Инмар Дуннеез но Музъем вылысь улонэз кылдытэ; со дун-шектэм пиосмуртэз но кышномуртэз кылдытэ, соосты туж чебер садэ улыны интыя но соослы курон-косонъёс сётэ

«КУТСКОНАЗ ик Инмар инмез но музъемез кылдытӥз» (Улон-вылон 1:1). Та огшоры но, со дыре ик, сюлме пырись кылъёс куке но гожтэм кутскон кылъёс пӧлысь тужгес но тодмо луо. Озьы Библия тодматэ милемыз ваньзэ быгатӥсь Инмарен, Иеговаен, кудӥз Священной Гожтэмын валтӥсь инты басьтэ. Библилэн нырысетӥ кылбуръёсаз вераське, Инмар быдэс Дуннелэн но Музъемлэн, кытын ми улӥськомы, Кылдытӥсез луэ шуыса. Азьланяз валэктӥське, кема кыстӥськись вакытъёс ӵоже, кудъёсыз нуналъёс шуыса нимамын, Инмар адямиослы улыны ярамон музъемез дасяз но паймымон инкуазез кылдытӥз шуыса.

Инмарлэн музъем вылын кылдытэмъёсыз пӧлысь тужгес но умоез луиз адями. Со Инмарлы укшатыса кылдытэмын вал, мукет сямен вераса, со быгатэ вал Инмарлэсь сямъёссэ возьматыны, кылсярысь, яратонэз но визьлыкез. Иегова адямиез сюй-тузонлэсь кылдытӥз, сое Адам шуыса нимаз но рае, Едем садэ, улыны интыяз. Со садэ Инмар емыш сётӥсь чебер писпуосты мерттӥз.

Инмар тодӥз, адямилы юрттӥсь кулэ шуыса. Адамлэн урдлыезлэсь Инмар кышномуртэз кылдытӥз но со доры вайиз. Со Адамлэн кышноез луиз, но берлогес Ева шуыса нимамын вал. Сюлмыз шумпотонэн пачылмыса, Адам кылбуръёс гожтӥз: «Тани, та лы мынам лыосы пӧлысь, та мугор но мынам мугорылэсь пӧрмытэмын». Инмар вераз: «Со понна ик адями аслэсьтыз атайзэ, аслэсьтыз анайзэ кельтоз но кышноез борды лякиськоз: кыкназы одӥг лулмугор луозы» (Улон-вылон 2:22—24; 3:20).

Инмар Адамлы но Евалы кык курон-косонъёс сётӥз. Нырысетӥез, со косӥз соосты музъем ужез ужаны, музъем сярысь сюлмаськыны но дыр ортчемъя сое адямиосын тырмытыны. Кыкетӥез, со ӧз лэзьы соосты бадӟым Едем садысь одӥг гинэ писпулэсь, «ӟечез но уродэз тодон писпулэсь», емышъёссэ сиыны (Улон-вылон 2:17). Соос ӧз кылзӥськысалзы ке, кулысалзы. Пиосмуртлы но кышномуртлы та курон-косонъёсты сётыса, Инмар соослы луонлык сётӥз возьматыны, соос Инмарез Кивалтӥсен лыдъяло но солэсь кылзӥсько шуыса. Кылзӥськыса, соос озьы ик асьсэлэсь яратэмзэс но тау каремзэс возьматыны быгато вал. Соослэн ӧй вал мугъёссы кылзӥськытэк улыны кивалтэтлэсь, кудӥз соослы шуд вае вал. Дун-шектэм адямиослэн изъянзы ӧй вал. Библиын вераське: «Инмар адӟиз, Солэн Аслаз вань кылдытэмез туж умой луэ шуыса» (Улон-вылон 1:31).

Пыкиськемын: Улон-вылон, 1-тӥ но 2-тӥ люкетъёс.