Salmos 106:1-48

  • Oy kʼusitik muʼyuk laj yichʼ ta kʼux li Israele

    • Ta anil la xchʼay ta sjolik li kʼusi la spas Diose (13)

    • Muʼyuk laj yichʼik ta mukʼ li Diose, jaʼ laj yichʼik ta mukʼ li slokʼol tot vakaxe (19, 20)

    • Muʼyuk laj yakʼ xchʼunel yoʼontonik ta sventa li kʼusi yaloj Diose (24)

    • Jmoj lik yichʼik ta mukʼ li Baale (28)

    • Laj yakʼbeik ta smoton pukujetik li xnichʼnabike (37)

106  ¡Kʼupil kʼoptaik li Jeovae!* Albeik kolaval li Jeovae, yuʼun li stuke toj lek;+te oy-o sbatel osil li tukʼil kʼanelal yuʼune.+   ¿Mi oy van buchʼu x-al yuʼun skotol li kʼusitik spasoj ta sjuʼel li Jeovae,o ti xalbe skʼoplal skotol li kʼusitik spasoj ti sta-o kʼupil kʼoptaele?+   Xmuyubaj noʼox li buchʼutik tukʼ kʼusi tspasike,li buchʼutik skotol ora jaʼ tspasik li kʼusi leke.+   Kajval Jeova, vulesun me ta ajol kʼalal chavakʼ ta ilel slekil avoʼonton ta stojolal li ateklumale.+ Chabiun xchiʼuk koltaun,   sventa jkʼupin li slekil avoʼonton chavakʼbe ta ilel li buchʼutik tʼujbil avuʼune,+sventa jmojuk ximuyubaj xchiʼuk li alumale,sventa jmojuk xkuxet koʼonton* jkʼupil kʼoptaot xchiʼuk li arextoe.*   Jpasoj jmulkutik, jech kʼuchaʼal la spas smulik li jmoltotakutike;+chopol kʼusi jpasojkutik; toj echʼ xa noʼox chopol li kʼusi jpasojkutike.+   Li jmoltotakutik ta Ejiptoe muʼyuk laj yichʼik ta kʼux* li kʼusitik labal sba la apase. Muʼyuk xvul ta sjolik ti toj echʼ xa noʼox li tukʼil kʼanelal avuʼune,jaʼ noʼox la stoy sbaik li ta nabe, ta xokon li Tsajal nabe.+   Pe koltaatik ta skoj li sbie,+sventa chakʼ ta ojtikinel li sjuʼele.+   La stsak ta utel li Tsajal nabe, vaʼun takij;beiltasatik ta yutil to li nab ti xkoʼolaj kʼuchaʼal takixokol balumile;+ 10  koltaatik lokʼel ta skʼob li yajkontraike+ xchiʼuk pojatik lokʼel ta skʼob li jkontrainvaneje.+ 11  Mutʼibatik* ta voʼ li yajkontratakike;mi junuk kuxul kom.+ 12  Vaʼun, laj yakʼ xchʼunel yoʼontonik ta sventa li kʼusi yaloje;+lik skʼejintabeik kʼejimoletik.+ 13  Pe ta anil la xchʼay ta sjolik li kʼusi la spase;+muʼyuk la smalaik li tojobtasel yuʼune. 14  Jaʼ la spasik li kʼusi tskʼan yoʼonton stukik li ta takixokol balumile;+laj yakʼik ta preva Dios li ta takixokol balumile.+ 15  Akʼbat li kʼusi la skʼanike,pe akʼbatik jtos tsatsal chamel ti kʼunibtasatik xchiʼuk ti chamik-oe.+ 16  Itʼixajik ta stojolal Moises ti bu spasoj skarpanaikexchiʼuk ta stojolal Aaron+ ti jaʼ li chʼul yuʼun Jeovae.+ 17  Jav li balumile, vaʼun bikʼat ochel li Datanexchiʼuk te ochik yalel li buchʼutik te tsobolik xchiʼuk Abirame.+ 18  Tsan skʼakʼal ti bu tsobolike;kʼakʼik ta leb kʼokʼ li buchʼutik toj chopolike.+ 19  La spasik jkot chʼiom tot vakax li ta Orebexchiʼuk la skejan sbaik ta stojolal jun lokʼol ti pasbil ta unijesbil takʼine.+ 20  Muʼyuk laj yichʼik ta mukʼ li Diose,jaʼ lek laj yaʼiik yichʼel ta mukʼ li slokʼol tot vakax ti snaʼ sloʼ yaxale.*+ 21  La xchʼay ta sjolik li Dios+ ti jaʼ Jkoltavanej yuʼunike,ti jaʼ li buchʼu toj mukʼtik kʼusitik la spas ta Ejiptoe,+ 22  ti labalik sba kʼusitik la spas li ta yosilal Kame,+ti toj yan xa noʼox sba kʼusitik la spas li ta Tsajal nabe.+ 23  Jutuk xa ox mu laj yal mantal ti xichʼik lajesele,pe jaʼ kʼopoj ta stojolalik* li Moises ti jaʼ tʼujbil yuʼune,sventa spajesbe li sokemal sjol ti chlajesvane.+ 24  Vaʼun, lik spʼajik li osil ti kʼupil sbae;+muʼyuk laj yakʼ xchʼunel yoʼontonik ta sventa li kʼusi yaloje.