Salmos 119:1-176

  • Kʼanbil li skʼop Dios ti kʼupil sbae

    • «¿Kʼuxi xuʼ sakuk-o xkuxlejal li jun kerem o jun tsebe?» (9)

    • «Jkʼanoj li tojobtaseletik avuʼune» (24)

    • «Jaʼ spatobil koʼonton li akʼope» (74, 81, 114)

    • «¡Toj echʼ xa noʼox jkʼanoj li amantale!» (97)

    • «Mas to pʼijun, jaʼ tsalbil to komel skotol li jchanubtasvanejetik kuʼune» (99)

    • «Li akʼope jaʼ kʼotem ta kantil yuʼun li kakane» (105)

    • «Batsʼi melel skotol li akʼope» (160)

    • Jun yoʼontonik li buchʼutik skʼanojbeik smantal Diose (165)

א [alef] 119  Xmuyubajik noʼox li buchʼutik chʼabal spaltail* ta xkuxlejalike,*li buchʼutik chchʼunbeik smantal Jeovae.+   Xmuyubajik noʼox li buchʼutik tstsakik ta venta li tojobtasel yuʼune,+li buchʼutik ta sjunul yoʼonton tsaʼike.+   Muʼyuk tspasik mi jtosuk li kʼusi muʼyuk tukʼe;te chanavik li ta sbetak Diose.+   Avaloj mantalti skʼan xichʼ chʼunel lek li kʼusitik avaloje.+   ¡Oy tajek ta koʼonton ti jtaojuk-o kav*+sventa jtsak ta venta li amantaltake!   Vaʼun bi, muʼyuk chkichʼ akʼel ta kʼexlal+kʼalal chkakʼ ta koʼonton li amantaltake.   Ta stukʼil koʼonton ta jkʼupil kʼoptaotkʼalal ta jchan li kʼusitik tukʼ kʼotem ta nopel avuʼune.   Ta jtsak ta venta li amantaltake. Mu me xaviktaun komel. ב [bet]   ¿Kʼuxi xuʼ sakuk-o xkuxlejal li jun kerem o jun tsebe? Jaʼ kʼalal chchabi sba leke xchiʼuk kʼalal tspas kʼuchaʼal chal akʼope.+ 10  Ta sjunul koʼonton ta jsaʼot. Mu xavakʼ ti xikʼejpʼuj* lokʼel li ta amantaltake.+ 11  Ta jnakʼ ta koʼonton kʼuchaʼal kʼulejal li kʼusi chlokʼ ta ave+sventa mu jsaʼ jmul ta atojolale.+ 12  Kajval Jeova, kʼupil kʼoptabilukot;chanubtasun li ta amantaltake. 13  Chlokʼ ta keskotol li kʼusitik kʼotem ta nopel avuʼune. 14  Mas ximuyubaj yuʼun skotol li tojobtaseletik avuʼune,+jaʼ mu sta li yan kʼusitik ti ep sbalile.+ 15  Ta jnopbe skʼoplal* li kʼusitik avaloje+xchiʼuk te chkakʼ-o batel jsat li ta abetake.+ 16  Jkʼanoj li amantaltake. Muʼyuk ta jchʼay ta jol li akʼope.+ ג [guimel] 17  Oyuk slekil avoʼonton ta jtojolalsventa xikuxi xchiʼuk ti jtsak ta venta li akʼope.+ 18  Jambun jsat sventa xkil lekli kʼusitik labalik sba ta amantale. 19  Jyanlumun noʼox li ta balumile.+ Mu xanakʼ* ta jtojolal li amantaltake. 20  Mu xa jnaʼ kʼusi ta jpas ta skoj ti oy tajek ta koʼontonskotol ora li kʼusitik kʼotem ta nopel avuʼune. 21  Chatsak ta utel li buchʼutik xtoyet chaʼi sbaike,li buchʼutik chopol kʼoptabilik ti chkʼejpʼujik* lokʼel li ta amantaltake.+ 22  Lokʼeso ta jtojolal* li labanel xchiʼuk pʼajele,yuʼun jtsakoj ta venta li tojobtasel avuʼune. 