Валтӥсь материалъёсы выжоно

Пуштросаз выжоно

 3-ТӤ ЮАН

Кызьы анай-атаен вераськыны кулэ?

Кызьы анай-атаен вераськыны кулэ?

МАЛЫ СОЕ ТОДЫНЫ КУЛЭ

Анай-атаеныд тупаса улӥд ке, трос шуг-секытъёслэсь палэнскод.

МАР КАРОД ТОН?

Пукты син азяд таӵе югдурез. Покчиарня. Ӝыт пал. 17 аресъем Джефф дорысьтыз лэсьтоно ужъёссэ быдэстӥз. Табере шутэтскыны но яра. Со телевизорез лэзе но аслаз яратоно креслояз умойгес интыяське.

Ӵапак со дыре атаез пыре. Адӟиське, солэн мылкыдыз куашкамын шуыса.

— Джеффри! Мар тон телевизор азьын пукиськод? Нош кин выныдлы урокъёссэ лэсьтыны юрттоз? Тон ноку но уд лэсьтӥськы сое, мар тонэ карыны косо!

— Нош ик кутскиз ини,— ныр улаз нукыртэ Джефф, нош атаез ваньзэ кылэ. Со пиез доры мыкырске:

— Мар тон шуид?

— Номыр ик ӧй, ас поннам,— мур лулске Джефф. Атаез пурӟе:

— Тон кызьы монэн вераськиськод?!

Тон Джефф интыын луысалыд ке, мар тон карысалыд, та умойтэм учыр медаз кылды шуыса?

ДУГДЫ НО МАЛПАСЬКЫ!

Анай-атаен вераськон кельше машинаез нуллонлы. Одӥг сюрес пытсамын ке, мукет сюрестӥ мыныны луэ.

 УЧЫР:

«Мыным туж секыт атаеным вераськыны,— шуэ Лия нимо нылаш.— Куддыръя мон солы мае ке верасько, нош со юа: „Вождэ эн вай, тон мар ке верад-а?“»

КЫӴЕ ВИЗЬ-КЕНЕШ ЛУОЗ СЁТЫНЫ ЛИЯЛЫ?

  1. Атаез шоры кесяськыны.

    Лия йыркуръяськыса: «Атай, малы тон монэ уд кылзӥськы? Со шудон ӧвӧл ук!»

  2. Азьланяз та сярысь вераськытэк улыны.

    Лия ужпум кутэ, шуг-секытэз сярысь атаеныз уз вераськы ни шуыса.

  3. Тупась учырез возьманы.

    Та вераськонэ Лия мукет дыръя берытске яке аслаз шуг-секытэз сярысь атаезлы гожтэтын вера.

Кыӵе визь-кенеш тон сётысалыд Лиялы?

МАЛПАСЬКОМЫ. Лиялэн атаез мар ке сярысь туж мур малпаське но уг адӟы, нылыз ӝоже усиз шуыса. Соин ик, Лия 1-тӥ визь-кенешлэсь кылзӥськиз ке, атаез шоры куаразэ будэтыса вераськиз ке, атаез валатэк но кыльыны быгатоз, мар луиз, но верамзэ рос-прос уз кылзы. Со сяна, озьы Лия ӧй возьматысал, атайзэ гажа шуыса (Ефесъёслы 6:2). Адӟиське, та визь-кенеш номыр умойзэ уз вайы.

Анай-атаеныд вераськыны секыт ке, эн малпа, та учырысь потыны сюрес ӧвӧл ни шуыса. Тон быгатод шедьтыны амал, кызьы соосын вераськыны!

2-тӥ визь-кенеш самой капчиез ке но, самой умоез уг луы. Малы ке шуоно шуг-секытсэ сэрттон-пертчон понна, Лиялы одно ик атаеныз вераськоно. Атаез нылызлы юрттыны быгатоз соку гинэ, куке тодӥз, мар луиз. Соин ик, вераськытэк улон пайда уз вайы.

Нош Лия 3-тӥ визь-кенешез бырйиз ке, соку со уз лэзьы, пытсам сюрес солы шуг-секытсэ сэрттыны-пертчыны мед люкетоз шуыса. Со мукет дыръя атаеныз вераськыны тыршоз. Нош Лия атаезлы гожтэт гожтыны малпаз ке, солы соку ик капчигес луоз, вылды.

Гожтэт юрттоз Лиялы малпанъёссэ валамонгес вераны. Гожтэтсэ лыдӟыса, атаез тодоз, мар Лиялэн солы верамез потэ вал, но нылзэ умойгес валаны быгатоз. Озьыен, 3-тӥез визь-кенеш пайдаё луоз Лиялы но, атаезлы но. Атаеныз вераськыса яке солы гожтэт гожтыса, Лия кылзӥськоз Библиын гожтэм визь-кенешлэсь: «Утчаломе сыӵе улонэз, кудӥз тупаса улонэз вае» (Римъёслы 14:19).

Кыӵе эшшо визь-кенеш сётысалыд на Лиялы?

Улӥязгес гожты аслэсьтыд визь-кенештэ, озьы ик сое, кытчы со вуттыны быгатоз.

 МАЛПАНЪЁСТЭ ВАЛАМОН ВЕРА

Тодад возь: куддыръя анай-атайёс верамдэ мыдлань валало.

УЧЫР:

Анаед но атаед юало, малы тынад мылкыдыд ӧвӧл. Тон вераськод: «Мынам со сярысь вераськеме уг поты».

Нош анаед но атаед кыло: «Мон тӥледлы уг оскиськы. Аслам шуг-секытъёсы сярысь мон эшъёсыным верасько».

Кылсярысь, тынад шуг-секытэд кылдӥз но, анай-атаедлэн тыныд юрттэмзы потэ. Тон вераськод: «Эн сюлмаське, мон тодӥсько, мар карыны».

  • Тынад анаед но атаед кыло:

  • Умойгес луысал вераны: