Валтӥсь материалъёсы выжоно

Пуштросаз выжоно

 11-ТӤ УРОК

Кыӵе пайда ваё милемлы Библиысь возетъёс?

Кыӵе пайда ваё милемлы Библиысь возетъёс?

1. Малы милемлы визь-кенешъёс кулэ?

Мар карыны милесьтым мылкыдмес ӝутэ Библиысь возет, кудӥз вера, улон — со Инмарлэн кузьымез шуыса? (ПСАЛТИРЬ 35:10).

Милям Кылдытӥсьмы милесьтым трослы визьмогес. Со, яратӥсь Атай кадь, ми сярысь сюлмаське но милемыз шуг-секытъёслэсь утемез потэ. Со сяна, ми Инмартэк улыны ум быгатӥське, малы ке шуоно ми озьы кылдытэмын (Иеремия 10:23). Кызьы пичи пиналъёслы кулэ, соос сярысь анай-атайёссы мед сюлмаськозы шуыса, озьы ик милемлы но ваньмылы кулэ, Кылдытӥсьмы милемлы визь-кенеш мед сётоз шуыса (Исаия 48:17, 18). Библиысь возетъёс — со визь-кенешъёс, кудъёсыз юртто милемлы улонамы. Со Инмарлэн кузьымез. (Лыдӟе 2 Тимофейлы 3:16.)

Иеговалэн законъёсыз но возетъёсыз дышето милемыз, кызьы ми али ик ини улонмес умойгес карыны быгатӥськомы но мар кароно, вуонояз пырак улон басьтон понна. Милемыз Инмар кылдытӥз бере, со ми сярысь ваньзэ тодэ, соин ик визьмо луоз солэн визь-кенешъёсызлэсь кылзӥськыны но соос понна тау карыны. (Лыдӟе Псалтирез 18:8, 12; Усьтӥськонэз 4:11.)

2. Мар со сыӵе Библиысь возетъёс?

Библиын кызьы законъёс, озьы ик возетъёс но вань. Законъёс шонерак верало, мар карыны яра, нош мар уг яра (Кыкетӥ Закон 22:8). Нош возетъёсты пӧртэм учыръёсын кутыны луэ. Кыӵе возетэз кутоно сояз яке таяз учырын валан понна, милемлы малпаськыны кулэ (Мадёнъёс 2:10—12). Кылсярысь, Библия дышетэ, улон — со Инмарлэн кузьымез шуыса. Та валтӥсь возет юрттоз милемлы чакласькыны, дорамы, уж дорамы яке кытчы ке мыныку милям улонмылы яке мукет адямилэн улонэзлы номыр кышкытлык медаз кылдыты шуыса. (Лыдӟе Апостолъёслэсь ужъёссэс 17:28.)

3. Кыӵе кык валтӥсь возетъёс вань?

Иисус вераз, кык валтӥсь возетъёс вань шуыса. Нырысетӥез  возет герӟаськемын соин, малы адями кылдытэмын вал — Инмарез тодыны, сое яратыны но солы оскымон ужаны-тыршыны. Улонамы кыӵе гинэ ужпум медам кутэ, та нырысетӥ возетэз милемлы котьку тодамы возёно (Мадёнъёс 3:6). Соос, кинъёс та возетъя уло, быгатозы Инмарлэн эшъёсыз луыны, пырак улыны но зэмзэ ик шудо луыны. (Лыдӟе Матфейлэсь 22:36—38.)

Кыкетӥез возет юрттоз милемлы котырысьтымы адямиосын тупаса улыны (1 Коринфъёслы 13:4—7). Та возетэз уже кутон понна, милемлы Инмарлэсь адӟем кароно но асьмеды адямиосын возёно озьы ик, кызьы со ассэ возе. (Лыдӟе Матфейлэсь 7:12; 22:39, 40.)

4. Кыӵе пайда вае милемлы Библиысь возетъёсъя улон?

Библиысь возетъёс семья кусыпъёсты юнмато но ог-огдэ зэмзэ ик яратыны юртто (Ефесъёслы 4:32; Колоссыослы 3:12, 14). Инмарлэн Кылаз эшшо одӥг кулэ луись возет гожтэмын на, кудӥз семья кусыпъёсты юнматэ. Библия дышетэ, кузпалъяськон — со быдэс улонлы кылдытэм кусыпъёс шуыса. (Лыдӟе Улон-вылонэз 2:24.)

Библиысь возетъёсъя улӥмы ке, милям котьку луоз кытын улыны, мар сиыны но мар дӥсяны, озьы ик сюлмамы но котьку каньыллык луоз. Кылсярысь, кивалтӥсьёслэн асьсэ доры ужаны басьтэмзы потэ сыӵе адямиосты, кинъёс уг пӧясько, нош мылысь-кыдысь ужало (Мадёнъёс 10:4, 26; Еврейёслы 13:18). Инмарлэн Кылыз дышетэ милемыз шумпотыны солы, мармы вань, но Инмарен кусыпъёсмес котькыӵе арберилэсь но вылӥе пуктыны. (Лыдӟе Матфейлэсь 6:24, 25, 33; 1 Тимофейлы 6:8—10.)

Библиысь возетъёсъя улон тазалыкмес утьыны юрттэ (Мадёнъёс 14:30; 22:24, 25). Кылсярысь, Библиын верамын, юыса улыны уг яра шуыса. Та удысын ми Инмарлэсь кылзӥськимы ке, со утёз милемыз кулонэ вуттӥсь висёнъёслэсь но шудтэм учыръёслэсь, кылсярысь, машинаен пазьгиськемлэсь (Мадёнъёс 23:20). Иегова лэзе вина юыны, но мултэс юоно ӧвӧл (Псалтирь 103:15; 1 Коринфъёслы 6:10). Инмарлэн возетъёсыз дышето милемыз чакланы, кызьы ми асьмеды возиськомы но мар малпаськомы (Псалтирь 118:97—100). Вераны кулэ, зэмос христианъёс Инмарлэн возетъёсызъя уг уло нырысь ик асьсэлы пайда басьтон понна. Соос Инмарлэн возетъёсызлэсь кылзӥсько, малы ке шуоно соослэн Иеговаез данъямзы потэ. (Лыдӟе Матфейлэсь 5:14—16.)