ئائىلىلەر ئۈچۈن ياردەم
كۆزقارىشىڭلار پەرقلەنگەندە
ئەر-ئايالنىڭ قىزىقىشلىرى بىلەن ئادەتلىرىنىڭ پەرقلىنىشى ۋە مىجەز-خۇلقىنىڭ ئالاھىدىلىكلىرى تۈپەيلىدىن كېلىشمەسلىكلەر پەيدا بولۇشى مۇمكىن. ئەمما بەزى مەسىلىلەردە، مەسىلەن تۆۋەندە كەلتۈرۈلگەنلىرىدە، تېخىمۇ قىيىن بولۇشى ئېھتىمال:
ئۇرۇق-تۇغقانلارغا قانچە ۋاقىت بۆلۈش
پۇلنى قانداق خىراجەت قىلىش
بالىلىق بولۇش-بولماسلىق
ەگەر ئىككىڭىزنىڭ كۆزقارىشى پەرقلىنىدىغان بولسا، ئۆمۈرلۈك جۈپتىڭىز بىلەن قانداق تىل تاپالايسىز؟
سىز نېمىنى بىلىشىڭىز كېرەك؟
ئەر-ئايالنىڭ بىر-بىرىگە لايىق بولۇشى ئويى بىر يەردىن چىقىدىغانلىقىنى بىلدۈرمەيدۇ. بىر-بىرىگە ئاجايىپ ماس كېلىدىغان ئەر-ئايال، ھەتتا مۇھىم مەسىلىلەردىمۇ، ھەردائىم ئوخشاش ئوي-پىكىردە بولمايدۇ.
«مەن ئىناق ئائىلىدە چوڭ بولدۇم. شەنبە-يەكشەنبە كۈنلىرى بىز بارلىق ئۇرۇق-تۇغقانلار بىلەن بىللە يىغىلاتتۇق. ئەمما ھەمراھىمنىڭ ئائىلىسى تامامەن باشقىچە ئىدى. شۇڭا ئۇرۇق-تۇغقانلار بىلەن، ھەتتا يىراقتا تۇرىدىغانلىرى بىلەن، قانچە ۋاقىت ئۆتكۈزۈش كېرەكلىكىمىز ھەققىدىكى پىكىرلىرىمىز پەرقلىنەتتى» (تامارا).
«ئايالىم ئىككىمىزنىڭ پۇلنى قانداق خىراجەت قىلىشقا باغلىق كۆزقارىشىمىز ھەر تۈرلۈك بولدى. بۇنىڭغا ئالغان تەربىيىمىز سەۋەب بولغان. توي قىلىشتىن كېيىن بىرنەچچە ئاي داۋامىدا پۇل مەسىلىسى تۈپەيلىدىن بىرقانچە قېتىم تاكاللاشتۇق» (تايلېر).
ئىككى كىشى ئوخشاش بىر مەنزىرىگە قاراپ، ئىككى خىل نەرسىلەرنى كۆرۈشى مۇمكىن. نەق شۇنىڭغا ئوخشاش، ئەر-ئايالنىڭمۇ بىر مەسىلىگە مۇناسىۋەتلىك كۆزقارىشى پەرقلىنىشى مۇمكىن
بەزى كېلىشمەسلىكلەرنى پەقەتلا كېلىشىش ئارقىلىق بىر تەرەپ قىلىش يېتەرلىك ئەمەس. مەسىلەن، قېيىناتا ياكى قېيىنانا ئاغرىپ قېلىپ، ياردەمگە مۇھتاج بولۇپ قالسىچۇ؟ ئېرى ياكى ئايالى بالىلىق بولۇشنى خالىغاندا، جورىسى خالىمىسىچۇ a؟
«ئايالىم ئىككىمىز بالىلىق بولۇش-بولماسلىق ھەققىدە بىرنەچچە قېتىم خېلە ئۇزاق پاراڭلاشتۇق. ئۇ بۇ ھەققىدە بارغانسېرى كۆپ ئويلىۋاتىدۇ ھەم بىزنىڭ بۇنىڭغا نىسبەتەن كۆزقارىشىمىز تېخىمۇ كۆپ پەرقلىنىۋاتىدۇ. بىز ھېچقاچان كېلىشمەيمىز دەپ ئويلايمەن» (ئالېكس).
ھەر تۈرلۈك كۆزقاراشلار نىكاھڭىزنىڭ بەختلىك بولالمايدىغانلىقىنى بىلدۈرمەيدۇ. بەزى مۇتەخەسسىسلەرنىڭ ئېيتىشىچە، يارىڭىز بىلەن مۇھىم بىر مەسىلىدە كېلىشەلمەيدىغان بولسىڭىز، سىز ئاخىرىغىچە، ھەتتا ئاجرىشىشقا قەدەر، ئۆز دېگىنىڭىزدە تۇرۇۋېلىشىڭىز كېرەك. لېكىن مەسىلىنىڭ بۇنداق «ھەل قىلىنىشى»، ھەمرايىڭىزغا نېمىلا بولمىسۇن چاپلىشىمەن دېگەن خۇدانىڭ ئالدىدا بېرىلگەن قەسىمىڭىزگە ئەمەس، سىزنىڭ ھېس-تۇيغۇلىرىڭىزغا كۆپرەك دىققەت بۆلىدۇ.
سىز نېمە قىلالايسىز؟
نىكاھ قەسىمىڭىزگە ھۆرمەت كۆرسىتىشكە بەل باغلاڭ. بۇنداق قىلساڭلار، سىز ھەرقانداق مەسىلىگە قارشىلاشقۇچىلاردەك ئەمەس، بەلكى ئىتتىپاقداشلاردەك قارايسىلەر.
