34-ТӤ УРОК

Кызьы Иеговалы яратэммес возьматоно?

ЛЭЗЁНО

Библиез дышетыса, тӥ шӧдӥды, дыр, Иеговаез юнгес яратыны кутскиды шуыса. Потэ-а тӥляд Иеговаез эшшо но юнгес яратэмды? Тодады возе, Иеговаез юнгес яратӥды ке, со но тӥледыз юнгес яратоз. Нош кызьы Иеговалы яратэммес возьматыны быгатомы?

1. Кызьы Иеговалы яратэммес возьматоно?

Иеговаез яратэммес возьматомы, солэсь кылзӥськимы ке. (Лыдӟе 1 Иоаннлэсь 5:3.) Иегова нокинэ кужмысь кылзӥськыны уг косы. Со котькуд адямилы быръён сётэ, кылзӥськоно-а солэсь, ӧвӧл-а. Малы? Малы ке шуоно Иеговалэн потэ, ми вань сюлмынымы мед кылзӥськомы шуыса (Римъёслы 6:17). Мукет кылъёсын вераса, Иегова возьма, ми яратэменымы солэсь мед кылзӥськомы шуыса. Та книгалэн 3-тӥ но 4-тӥ люкетъёсыз юрттозы милемлы дышетскыны лэсьтыны сое, мар Иеговалы кельше, но палэнскыны солэсь, мар солы уг кельшы.

2. Малы Иеговалэсь кылзӥськыны котьку ик капчи ӧвӧл?

Библиын верамын: «Шонер улӥсьлэн трос куректон-кайгуэз» (Псалтирь 33:20). Милемлы ваньмылы люкетэ сьӧлыко луэммы. Со сяна, ми пумиськыны быгатӥськомы коньдонэн герӟаськем шуг-секытъёсын, шонертэм ужъёсын, озьы ик мукет шуг-секытъёсын но. Шуг-секытъёсын пумиськыкумы, котьку ик Иеговалэсь кылзӥськыны капчи ӧвӧл, капчигес ас малпаммыя лэсьтыны. Но Иеговалэсь кылзӥськиськомы ке, ми солы оскымон кылиськомы. Соку Иегова но милемлы оскымон луэ. Со ноку но милемыз уз кельты. (Лыдӟе Псалтирез 4:4.)

МУРГЕС ЭСКЕРЕ

Ойдолэ тодомы, малы Иеговалы кельше, куке ми кылзӥськиськомы, но мар юрттоз милемлы кылзӥськыны.

3. Шайтан тӥледыз янгыше уськытэ

Библиысь Иов книгаысь асьмеос тодӥськомы, Шайтан Иовез гинэ янгыше ӧз уськыты шуыса. Со янгыше уськытӥз вань адямиосты, кудъёсызлэн Иеговалэсь кылзӥськемзы потэ. Лыдӟе Иов книгаез 1:1, 6—2:10 но та юанъёслы валэктонъёс сётэ:

Шайтан верамъя, малы Иов Иеговалэсь кылзӥськиз? (Учке Иов книгаез 1:9—11.)
Мар вераз Шайтан вань адямиос сярысь, тӥ сярысь но? (Учке Иов книгаез 2:4.)

Лыдӟе Иов книгаез 23:11, 12 но та юанлы валэктон сётэ:

Кызьы Иов возьматӥз, Иеговаез зэмзэ ик яратэ шуыса?

Иов Иеговалы оскымон кылиз но озьы аслэсьтыз яратэмзэ возьматӥз

Ми Иеговалы оскымон кылимы ке, озьы сое яратэммес возьматомы

4. Иеговаез шумпоттэ

Лыдӟе Мадёнъёсты 27:11 но та юанъёслы валэктонъёс сётэ:

Кызьы учке Иегова тӥ шоры, куке тӥ асьтэды визьмо возиськоды но солэсь кылзӥськиськоды? Малы?

5. Тӥ быгатӥськоды Иеговалы оскымон луыны

Ми Иеговаез яратӥськомы, соин ик милям со сярысь мукетъёсызлы вераммы потэ. Ми со сярысь вераськомы соку но, куке милемлы секыт, малы ке шуоно милям солы оскымон луэммы потэ. Учке ВИДЕОРОЛИКЕЗ но та юанъёслы валэктонъёс сётэ:

ВИДЕОРОЛИК: «Котьку дась луэ оскондэс утьыны» (5:09)

Секыт-а тӥледлы вераны мукетъёсызлы Иегова сярысь?
Мар юрттӥз Грейсонлы аслэсьтыз кышканзэ вормыны?

Ми яратӥмы ке сое, мае яратэ Иегова, но адӟонтэм каримы ке сое, мае со адӟонтэм каре, милемлы капчигес луоз солы оскымон кыльыны. Лыдӟе Псалтирез 96:10 но та юанъёслы валэктонъёс сётэ:

Лыдэ басьтыса сое, мае тӥ Иегова сярысь тодӥды ини, кызьы тӥ верасалды, мае со яратэ? Нош мае со адӟонтэм каре?
Кызьы дышетсконо яратыны сое, мае Инмар ӟечен лыдъя, но адӟонтэм карыны сое, мае со уродэн-лекен лыдъя?

6. Иеговалэсь кылзӥськон милемлы пайда вае

Инмарлэсь кылзӥськыса улон милемлы котьку пайда вае. Лыдӟе Исаиялэсь 48:17, 18 но та юанъёслы валэктонъёс сётэ:

Оскиськоды-а тӥ, Иегова котьку но тодэ шуыса, мар милемлы умойгес? Малы тӥ солы оскиськоды?
Кыӵе пайда вайиз ини тӥледлы Библиысь тодэмды но Иегова Инмар сярысь тодэмды?

КИН КЕ НО ЮАНЫ БЫГАТОЗ: «Быгато-а мынам ужъёсы Инмарез шумпоттыны?»