Валтӥсь материалъёсы выжоно

Пуштросаз выжоно

 17-ТӤ ЛЮКЕТ

Кызьы Инмарлы вӧсяськоно?

Кызьы Инмарлы вӧсяськоно?

«Инмез но, музъемез но кылдытӥсь» милесьтым вӧсяськонъёсмес кылзыны дась (Псалтирь 113:23).

1, 2. Малы Иеговалы вӧсяськыны луонлык — со номырин ӵошатыны луонтэм дан? Малы тодыны кулэ, мар верамын Библиын вӧсяськон сярысь?

МУЗЪЕММЕС инмысь тросэныз кизилиосын ӵошатоно ке, со туж пичи. Нош адямиос со вылын эшшо но пичиесьгес на. Библиын верамын, Иеговалы вань калыкъёс пичи ву шапык кадь пото шуыса (Псалтирь 113:23; Исаия 40:15). Озьы ке но Псалтирьын 144:18, 19 верамын: «Ваньмызлы вӧсяськисьёслы, ваньмызлы чылкыт сюлмын вӧсяськисьёслы, Кузё-Инмар матын улэ. Кышканэн улӥсьёсызлэсь куронъёссэс Инмар быдэстэ, викышъям-бӧрдэмзэс кылэ но соосты уте». Макем шумпоттэ, Иегова милемлы луонлык сётӥз шуыса солы вӧсяськыны! Иеговалэн, Быдэс Дуннеез Кылдытӥсьлэн, милемлы матын луэмез потэ. Со дась милесьтым вӧсяськеммес кылзыны. Иеговалы вӧсяськыны луонлык — со номырин ӵошатыны луонтэм дан.

2 Но Иегова милемыз кылзоз соку гинэ, куке ми солы вӧсяськимы озьы, кызьы солэн потэ. Соин ик ойдолэ тодомы, мар верамын Библиын вӧсяськон сярысь.

МАЛЫ ИЕГОВАЛЫ ВӦСЯСЬКЫНЫ КУЛЭ?

3. Малы Инмарлы вӧсяськоно?

3 Иеговалэн потэ, ми соин мед вераськомы шуыса. Кытысь ми сое тодӥськомы? Лыдӟе Филиппыослы  4:6, 7. Малпалэ гинэ: ачиз Кылдытӥсь тунсыкъяське тӥледын но солэн потэ, тӥ солы асьтэлэсь малпанъёстэс но шуг-секытъёстэс мед вералоды шуыса.

4. Ми Иеговалы ӵем вӧсяськимы ке, кызьы со шӧдӥськоз соин кусыпъёсмы вылын?

4 Вӧсяськон юрттэ милемлы Иеговалэн матысь эшъёсыз луыны. Эшъёс трос дырзэс ӵош ортчыто но малпанъёссэс но сюлмаськонъёссэс ог-огзылы верало ке, соослэн кусыпъёссы юнмало. Библия пыр Иегова вера тӥледлы аслэсьтыз малпанъёссэ но шӧдонъёссэ. Озьы ик со вера, мар кароз вуонояз. Тӥ но котьку солы сюлэмдэс кисьтыны быгатӥськоды. Соку тӥляд Иеговаен кусыпъёсты юнмалозы (Иаков 4:8).

МАР КАРОНО, ИНМАР МИЛЕМЫЗ МЕД КЫЛОЗ ШУЫСА?

5. Кытысь ми тодӥськомы, Иегова вань вӧсяськонъёсты уг кылзы шуыса?

5 Кылзэ-а Иегова вань вӧсяськонъёсты? Уг. Исаия пророк улыку, Иегова вераз израиль калыклы: «Тӥ котькӧня вӧсяськиды ке но, Мон уг кылы, уго тӥляд киосты вирен пачылмемын» (Исаия 1:15). Ми ӧм ке чаклаське, быгатомы карыны сое, мае Иегова адӟемпотостэм каре, соку со милемыз уз кылзы ни.

6. Кызьы вӧсяськон осконэн герӟаськемын? Кызьы ми возьматыны быгатомы, оскиськомы шуыса?

6 Милям потэ ке, Инмар милесьтым вӧсяськеммес мед кылоз шуыса, милемлы солы оскыны кулэ (Марк 11:24). Апостол Павел валэктӥз: «Нош осконтэк Инмарлы ярамон луыны уг луы. Инмар доры лыктӥсь мурт оскыны кулэ, Инмар вань шуыса,  Ассэ утчасьёслы Инмар мед-кузьым сётэ шуыса» (Еврейёслы 11:6). «Мон оскисько» шуыны гинэ тырмыт ӧвӧл, аслэсьтыд оскемдэ ужъёсын возьматоно. Кызьы? Котьку Инмарлэсь кылзӥськоно. (Лыдӟе Иаковлэсь 2:26.)

7. а) Малы вӧсяськыны кулэ зӥбыт-востэм кариськыса но гажаса? б) Кызьы ми возьматыны быгатомы, ми сюлмысь вӧсяськиськомы шуыса?

7 Вӧсяськыны кулэ зӥбыт-востэм кариськыса но гажаса. Малы? Малы ке шуоно эксэен яке президентэн ми зӥбытэн но гажаса вераськысалмы. Нош Иегова — Ваньмызлэсь Кужмо Инмар, соин ик кулэ ӧвӧл-а солы эшшо но тросгес гажаммес возьматыны? (Улон-вылон 17:1; Иаков 4:6). Со сяна, Инмарлы сюлмысь вӧсяськоно, солэсь номыр но ватоно ӧвӧл. Кулэ ӧвӧл вӧсяськыкумы одӥг кылъёсты ик выльысь но выльысь вераны. Трос кылъёс верам интые, шонерак верано, мар милемыз зэмзэ ик сюлмаськытэ (Матфей 6:7, 8).

8. Ми Инмарлэсь мае ке курыса вӧсяськиськомы ке, мар кароно милемлы?

 8 Ми Инмарлэсь мае ке курыса вӧсяськиськомы ке, милемлы асьмелы но мар ке но кароно, куреммы мед быдэсмоз шуыса. Кылсярысь, ми куримы ке сое, мар кулэ милемлы нуналлы быдэ, кулэ ӧвӧл малпаны, Иегова ваньзэ ми интые лэсьтоз шуыса. Милемлы асьмелы но кужым пононо но дась луоно басьтӥськыны котькыӵе уж борды, кудзэ ми быдэстыны быгатомы (Матфей 6:11; 2 Фессалоникаослы 3:10). Яке, милям кыӵе ке умойтэм сяммес вормеммы потэ но, ми Иеговалэсь юрттэтсэ куримы. Соку туж кулэ палэнскыны сыӵе югдуръёслэсь, кудъёсаз со умойтэм сяммы нош ик потыны быгатоз (Колоссыослы 3:5). Табере ойдолэ валэктон сётомы вӧсяськон сярысь кылдӥсь куд-ог юанъёслы.

ВӦСЯСЬКОН СЯРЫСЬ КЫЛДӤСЬ ЮАНЪЁС

9. Кинлы вӧсяськоно? Иоаннлэсь 14:6 лыдэ басьтыса, кин пыр вӧсяськоно?

9 Кинлы вӧсяськоно? Иисус Христос аслэсьтыз дышетскисьёссэ «Инмысь Атаймылы» вӧсяськыны дышетӥз (Матфей 6:9). Озьы ик со вераз на: «Мон — сюрес но, зэмлык но, улон но; Мон пыр сяна нокин но Атай доры уг лыкты» (Иоанн 14:6). Озьыен, вӧсяськыны кулэ Иеговалы гинэ но вӧсяськоно Иисус Христос пыр. Мае возьматэ Иисус Христос пыр вӧсяськон? Со возьматэ, ми тодӥськомы но соглаш луиськомы, Иисус Иеговалэн малпаназ нимысьтыз инты басьтэ шуыса. Иисус милемыз сьӧлыклэсь но кулонлэсь мозмытон понна музъем вылэ лыктӥз (Иоанн 3:16; Римъёслы 5:12). Со сяна,  Иегова сое архиерей, яке быдӟым священник, но судья карыса пуктӥз (Иоанн 5:22; Еврейёслы 6:20).

Вӧсяськыны яра котькытын но котьку

10. Кызьы Инмарлы вӧсяськоно?

10 Кызьы вӧсяськоно? Библиын верамын ӧвӧл, милемлы одно ик пыдесъяськыса, пукыса яке сылыса вӧсяськоно шуыса. Иеговалы вӧсяськыны котькызьы но луэ, солы гажаммес гинэ возьматоно (Неемия 8:6; Даниил 6:10; Марк 11:25). Иегова понна валтӥсез — со, мар милям сюлмамы. Вӧсяськыны яра котькытын но котькыӵе дыре. Иегова кылоз милемыз соку но, куке ми солы ас поннамы вӧсяськимы (Неемия 2:1—6).

11. Мар сярысь вӧсяськыны яра?