23  Akʼo mi jmoj xchotiik li bankilal j-abteletik sventa chopol chalbeikun jkʼoplale,ta jnopbe skʼoplal* li amantaltake. 24  Jkʼanoj li tojobtaseletik avuʼune;+xkoʼolaj kʼuchaʼal viniketik ti tstojobtasikune.+ ד [dalet] 25  Patalun ta pukuktik.*+ Kuxul iktaun jech kʼuchaʼal avaloje.+ 26  Laj kalbot li kʼusitik ta jpase, vaʼun la atakʼbun;chanubtasun li ta amantaltake.+ 27  Akʼbun kaʼibe smelolal kʼusi skʼan xal* li kʼusitik avaloje,sventa xuʼ jnopbe skʼoplal* li kʼusitik labalik sba apasoje.+ 28  Solel mu x-och jvayel ta at-oʼonton. Tsatsubtasun jech kʼuchaʼal avaloje. 29  Lokʼeso ta jtojolal li sbelel loʼlavaneje+xchiʼuk akʼbun kil ti lek chavilune, akʼbun jchan li amantale. 30  Jaʼ jtamoj batel li sbelel tukʼilale.+ Jnaʼoj ti tukʼ li kʼusitik kʼotem ta nopel avuʼune. 31  Napʼalun ta stojolal li tojobtasel avuʼune.+ Kajval Jeova, mu xavakʼ ti ta kʼexlal xikome.+ 32  Oy tajek ta koʼonton chibat* li ta sbelel amantaltake,yuʼun chavakʼ ti jchʼunej mantaluk li koʼontone.* ה [e] 33  Kajval Jeova, akʼbun kil+ sbelel li amantaltake,vaʼun jaʼ ta jtam-o batel.+ 34  Akʼbun jpʼijilsventa jtsak ta venta li amantalexchiʼuk ti jchʼun ta sjunul koʼontone. 35  Beiltasun* batel li ta sbelel amantaltake,+yuʼun toj kʼupil sba chkaʼi. 36  Tijbun koʼonton sventa jkʼan li amantaltake,maʼuk li kʼusi ta jkʼan jtuke.+ 37  Joypʼino batel jsat sventa mu xil li kʼusi mu kʼusi xtun-oe;+akʼo xanavkun ta abe sventa kuxul xikom-o. 38  Kʼotuk ta pasel avuʼun li kʼusi avalojbun chapassventa xavichʼ xiʼtaele.* 39  Lokʼeso li jvokol ti chixiʼoe,yuʼun lek li kʼusitik kʼotem ta nopel avuʼune.+ 40  Kʼelavil ti oy tajek ta koʼonton li kʼusitik avaloje. Kuxul iktaun ta skoj li atukʼilale. ו [waw] 41  Kajval Jeova, akʼbun kil li tukʼil kʼanelal avuʼune,+koltaun jech kʼuchaʼal avaloj chapase;+ 42  vaʼun bi ta jtakʼbe sutel li buchʼu chchopol kʼoptaune,yuʼun jpatoj koʼonton li ta akʼope. 43  Mu me jsetʼuk* xapoj lokʼel ta ke li kʼusi melel ta akʼope,yuʼun jpatoj koʼonton yuʼun* li kʼusi kʼotem ta nopel avuʼune. 44  Muʼyuk chkikta-o jba ta xchʼunel li amantale,sbatel osil jech ta jpas.+ 45  Xital xibat noʼox ti bu jun koʼontone,*+yuʼun ta jsaʼ li kʼusitik avaloje. 46  Chkalbe skʼoplal ta stojolal ajvaliletik li tojobtaseletik avuʼune xchiʼuk muʼyuk chikʼexav.+ 47  Jkʼanoj li amantaltake,jech xkal, jkʼanoj.+ 48  Jtoyoj muyel jkʼob ta jkʼoponot ta skoj ti jkʼanoj li amantaltake+xchiʼuk ta jnopbe skʼoplal* li amantaltake.+ ז [sayin] 49  Vuleso me ta ajol li kʼusi avalojbun*ti jaʼ avakʼojbun-o spatobil koʼontone.