈنىشىگە ئالاھىدە ئەھمىيەت بېرىشنىڭ ھاجىتى يوق. ئەمما، مۇقەددەس كىتاب بۇ توغرۇلۇق بەزى تەپسىلاتلارنى بىزگە كۆرسىتىپ بېرىدۇ.
چىرايى. ئەيسا مەسىھ ئىسرائىللارنىڭ يەھۇدا قەبىلىسىدىن كېلىپ چىققان بىر يەھۇدىي بولۇپ، ئانىسىدىن بەزى چىراي ئالاھىدىلىكلىرىنى مىراس ئالغان بولۇشى مۇمكىن (ئىبرانىيلار 7:14). ئۇنىڭ چىرايى باشقىلاردىن پەرقلەنمىگەن. بىر كۈنى ئەيسا مەسىھ جەلىلىيەدىن يەھۇدىيىگە يوشۇرۇن بارغان ۋە ئۇنى ھېچكىم تونۇمىغان (يۇھاننا 7:10، 11). ئۇنىڭ ئۈستىگە ئۇ شاگىرتلىرىدىن ئالاھىدە پەرقلىق بولمىغان. شۇڭا، قىلىچ-توقماقلار بىلەن قوراللانغان بىر توپ كىشىلەر ئەيسانى تۇتۇشقا كەلگەندە، ئىشقارىيوت يەھۇدانىڭ مەسىھنى تونۇپ، ئۇنى كۆرسىتىپ بېرىشىگە توغرا كەلگەنىدى.—مەتتا 26:47–49.
چېچىنىڭ ئۇزۇنلۇقى. بەلكىم، ئەيسا مەسىھنىڭ چېچى ئۇزۇن بولمىغان. چۈنكى، مۇقەددەس كىتابتا مۇنداق سۆزلەر يېزىلغان: «ئەر كىشىنىڭ ئۇزۇن چاچ قويۇشى نومۇس ئىش».—1-كورىنتلىقلار 11:14.
ساقىلى. ئەيسا پەيغەمبەرنىڭ ساقىلى بولغان. چۈنكى، ئۇ ئىسرائىللارغا بېرىلگەن «ساقىلىڭلارنىڭ ئۇچىنى قىرماڭلار» دېگەن قانۇنىغا ئەمەل قىلغان (لاۋىيلار 19:27؛ گالاتىيالىقلار 4:4). بۇنىڭدىن باشقا، ئەيسا مەسىھنىڭ تارتقان ئازاب-ئوقۇبىتى ھەققىدىكى بېشارەتتە، ئۇ ساقال بىلەن تەسۋىرلەنگەن.—يەشايا 50:6.
تېنى. بارچە ئامىللار شۇنى كۆرسىتىپ بېرىدۇكى، ئەيسا مەسىھ جىسمانىي جەھەتتىن كۈچلۈك بولغان. ئۇ ۋەز قىلىپ يۈرگەن چاغلاردا، دائىم پىيادە يول ماڭغان (مەتتا 9:35). ئۇ ئىككى قېتىم يەھۇدىي ئىبادەتخانىسىنى تازىلاپ، پۇل تېگىشىدىغانلارنىڭ ئۈستەللىرىنى ئۆرۈپ تاشلىغان. بىر قېتىم ئەيسا پەيغەمبەر قامچا بىلەن، ئىبادەتخانىدىكى مال-چارۋىلارنى ھەيدەپ چىققان (لۇقا 19:45، 46؛ يۇھاننا 2:14، 15). بىر قامۇستا(McClintock and Strong”s Cyclopedia) مۇنداق دەيدۇ: «ئىنجىلدىكى ئەيسا پەيغەمبەر توغرىسىدىكى بارلىق تەسۋىرلەشلەر ئۇنىڭ تېنى ناھايىتى كۈچلۈك ۋە ساغلام ئىكەنلىكى كۆرسىتىپ بېرىدۇ».