11 Мар сярысь вӧсяськыны яра? Вӧсяськыны яра котьмар сярысь, мар Инмарлэн эрикезлы пумит ӧвӧл. Библиын верамын: «Солэн эрикезлы тэрытскыса, мае гинэ ум куриське, Со асьмеды кылзэ» (1 Иоанн 5:14). Нош яра-а Инмарлэсь курыны сое, мар тыныд кулэ? Яра. Иеговалэн потэ, ми солы, эшмылы кадь, ваньзэ мед вераломы шуыса. Вӧсяськыкумы возьдаськытэк вераны луоз Иеговалы малпанъёсмы но шӧдонъёсмы сярысь (Псалтирь 61:9). Шонер ужъёс лэсьтон понна, ми быгатомы Иеговалэсь святой духсэ курыны (Лука 11:13). Шонер ужпум кутон понна, ми быгатомы солэсь визьлыксэ курыны, нош шуг-секытъёсмес вормон понна — кужымзэ (Иаков 1:5). Озьы ик кулэ Иеговалэсь курыны, со милесьтым сьӧлыкъёсмес мед куштоз шуыса (Ефесъёслы 1:3, 7). Со сяна, кулэ мукетъёсыз понна вӧсяськыны, кылсярысь, семьямы понна яке кенешысь вын-агайёс но сузэр-апайёс  понна (Апостолъёслэн ужъёссы 12:5; Колоссыослы 4:12).

12. Мар сярысь нырысь ик вӧсяськоно?

12 Мар сярысь нырысь ик вӧсяськоно? Со сярысь, мар Иеговаен герӟаськемын, но солэн эрикез сярысь. Милемлы вань сюлмысьтымы Иеговалы тау кароно ваньмыз понна, мар со милемлы каре (1 Паралипоменон 29:10—13). Ӵапак со сярысь Иисус дышетӥз вӧсяськыны аслэсьтыз дышетскисьёссэ, куке музъем вылын улӥз. (Лыдӟе Матфейлэсь 6:9—13.) Со вераз, соос вӧсяськыны кулэ: нырысетӥез — Инмарлэн нимыз дано мед луоз шуыса, но кыкетӥез — Инмарлэн Эксэйлыкез мед лыктоз но быдэс музъем вылын Иеговалэн эрикез быдэстэмын мед луоз шуыса. Собере Инмарлэсь курыны луоз сое, мар милемлы асьмелы кулэ. Ми нырысь ик вӧсяськиськомы ке со сярысь, мар Иеговаен герӟаськемын, озьы ми возьматӥськомы, ми понна валтӥсез — со Иеговаен кусыпъёсмы.

13. Макем кема вӧсяськоно?

13 Макем кема вӧсяськоно? Библиын со сярысь верамын ӧвӧл. Вӧсяськонъёсмы кузесь но, вакчиесь но луыны быгато — ваньмыз со югдурен герӟаськемын. Кылсярысь, сиськон азьын ми вакчияк вӧсяськысалмы, дыр, нош куке Иеговалы тау кареммы яке сюлмаськонъёсмы сярысь вераммы потэ, соку кемагес вӧсяськысалмы, дыр (1 Эксэйлыкъёслэн 1:12, 15). Но кулэ ӧвӧл, мукет адямиос азьын чеберъяськыса, юри кема вӧсяськыны, кызьы вӧсяськылӥзы Иисус музъем вылын улон дыръя куд-ог адямиос (Лука 20:46, 47). Кулэ ӧвӧл  малпаны, сыӵе вӧсяськонъёс Иеговалы кельшозы шуыса. Иегова милесьтым сюлмысь вӧсяськеммес возьма.

14. Макем ӵем вӧсяськоно но малы?

14 Макем ӵем вӧсяськоно? Иеговалэн потэ, ми соин ӵемгес мед вераськомы шуыса. Библия ӧте милемыз: «Вӧсяське», «Дугдылытэк вӧсяськыса улэ» но «Дугдылытэк вӧсяське» (Матфей 26:41; Римъёслы 12:12; 1 Фессалоникаослы 5:17). Малы?  Малы ке шуоно Иегова котьку дась милемыз кылзыны. Ми быгатӥськомы котькуд нунал солы тау карыны яратэмез но шырыт сямо луэмез понна. Озьы ик быгатӥськомы курыны, со милемлы визь-кенеш, кужым мед сётоз но милемыз мед юнматоз шуыса. Иеговалы вӧсяськыны луонлыкез ми зэмзэ ик дунъяськомы ке, котьку дыр шедьтомы соин вераськыны.

15. Малы вӧсяськем бере «аминь» шуоно?

15 Малы вӧсяськем бере «аминь» шуо? «Аминь» кыл «шонер» яке «озьы мед луоз» шуэмез возьматэ. Вӧсяськеммы бере «аминь» шуиськомы ке, озьы ми возьматӥськомы, верам кылъёсмы зэм луо но сюлмысьтымы потэмын шуыса  (Псалтирь 40:14). Кинлэн ке шара вӧсяськемез бере «аминь» шуэммы возьматэ, ми вӧсяськись адямилэн кылъёсыныз соглаш луиськомы шуыса. «Аминь» шуыны яра ас поннад но, шара но (1 Паралипоменон 16:36; 1 Коринфъёслы 14:16).

