Валтӥсь материалъёсы выжоно

Пуштросаз выжоно

 6-ТӤ ЮАН

Кызьы огъёзъёсыдлэн зӥбемзылы пумит сылоно?

Кызьы огъёзъёсыдлэн зӥбемзылы пумит сылоно?

МАЛЫ СОЕ ТОДЫНЫ КУЛЭ

Тон аслад йырыныд малпаськыны дышетскид ке, улонад ачид кузё луод, нош мукетъёсызлы улонад кузёяськыны уд лэзьы.

МАР КАРОД ТОН?

Пукты син азяд таӵе югдурез: Брайан доры классысьтыз кык пиос лыкто. Солэн сюлмыз зол жугиськыны кутске — та арня куспын соос кык пол ини сое кужмысь косо вал тамак кыскыны. Таиз — куинетӥез.

Нырысетӥез вера:

— Мар, нош ик мӧзмиськод-а? Мон тыныд мар ке но вайи. Со тынэсьтыд мылкыддэ ӝутоз...

«Мар ке но» кылъёсты со нимысьтыз висъя. Со кисыяз пыре но, тон тодӥськод ини, мар со али поттоз. Сигарет. Брайанлэн сюлмыз потымон жугиськыны кутске.

— Кулэ ӧвӧл, мон тӥледлы верай вал ук ини...

Кыкетӥез Брайанэз куспетӥ каре:

— Кышкад-а, мар-а?

— Ӧй, ӧй кышка...

Одӥгез соос пӧлысь Брайанлэн пельпум вылаз кизэ понэ но небыт куараен вера:

— Соку кыскы ук!

Мукетыз Брайанлэн нырулаз сигаретэз донге но кескич мыньпотыса вера:

— Ми нокинлы но ум вералэ. Нокин уз тоды.

Мар тон карысалыд Брайан интыын?

 ДУГДЫ НО МАЛПАСЬКЫ!

Малы Брайанлэн огъёзъёсыз тамак кыско? Соос асьсэос сыӵе быръён лэсьтӥзы-а? Ӧз, дыр. Соос тамак кыскыны кутскизы, малы ке шуоно тросэз кыско. «Тӧдьы куака» луэмзы потымтэен, соос каро озьы ик, кызьы мукетъёсыз.

Тон но таӵе югдуре шедид ке, мар юрттоз тыныд аслыд ужпум кутыны, огъёзъёсыд шоры учкытэк?

  1. АЗЬЛО ИК АДӞЫНЫ ТЫРШЫ

    Библиын верамын: «Визьнодо мурт шугадӟонэз адӟе но ватӥське; нош улонэз ляб тодӥсьёс азьлане мыно но вӧсь карон улэ сюро» (Мадёнъёс 22:3).

    Умойтэм учырез азьло ик адӟыны луэ. Кылсярысь, азьпалад ӵош дышетскисьёсыд сыло. Ваньзы тамак кыско. Азьло ик валад ке, кыӵе умойтэм учыр кылдыны быгатоз, тон солы дась луод.

  2. МАЛПАСЬКЫ

    Библиын верамын: «Сюлэмды чылкыт мед луоз» (1 Пётр 3:16).

    Юа аслэсьтыд: «Мон али лэсьтӥ ке озьы, кызьы тросэз лэсьто, мар мон шӧдо берлогес?» Огъёзъёсыд кӧня ке дыр ӵоже тон борды уз мерске ни, вылды, но берлогес кыӵе шӧдонъёсыд тынад луозы? Дась-а тон аслад учконъёсыдлэсь куштӥськыны, ӵош дышетскисьёсыдлы ярамон луон понна? (Потон 23:2).

  3. УЖПУМ КУТ

    Библиын верамын: «Адями мае кизе, сое ик со ара» (Галатъёслы 6:7).

    Куке но одно ик ужпум кутоно луоз, нош собере со понна кыл кутоно. Библиын верамын адямиос сярысь, кудъёсыз шонер ужпум кутӥзы, кылсярысь, Иосиф, Иов но Иисус Христос. Озьы ик, отын верамын Каин, Исав но Иуда Искариот сярысь, кудъёсыз шонертэм ужпум кутӥзы. Кыӵе ужпум кутод тон?

Библиын верамын: «Ӧжытын оскиськымон бадӟымын но оскиськымон луэ» (Лука 16:10). Тон малпад ке ини, кытчы вуттыны быгатозы кутэм ужпумъёсыд, но ужпум кутӥд ке, соку аслад учконъёсыд сярысь вераны капчигес луоз. Но со шумпотон ваёз.

Эн кышка, огъёзъёстэ дышетоно уз луы. Ваньмыз, мар кулэ,— со юн мылкыдын пумитазы «уг» шуыны. Яке, кутэм ужпумдэ уд вошты ни шуыса возьматон понна, тон вераны быгатысалыд на:

  • «Тазэ ини монтэк!»

  • «Мон сыӵе маин ке уг выриськы!»

  • «Тӥ тодӥськоды ук мынэсьтым учконъёсме!»

Сыӵе учырын туж кулэ соку ик ответ сётыны но юн мылкыдын вераны. Тон ачид ик паймод, макем ӝог соос тон борды ёрмемысь дугдозы!

 КЫЗЬЫ АСТЭ ВОЗЁНО, ТОНЭ СЕРЕКЪЯЛО КЕ

Огъёзъёсыдлы сётскиськод ке, соку малпаськыны быгатӥсьтэм робот кадь луиськод, малы ке шуоно асэныд кивалтыны лэзиськод

Мар кароно, огъёзъёсыд тонэ серекъяло ке? Кылсярысь, соос верало: «Мар, кышкад-а?» Тодад возь: тонэ серекъяса, огъёзъёсыд тонэ зӥбыны тыршо. Кызьы солы пумитъяськоно? Кылсярысь, тон быгатӥськод:

  • Соосын соглаш кариськыны. («Зэм, мон кышкасько! Мынам уг поты...»)

  • Соосты возьытэ уськытыны. Валэкты, малы тон пумит луиськод, нош собере соосты малпаськыты. («Тӥ визьмо адямиос, кадь, нош асьтэос сыӵе ужъёсын выриськоды!»)

Тонэ серекъямысь уг дугдо ке, кошкы! Макем кемагес серекъямзэс кылзӥськод, сокем золгес зӥбыны тыршо. Кошкыса тон возьматод, тынад уг поты, мукетъёсыз тонэн мед кивалтозы шуыса.

Огъёзъёслэн зӥбемзылэсь быдэсак палэнскыны уг луы. Но тон быгатӥськод аслад учконъёсыдъя лэсьтыны, вераны соос сярысь но югдурез ас кияд возьыны. Ваньмыз тынад кияд! (Иисус Навин 24:15).