* 50  Taje jaʼ tspatbun koʼonton kʼalal oy jvokole,+yuʼun jaʼ kuxulun yuʼun li kʼusi avaloje. 51  Solel spʼajojikun li buchʼutik xtoyet chaʼi sbaike,pe muʼyuk kʼejpʼujemun* lokʼel li ta amantale.+ 52  Kajval Jeova, xvul ta jol li kʼusitik kʼot ta nopel avuʼun ta voʼnee+xchiʼuk jaʼ tspatbun koʼonton.+ 53  Ilinemun ta jyalel ta skoj li buchʼutik toj chopolike,ti chiktaik li amantale.+ 54  Kʼotem ta jkʼejimol li amantaltake,buyuk noʼox nakalun.* 55  Kajval Jeova, chvul ta jol li abi ta akʼobaltike,+taje jaʼ sventa jchʼun li amantale. 56  Jaʼ jech nopem xkaʼi spasel tal taje,yuʼun jtsakoj ta venta li amantaltake. ח [jet] 57  Jeova, voʼot kʼotemot ta jparte;+kakʼoj ke ta jchʼun li akʼoptake.+ 58  Ta sjunul koʼonton ta jkʼan ti lekuk xavilune;+akʼo ta ilel slekil avoʼonton ta jtojolal+ jech kʼuchaʼal avaloj chapase. 59  Jchajoj lek ta kʼelel ti bu chixanave,sventa xisut tal xchiʼuk ti jtam batel li tojobtaseletik avuʼune.+ 60  Ta jsuj jba xchiʼuk muʼyuk chijalijsventa jchʼun li amantaltake.+ 61  La stsʼotun ta xchʼojonik li buchʼutik toj chopolike,pe muʼyuk la jchʼay ta jol li amantale.+ 62  Chilik ta oʼlol akʼobal sventa jtojbot ta vokol+li kʼusitik tukʼ kʼotem ta nopel avuʼune. 63  Jaʼ kamigotak skotol li buchʼutik chiʼtaikotexchiʼuk skotol li buchʼutik chchʼunik li kʼusitik avaloje.+ 64  Kajval Jeova, nojem yuʼun balumil li tukʼil kʼanelal avuʼune;+chanubtasun li ta amantaltake. ט [tet] 65  Kajval Jeova, lek kʼusi apasojbunjech kʼuchaʼal avaloje. 66  Chanubtasun sventa xipʼijub batel xchiʼuk sventa oyuk yojtikinobil kuʼun,+yuʼun jaʼ jpatoj-o koʼonton li amantaltake. 67  Kʼalal mu toʼox bu kiloj jvokole, chikʼejpʼuj* toʼox ta be,*pe li avie ta jchʼun li kʼusi chavale.+ 68  Lek avoʼonton+ xchiʼuk lekik li avabteltake. Chanubtasun li ta amantaltake.+ 69  Li buchʼutik xtoyet chaʼi sbaike tsokesbeikun jkʼoplal li ta sjutbil kʼopike,*pe ta sjunul koʼonton ta jchʼun li kʼusitik avaloje. 70  Muʼyuk xkʼuxul yoʼontonik,*+yan li voʼone jkʼanoj li amantale.+ 71  Lek ti laj kil jvokole,sventa jchan li amantaltake.+ 72  Tsots skʼoplal chkaʼi li mantal avaloje,+jaʼ mu sta mi oy epal oro xchiʼuk platae.+ י [yod] 73  Jaʼ la spasun xchiʼuk la smeltsanun li akʼobe.Akʼbun jpʼijil sventa jchanbe skʼoplal li amantaltake.+ 74  Xmuyubajik kʼalal chilikun li buchʼutik xiʼtaojikote,yuʼun jaʼ spatobil koʼonton li akʼope.*+ 75  Kajval Jeova, jnaʼoj ti tukʼ li kʼusitik chkʼot ta nopel avuʼune+xchiʼuk ti avakʼojbun kastigo ta skoj ti tukʼ chavakʼ abae.