Павеллэн гожтэтъёсыз нырысетӥ христианъёсты юнмато

АЛИГЕС кылдэм христиан кенеш Иеговалэсь малпанзэ быдэстонын бадӟым инты басьтыны кулэ вал. Ӝоген, кылдэм бераз, со уйылон-уллянъёсын пумиськиз. Нош кылёзы-а нырысетӥ христианъёс Инмарлы оскымон, кенеш пӧлысь шуг-секытъёс но палэнысь уллянъёс шоры учкытэк? Христиан Грек Гожтэмъёс пӧлы 21 гожтэт пыре. Отын кулэ луись визьнод но буйгатон сётэмын.

Со гожтэтъёс пӧлысь 14-зэ гожтӥз апостол Павел — Римъёслы гожтэтысен Еврейёслы гожтэтозь. Гожтэтъёслэн йыръянъёсазы христиан кенешъёслэн яке адямиослэн нимъёссы гожтэмын, кудъёсызлы соос ыстэмын. Тани Павеллэн гожтэтъёсаз ӝутэм куд-ог темаос.

Вылӥ эсэпъёсъя улон но астэ возён. Азыса-калгыса улӥсьёс, мурт пиосмуртэн яке мурт кышномуртэн сьӧлыкасьёс но мукет секыт сьӧлык лэсьтӥсьёс «Инмар Эксэйлыкын люкет уг басьто» (Галатъёслы 5:19—21; 1 Коринфъёслы 6:9—11). Инмарлэн ужась-тыршисьёсыз огкылысь улыны кулэ, кыӵе гинэ калыкысь соос медаз луэ (Римъёслы 2:11; Ефесъёслы 4:1—6). Соос ёрмыса улӥсь огъя оскисьёссылы сюлмысь юрттыны кулэ (2 Коринфъёслы 9:7). Павел визь-кенеш сётэ: «Дугдылытэк вӧсяське». Апостол христианъёсты ӧте сюлмысь мур шӧдонъёссэс Иеговалы усьтыны (1 Фессалоникаослы 5:17; 2 Фессалоникаослы 3:1; Филиппыослы 4:6, 7). Инмар соосты мед кылоз шуыса, соослы оскыса вазиськыны кулэ (Еврейёслы 11:6).

Мар юрттоз семьяослы юнэсь луыны? Карт кышнозэ аслэсьтыз мугорзэ кадь яратыны кулэ, нош кышно картсэ мур гажаны кулэ. Нылпиос анай-атайзылэсь кылзӥськыны кулэ, малы ке шуоно со Инмарлы ярамон луэ. Анай-атайёслы нылпиоссэс яратыса но Инмарлэн Кылысьтыз визь-кенешъёссэ кутыса будэтыны кулэ (Ефесъёслы 5:22—6:4; Колоссыослы 3:18—21).

Инмарлэсь малпанзэ валан. Христос лыктытозь Моисейлэн катысьтыз тросэз люкетъёсыз израиль калыкез утизы но кивалтэт сётӥзы (Галатъёслы 3:24). Нош христианъёслы та Катэз чакланы кулэ ӧй вал. Еврейёслы, иудейёс пӧлысь потэм христианъёслы, гожтэтаз Павел пыр-поч валэктӥз, малы Моисейлэн катэз сётэмын вал, но кызьы Инмарлэн малпанэз Христос пыр быдэсме. Апостол гожъяз, Катлэн аспӧртэмлыко интыосыз азьпалэз сярысь  верало вал шуыса. Кылсярысь, пудо-животъёсты курбонлы сётон Иисуслэн мозмытӥсь курбонэзлэн вужерез вал, кудӥз сьӧлыкъёсты зэмзэ ик куштыны быгатоз (Еврейёслы 10:1—4). Инмар Христослэн кулонэныз Катлэсь тупанкылзэ вужмемын шуыса возьматӥз, малы ке шуоно со быдэстӥз сое, малы сётэмын вал (Колоссыослы 2:13—17; Еврейёслы 8:13).

Кенешлэн ужез. Кенешын дано ужъёс быдэсъяны мылкыд карись пиосмуртъёслы вылӥ эсэпъёсъя улоно но духовной ласянь быдэ вуоно (1 Тимофейлы 3:1—10, 12; Титлы 1:5—9). Иеговалэн ужась-тыршисьёсызлы ялан огазе люкаськоно но ог-огзылэсь мылкыдзэс ӝутоно (Еврейёслы 10:24, 25). Христиан пумиськонъёс юнматыны но визьноданы кулэ (1 Коринфъёслы 14:26, 31).

Тимофейлы кык гожтэтъёсыз пӧлысь кыкетӥзэ Павел Римын гожтӥз. Апостол нош ик пытсэтын вал но витиз, ку сое судъялозы. Павеллэн куд-ог эшъёсыз гинэ со доры лыктыны дӥсьтӥзы. Со валаз, солэн дырыз ӧжыт кылемын шуыса. «Мон зол нюръяськи,— гожъяз со,— ортчоно сюресме ортчи ни, но осконме ути» (2 Тимофейлы 4:7). Со бере ик, вылды, Павел казнить каремын вал. Озьы ке но солэн гожтэтъёсыз асьме нуналъёсы но зэмос христианъёслы кивалтэт сёто.

Пыкиськемын: Римъёслы; 1 но 2 Коринфъёслы; Галатъёслы; Ефесъёслы; Филиппыослы; Колоссыослы; 1 но 2 Фессалоникаослы; 1 но 2 Тимофейлы; Титлы; Филимонлы; Еврейёслы.