КЫЗЬЫ ИНМАР ВӦСЯСЬКОНЪЁСМЫЛЫ ОТВЕТ СЁТЭ

16. Малы вераны луоз, Иегова вӧсяськонъёсмылы ответ сётэ шуыса?

16 Малы вераны луоз, Иегова вӧсяськонъёсмылы ответ сётэ шуыса? Малы ке шуоно Библиын верамын, Инмар вӧсяськонъёсмес кылэ шуыса (Псалтирь 64:3). Иегова трос миллион адямиослэсь сюлмысь вӧсяськемзэс кылэ но соослы ответ сётэ.

17. Кызьы Иегова вӧсяськонъёсмылы ответ сётэ? Вералэ примеръёс.

17 Иегова милям вӧсяськонъёсмылы ответ сётэ, кылчинъёсты яке аслэсьтыз ужась-тыршисьёссэ ыстыса (Еврейёслы 1:13, 14). Трос учыръёс вал, куке адями вӧсяське но юрттэт куре Библиез валаны, нош вӧсяськемез бере кема ик дыр уг ортчы, со доры кин ке Адӟись-Ивортӥсьёс пӧлысь лыктэ. Ваньмыз со возьматэ, кылчинъёс быдэс музъем вылэ «Евангелиез», яке ӟеч иворез, вӧлмытон уже мылысь-кыдысь пырисько шуыса. (Лыдӟе Усьтӥськонэз 14:6.) Со сяна, Иегова вӧсяськонъёсмылы ответ сётэ, куке вын-агайёсмылэсь но сузэр-апайёсмылэсь мылкыдзэс ӝутэ юрттыны милемлы ӵапак соку, куке со тужгес но кулэ (Мадёнъёс 12:25; Иаков 2:16).

Иегова кенешысь кинлэсь ке мылкыдзэ ӝутыны быгатэ милемлы юрттыны но озьы милям вӧсяськеммылы ответ сётыны

18. Кызьы эшшо Иегова вӧсяськонъёсмылы ответ сётэ?

18 Кызьы эшшо Инмар вӧсяськонъёсмылы ответ сётэ? Куке милемлы кыӵе ке шуг-секытэз сэрттон-пертчон понна визь-кенеш яке кужым кулэ,  Иегова милемлы святой дух сётыны быгатэ (2 Коринфъёслы 4:7). Куке милемлы ужпум кутоно, Иегова милемлы юрттыны быгатэ Библия пыр. Кызьы? Кылсярысь, Библиез лыдӟыкумы, ми саклыкмес висъяны быгатомы пайдаё малпанъёслы. Яке Иегова кинлэсь ке мылкыдзэ ӝутыны быгатэ пумиськонын эскеронэ пыриськыкуз вераны сое, мае милемлы кылыны кулэ вал. Озьы ик Библиысь кулэ луись малпанэз милемлы вераны быгатэ кин ке тӧроос пӧлысь (Галатъёслы 6:1).

19. Мае тодамы возёно, Иегова вӧсяськеммылы ответ уг сёты кадь потэ ке?

19 Куддыръя ми малпаны быгатомы: «Малы Иегова мынэсьтым вӧсяськемме уг кылы?» Тодады возе: Иегова умойгес тодэ, кызьы но ку вӧсяськеммылы ответ сётоно. Со тодэ, мар милемлы кулэ. Оло нош, милемлы трос пол но вӧсяськоно луоз — озьы Иегова адӟоз, со, мае ми куриськомы, милемлы зэмзэ ик кулэ шуыса. Выльысь но выльысь вӧсяськимы ке, со возьматоз, ми оскиськомы, Иегова милемлы одно ик ответ сётоз шуыса (Лука 11:5—10). Куддыръя Иегова вӧсяськеммылы ответ сётэ мукет сямен, озьы, кызьы ми ум возьмаське вал. Кылсярысь, ми куримы, Иегова улонысьтымы кыӵе ке шуг-секытмес мед палэнтоз шуыса, нош сое палэнтэм интые, со милемлы кужым сётӥз сое вормыны. (Лыдӟе Исаиялэсь 40:28, 29.)

20. Малы Иеговалы ӵем вӧсяськоно?

20 Кыӵе умой, ми Иеговалы вӧсяськыны быгатӥськомы шуыса! Оске: Иегова тӥледыз кылэ (Псалтирь 144:18). Макем ӵемгес ми Иеговалы вӧсяськимы, сокем юнгес соин кусыпъёсмы луозы.