+ 76  Avokoluk, jaʼuk akʼo spatbun koʼonton li tukʼil kʼanelal avuʼune,+jech kʼuchaʼal avalojbun chapase. 77  Oyuk xkʼuxul avoʼonton ta jtojolal sventa jechuk-o kuxulun,+yuʼun jkʼanoj li amantale.+ 78  Akʼo yichʼik akʼel ta kʼexlal li buchʼutik xtoyet chaʼi sbaike,yuʼun ta jech noʼox* chakʼbeikun jvokol. Yan li voʼone ta jnopbe skʼoplal* li kʼusitik avaloje.+ 79  Akʼo sutikuk tal ta jtojolal li buchʼutik xiʼtaojikote,li buchʼutik xojtikin li tojobtaseletik avuʼune. 80  Chʼabaluk spaltail* koʼonton kʼalal ta jchʼun batel li amantaltake,+sventa mu xkichʼ kʼexlaltasel.+ כ [kaf] 81  Oy tajek ta koʼonton* ti xakoltaune,+yuʼun jaʼ spatobil koʼonton li akʼope.* 82  Tskʼel xa tajek yaʼi jsat li kʼusi avaloj+kʼalal xi chkale: «¿Kʼusi to ora chapatbun koʼonton?».+ 83  Yuʼun xikoʼolaj kʼuchaʼal yav voʼ pasbil ta nukul ti takijem ta chʼaile,*pe mu xchʼay ta jol li amantaltake.+ 84  ¿Jayib to van kʼakʼal skʼan jmala? ¿Kʼusi to ora chachapan li buchʼutik chilbajinikune?+ 85  Tsjokʼik jchʼenaltak li buchʼutik xtoyet chaʼi sbaike,li buchʼutik tskontrainik li amantale. 86  Xuʼ jpat-o koʼonton skotol li amantaltake. Ta jech noʼox chilbajinikun li krixchanoetike, ¡koltaun!+ 87  Jutuk xa mu la stupʼbeikun jkʼoplal li ta balumile,pe muʼyuk bu la jkomtsan li kʼusitik avaloje. 88  Kuxulukun-o avuʼun ta skoj li tukʼil kʼanelal avuʼune,sventa jchʼun li tojobtaseletik avaloje. ל [lamed] 89  Kajval Jeova, sbatel osilte oy-o ta vinajel li akʼope.+ 90  Jech-o tukʼ chavakʼ aba, akʼo mi x-echʼ skotol li jaykʼol kuxlejale.+ Lek anakanoj li balumil sventa staojuk-o yave.+ 91  Te oyik-o* avi ta skoj li kʼusitik kʼotem ta nopel avuʼune,yuʼun jaʼ avajtunel skotolik. 92  Ti muʼyukuk la jkʼan li amantale,licham jechuk kʼalal jaʼo oy jvokole.+ 93  Mi jaʼuk bu ta jchʼay ta jol li kʼusitik avaloje,yuʼun jaʼ kuxulun-o avuʼun.+ 94  Voʼot avuʼuninojun; koltaun me,+yuʼun jaʼ jsaʼoj li kʼusitik avaloje.+ 95  Smala malaik* tslajesbeikun jkʼoplal li buchʼutik toj chopolike,yan li voʼone ta jtsʼetanbe lek xchikinal li tojobtaseletik avuʼune. 96  Ep kʼusitik kiloj ti tukʼike,pe mas toj echʼ xa noʼox lek li amantaltake. מ [mem] 97  ¡Toj echʼ xa noʼox jkʼanoj li amantale!+ Ta jnopbe skʼoplal* skotol kʼakʼal.+ 98  Xjelav to jpʼijil yuʼun li amantale, jaʼ mu sta spʼijil li kajkontratake,+yuʼun te oy-o ta jtojolal sbatel osil. 99  Mas to pʼijun, jaʼ tsalbil to komel skotol li jchanubtasvanejetik kuʼune,yuʼun ta jnopbe skʼoplal* li tojobtaseletik avuʼune.+ 100  Voʼon mas xkaʼibe smelolal, jaʼ mu sta li viniketik ti mas xa oy sjabilalike,yuʼun ta jtsak ta venta li kʼusitik avaloje. 