Salmos 41:1-13

  • Tspas orasion kʼalal telel ta stem ta skoj chamele

    • Ch-ikat yuʼun Dios li buchʼu tsakbil ta chamele (3)

    • Valopatinat yuʼun jun yamigo (9)

Sventa bankilal jtijson. Skʼejimol David. 41  Xmuyubaj noʼox li buchʼu oy ta yoʼonton li buchʼu abol sbae;+chpojat yuʼun Jeova li ta yorail vokolile.   Chchabiat yuʼun Jeova xchiʼuk chkʼelat ti kuxuluk-oe. Xmuyubaj noʼox ti jayib kʼakʼal chkuxi ta balumile;+mi jaʼuk bu ch-akʼat ta skʼob yajkontratak.+   Ch-ikat yuʼun Jeova kʼalal telel ta stem* ta skoj chamele;+chkʼibat xchiʼuk chjelbat lek stas kʼalal te puchʼul ta stem ta skoj chamele.   Yuʼun xi laj kale: «Kajval Jeova, akʼo ta ilel slekil avoʼonton ta jtojolal.+ Poxtaun,+ yuʼun jsaʼoj jmul ta atojolal».+   Pe toj chopol kʼusi chalik ta jtojolal li kajkontratake, xi chalike: «¿Kʼusi to ora chcham xchiʼuk ti chʼab xi skʼoplale?».   Mi tal skʼelikun junuk yuʼunike, chopol kʼusi chal. Oy kʼusi tsabe smelolal sventa chakʼbun jvokol;vaʼun chlokʼ batel xchiʼuk tspukbe batel skʼoplal ta yantik lum.   Xmixmun* tskʼopon sbaik skotol li buchʼutik spʼajojikune;oy kʼusi chopol yakal tsnop tspasbeikun, xi chalike:   «Oy kʼusi toj echʼ xa noʼox xibal sba kʼot ta stojolal;ta skoj ti yalem xa ta lume, mu xa bu chtots-o tal».+   Li buchʼu jun toʼox koʼonton jchiʼuke, ti jpatoj toʼox lek koʼonton ta stojolale,+ti te toʼox tsveʼilan jpane, joypʼij ta kajkontra.+ 10  Yan li voʼote, Jeova, akʼo ta ilel slekil avoʼonton ta jtojolal xchiʼuk toyun likelsventa xkakʼbe stojik li kʼusi la spasbeikune. 11  Jech ta jnaʼ ti lek chavilun kʼalal mi laj kil ti muʼyuk bu stsalikun li kajkontratake xchiʼuk kʼalal muʼyuk xa bu xmuyubajike.+ 12  Chavikun ta skoj ti tukʼ koʼonton kakʼoj jbae;+lek chavilun-o sbatel osil.+ 13  Akʼo yichʼ kʼupil kʼoptael sbatel osil li Jeovae,+li Dios yuʼun Israele. Jechuk, jechuk.

Tsʼibetik ta yok vun

O «svayeb».
O «Svisvun; Skoskun; Stsajtsun».