Валтӥсь материалъёсы выжоно

Пуштросаз выжоно

 8-ТӤ ЮАН

Мае тодыны кулэ эриктэман сярысь?

Мае тодыны кулэ эриктэман сярысь?

МАЛЫ СОЕ ТОДЫНЫ КУЛЭ

Котькуд ар трос миллион адямиос эриктэманэн яке мукет со выллем йыружъёсын пумисько. Нырысь ик эриктэмасьёс егитъёсты быръё.

МАР КАРОД ТОН?

Аннетт вылэ витьымтэ шорысь пиосмурт урдскиз. Нылаш валаса ик ӧз вуы, кызьы пиосмурт сое музъем вылэ погыртӥз. «Кӧня кужыме вал, мон соин нюръяськи,— тодаз вае Аннетт.— Мон кесяськыны тырши, но шоканэ пытсаськиз. Мозмытскыны тыршыса, мон мыжгай, ӵыжай но ӵабъяй сое. Со куспын мыным туж вӧсь луиз — со монэ пуртэн бышкалтӥз. Собере мон пумитъяськемысь дугдӥ».

Мар тон карод, сыӵе ик учыре сюрид ке?

ДУГДЫ НО МАЛПАСЬКЫ!

Тон сак луыны тыршиськод ке но, кылсярысь, пеймыт вакытэ урамын, тон кышкыт учыре сюрыны быгатод. Библиын верамын: «Тӥ уд тодӥське, мар луоз ӵуказе» (Иаков 4:14).

Куд-огзэ Аннетт кадь быдэ вуымтэосты тодмотэм муртъёс эриктэмазы. Мукетъёссэ — тодмооссы яке семьяысьтызы кин ке. Тани мар луиз Наталиен. Куке солы 10 арес гинэ вал ай, сое вӧзазы улӥсь пи эриктэмаз. «Мыным туж кышкыт но возьыт вал, соин ик нырысь мон нокинлы но со сярысь ӧй вера»,— тодаз вае Натали.

 АСТЭ ЯНГЫШЕ ЭН УСЬКЫТЫ

Аннетт али ке но луэм учырын ассэ янгыше уськытэ. Со вера: «Выльысь но выльысь йырам бергатӥсько со уез. Мыным золгес пумитъяськоно вал, дыр. Но со монэ пуртэн бышкалтэм бере мон туж кышкай, нюръяськемысь ик дугдӥ... но мыным кулэ вал нюръяськыны!»

Натали но ассэ туж янгышен лыдъя. Со вера: «Малы мон солы оски! Анаймы но атаймы верало вал милемлы, ульчаын ми сузэреным котьку ӵош мед шудомы шуыса, нош мон ӧй кылзӥськы. Озьыен, мон ачим со пилы сыӵе луонлык сётӥ. Со учыр туж бадӟым куректон вайиз милям семьямылы. Нокызьы вунэтэме уг луы, мар мында соос мон понна чидано луизы».

Тынад но Аннеттлэн но Наталилэн кадь шӧдонъёсыд вал ке, тодад возь: тон янгыш ӧвӧл. Куд-ог адямиос сыӵе учыръёсысь кышкытлыксэ уг адӟо, соос верало, пиослэн сямзы сыӵе шуыса, яке со, кинэ эриктэмазы, ачиз янгыш шуыса. Нош со эриктэмасез шонере уг потты — одӥг адямиез но эриктэманы уг яра. Тон эриктэмась ки улэ шедид ке, со понна астэ янгыше эн уськыты!

Веранэз ӧвӧл, тон янгыш ӧвӧл шуыса лыдӟыны капчи, нош оскыны солы секытгес. Куд-огъёсыз ваньзэ пушказы возё но асьсэды янгыш шуыса малпанэн сюлэмзэс йыръё. Нокинлы ӧд вера ке, кинлы умойгес карод: эриктэмасьлы-а, аслыд-а? Эн ваты сое, малпаськы ачид сярысь.

ЮРТТЭТ КУРЫСА ВАЗИСЬКЫ

Библиын верамын, туж бадӟым куректонэз чидамез бере шонерлыко улӥсь Иов тазьы вераз шуыса: «Лулы куректыку-кайгырыку верало» (Иов 10:1). Солэсь адӟем кар, но тыныд капчигес луоз. Вера аслад шӧдонъёсыд сярысь солы, кинлы тон оскиськод. Со юрттоз тыныд дыр ортчемъя буйгатскыны.