101  Mu jkʼan jtam batel li be ti toj chopole,+sventa xuʼ jchʼun li amantale. 102  Ta sventa li kʼusitik kʼotem ta nopel avuʼune muʼyuk chikʼejpʼuj* lokʼel,yuʼun voʼot achanubtasojun. 103  ¡Toj echʼ xa noʼox chiʼ chkaʼi ta jpakʼov* li kʼusitik chavale,jaʼ xkom to xchiʼil chkaʼi ta ke li pome!+ 104  Ta skoj li kʼusitik avaloje, la jta-o jpʼijil.+ Jaʼ yuʼun, jpʼajoj skotol li jecheʼ beetike.+ נ [nun] 105  Li akʼope jaʼ kʼotem ta kantil yuʼun li kakanexchiʼuk jaʼ sakjaman batel yuʼun li jbee.+ 106  Oy kʼusi jamal kaloj ta jpas ti chkʼot ta pasel kuʼune,jaʼ ti ta jtsak ta venta li kʼusitik tukʼ kʼotem ta nopel avuʼune. 107  Kiloj tajek jvokol.+ Kajval Jeova, kuxul iktaun jech kʼuchaʼal avaloje.+ 108  Avokoluk, Jeova, kʼupiluk sba xavil li matanaletik chlokʼ ta koʼonton ti ta jkʼupil kʼoptaote+xchiʼuk akʼbun jchan li kʼusitik kʼotem ta nopel avuʼune.+ 109  Nopajtik noʼox oy ta vokol li jkuxlejale,pe muʼyuk chʼayem ta jol li amantale.+ 110  Li buchʼutik toj chopolike tskʼan tsyakikun ta petsʼ,pe muʼyuk kiktaoj li kʼusitik avaloje.+ 111  Jaʼ jparte-o sbatel osil chkil li tojobtaseletik avuʼune,yuʼun jaʼ xkuxet-o koʼonton yuʼun.+ 112  Jpʼel ta koʼonton ta jchʼun* skotol ora li amantaltake,jaʼ to mi lichame. ס [samek] 113  Jpʼajoj li buchʼutik xchibet yoʼontonike,*+pe jkʼanoj li amantale.+ 114  Voʼot jnakʼobbailot xchiʼuk j-eskudoot,*+yuʼun jaʼ spatobil koʼonton li akʼope.*+ 115  Jpaschoplejaletik, chʼako abaik lokʼel ta jtojolal+sventa jchʼunbe smantaltak li Jdiose. 116  Ikun me jech kʼuchaʼal avalojbun chapase,+sventa kuxulukun-o;mu me xavakʼ ti ta kʼexlaluk xikom ta skoj li kʼusi jpatoj-o koʼontone.+ 117  Ikun me sventa kolem xikom;+vaʼun skotol ora chkakʼ ta koʼonton li amantaltake.+ 118  Chapʼaj skotol li buchʼutik chkʼejpʼujik* lokʼel li ta amantaltake,+yuʼun mu meleluk xkʼopojik xchiʼuk tsjutik kʼop.* 119  Chajip lokʼel ta balumil skotol li buchʼutik toj chopolike, jech chajip lokʼel kʼuchaʼal kʼaʼep* ti muʼyuk sbalile.+ Jech oxal, jkʼanoj li tojobtaseletik avuʼune. 120  Ta skoj li axiʼtaele, chnik li jbekʼtale;chixiʼ mi mu jpas li kʼusitik kʼotem ta nopel avuʼune. ע [ayin] 121  Jaʼ jpasoj li kʼusi leke xchiʼuk li kʼusi tukʼe. Mu teuk xaviktaun ta skʼob li buchʼutik chilbajinikune. 122  Alo ta jamal ti chakoltaune;akʼo mu xilbajinun li buchʼutik xtoyet chaʼi sbaike. 123  Lubem xa jsat ta smalael ti chakoltavane+xchiʼuk li kʼusi avaloj chapas ti tukʼe.+ 124  Akʼbun kil li tukʼil kʼanelal avuʼune+xchiʼuk chanubtasun li ta amantaltake.