Библиысь валэктон

 Иисус аслэсьтыз улонзэ оскись адямиос понна сётӥз. Озьы со соос понна дун тыриз но соосты кулонлэсь утиз (Матфей 20:28). Соин Библиын Иисус «дуннеез Утись» шуэмын (1 Иоанн 4:14). Озьы ик Библиын гожтэмын: «Со бордын сяна, нокин бордын но утиськон ӧвӧл. Инбам улын адямиослы сётэмын ӧвӧл мукет ним, кудӥз пыр асьмеос мед быгатысалмы утиськыны» (Апостолъёслэн ужъёссы 4:11, 12).

 Иисус «кулонэз веръяно луиз» ваньмыз понна, кин солы оске (Еврейёслы 2:9; Иоанн 3:16). Собере «Инмар Сое кулэмысь улӟытӥз» но, Иисус, кылчин луыса, инме берытскиз (Апостолъёслэн ужъёссы 3:15). Инмын улыса, «Со Ачиз пыр Инмар доры лыктӥсьёсты котьку но утьыны быгатэ. Со котьку но улэп бере, соос понна Со дурбасьтэ» (Еврейёслы 7:25).

Малы Иисус ми понна дурбасьтыны кулэ?

 Ваньмы ми сьӧлыкаськомы (Римъёслы 3:23). Сьӧлык люкетэ милемлы Инмарен эшъяськыны; сьӧлык кулонэ вуттэ (Римъёслы 6:23). Но Иисус Христос Атай азьын дурбасьтэ соос понна, кинъёс оско Иисуслэн дун тыремезлы (1 Иоанн 2:1). Иисус куре, Инмар милесьтым вӧсяськонъёсмес мед кылзоз но сьӧлыкъёсмес мед куштоз шуыса (Матфей 1:21; Римъёслы 8:34). Иисуслэн куронъёсыз Инмарлэн эрикезъя луо бере, Инмар соосты кылзэ. Инмар Иисусэз музъем вылэ ыстӥз, «Со пыр дунне мед утиськоз шуыса» (Иоанн 3:17).

Утиськон понна, Христослы оскыны гинэ тырмыт-а?

 Ӧвӧл. Христослы оскыны кулэ, но утиськон понна эшшо мар ке но кулэ на (Апостолъёслэн ужъёссы 16:30, 31). Библиын верамын: «Кызьы мугор лултэк улыны уг быгаты, озьы ик оскон но ужъёстэк улыны уг быгаты» (Иаков 2:26). Утиськон понна, асьмелы кулэ:

•   Тодон-валан басьтыны Иисус сярысь но солэн Атаез, Иегова, сярысь (Иоанн 17:3).

•   Соослы осконмес юнматыны (Иоанн 12:44; 14:1).

•   Осконмес ужъёсын возьматыны. Со понна Иисуслэн но Инмарлэн куронъёссылэсь кылзӥськоно (Лука 6:46; 1 Иоанн 2:17). Иисус валэктӥз, котькудӥз ик сое «Кузё-Инмаре!» шуись мурт уз утиськы шуыса, нош утиськоз со гинэ, кин Инмысь Атайлэсь эриксэ быдэсъя (Матфей 7:21).

•   Шуг-секытъёсын пумиськыса но, Инмарлы оскеммес возьматыны. Уго Иисус вераз: «Пумозяз чидам мурт утиськоз» (Матфей 24:13).