Jenesis 1:1-31

1  Li ta slikebale, li Diose la spas vinajel* xchiʼuk balumil.+  Muʼyuk toʼox smelolal xvinaj li balumile xchiʼuk muʼyuk toʼox kʼusi oy,* naka ikʼ osil oy li ta ba voʼe,*+ jech xtok, li sjuʼel+ Diose* xtal xbat ta jujujot li ta ba voʼe.+  Xi laj yal li Diose: «Oyuk sak osil». Vaʼun, jech ayan sak osil.+  Kʼalal spasoj xa ox jeche, li Diose lek laj yil li sak osile. Jech la xchʼak Dios li sak osil xchiʼuk li ikʼ osile.  Li Diose Kʼakʼaltik laj yakʼbe sbi li sak osile, jaʼ Akʼobaltik+ laj yakʼbe sbi li ikʼ osile. Jech ayan mal kʼakʼal xchiʼuk ayan sob,* taje jaʼ li sba kʼakʼale.  Xi laj yal li Diose: «Akʼo xchʼak sba li voʼe,+ te akʼo komuk jvokʼ ta akʼol xchiʼuk te akʼo komuk ta olon li jvokʼe sventa xokoluk+ xkom li ta oʼlole».  Li Diose jaʼ jech la spas ta chaʼvokʼ li voʼe: li jvokʼe kom ta akʼol, li jvokʼe kom ta olon. Jaʼ xokol kom yuʼun li ta oʼlole.+ Jaʼ jech kʼot ta pasel taje.  Li Diose Vinajel laj yakʼbe sbi li bu xokol kome. Jech ayan mal kʼakʼal xchiʼuk ayan sob, taje jaʼ li xchibal kʼakʼale.  Vaʼun, xi laj yal li Diose: «Li voʼ oy ta yolon vinajele akʼo stsob sba ta jun noʼox yavil sventa xlik vinajuk li bu takine».+ Jaʼ jech kʼot ta pasel taje. 10  Li Diose Balumil laj yakʼbe sbi li bu takine,+ jaʼ Nab laj yakʼbe sbi+ li bu la stsob sba li voʼe. Ti vaʼ yelan taje lek laj yil+ li Diose. 11  Xi laj yal li Diose: «Akʼo chʼiuk yaxal* li ta balumile, tsʼiʼleletik ti chakʼ sbekʼe xchiʼuk jeltos teʼetik ti chakʼ sat xchiʼuk sbekʼe». Jaʼ jech kʼot ta pasel taje. 12  Chʼi talel jeltos yaxaltik li ta balumile, jeltos tsʼiʼleletik ti chakʼ sbekʼe+ xchiʼuk jeltos teʼetik ti chakʼ sat xchiʼuk sbekʼe. Ti vaʼ yelan taje lek laj yil li Diose. 13  Jech ayan mal kʼakʼal xchiʼuk ayan sob, taje jaʼ li yoxibal kʼakʼale. 14  Xi laj yal li Diose: «Akʼo oyuk kʼusitik chakʼ xojobal*+ li ta vinajele sventa chʼakal chkom li kʼakʼaltike xchiʼuk li akʼobaltik+ ti jaʼ chtun ta senyail kʼalal chjel batel li kʼakʼaletike, li jujun kʼakʼale xchiʼuk li jujun jabile.+ 15  Li kʼusitik chakʼ xojobal ti te oy ta vinajele jaʼ sventa chakʼ xojobal li ta balumile». Jaʼ jech kʼot ta pasel taje. 16  Li Diose la spas* li chib kʼusi mukʼtik ti chakʼ xojobale, li mas mukʼe jaʼ sventa mas chakʼ xojobal ta kʼakʼaltik,+ yan li bikʼite jaʼ sventa chakʼ jutuk xojobal ta akʼobaltik. Jech xtok, la spas li kʼanaletike.+ 17  Jaʼ te laj yakʼ Dios li ta vinajele sventa xakʼ xojobalik li ta balumile 18  xchiʼuk sventa xakʼ xojobal ta kʼakʼaltik xchiʼuk ta akʼobaltik, jech xtok, jaʼ sventa chʼakal chkom li sak osil xchiʼuk li ikʼ osile.+ Ti vaʼ yelan taje lek laj yil li Diose. 19  Jech ayan mal kʼakʼal xchiʼuk ayan sob, taje jaʼ li xchanibal kʼakʼale. 20  Xi laj yal li Diose: «Akʼo ayanuk xchanultak li voʼe, akʼo vilikuk ta vinajel+ li kʼusitik snaʼ xvilike». 21  Jech oxal, li Diose la spas li mukʼtik xchanultak nabe xchiʼuk skotol li jeltos xchanultak nab ti chnuxinajike xchiʼuk ti tsnojesik li nabe xchiʼuk skotol li jeltos chonetik ti oy xikʼik ti snaʼ xvilike. Ti vaʼ yelan taje lek laj yil li Diose. 22  Xi laj yal kʼalal laj yakʼanbe bendisione: «Epajanik, pʼolanik, nojesik li nabetike.+ Jech xtok, akʼo epajikuk li kʼusitik kuxajtik ta balumil ti chvilike». 23  Jech ayan mal kʼakʼal xchiʼuk ayan sob, taje jaʼ li svoʼobal kʼakʼale. 24  Xi laj yal li Diose: «Akʼo ayanuk ta balumil li jeltos kʼusitik kuxajtike:* tsʼunbal chonbolometik, chonetik ti xkilet chanavik ta balumile* xchiʼuk jeltos teʼtikal chonbolometik».+ Jaʼ jech kʼot ta pasel taje. 25  Li Diose lik spas li jeltos teʼtikal chonbolometik ta balumile, li jeltos tsʼunbal chonbolometike xchiʼuk li jeltos chonbolometik ti xkilet chanavike. Ti vaʼ yelan taje lek laj yil li Diose. 26  Xi laj yal li Diose: «Jpastik+ krixchano jech kʼuchaʼal voʼotike,+ jlokʼoltikuk xbat kuʼuntik.+ Akʼo spasik ta mantal li choyetik ta nabe, li kʼusitik kuxajtik ti chvilik ta vinajele xchiʼuk li tsʼunbal chonbolometike. Jech xtok, akʼo sventainik spʼejel li balumile xchiʼuk skotol li chonbolometik ti xkilet chanavik ta balumile».+ 27  Li Diose la spas li krixchano jech kʼuchaʼal stuke, jaʼ slokʼol la spas stuk; vinik xchiʼuk ants la spas.+ 28  Vaʼun, akʼbatik bendision yuʼun Dios, xi albatike: «Epajanik, pʼolanik, nojesik li balumile,+ ventainik,+ pasik ta mantal+ li choyetik ta nabe, li kʼusitik kuxajtik ti chvilik ta vinajele xchiʼuk skotol li kʼusitik kuxajtik ta balumile». 29  Xi laj yal li Diose: «Kakʼojboxuk skotol li tsʼiʼleletik ti chakʼ sbekʼ ti chchʼi ta spʼejel balumile xchiʼuk skotol li teʼetik ti chakʼ sat xchiʼuk sbekʼe. Akʼo tunuk avuʼunik sventa aveʼelik.+ 30  Yan li tsʼiʼleletik xchiʼuk yaxaltike jaʼ kakʼoj sventa sveʼelik+ li teʼtikal chonbolometik ta balumile, sventa skotol li kʼusitik kuxajtik ti chvilik ta vinajele xchiʼuk sventa skotol li yan kʼusitik kuxajtik* ta balumile». Jaʼ jech kʼot ta pasel taje. 31  Kʼalal spasoj xa ox jech li Diose, lek tajek laj yil.+ Jech ayan mal kʼakʼal xchiʼuk ayan sob, taje jaʼ li svakibal kʼakʼale.