+ 125  Avajtunelun; akʼbun jpʼijil+sventa xkojtikin li tojobtaseletik avuʼune. 126  Jeova, kʼot xa yorail sventa oyuk kʼusi xapas,+yuʼun muʼyuk la xchʼunik li amantale. 127  Jkʼanoj li amantaltake,jaʼ mu sta li oroe, akʼo mi jaʼ li lekil oroe.+ 128  Jech oxal, tukʼ chkil skotol li kʼusi chavakʼ ta chanele;*+jpʼajoj skotol li jecheʼ beetike.+ פ [pe] 129  Toj labalik sba li tojobtaseletik avuʼune. Jech oxal, ta jtsak ta venta. 130  Chakʼ talel sakil osil kʼalal chvinaj skʼoplal li akʼope,+chakʼbe spʼijil li buchʼutik muʼyuk spʼijilike.+ 131  Ta jachʼ lek ke xchiʼuk ta jikʼ koʼonton,*yuʼun oy tajek ta koʼonton li amantaltake.+ 132  Kʼelun talel xchiʼuk oyuk slekil avoʼonton ta jtojolal,+jech kʼuchaʼal kʼotem ta nopel avuʼun ta stojolal li buchʼutik skʼanojik abie.+ 133  Beiltasun lek ta sventa li kʼusi avaloje;mu xavakʼ spasun ta mantal jtosuk li kʼusi toj chopole.+ 134  Koltaun lokʼel* ta skʼob li buchʼutik ch-ilbajinvanike,vaʼun ta jchʼun li kʼusitik avaloje. 135  Xojobajuk* asat ta jtojolal+xchiʼuk chanubtasun li ta amantaltake. 136  Solel xmalmun yaʼlel jsat,yuʼun muʼyuk chchʼunik amantal li krixchanoetike.+ צ [sade] 137  Kajval Jeova, tukʼot+xchiʼuk muʼyuk tʼujbil yajval avuʼun kʼalal chachapanvane.+ 138  Tukʼ ti kʼu yelan chatojobtasvanexchiʼuk stakʼ jpat-o lek koʼontonkutik. 139  Xkoʼolaj kʼuchaʼal kʼokʼ xtiltun ta koʼonton ta skoj ti oyot tajek ta koʼontone,+yuʼun xchʼayoj xa ta sjolik akʼoptak li kajkontratake. 140  Toj echʼ xa noʼox lek li kʼusi avaloje,+jaʼ yuʼun jkʼanoj.+ 141  Muʼyuk tsots jkʼoplal xchiʼuk pʼajbilun.+Akʼo mi jech, muʼyuk chʼayem ta jol li kʼusitik avaloje. 142  Te oy-o sbatel osil li kʼusitik tukʼ apasoje+xchiʼuk melel li amantale.+ 143  Akʼo mi xtal at-oʼonton xchiʼuk vokolil ta jtojolal,jech-o jkʼanoj li amantaltake. 144  Tukʼ-o sbatel osil li tojobtaseletik avuʼune. Akʼbun jpʼijil+ sventa jechuk-o kuxulun. ק [kof] 145  Ta sjunul koʼonton ta jkʼoponot. Kajval Jeova, takʼbun. Ta jchʼun li amantaltake. 146  Xivokolet ta atojolal; ¡koltaun! Ta jchʼun li tojobtaseletik avuʼune. 147  Julavemun xa onoʼox sventa xivokolet ta jkʼan koltael+ kʼalal skʼan toʼox xlokʼ tal li xojobal kʼakʼale,yuʼun jaʼ spatobil koʼonton li akʼope.* 148  Chvikʼ jsat ta oʼlol akʼobal*sventa xuʼ jnopbe skʼoplal* li kʼusi avaloje.+ 149  Chikintao li yechʼomal ke ta skoj li tukʼil kʼanelal avuʼune.+ Kajval Jeova, kuxul iktaun ta skoj li atukʼilale. 150  Chnopajik tal li buchʼutik toj kʼexlal sba stalelalike;toj nom yakʼoj sbaik li ta amantale. 151  Kajval Jeova, nopol oyot ta jtojolal+xchiʼuk melel skotol li amantaltake.