يۈز ئىپادىسى. شۈبھىسىزكى، ئەيسا مەسىھنىڭ مېھرىبانلىقى ۋە مۇلايىملىقى ئۇنىڭ يۈزىدە ئەكس ئەتكەن (مەتتا 11:28، 29). ھەرخىل ئادەملەر تەسەللى ۋە ياردەم سوراپ ئەيسانىڭ ئالدىغا كەلگەنىدى (لۇقا 5:12، 13؛ 7:37، 38). ھەتتا بالىلارمۇ ئاسانلا ئەيساغا يېقىنلىشىپ، ئۇنىڭ ئالدىدا ئۆزلىرىنى ئەركىن ھېس قىلغان.—مەتتا 19:13–15؛ ماركۇس 9:35–37.
ئەيسا مەسىھنىڭ تاشقى كۆرۈنۈشى ھەققىدىكى ناتوغرا ئوي-پىكىرلەر
ناتوغرا ئوي-پىكىر. بەزىلەر ئەيسا مەسىھنى ئافرىقىلىقلارنىڭ نەسلىدىن كېلىپ چىققان دەپ تالاش-تارتىش قىلىدۇ. چۈنكى، ۋەھىي كىتابىدا ئۇنىڭ چېچى يۇڭ بىلەن، پۇتلىرى ئوچاقتا تاۋلىنىپ پارقىرىغان مىس بىلەن سېلىشتۇرۇلغان.—ۋەھىيلەر 1:14، 15.
ئەمەلىيەت. ۋەھىي كىتابىدا سىمۋوللۇق ئالامەتلەرنى تەسۋىرلەنگەن. ئەيسا مەسىھنىڭ چېچى ۋە پۇتلىرى سىمۋوللۇق مەنىدە، ئۇنىڭ تىرىلدۈرۈلگەندىن كېيىنكى پەزىلەتلىرى ياكى سۈپەتلىرىنى تەسۋىرلىگەن. ئەمما، ئۇلار ئەيسا مەسىھنىڭ يەر يۈزىدە ياشىغاندا چىرايى قانداق بولغانلىقى توغرۇلۇق ھېچنېمىنى كۆرسىتىپ بەرمەيدۇ. ۋەھىيلەر 1:14-ئايەتتە: «ئۇنىڭ بېشى ۋە چاچلىرى ئاق يۇڭدەك ۋە قاردەك ئاپئاق ئىدى»،— دەپ يېزىلغان. بۇ ئايەتتە، ئەيسا پەيغەمبەرنىڭ ئۇزۇن يىللار جەريانىدا توپلىغان ئەقىل-پاراسىتى چۈشەندۈرۈلگەن، شۇڭا ئۇنىڭ چېچىنىڭ رەڭگى يۇڭدەك ياكى قاردەك ئاق دەپ تەكىتلەنگەن، ھەرگىزمۇ چېچىنىڭ تۈرى ئەمەس.—ۋەھىيلەر 3:14.
بۇ ۋەھىيدە ئەيسا پەيغەمبەرنىڭ پۇتلىرى ئوچاقتا تاۋلىنىپ پارقىرىغان مىس كەبى، چىرايى كۈچلۈك نۇرىنى چېچىپ پارلىغان قوياش كەبى تەسۋىرلىگەن (ۋەھىيلەر 1:15، 16). يۇقىرىدا تەسۋىرلىگەن تەن ئالاھىدىلىكى ھېچقانداق مىللەت ياكى ئىرق كىشىلىرىدە يوق. شۇڭا، مۇشۇ ۋەھىيدە ئەيسانىڭ جىسمانىي جەھەتتىكى تاشقى كۆرۈنۈشى ئەمەس، بەلكى تىرىلدۈرۈلگەندىن كېيىن «ھېچكىم يېقىنلىشالمايدىغان نۇر ئىچىدە» تۇرغان سىمۋوللۇق مەنىدىكى ئەيسا پەيغەمبەر تەسۋىرلەنگەن.—1-تىموتىي 6:16.
ناتوغرا ئوي-پىكىر. ئەيسا پەيغەمبەر ئاجىز ۋە كۈچسىز.
