ئائىلىلەر ئۈچۈن ياردەم
بالىڭىزغا مەكتەپتە ياخشى ئوقۇشى ئۈچۈن قانداق ياردەم بېرەلەيسىز؟
پەرزەندىڭىز مەكتەپتە ئوقۇشنى ياخشى كۆرمەيدۇ ۋە ئۆي تاپشۇرۇقلىرىنى ئورۇنلاشتىن قاچىدۇ دەيلى. نەتىجىسىدە، ئۇنىڭ باھالىرى تۆۋەنلەپ كېتىپ، يۈرۈش-تۇرۇشىمۇ ناچارلىشىۋاتىدۇ. بالىڭىزغا مەكتەپتە ياخشى ئوقۇشى ئۈچۈن قانداق ياردەم بېرەلەيسىز؟
سىز نېمىنى بىلىشىڭىز كېرەك؟
بالىغا بېسىم قىلىش ۋەزىيەتنى تېخىمۇ كەسكىنلەشتۈرىدۇ. پەرزەندىڭىزگە بېسىم كۆرسەتسىڭىز، ئۇ مەكتەپتە ھەم ئۆيدە ئەنسىرەيدۇ. مېنى تىللايدۇ دەپ قورقۇپ، بالا يالغان ئېيتىشى، ناچار باھالىرىنى يوشۇرۇشى، سىزنىڭ ئىمزايىڭىزنى ئوخشىتىپ ياسىشى ياكى ساۋاقتىن قېچىشى مۇمكىن. دېمەك، بالىغا بېسىم قىلىش ئەھۋالنى تېخىمۇ ناچارلىتىدۇ.
بالىغا سوۋغات بېرىپ ياخشى ئوقۇشقا ئۈندەش يامان نەتىجىگە ئېلىپ كېلەلەيدۇ. يندريۇ ئىسىملىق بىر دادا مۇنداق دەيدۇ: «قىزىمىزنى ياخشى ئوقۇشقا دەۋەت قىلماقچى بولۇپ، بىز ئۇنىڭغا ياخشى باھالىرى ئۈچۈن سوۋغاتلارنى بېرەتتۇق. ئەمما نەتىجىدە ئۇ پەقەت مۇكاپاتقا كۆڭۈل بۆلىدىغان بولدى. ناچار باھا ئالغاندا ئۇ باھاسىغا ئەمەس، سوۋغاتسىز قالغانلىقىغا خاپا بولاتتى».
مۇەللىملەرنى ئەيىبلەشنىڭ ھېچ پايدىسى يوق. شۇنداق قىلسىڭىز، بالىڭىز ياخشى نەتىجىلەر ئۈچۈن تەر تۆكۈشنىڭ ھېچ ھاجىتى يوق دەپ ئويلاپ قېلىشى ئېھتىمال. شۇنداقلا ئۇ خاتالىقلىرى ئۈچۈن باشقىلارنى ئەيىبلەپ، قىيىنچىلىقلىرىمنى ئۇلار ھەل قىلىدۇ دەپ كۈتۈشى مۇمكىن. قىسقىچە ئېيتقاندا، پەرزەندىڭىزنىڭ تۆۋەن باھالىرى ئۈچۈن مۇەللىملەرنى ئەيىبلىسىڭىز، بالىڭىز ئۆز ئىشلىرى ئۈچۈن جاۋاپكار بولۇشنى ئۈگەنمەيدۇ. بۇ خىسلەت ئۇنىڭغا چوڭ بولغاندا كېرەك بولىدۇ.
سىز نېمە قىلالايسىز؟
ئچچىقىڭىزنى بېسىڭ. ئاچچىقلانغان چاغدا، بالىڭىز بىلەن مەكتەپتىكى باھالىرى ھەققىدە سۆزلەشمەڭ. «ئايالىم ئىككىمىزنىڭ بالىلىرىمىزنى تىللىماي، سەۋرچانى ساقلاپ، ئۇلارغا مېھرىبانلىق بىلەن سۆزلەشكەندە، ياخشى نەتىجىگە ئېرىشەلەيدىغانلىقىمىزغا كۆزۈمىز يەتتى»،— دەپ ئېيتتى برېتت ئىسىملىق بىر دادا.