+ 152  Voʼne xa laj kojtikin li tojobtaseletik avuʼune,ti lek la anakan sventa xjalij sbatel osile.+ ר [[rex] 153  Kʼelavil li jvokole xchiʼuk koltaun,+yuʼun muʼyuk chʼayem ta jol li amantale. 154  Pakbun jkʼoplal xchiʼuk pojun lokʼel;+kuxulukun-o avuʼun jech kʼuchaʼal avaloj chapase. 155  Nom oy kolebal ta stojolalik li buchʼutik toj chopolike,yuʼun muʼyuk saʼojik li amantaltake.+ 156  Kajval Jeova, toj echʼ xa noʼox li xkʼuxul avoʼontone.+ Kuxulukun-o avuʼun ta skoj li atukʼilale. 157  Toj epik li kajkontratake xchiʼuk li buchʼutik chilbajinikune;+pe muʼyuk kiktaoj li tojobtaseletik avuʼune. 158  Toj chopol chkil li jvalopatinvanejetike,yuʼun muʼyuk chchʼunik li kʼusi avaloje.+ 159  ¡Kʼelavil! ¡Jkʼanoj tajek li kʼusitik avaloje! Kajval Jeova, kuxulukun-o avuʼun ta skoj li tukʼil kʼanelal avuʼune.+ 160  Batsʼi melel skotol li akʼope+xchiʼuk te oy-o sbatel osil li kʼusitik tukʼ kʼotem ta nopel avuʼune. ש [sin o xin] 161  Ta jech noʼox tskontrainikun li bankilal j-abteletike,+pe li koʼontone labal sba chil li akʼoptake.+ 162  Ximuyubaj ta skoj li kʼusi avaloje,+jech kʼuchaʼal kʼalal oy buchʼu tsta epal kʼulejale. 163  Jpʼajoj li sjutel kʼope,* batsʼi mu jkʼan jkʼelbe sat,+pe jkʼanoj li amantale.+ 164  Vukub velta ta jkʼupil kʼoptaot ta kʼakʼalta skoj li kʼusitik tukʼ kʼotem ta nopel avuʼune. 165  Jun tajek yoʼontonik li buchʼutik skʼanojik amantale,+muʼyuk kʼusi chmakbat* yakanik. 166  Kajval Jeova, jpatoj koʼonton ti oy kʼusi chapas sventa chakoltavanexchiʼuk ta jchʼun li amantaltake. 167  Ta jchʼun li tojobtaseletik avuʼunexchiʼuk jkʼanoj ta melel.+ 168  Ta jchʼun li kʼusitik avaloje xchiʼuk li tojobtaseletik avuʼune,yuʼun venta avuʼun skotol li kʼusi ta jpase.+ ת [taw] 169  Kajval Jeova, kʼotuk ta atojolal ti xivokolet ta jkʼan akʼo xakoltaune.+ Pʼijubtasun jech kʼuchaʼal avaloje.+ 170  Chikintao ti xivokolet ta jkʼan koltaele. Koltaun jech kʼuchaʼal avaloj chapase. 171  Chtanijuk xa lokʼel ta ke li akʼupil kʼoptaele,+yuʼun avakʼoj jchan li amantaltake. 172  Ta jkʼejintabe skʼoplal li kʼusi avaloje,+yuʼun tukʼ skotol li amantale. 173  Chapaluk xa akʼob sventa skoltaun,+yuʼun jaʼ ta jkʼan ta jchʼun li kʼusitik avaloje.+ 174  Kajval Jeova, oy tajek ta koʼonton ti xakoltaunexchiʼuk jkʼanoj li amantale.+ 175  Akʼbun to jkuxlejal sventa xuʼ jkʼupil kʼoptaot;+akʼo skoltaun li kʼusitik kʼotem ta nopel avuʼune. 176  Kʼejpʼujemun* ta be kʼuchaʼal jkot chʼayemal chij.+ Saʼun,yuʼun muʼyuk jchʼayoj ta jol li amantaltake.+

Tsʼibetik ta yok vun

O «xchopolil».