+ 25  Jech-o xbikʼtal vulajetik li ta skarpanaike;+muʼyuk la xchikintabeik li yechʼomal ye Jeovae.+ 26  Vaʼun, la stoy muyel skʼob sventa oy kʼusi lek jamal chal ta stojolalik,ti te tslajesan ta takixokol balumile;+ 27  ti te tslajesbe ta mukʼtik lumetik li snitilulalikexchiʼuk tspukan batel li ta lumetike.+ 28  Vaʼun, te jmoj lik yichʼik ta mukʼ* li Baal ta Peore+xchiʼuk la slajesik li milbil matanal akʼbil ta stojolal animaetike.* 29  La sabeik skʼakʼal yoʼonton ta skoj li kʼusitik la spasike+xchiʼuk vul chamel ta stojolalik.+ 30  Pe kʼalal la svaʼan sba xchiʼuk ti oy kʼusi la spas li Finease,paj li chamele.+ 31  Jech xtok, laj yichʼ alel ti tukʼ skʼoplale,jech-o laj yichʼ albel skʼoplal sbatel osil ta skotol li jaykʼol kuxlejale.+ 32  La sabeik skʼakʼal yoʼonton li ta voʼ ta Meribae,*vaʼun chopol kʼusi kʼot ta stojolal Moises ta skojik.+ 33  La sabeik skʼakʼal yoʼonton,vaʼun muʼyuk xa la snop lek li kʼusi laj yale.+ 34  Muʼyuk la smilik li jteklumetike,+muʼyuk la spasik kʼuchaʼal albatik yuʼun Jeovae.+ 35  Yuʼun la skap sbaik xchiʼuk li mukʼtik lumetike+xchiʼuk la xchanbeik li kʼusitik tspasike.+ 36  Tunik-o batel ta stojolal santoik,+vaʼun jaʼ kʼot ta spetsʼalik.+ 37  Laj yakʼik ta chikʼbil matanal li xnichʼnabikexchiʼuk laj yakʼbeik ta chikʼbil matanal pukujetik li stsebetakike.+ 38  Jech-o la smalbeik xchʼichʼel li buchʼu chʼabal smule,+la smalbeik xchʼichʼel li skerem stsebike,la smilbeik ta smoton li santoetik ta Kanaane;+vaʼun ikʼub ta chʼichʼ li yosilalike. 39  Ibal sba* komik ta skoj li kʼusitik tspasike;muʼyuk tukʼ laj yakʼ sbaik ta stojolal Dios ta skoj li kʼusitik la spasike.+ 40  Jaʼ yuʼun, til skʼakʼal yoʼonton ta stojolal steklumal li Jeovaexchiʼuk lik spʼaj li xrextoe.* 41  Ep ta velta laj yakʼ ta skʼob mukʼtik lumetik+sventa jaʼuk xventainatik yuʼun li buchʼutik pʼajvanemike.+ 42  Akʼbat svokolik yuʼun li yajkontratakikexchiʼuk laj yichʼik pasel ta mantal. 43  Ep ta velta pojatik,+pe la stoy sbaik xchiʼuk mu xchʼunik mantal,+vaʼun laj yichʼ bikʼtajesbel skʼoplalik ta skoj li spaltailike.*+ 44  Pe ilbat li svokolike+xchiʼuk aʼibatik ti xvokolet tskʼanik koltaele.+ 45  Vul ta sjol li trato spasoj xchiʼukike,jech xtok, kʼuxubaj ta yoʼonton* ta skoj ti jaʼ chtijbat yoʼonton ti toj ep li tukʼil kʼanelal yuʼune.+ 46  Jaʼ la stijbe yoʼonton li jchukvanejetik ti oyuk xkʼuxul yoʼontonikta stojolal li buchʼutik xchukojike.+ 47  Koltaunkutik, Jeova Dios kuʼunkutik,+jech xtok, tsobunkutik lokʼel tal li ta mukʼtik lumetik+sventa jkʼupil kʼoptakutik li achʼul biexchiʼuk ti xkuxetuk noʼox koʼontonkutik kʼalal ta jkʼupil kʼoptaotkutike.+ 48  Akʼo yichʼ kʼupil kʼoptael sbatel osil li Jeova+ti jaʼ li Dios yuʼun Israele. Jech xtok, akʼo xi xal sjunul li jteklume: «¡Jechuk!».* ¡Kʼupil kʼoptaik li Jeovae!*

Tsʼibetik ta yok vun

O «¡Aleluya!». Taje jaʼ skʼan xal ‹¡Kʼupil kʼoptaik Ja!›, li Jae jaʼ skomkom bi li Jeovae.
O «mukʼ jkʼoplal chkaʼi jba».
O «apukulale; apartee».
O «muʼyuk laj yaʼibeik smelolal».
O «Mukibatik».
O «tsʼiʼlele».
Literal «te la svaʼan sba ta yeloval ti bu kaykay».
O «la snapʼan sbaik ta stojolal».
Jaʼ xkaltik, milbil matanal akʼbil ta stojolal animaetik o ta stojolal diosetik ti muʼyuk kuxajtike.
Jaʼ skʼan xal ‹saʼkʼop›.
Kʼelo Glosario, ibal sba.
O «spukulale; spartee».
O «li xchopolilike».
O «chopol laj yaʼi sba».
O «¡Jaʼ jech kʼotuk ta pasel!».
O «¡Aleluya!». Taje jaʼ skʼan xal ‹¡Kʼupil kʼoptaik Ja!›, li Jae jaʼ skomkom bi li Jeovae.