Xi chal Mateo 16:1-28

  • Tskʼanbeik Jesus akʼo yakʼ ta ilel junuk senyail (1-4)

  • Slevadurail jfariseoetik xchiʼuk jsaduseoetik (5-12)

  • «Syaveal Ajvalilal» (13-20)

    • Tsobobbail ti vaʼanbil ta sba tone (18)

  • Baʼyel xa onoʼox laj yal ti chcham li Jesuse (21-23)

  • Li kʼusi skʼan spas jun melel jchankʼope (24-28)

16  Li jfariseoetik xchiʼuk jsaduseoetike te nopajik tal ta stojolal Jesus, vaʼun la skʼanbeik ti akʼo yakʼ ta ilel junuk senyail ta vinajel sventa chakʼik ta prevae.+  Xi takʼbatike: «Xi chavalik kʼalal ch-och xa akʼobale: ‹Lek kʼepel, yuʼun lek tsoj li vinajele›,  xi chavalik li ta sobe: ‹Chtal voʼ xchiʼuk oy sik maʼ tanae, yuʼun lek tsoj li vinajele xchiʼuk oy tok›. Xanaʼik skʼelel kʼu yelan li vinajele, pe mu xavaʼibeik smelolal li kʼusitik chkʼot ta pasel avie.  Li jkʼol kuxlejal ti toj chopol liʼe xchiʼuk ti muʼyuk tukʼ chakʼ sba ta stojolal Diose* yakalik-o ta sabel junuk senyail, pe muʼyuk bu ch-akʼbat yilik junuk senyail,+ jaʼ noʼox li senyail Jonase».+ Laj une, bat, te laj yiktaan komel.  Vaʼun, li jchankʼopetike jelavik batel ta jot nab, pe chʼay ta sjol xichʼ batel spanik.+  Xi albatik yuʼun li Jesuse: «Vikʼiluk me lek asatik xchiʼuk kʼelo me abaik ta skoj slevadurail* li jfariseoetik xchiʼuk jsaduseoetike».+  Vaʼun, xi lik yalbe sbaike: «Muʼyuk laj kichʼ tal li jpantike».  Snaʼoj Jesus li kʼusi tsnopike, jaʼ yuʼun xi laj yale: «¿Kʼu yuʼun jech chavalbe abaik ta skoj ti chʼabal apanike? ¡Toj jutuk xchʼunel avoʼontonik!  ¿Mi yuʼun mu to xavakʼik venta o mi yuʼun mu xvul ta ajolik ti veʼik voʼmil viniketik ta voʼob pane xchiʼuk ti jayib to moch la atsobike?+ 10  ¿O kʼalal veʼik chanmil viniketik ta vukub pane xchiʼuk ti jayib to mukʼtik moch noj avuʼunik kʼalal la atsobike?+ 11  ¿Kʼuxi ti mu xavakʼik venta ti maʼuk laj kalbe skʼoplal pane? Pe kʼelo me abaik ta skoj li slevadurail jfariseoetik xchiʼuk jsaduseoetike».+ 12  Vaʼun, laj yaʼibeik smelolal ti maʼuk albatik ti skʼan skʼel sbaik ta skoj li slevadurail pane, jaʼ ta skoj li chanubtasel chakʼ jfariseoetik xchiʼuk jsaduseoetike. 13  Kʼalal te xa ox oy ta yosilal Sesarea yuʼun Filipo li Jesuse, xi lik sjakʼbe li yajchankʼoptake: «¿Buchʼu la jaʼ li Xnichʼon Krixchano chalike?».+ 14  Xi laj yalike: «Jlome chalik ti voʼot la li Juan J-akʼ-ichʼvoʼe,+ yantike chalik ti voʼot la li Eliase,+ li yantik xtoke chalik ti voʼot la li Jeremiase o voʼot la junuk j-alkʼop». 15  Xi albatike: «Pe li voʼoxuke, ¿buchʼuun avalojik?». 16  Xi la stakʼ li Simon Pedroe: «Voʼot li Kristoote,+ li Xnichʼon kuxul Diose».