Literal «sbeike». O «li buchʼutik oy stukʼil yoʼontonike».
Literal «ti staojuk-o yav li jbe».
O «xikʼejev».
O «Ta jchanbe skʼoplal».
O «xamuk».
O «chkʼejevik».
Literal «Balalino lokʼel ta jba».
O «ta jchanbe skʼoplal».
O «lumtik».
Literal «sbelel».
O «jchanbe skʼoplal».
Literal «Ta xi-anilaj batel».
O jaʼ van skʼoplal «voʼot avakʼoj ti muʼyukuk xchibet li koʼontone».
O «Teuk xixanav avuʼun».
O jaʼ van skʼoplal «ti jech chapasbe li buchʼutik chiʼtaikote». Kʼelo Glosario, xiʼtael Dios.
O «jutebuk».
O «jmalaoj».
O «ti bu jamalaltike».
O «ta jchanbe skʼoplal».
O «li kʼusi avalojbun chapas».
O «ti jaʼ avakʼoj jmalae».
O «kʼejevemun».
O «li ta na bu nakalun kʼuchaʼal jyanlume».
O «chikʼejev; chitsʼepʼuj».
O «muʼyuk bu xkakʼ venta la jsaʼilan tal jmul».
O «snopbil kʼopike; yepal kʼopike».
Literal «Mu kʼusi chaʼi ta yoʼontonik jech kʼuchaʼal xepuʼ».
O «jmalaoj li kʼusi chavale».
O jaʼ van skʼoplal «ta jutbil kʼopetik».
O «ta jchanbe skʼoplal».
O «xchopolil».
O «Ta jikʼ-o koʼonton».
O «jmalaoj li kʼusi chavale».
O «chʼayile».
Jaʼ xkaltik, skotol li kʼusitik spasoje.
O «Smalaojik».
O «Ta jchanbe skʼoplal».
O «ta jchanbe skʼoplal».
O «chikʼejev».
O «yakʼol ke».
Literal «Jaʼ te kakʼoj batel koʼonton ta xchʼunel».
O «viniketik ti xchʼakoj sba yoʼontonike».
O «jmakobbailot».
O «jmalaoj li kʼusi chavale».
O «chkʼejevik».
O «tsnopik kʼop; ch-epal kʼopojik».
Li ta ebreo kʼope jaʼ chalbe skʼoplal li skʼaʼepal chlokʼ tal kʼalal chichʼ unijesel li plata o li oroe.
O «li kʼusi avaloje».
Literal «xitastun».
Literal «Manun lokʼel».
O «Tseʼinuk».
O «jmalaoj li kʼusi chavale».
O «kʼalal skʼan toʼox li chabivanej ta akʼobaltik».
O «jchanbe skʼoplal».
O «snopel kʼope; epal kʼope».
O «chtʼab-o».
O «Kʼejevemun; Tsʼepʼujemun».