مۇقەددەس كىتاب پرىنسىپى: «ئاڭلاشقا تېز، سۆزلەشكە ئالدىرىمايدىغان، غەزەپكە ئالدىرىمايدىغان بولۇ[ڭلار]» (ياقۇپ 1:19).
قىيىنچىلىقنىڭ سەۋەبىنى ئېنىقلاۋېلىڭ. بالىڭىزنى ھورۇن دەپ ئويلاشقا ئالدىرىماڭ. پەرزەندىڭىزنىڭ باھالىرى تۆۋەنلەپ كېتىشىگە بۇ سەۋەب بولۇشى مۇمكىن: لۆكچەكلەرنى ئۇچرىتىش، باشقا مەكتەپكە يۆتكىلىش، ئېمتىھان ئالدىدا ئەنسىرەش، ئائىلىۋى قىيىنچىلىقلار، ئۇيقۇسىنى قاندۇرمىغانلىق، ۋاقىتنى ناتوغرا ئىشلىتىش ياكى دەرىسلەرگە كۆڭۈل بۆلمەسلىك.
مۇقەددەس كىتاب پرىنسىپى: «نەسىھەت سۆزىگە كۆڭۈل قويغان پايدا تاپار» (پەندى-نەسىھەت 16:20).
دەرىس ئوقۇش ئۈچۈن ھەممە شارائىتلارنى يارىتىپ بېرىڭ. بالىڭىزغا دەرىس ئوقۇش ۋە ئۆي تاپشۇرۇقلىرىنى ئورۇنلاش ئۈچۈن ۋاقىتنى بەلگۈلەپ قويۇڭ. ئۇنىڭ ساۋاق ئوقۇيدىغان يېرى تىنچ بولۇشى كېرەك. ئۇ يەردە دىققىتىنى چاچىدىغان ھېچنەرسە (شۇنىڭ ئىچىدە تېلېۋىزور ۋە يانفون) بولماسلىقى لازىم. پەرزەندىڭىز قىينالماسلىقى ئۈچۈن ئۆي تاپشۇرۇقلىرىنى بۆلۈپ-بۆلۈپ ئورۇنلىسۇن. گېرمانىيادە ياشايدىغان گېكتور ئىسىملىق بىر دادا مۇنداق دەيدۇ: «تەكشۈرۈش ئىشىنىڭ بولىدىغانلىقىنى بىلگەندە بىز ئاخىرقى مىنۇتقىچە كۈتمەي، ھەر كۈنى پەيدىن-پەي تەييارلىق كۆرۈمىز».
مۇقەددەس كىتاب پرىنسىپى: «ھەربىر ئىشنىڭ مۇۋاپىق پەسلى بار» (ۋەز 3:1).
ياخشى ئوقۇشقا دەۋەت قىلىڭ. بالىڭىز مەكتەپتە ئوقۇش ھازىرنىڭ ئۆزىدە ئۇنىڭغا پايدا كەلتۈرەلەيدىغانلىقىنى چۈشەنسە، ئۇنىڭ ئوقۇشقا بولغان قىزىقىشى كۈچىيىدۇ. مەسىلەن، ماتېماتىكا پەنىنى ياخشى ئوقۇسا، ئۇنىڭغا بېرىلگەن پۇلنى دانالىق بىلەن ئىشلىتەلەيدۇ.
مۇقەددەس كىتاب پرىنسىپى: «دانالىقنى ئالغىن، ئەقىل تاپ، [ئۇنى] ئەتىۋارلىقىن» (پەندى-نەسىھەت 4:5، 8).
مەسلىھەت: پەرزەندىڭىزگە ئۆي تاپشۇرۇقلىرىنى ئورۇنلاشقا ياردەملىشىڭ، ئەمما ئۇلارنى ئۆزىڭىز ئورۇنلاپ قويماڭ. يندريۇ مۇنداق دەيدۇ: «قىزىمىز بىزنىڭ ئەقلىمىزگە تايىنىپ، ئۆز ئەقلىنى ئىشلەتكۈسى كەلمىدى». بالىڭىزغا ئۆي تاپشۇرۇقلىرىنى ئۆزى قانداق ئورۇنلالايدىغانلىقىنى ئۆگىتىڭ.