Валтӥсь материалъёсы выжоно

Пуштросаз выжоно

 18-ТӤ ЛЮКЕТ

Иисус паймымон ужъёс лэсьтэ

Иисус паймымон ужъёс лэсьтэ

Иисуслэн паймымон ужъёсыз возьмато, мар карыны со быгатоз, Эксэй луыса

ИНМАР Иисуслы луонлык сётӥз лэсьтыны сое, мае мукет адямиос лэсьтыны уг быгато. Иисус трос паймымон ужъёс лэсьтылӥз — ӵем дыръя туж трос калык азьын. Иисуслэн паймымон ужъёсыз оскытӥзы, со быгатоз вормыны тушмонъёсыз но югдуръёсыз, кудъёссэ тырбыдэстэм адямиос асьсэос вормыны уг быгато. Тани куд-ог примеръёс.

Сютэм улон. Кык пол Иисус трос сюрс адямиосыз сюдӥз кӧня ке чорыген но нянен гинэ — кык полаз ик сиён ваньмызлы тырмиз но кылиз на. Нош одӥг пол Иисус вуэз умой виналы пӧрмытӥз — со вал солэн нырысетӥез паймымон ужез.

Висёнъёс. Иисус «адямиослэсь котькыӵе но висёнъёссэс, ляблыкъёссэс» бурмытъяз (Матфей 4:23). Со синтэмъёсты но пельтэмъёсты, сӧсырмемъёсты но чутъёсты, гижлочерен висисьёсты но кулыса усьылӥсьёсты, нош озьы ик парализовать каремъёсты бурмытъяз. Ӧй вал сыӵе висён, кудӥзлэсь Иисус бурмытыны ӧй быгатысал.

Инкуазь шимучыръёс. Одӥг пол Иисус но солэн дышетскисьёсыз Галилей зарезьтӥ пыжен уяса мыно вал. Шӧдтэк шорысь шимес тӧлпери ӝутскиз но, дышетскисьёсыз туж кышказы. Соку Иисус зарезьлы шуиз: «Чалмытскы, дугды». Тӧл дугдӥз но, туж чалмыт луиз (Марк 4:37—39). Мукетаз учыре, кужмо тӧл дыръя, Иисус ву вылтӥ вамышъяса мынӥз (Матфей 14:24—33).

Лек периос. Инмарлэн та лек тушмонъёсыз котькыӵе адямилэсь трослы кужмогес, соин ик адямиос уг быгато соослэн зӥбет улысьтызы потыны. Иисус трос пол лек периосты адямиос пушкысь потыны но соосты кельтыны косӥз. Со соослэсь ӧз кышка, соос солэсь кышказы, малы ке шуоно тодо вал солэсь кужымзэ.

Кулон. Кулонэз, зэмзэ ик, тушмон шуыса ниманы луоз, одӥг адями но сое вормыны уг быгаты (1 Коринфъёслы 15:26). Нош Иисус кулэмъёсты улӟытъяз: со егит пиез палкышно анаезлы берыктӥз, нош нылэз — юн куректӥсь анай-атайёсызлы. Озьы ик, Иисус трос адямиос азьын аслэсьтыз яратоно Лазарь эшсэ улӟытӥз, со ньыль нунал кулэмын вал ини ке но. Макем паймымон уж вал со! Иисуслэн тушмонъёсыз но ӧз споръяське, Иисус со паймымон ужез лэсьтӥз шуыса (Иоанн 11:38—48; 12:9—11).

Малы Иисус паймымон ужъёсты лэсьтӥз? Соос, кинъёслы со юрттӥз, берло ӧз кулэ шат? Зэм, кулӥзы, но Иисуслэн паймымон ужъёсыз возьматӥзы, Мессия Эксэйлэн кивалтэмез сярысь вань паймымон азьпалзэ ивортонъёс одно ик быдэсмозы шуыса. Инмарен быръем Эксэй сютэм улонэз, висёнъёсты, инкуазь шимучыръёсты, лек периосты, озьы ик кулонэз но вормоз. Ми солы оскыны быгатӥськомы, малы ке шуоно, паймымон ужъёсты лэсьтыса, Иисус возьматӥз, Инмар солы сыӵе кужым сётӥз шуыса.

Пыкиськемын: Матфей, Марк, Лука но Иоанн книгаос.