Tsʼibetik ta yok vun

Liʼe jaʼ skʼoplal li vinajel ti te tsakal skʼoplal kʼanaletik, planetaetik, galaksiaetik xchiʼuk yantik.
O «xokol toʼox».
O «voʼ ti tsots yoke».
O «xchʼul espiritu Diose».
Ta skoj taje, li j-ebreoetik ta voʼnee jaʼo chlik xchapik jujun kʼakʼal kʼalal chchʼay xa ox batel li kʼakʼale, jaʼo te chpaj kʼalal chchʼay xa ox batel kʼakʼal ta yokʼomale.
O «tsʼiʼlel».
O «slusal».
Li jpʼel kʼop ta ebreo ti chichʼ jelubtasel «la spas» xie mu xkoʼolaj kʼalal «la spas» xi li ta versikulo 1, 21, 27 xchiʼuk 2:3. Kʼalal «la spas» xi li ta versikulo liʼe, jaʼ skʼan xal ti jaʼ xa noʼox chichʼ sabel lek yavil li chib kʼusi mukʼtik chakʼ xojobale o ti xlik abtejuke.
Li ta ebreo kʼope jaʼ nefex. Kʼelo Glosario, nefex.
Li ta ebreo kʼop «xkilet chanavik» xie te tsakal skʼoplal li chʼoetike, li kiletel chonetike xchiʼuk yan bikʼtal chonetik ti chanavik ta balumile.
Li ta ebreo kʼope jaʼ nefex.