Тыныд огнад соин нюръяськоно ӧвӧл. Вераськы кинэн ке но аслад шӧдонъёсыд сярысь.

Аннетт сое ас вылаз шӧдӥз. Со тодаз вае: «Мон матысь эшеным вераськи но, со мынэсьтым мылкыдме ӝутӥз ваньзэ тӧроослы вераны. Мон туж шумпотӥсько, солэсь кылзӥськи шуыса. Тӧроос монэн трос пол пумиськылыса вераськизы. Соос веразы мыным ӵапак сое, мар мыным кулэ вал,— луэм учырын мон янгыш ӧй вал. Мон номырин но ӧй янгыша».

Натали анай-атаеныз вераськиз. «Соос туж юрттӥзы мыным,— шуэ со.— Соос веразы мыным, мон медам кышка но ваньзэ соослы мед вералом шуыса. Со юрттӥз мыным куректонме но вожпотонме вормыны».

Озьы ик, Натали вӧсяськыса буйгатскылӥз. «Мыным туж юрттылӥз Инмарен вераськон,— вера со,— тужгес но соку, куке мыным туж секыт вал шӧдонъёсме кинлы ке вераны. Вӧсяськыкум мон ваньзэ вераны быгатӥсько. Мон вӧсяськисько ке, мынам сюлмы каньыл луэ».

Тон но ас вылад шӧдыны быгатод, «эмъянлэн аслаз дырыз» вань шуыса (Екклесиаст 3:3). Тыршы умоез сярысь гинэ малпаськыны. Эн вунэты шутэтскыны. Нош тужгес но кулэ Иеговалы оскиськыны, котькыӵе буйгатсконлэн Инмарезлы (2 Коринфъёслы 1:3, 4).

 КИНЭН КЕ ПУМИСЬКЫЛЫНЫ ТЫНАД АРЛЫДЫД ВУЭМЫН КЕ ИНИ

Тон нылмурт но тонэ азон-калгон сьӧлыке кыскыны тыршо ке, эн кышка юн мылкыдын вераны: «Уг!» яке «Эн йӧтылы монэ!» Яратоно пидэ ыштыны кышкаса, пумит кыл вератэк эн улы. Со бере со тонэ куштӥз ке, эн куректы. Тон шедьтод мукетсэ, кудӥз тонэ но тынэсьтыд учконъёстэ гажалоз.

АСТЭ ЭСКЕРОН: КУЖМЫСЬ СЕКС ӴЕКТОН

«Шор ёзо школаын пиос монэ тыбыр ласянь бюстгальтертӥм кыскало вал но оломар но юрӟымзэ верало вал. Кылсярысь, мон шумпотысал, пе, соосын кӧлысал ке» (Коретта).

Кызьы тон малпаськод, со пиослэн сыӵе выремзы вал...

  1. маскаръяськон?

  2. флирт?

  3. кужмысь секс ӵектон?

«Автобусын одӥг егит пи мыным юрӟым макеосты вераны но ӟыгыръяськыны кутскиз. Мон солэн кияз чабки но палэнскыны косӥ. Со мон шоры визьтэм мурт шоры кадь учкиз» (Кендис).

Кызьы тон малпаськод, со егит пилэн сыӵе выремез вал...

  1. маскаръяськон?

  2. флирт?

  3. кужмысь секс ӵектон?

«Кылем арын одӥг пияш ялан вералляз, мон солы кельшисько шуыса но солэн монэн пумиськылэмез потэ шуыса, мон солы котьку „уг“ шуисько вал ке но. Куддыръя со мынэсьтым киме маялляны турттылӥз. Мон солы „дугды“ шуисько вал, нош со ёрмемысь уг дугды вал. Одӥг пол, пыдкукелэсь калъёссэ керттылыкум, со монэ берпалам чабкиз» (Бетани).

Кызьы тон малпаськод, со пияшлэн сыӵе выремез вал...

  1. маскаръяськон?

  2. флирт?

  3. кужмысь секс ӵектон?

Куинь юанъёслы ик шонер валэктон — 3.

Маин кужмысь секс ӵектон флиртлэсь яке маскаръяськонлэсь пӧртэм луэ?

Кужмысь секс ӵектон одӥгезлы гинэ шумпотон вае. Адямилы «эн» шуо ке но, со ёрмемысь уг дугды.

Кужмысь секс ӵектон — со маскаръяськон ӧвӧл. Со эриктэманэ вуттыны быгатэ.