Павел ӟеч иворез тодытыса ветлэ

ХРИСТИАНИН луыса, Павел Инмарлэн Эксэйлыкез сярысь ӟеч иворез мылысь-кыдысь тодытӥз. Азьвыл со уйылӥсь-уллясь вал, нош табере ачиз лек пумитъяськонъёсын ӵем пумиськылӥз. Жадёнэз валасьтэм апостол трос тодытыса ветлӥз Эксэйлык сярысь, кудӥз Инмарлэсь нырысь малпанзэ быдэстоз.

Листраын, тодытыса нырысетӥзэ ветлон дыръяз, Павел бурмытӥз вордскем дырысеныз чут адямиез. Люкаськем калык Павелэз но солэсь эшсэ Варнаваез инмаръёс шуыса лыдъяз, соослы курбон но вайыны малпаз. Павел но Варнава мырдэм соосты оскытӥзы, озьы медаз лэсьтэ шуыса. Озьы ке но, ӝоген со адямиос ик, Павеллэн тушмонъёсызлэн узатэменызы, апостолэз изъёсын зӥръязы но, со кулӥз шуыса малпаса, кар сьӧры поттӥзы. Нош Павел улэп кылиз но берлогес, дышетскисьёслэсь мылкыдзэс ӝутон но соосты юнматон понна, выльысь Листрае берытскиз.

Еврейёс пӧлысь куд-ог христианъёс веразы, еврейёс луисьтэм христианъёслы Моисейлэн катысьтыз куд-ог люкетъёссэ чаклано шуыса. Та юанэз Павел Иерусалимысь апостолъёслы но тӧроослы сётӥз. Та пиосмуртъёс Гожтэмъёсты пыр-поч эскеризы но Инмарлэн святой духезлэн кивалтэмез улсын кенешъёслы гожтэт гожтӥзы, кудаз христианъёсты ӧтизы сульдэръёслы курбон сётэм сиёнлэсь, вирлэсь, кекам пудолэн сӥлезлэсь (кытысь вирыз лэземын ӧй вал) но азон-калгонлэсь возиськыны. «Таизэ, тужгес кулэ луисьсэ» христианъёслы быдэсъяны кулэ вал, нош Моисейлэсь катсэ соослы чаклано ӧй вал (Апостолъёслэн ужъёссы 15:28, 29).

Тодытыса кыкетӥзэ ветлон дыръяз, Павел вуылӥз Верие — каре, кудӥз туала Грецилэн музъемаз интыяськемын вал. Отын улӥсь иудейёс сюлмысь оскизы Инмарлэн кылъёсызлы, нуналлы быдэ Гожтэмъя пыр-поч эскерыса сое, малы Павел дышетӥз. Нош ик пумитъяськонъёс сэрен, апостол кошконо луиз — табере Афиные. Отын Павел дышетскем адямиос азьын вераськиз. Солэн туж умой веранэз яркыт возьматӥз, кызьы усто вераськоно, шӧдӥсь-валась луоно но астэ возьыны быгатоно.

Тодытыса куинетӥзэ ветлон бераз, Павел Иерусалиме мынӥз. Куке со храме лыктӥз, иудейёс вань калыкез бугыртӥзы но Павелэз виыны тыршизы. Но рим ожгарчиос соос вискы пыриськизы но Павеллэсь юалляськыса тодӥзы, со Римлэн кунмуртэз луэ шуыса. Соин ик апостоллы берлогес луонлык сётэмын вал Феликс кивалтӥсь азьын ассэ утьыны. Иудейёс Павелэз янгыше уськытӥзы, нош доказательствооссы ӧй вал. Соос кие сюронтэм вылысь, со Фестлы, Рим кунысь мукет кивалтӥсьлы, вазиськиз: «Кесарьлэсь судзэ курисько». Соку Фест шуиз: «Кесарь доры ик мынод» (Апостолъёслэн ужъёссы 25:11, 12).

Павелэз кораблен Италие лэзизы, кытын со суд азе султыны кулэ вал. Корабль куашканэ-выёнэ сюриз но, апостоллы Мальта шормуӵын толзэ ортчытоно луиз. Риме вуыса, Павел кык ар улӥз огдырлы басьтэм коркан. Апостолэз ожгарчиос возьмаса возизы ке но, азьло сямен ик, со Инмар Эксэйлык сярысь мылысь-кыдысь тодытӥз ваньмызлы, кин со доры вуылӥз.

Пыкиськемын: Апостолъёслэн ужъёссы 11:22—28:31.