Deuteronomio 16:1-22

  • Kʼin Koltael; Skʼinal Pan ti Muʼyuk Slevaduraile (1-8)

  • Skʼinal Xemanaetik (9-12)

  • Skʼinal Axibalnaetik (13-17)

  • Laj yichʼ vaʼanel jchapanvanejetik (18-20)

  • Kʼusitik pasbil ti mu stakʼ muyubtaele (21, 22)

16  »Vuleso me ta ajol li yuilal abibe* xchiʼuk skʼan xapas li Kʼin Koltael sventa li Jeova Dios avuʼune,+ yuʼun ta yuilal abib la slokʼesot tal ta Ejipto li Jeova Dios avuʼune, ta akʼobaltik la slokʼesot tal.+  Skʼan xamil li matanal chichʼ akʼel ta Kʼin Koltael sventa li Jeova Dios avuʼune,+ jaʼ li chije xchiʼuk li vakaxe,+ te xavakʼ ti bu tstʼuj sventa xichʼ muyubtabel sbi li Jeovae.+  Mu me xakap ta levadura* li kʼusiuk noʼox chalajes kʼalal chatiʼ li bekʼete;+ vukub kʼakʼal skʼan xaveʼ pan ti muʼyuk slevaduraile, jaʼ li pan sventa vokolile, yuʼun sujom lalokʼ tal li ta yosilal Ejiptoe.+ Ti kʼu sjalil kuxulote jechuk xapas sventa xavules ta ajol ti kʼusi ora lalokʼ tal ta yosilal Ejiptoe.+  Vukub kʼakʼal skʼan muʼyukuk avotsʼbil arina ti yichʼoj slevadurail ta sjunul li avosilale,+ jech xtok, li milbil matanal sventa Kʼin Koltael ti chavakʼ ta mal kʼakʼal li ta sba kʼakʼale mu me xakʼejbe* jutebuk sbekʼtal kʼalal to ta sob yokʼomal.+  Li matanal sventa Kʼin Koltaele mu buyuk noʼox xamil li ta lumetik chakʼbot li Jeova Dios avuʼune.  Skʼan te xichʼ milel ti bu tstʼuj sventa xichʼ muyubtabel sbi li Jeova Dios avuʼune. Ta mal kʼakʼal skʼan xamil li matanal sventa Kʼin Koltaele, jaʼo kʼalal naka noʼox chchʼay batel kʼakʼale,+ yuʼun jaʼo chkʼot yorail ti kʼusi ora lalokʼ tal ta Ejiptoe.  Skʼan xalakan xchiʼuk skʼan xalajes+ ti bu tstʼuj sventa xichʼ muyubtabel sbi li Jeova Dios avuʼune.+ Li ta yokʼomale xuʼ xasut batel ta akarpana.  Vakib kʼakʼal skʼan xalajes pan ti muʼyuk slevaduraile, li ta svukubal kʼakʼale chichʼ pasel jun tsobajel tsots skʼoplal sventa li Jeova Dios avuʼune. Mu me xapas jtosuk abtelal.+  »Skʼan xachap vukub xemana. Jaʼo te chlik achap talel vukub xemana kʼalal jaʼo chlik atuchʼ ta jos* li sevada atsʼunoje.+ 10  Vaʼun, skʼan xapas li Skʼinal Xemanaetik sventa li Jeova Dios avuʼune,+ chavichʼ talel li matanal chlokʼ ta avoʼontone, jaʼ ti kʼu yepal chakʼbot bendision li Jeova Dios avuʼune.+ 11  Kuxetuk avoʼonton ta yeloval li Jeova Dios avuʼune, kuxetuk yoʼonton li akereme, li atsebe, li amosoe, li akiarae, li jlevi krixchano ti te nakal ta ateklumale, li jyanlum ti te nakal ta ateklumale, li olol ti chamem stote xchiʼuk li ants ti chamem smalal ti te nakal ta ateklumale, skʼan te xamuyubaj ti bu tstʼuj sventa xichʼ muyubtabel sbi li Jeova Dios avuʼune.+ 12  Vuleso me ta ajol ti la-echʼ ta mosoil ta Ejiptoe+ xchiʼuk kʼelo me lek xchiʼuk akʼo ta akuxlejal li mantaletik liʼe. 13  »Vukub kʼakʼal skʼan xapas li Skʼinal Axibalnaetik*+ kʼalal mi la sta yorail chatsob li kʼusitik chlokʼ ta yikʼaobil atrigoe xchiʼuk mi la atsob li aseite xchiʼuk vino ti te chlokʼ ta spitsʼobile. 14  Kuxetuk noʼox avoʼonton kʼalal chapas li kʼine,+ kuxetuk yoʼonton li akereme, li atsebe, li amosoe, li akiarae, li jlevietike, li jyanlum ti te nakal ta ateklumale, li olol ti chamem stote xchiʼuk li ants ti chamem smalal ti te nakalik ta ateklumale. 15  Vukub kʼakʼal chapas kʼin+ ta stojolal Jeova Dios avuʼun ti bu stʼujoj li Jeovae, yuʼun chakʼbe bendision Jeova Dios avuʼun skotol li kʼusitik chlokʼ avuʼune xchiʼuk skotol li kʼusi chapase,+ muʼyuk kʼusi yan chanuptan, kʼajomal noʼox xkuxet avoʼonton.+ 16  »Skotol li viniketik avuʼune oxib velta ta jabil skʼan xbatik ta yeloval Jeova Dios avuʼun ti bu tstʼuje: ta Skʼinal Pan ti Muʼyuk Slevaduraile,+ ta Skʼinal Xemanaetik+ xchiʼuk li ta Skʼinal Axibalnaetike.*+ Mu me buchʼu xokoluk skʼob xbat ta yeloval li Jeovae. 17  Ep matanal chichʼ akʼbel li Jeova Dios avuʼune, yuʼun ep bendision yakʼojbot.+ 18  »Skʼan xavaʼan jchapanvanejetik+ xchiʼuk j-abteletik ta jujun nitilulal ta skotol li lumetik ti jaʼ chakʼbot li Jeova Dios avuʼune. Tukʼ skʼan xchapanik li jteklume. 19  Mu me xasokbe skʼoplal li kʼusi tukʼe,+ mu me tʼujbiluk noʼox yajval avuʼun+ xchiʼuk mu me xachon aba ta takʼin,* yuʼun li chonbail ta takʼine tspas yuʼun ta maʼsat li buchʼu pʼije+ xchiʼuk xuʼ tsokesbe skʼopojel li buchʼu tukʼe. 20  Li tukʼilale, jaʼ xatsʼakli li tukʼilale+ sventa jechuk-o xakuxi xchiʼuk sventa xavuʼunin li osil chakʼbot Jeova Dios avuʼune. 21  »Ti bu chapasbe li skajleb smoton Jeova Dios avuʼune mu teuk xatsʼun kʼusiuk noʼox teʼal ti chkʼot ta chʼul poste* avuʼune.+ 22  »Mu xapas vaʼanbil chʼul ton xtok,+ yuʼun spʼajoj tajek li Jeova Dios avuʼune.

Tsʼibetik ta yok vun

Kʼelo Glosario, levadura.
O «xanakʼbe».
Jun lukluk natil kuchilu ti jaʼ sventa xtuchʼobil li kʼusitik tsʼunbile o sventa chichʼ tsobbel-o sat.
O «Nakʼobbailetik ti te noʼox kʼuk sjalil chtun».
O «Nakʼobbailetik ti te noʼox kʼuk sjalil chtune».
O «mu me xatsak michʼob kʼabal».
Kʼelo Glosario, chʼul poste.