مۇقەددەس كىتاب پرىنسىپى: «خۇدا بىر بويۇنتۇرۇق بىلەن قوشقاننى ئادەم ئايرىمىسۇن» (مەتتا 19:6).
بارلىق خىراجەتلەرنى ھېسابلاپ چىقىڭلار. ئەر-ئايالنىڭ بىرى بالىلىق بولۇشنى خالىسا، باشقىسى خالىمايدۇ دەيلى. بۇ ئەھۋالدا تۆۋەندىكىدەك بىرقانچە ئامىلنى كۆرۈپ چىقىش لازىم:
نىكاھڭىزنىڭ قانچىلىك مەھكەم بولۇشى.
سىلەر بالا تەربىيىلەش بىلەن باغلىق بولغان قوشۇمچە بېسىمنى كۆتىرەلەمسىلەر؟
ئاتا-ئانا بولۇش بىلەن باغلىق بولغان مەسئۇلىيەت.
بۇ مەسئۇلىيەتكە پەقەتلا ئوزۇق-تۈلۈك، كىيىم-كېچەك ۋە پانا جاي بىلەن تەمىنلەش كىرمەيدۇ.
سىزنىڭ ماددىي ئەھۋالىڭىز.
سىز ئىش، ئائىلە ۋە باشقىمۇ ۋەزىپىلەرنى تەڭ ئېلىپ كېتەلەمسىز؟
مۇقەددەس كىتاب پرىنسىپى: «ئەگەر ئاراڭلاردىن بىرىڭلار مۇنارە سالماقچى بولسا، ئۇ بالدۇر ئولتۇرۇپ، بارلىق خىراجىتىنى ھېسابلاپ چىقماسمۇ؟» (لۇقا 14:28).
مەسىلىنى ھەممە تەرەپتىن كۆرۈپ چىقىڭ. بەلكىم، كېلىشمەسلىكلەرنى قانداقتۇ بىر مەلۇم دەرىجىدە ھەل قىلىشقا بولىدۇ. مەسىلەن، پەرزەنت كۆرۈش مەسىلىسىدە بىر پىكىرگە كەلمىگەن بولسىڭىز، ئۇنىمايدىغان جورا ئۆزىدىن مۇنداق سورىسا بولىدۇ:
«مەن بالىلىق بولۇشنى پەقەتلا ھازىرچە خالىمايمەنمۇ ياكى تامامەن خالىمايمەنمۇ؟»
«مەن ياخشى ئاتا-ئانا بولالايدىغانلىقىمغا گۇمانلانغانلىقتىن ئۆزۈمنى بالىلىق بولۇشتىن تارتىمەنمۇ؟»
«جورام مېنى ئېتىبارسىز قالدۇرىدۇ دەپ قورقىمەنمۇ؟»
باشقا تەرەپتىن، پەرزەنت كۆرۈشنى خالايدىغان جورا ئۆزىگە تۆۋەندىكى سوئاللارنى قويالايدۇ:
«بىز ئاتا-ئانا بولۇش ۋەزىپىسىنى ئاتقۇرۇش ئۈچۈن تەييارمۇ؟»
«بالا بېقىشقا باغلىق بولغان چىقىملارنى كۆتىرەلەيمىزمۇ؟»
مۇقەددەس كىتاب پرىنسىپى: «ئەرشتىن چۈشكەن دانالىق... ئەقىل-پاراسەتلىك» (ياقۇپ 3:17).
يارىڭىزنىڭ كۆزقارىشىنىڭ ئارتۇقچىلىقلىرىنى ئېتىراپ قىلىڭ. ئىككى كىشى ئوخشاش بىر مەنزىرىگە قاراپ، ئىككى خىل نەرسىلەرنى كۆرۈشى مۇمكىن. نەق شۇنىڭغا ئوخشاش، ئەر-ئايالمۇ ئوخشاش مەسىلىگە، مەسىلەن، پۇلنى قانداق خىراجەت قىلىشقا، ئىككى تۈرلۈك كۆزقاراشتا بولۇشى ئېھتىمال. كۆزقاراشلىرىڭىز پەرقلىنىدىغان ھەرقانداق شارائىتنى مۇھاكىمە قىلىشتىن ئاۋۋال، ئىككىڭىزگە ئورتاق بولغان نەرسىلەردىن باشلاڭلار.
ئورتاق مەخسەتلىرىڭلار قانداق؟
ھەربىرىڭىزنىڭ كۆزقارىشىنىڭ قانداق ئارتۇقچىلىقلىرى بار؟
نىكاھڭىزنى ساقلاپ قېلىش ئۈچۈن، ئىككىڭلار، يە بولمىسا، بىرىڭلار پىكرىڭلارنى ئۆزگەرتەلەمسىلەر؟
مۇقەددەس كىتاب پرىنسىپى: «ھەركىم ئۆزىنىڭ پايدىسىنى ئەمەس، باشقىسىنىڭ پايدىسىنى ئىزدىسۇن» (كورىنتلىقلارغا 1-خەت 10:24).
a مۇھىم سوئاللار توي قىلىشتىن بۇرۇن مۇھاكىمە قىلىنىشى كېرەك. شۇنداق بولسىمۇ، كۈتۈلمىگەن ئەھۋاللار ئورۇن ئېلىشى مۇمكىن، يە بولمىسا ۋاقىت ئۆتۈپ بىر جورىنىڭ پىكرى ئۆزگىرىپ كېتىشى ئېھتىمال (ۋەز 9:11).