Библиысь валэктон

 Армагеддон — со адями кивалтӥсьёс но Инмар куспын берпуметӥез ожмаськон. Адями кивалтӥсьёс но соос пала пырисьёс туннэ нуналозь Инмарлы пумитъясько, солы тэрытскемзы уг поты (Псалтирь 2:2). Армагеддон ож адямиослэн кивалтэмзылы пум поноз (Даниил 2:44).

 «Армагеддон» кыл Библиын одӥг пол гинэ пумиське, Усьтӥськонын 16:16. Та книгаысь азьпалзэ ивортон верамъя, «быдэс дунне вылысь музъем выл эксэйёс» «Дунне Кутӥсь Инмарлэн быдӟым нуналаз ожмаськонэ» люкамын луозы, «еврей сямен Армагеддон шуон интые» (Усьтӥськон 16:14).

 Кин Армагеддонын ожмаськоз? Иисус Христос инмысь ожмаськисьёсты нуоз но Инмарлэсь тушмонъёссэ вормоз (Усьтӥськон 19:11—16, 19—21). Инмарлэн тушмонъёсыз пӧлын соос, кинъёс Инмарлы уг тэрытско но Инмарез адӟонтэм каро (Иезекииль 39:7).

 Ортчоз-а Армагеддон ож Ближней Востокын? Уз. Армагеддон ож кыӵе ке нимысьтыз интыын уз ортчы, со быдэс музъем вылын луоз (Иеремия 25:32—34; Иезекииль 39:17—20).

 Армагеддон кыл, кудзэ куддыръя «Хар-Магедон» (еврей сямен Хар-Мегиддон) шуыса берыкто, «Мегиддон гурезь» шуэм луэ. Вашкала Израиль музъемын Мегиддон город вал. Историысь тодӥськомы, та город вӧзын трос бадӟым ожмаськонъёс ортчизы шуыса. Соос пӧлысь куд-огъёсыз сярысь Библиын гожтэмын (Судьяос 5:19, 20; 4 Эксэйлыкъёслэн 9:27; 23:29). Озьы ке но, Армагеддон кыл уг возьматы вашкала Мегиддон вӧзысь кыӵе ке нимысьтыз интыез. Отын ӝужыт гурезь ӧвӧл, нош Изреель нёжал уз тэрыты ваньзэс, кин Инмарлы пумит султоз. Армагеддон кыл возьматэ дуннеысь югдурез, куке вань калыкъёс люкаськозы но берпуметӥзэ Инмарлэн кивалтэтэзлы пумит султозы.

 Кыӵе югдур луоз Армагеддон дыръя? Асьмеос ум тодӥське, кызьы Армагеддон дыръя Инмар аслэсьтыз кужымзэ возьматоз. Но тодӥськомы, азьвыл со тушмонъёсыз вылэ лэзьылӥз: йӧзор, музъемзуркан, туж кужмо зор, тылэн ӵуждари, чилектэмъёс но висёнъёс (Иов 38:22, 23; Иезекииль 38:19, 22; Аввакум 3:10, 11; Захария 14:12). Инмарлэн куд-ог тушмонъёсыз кышкаменызы ог-огзэс виылыны кутскозы. Берло валалозы, соослы пумит Инмар ожмаське шуыса (Иезекииль 38:21, 23; Захария 14:13).

 Армагеддон дыръя дунне быроз-а? Музъем ноку но быдтэмын уз луы, со адямиослы улон-вылон понна кылдытэмын (Псалтирь 36:29; 95:10; Екклесиаст 1:4). Армагеддонын адямиос быдтэмын уз луэ, соос утемын луозы. Библиын верамын, Армагеддон пыр «туж-туж трос калык» потоз шуыса, со адямиос — Инмарлэн ужась-тыршисьёсыз (Усьтӥськон 7:9, 14; Псалтирь 36:34).

 Библиын кутӥськись «дунне» кыл Музъемез гинэ уг возьматы, нош озьы ик возьматэ лек адямиосты, кудъёсыз Инмарлы пумитъясько (1 Иоанн 2:15—17). Армагеддонын та лек адямиос быдтэмын луозы. Соин Библиын со сярысь «дунне бырон» шуыса верамын (Матфей 24:3).

 Ку луоз Армагеддон? «Бадӟым куректон» сярысь веракуз, кудӥз Армагеддон ожен йылпумъяськоз, Иисус шуиз: «Нош со нуналэз но часэз, одӥг Мынам Атае сяна, Инмысь Кылчинъёс но, нокин но уг тоды» (Матфей 24:21, 36). Озьы ке но Библиын верамын, Армагеддон Иисуслэн адскисьтэм лыктонэз бере луоз шуыса. Нош со лыктӥз 1914-тӥ арын (Матфей 24:37—39).