ئەمەلىيەت. ئەيسا پەيغەمبەر ھەقىقىي ئەركەك ئىدى. مەسىلەن، قوراللانغان بىر توپ كىشىلەر ئۇنى تۇتۇشقا كەلگەندە، ئەيسا پەيغەمبەر باتۇرلۇق بىلەن ئۇلارنىڭ ئالدىغا چىققان (يۇھاننا 18:4-8). ئەيسا پەيغەمبەر ياغاچچى بولۇپ، دائىم ياغاچچىلىقتا قوللىنىدىغان ئەسۋابلار ياكى سايمانلارنى ئىشلەتكەن. دېمەك، ئۇ چوقۇم جىسمانىي جەھەتتىن كۈچلۈك بولغان.—مارك 6:3.
بەلكىم، بەزىلەر شۇنداق ئويلايدۇ: ئەيسا مەسىھ كۈچلۈك بولسا، نېمە ئۈچۈن ئازاب تۈۋرۈكىنى كۆتۈرۈپ ماڭغاندا باشقىلارنىڭ ياردىمىگە موھتاج بولغان؟ نېمە ئۈچۈن ئەيسا مەسىھ ئۆزى بىلەن بىللە ئۆلۈم جازاسىغا ھۆكۈم قىلىنغانلاردىن بۇرۇن ئۆلگەن؟ (لۇقا 23:26؛ يۇھاننا 19:31-33). ئەمەلىيەتتە، ھەزرىتى ئەيسا ئۆلۈم جازاسىغا تارتىلىشتىن ئاۋۋالقى ئاخشىمى پۈتۈن كېچە ئوخلىمىغان ۋە ئېغىر روھىي ئازاب-ئوقۇبەت چەككەن (لۇقا 22:42-44). ئاشۇ كېچىسى يەھۇدىيلار ئۇنى ئۇرۇپ مەسخىرە قىلغان ۋە ئەتىسى رىملىقلار ئۇنى قىيناپ ئازابلىغان (مەتتا 26:67، 68؛ يۇھاننا 19:1-3). شۇ ئامىللار ئەيسا مەسىھنىڭ ئۆلۈمىنى تېزلەشتۈرگەن بولۇشى مۇمكىن
ناتوغرا ئوي-پىكىر. ئەيسا پەيغەمبەر دائىم غەمكىن، چۈشكۈن بولغان.
ئەمەلىيەت. ئەيسا مەسىھ مۇكەممەل ھالەتتە ئۆز ئاتىسى يەھۋانىڭ پەزىلەتلىرىنى ئەكس ئەتكەن. مۇقەددەس كىتاب، ئۇنى ‹شاد-خۇرام خۇدا› دەيدۇ (1-تىموتىي 1:11؛ يۇھاننا 14:9). ئۇنىڭدىن باشقا، ئەيسا پەيغەمبەر باشقىلارغا قانداق كىشىلەر بەختلىك ئىكەنلىكى توغرۇلۇق تەلىم بەرگەن (مەتتا 5:3-9؛ لۇقا 11:28). شۇ ئامىللاردىن كۆرۈۋېلىشقا بولىدۇكى، ئەيسا مەسىھنىڭ چىرايىدا ھەمىشە شاد-خۇراملىق ئەكس ئېتىپ تۇرغان.
بۇلارغىمۇ قىزىقىشىڭىز مۇمكىن
مۇقەددەس كىتاب. سوئال-جاۋاب
مۇقەددەس كىتابتا ئەيسا پەيغەمبەرنىڭ ھاياتى توغرۇلۇق يېزىلغانلار توغرىمۇ؟
ئىنجىلدا يېزىلغانلار ۋە ئەڭ كونا قوليازمىلار ھەققىدىكى مەلۇماتنى ئوقۇپ كۆرۈڭ.
مۇقەددەس كىتابنىڭ ئاساسىي تەلىملىرى
مۇقەددەس كىتاب خۇدادىنمۇ؟
مۇقەددەس كىتاب خۇدادىن كەلگەن بولسا، ئۇ باشقا ھەرقانداق كىتابتىن پەرقلىنىشى كېرەك.
بىز ھەققىدە
ئۇچرىشىشنى ئىلتىماس قىلىڭ
مۇقەددەس كىتابتىكى سوئالنى مۇھاكىمە قىلىڭ ياكى يەھۋا گۇۋاھچىلىرى توغرۇلۇق كۆپرەك بىلىڭ.