Salmos 62:1-12

  • Te chlik tal ta stojolal Dios li melel kolebale

    • «Te tsʼijilun ta jmala li Diose» (1, 5)

    • Albeik Dios skotol li kʼusi oy ta avoʼontonike (8)

    • Xkoʼolajik noʼox kʼuchaʼal ikʼ li krixchanoetike (9)

    • Mu xapat avoʼontonik ta kʼulejal (10)

Sventa bankilal jtijson; yuʼun Jedutun.* Skʼejimol David. 62  Ta melel, te tsʼijilun ta jmala li Diose. Te chlik talel jpojobbail ta stojolal.+   Ta melel, jaʼ mukʼta ton kʼotem kuʼun, jaʼ jpojobbail, jaʼ jlekil nakʼobbail;+mi jaʼuk onoʼox buchʼu xuʼ svuyilanun.*+   Voʼoxuke, ¿kʼu to sjalil chakontrainik li jun krixchano sventa chamilike?+ Toj xibal abaik kʼuchaʼal jun pakʼbal na* ti tsʼeʼel xae, jun muro ti pasbil ta ton ti chlom xae.*   Yuʼun jmoj chchap skʼopik sventa tsjipik lokʼel yaʼiik li ta yabtel ti tsots skʼoplale;*lek tajek chaʼiik ti tsjutik kʼope.* Chakʼik bendision li ta yeike, pe yakal chchopol kʼoptavanik li ta yoʼontonike.+ (Sela).   Ta melel, te tsʼijilun ta jmala li Diose,+yuʼun jaʼ te chlik talel ta stojolal li spatobil koʼontone.+   Ta melel, jaʼ mukʼta ton kʼotem kuʼun, jaʼ jpojobbail, jaʼ jlekil nakʼobbail;muʼyuk buchʼu xuʼ svuyilanun.*+   Jaʼ noʼox xuʼ te jta jpojobbail xchiʼuk jmukʼulal ta stojolal Dios. Jaʼ tsatsal mukʼta ton kuʼun li Diose, jaʼ li jnakʼobbaile.+   Krixchanoetik, pato avoʼontonik ta stojolal skotol ora. Albo skotol li kʼusi oy ta avoʼontonike.+ Yuʼun jaʼ jnakʼobbailtik li Diose.+ (Sela).   Li xnichʼnab krixchanoetike xkoʼolajik noʼox kʼuchaʼal ikʼ,li xnichʼnab krixchanoetike jloʼlavanejetik noʼox.+ Kʼalal jmoj chichʼik pʼisel ta kiloe, jaʼ mas to muʼyuk ol chkʼotik kʼuchaʼal li ikʼe.+ 10  Mu xapat avoʼontonik yuʼun li loʼlavanejeo mu jecheʼuk xapat avoʼontonik yuʼun li elekʼe. Mi epaj akʼulejalike, mu me jaʼuk te xbat avoʼontonik.+ 11  Jun velta kʼopojem li Diose, chib velta kaʼioj liʼe: ti jaʼ yuʼun Dios li juʼelale.+ 12  Jech xtok, jaʼ avuʼun li tukʼil kʼanelale, Kajval Jeova,+yuʼun jech chatojbe sutel ta jujuntal ti kʼu yelan la spasike.+

Tsʼibetik ta yok vun

Kʼelo Glosario, Jedutun.
O «buchʼu xuʼ xitamlajet yuʼun».
O «pakʼ na; kʼal na; chʼut na».
O jaʼ van skʼoplal «Akotolik yakal chakontrainik ti xkoʼolaj kʼuchaʼal jun pakʼbal na ti tsʼeʼel xae, jun muro ti pasbil ta ton ti chlom xae».
O «li ta yichʼel ta mukʼe».
O «tsnopik kʼope; ch-epal kʼopojike».
O «buchʼu xuʼ xitamlajet yuʼun».