+ 17  Xi takʼbat yuʼun li Jesuse: «Muyubajan noʼox, Simon xnichʼon Jonas, yuʼun maʼuk laj yakʼbot anaʼ li buchʼu oy sbekʼtal xchiʼuk xchʼichʼele,* jaʼ laj yakʼbot anaʼ li Jtot ta vinajele.+ 18  Xi chkalbot xtoke: voʼot Pedroot,+ ta jvaʼan jtsobobbail li ta sba ton liʼe,+ vaʼun muʼyuk bu tstsalat yuʼun li yochebaltak Mukinale.* 19  Voʼon chkakʼbot li syaveal Ajvalilal* ta vinajele, jaʼ yuʼun kʼusiuk noʼox ti chachuk liʼ ta sba balumile chukbil xa li ta vinajele xchiʼuk kʼusiuk noʼox ti chatitun liʼ ta sba balumile titunbil xa li ta vinajele». 20  Vaʼun, tsots laj yalbe mantal yajchankʼoptak ti mu me buchʼu xalbeik batel ti jaʼ li Kristoe.+ 21  Jaʼo xa te lik yalbe tal yajchankʼoptak Jesus ti persa skʼan xbat ta Jerusalen xchiʼuk ti toj ep chil svokol ta skʼob moletik, bankilal paleetik, jchanubtasvanejetik ta mantal xchiʼuk ti chlaj ta milele, vaʼun ti chchaʼkuxi ta yoxibal kʼakʼale.+ 22  Vaʼun, li Pedroe parte laj yikʼ batel li Jesuse, xi tsots laj yalbe mantale: «Oyuk slekil avoʼonton ta atojolal, Kajval; ta batsʼi melel mu jechuk chkʼot ta atojolal taje».+ 23  Pe li Jesuse joypʼij, vaʼun xi laj yalbe li Pedroe: «¡Akʼo aba ta jpat, Satanas! Chamakbun* kakan, yuʼun maʼuk chanop li kʼusitik tsnop Diose, jaʼ chanop li kʼusitik tsnop krixchanoetike».+ 24  Vaʼun, xi laj yalbe yajchankʼoptak li Jesuse: «Mi oy buchʼu tskʼan chtal ta jtojolale, akʼo sjip ta yoʼonton xkuxlejal, akʼo xkuch li jtel teʼ* sventa vokolile xchiʼuk akʼo stsʼakliun-o batel.+ 25  Yuʼun li buchʼu tspoj yaʼi xkuxlejale ta me xchʼay yuʼun, yan li buchʼu chcham* ta jkoje jaʼ tsta xkuxlejal.+ 26  Ta melel, ¿kʼusi sbalil tstabe li jun krixchano mi laj yuʼunin skotol li kʼusi oy ta balumil pe ti jaʼ chchʼay li xkuxlejale?+ ¿O kʼusi xuʼ xakʼ li jun krixchano sventa sta yan velta li xkuxlejale?+ 27  Yuʼun li Xnichʼon Krixchanoe ta smukʼulal Stot chtal xchiʼuk yaj-anjeltak, vaʼun jaʼ jech chakʼbe stojol li krixchanoetik ti kʼu yelan stalelalik ta jujuntale.+ 28  Chkalboxuk avaʼiik ta melel ti oy jlom li buchʼutik liʼ vaʼalik ti muʼyuk bu chaʼiik kʼu yelan ta jyalel li lajelale, jaʼ to mi baʼyel laj yilik chtal ta Ajvalilal yuʼun li Xnichʼon Krixchanoe».+

Tsʼibetik ta yok vun

Literal «tsloʼla snup xchiʼile».
Kʼelo Glosario, levadura.
O «li krixchanoe».
O «Adese», jaʼ xkaltik, li mukinal ta komon yuʼun krixchanoetike. Kʼelo Glosario, mukinal.
Kʼelo Glosario, ajvalilal.
O «Chatʼabesbun».
Kʼelo Glosario, jtel teʼ.
O «chchʼay xkuxlejal». Li ta griego kʼope jaʼ psykje. Kʼelo Glosario, psykje.