Markos 8:1-38

  • La smakʼlin chanmil krixchano li Jesuse (1-9)

  • Tskʼanik junuk senyail (10-13)

  • Slevadurail jfariseoetik xchiʼuk slevadurail Erodes (14-21)

  • Poxtaj jun maʼsat vinik ta Betsaida (22-26)

  • Laj yojtikin Kristo li Pedroe (27-30)

  • Baʼyel xa onoʼox laj yichʼ albel skʼoplal li slajel Jesuse (31-33)

  • Melel jchankʼopetik (34-38)

8  Li vaʼ kʼakʼale, te stsoboj sba yan velta epal krixchanoetik xchiʼuk chʼabal kʼusi slajesik, jaʼ yuʼun la stak ta ikʼel li jchankʼopetike xchiʼuk xi laj yale:  «Kʼux ta koʼonton li epal krixchanoetike, yuʼun oy xa ta oxib kʼakʼal liʼ xchiʼinojikune xchiʼuk muʼyuk kʼusi slajesik.  Mi muʼyuk veʼem ta jtak batel ta snaike, ta xlaj yipalik ta be, yuʼun oy jlom ti nom likemik tale».  Pe xi takʼbat yuʼun li yajchankʼoptake: «¿Buchʼu xa noʼox xuʼ tsta epal pan* sventa tsmakʼlin li epal krixchanoetik liʼe, ti stuktuk bu chʼikil ti bu oyutike?».  Akʼo mi jech, xi jakʼbatike: «¿Jayib pan oy avuʼunik?». Xi la stakʼike: «Vukub».  Vaʼun laj yalbe li krixchanoetik ti akʼo xchotiik ta lumtike. Vaʼun la stsak li vukub pane, la stoj ta vokol, la svokʼ,* te une laj yakʼbe yajchankʼoptak sventa tspukik batel, vaʼun la spukbeik li krixchanoetike.  Oy jaykot bikʼtal choy yuʼunik xtok, vaʼun kʼalal la stoj ta vokole laj yal ti akʼo spukik batel xtoke.  Jech oxal veʼ skotolik xchiʼuk noj kom xchʼutik, vaʼun noj lek vukub mukʼtik moch yuʼunik kʼalal la stsobbeik li skomenale.  Pe te van chanmiluk viniketik ti veʼike. Vaʼun jaʼ to la stakan batel. 10  Ta ora noʼox muy ta varko* xchiʼuk yajchankʼoptak, batik ta yosilal Dalmanuta. 11  Te lokʼik tal li jfariseoetike xchiʼuk lik svulilanik li Jesuse, yuʼun tskʼanik ti akʼo spas junuk senyail* ti likem tal ta vinajel sventa chakʼik ta prevae. 12  Vaʼun tsots la sjikʼ yoʼonton xchiʼuk xi laj yale: «¿Kʼu yuʼun yakalik ta sabel junuk senyail li jkʼol kuxlejal* liʼe? Chkal ta melel ti muʼyuk bu ch-akʼbat yilik junuk senyail li jkʼol kuxlejal liʼe». 13  Vaʼun te iktaatik komel, muy batel yan velta ta varko, bat ta jot tiʼ nab. 14  Pe chʼay ta sjol xichʼ batel spanik, kʼajomal noʼox jun pan laj yichʼik batel, jaʼ yuʼun muʼyuk kʼusi mas x-ayan yuʼunik li ta varkoe. 15  Vaʼun pʼijubtasatik xchiʼuk xi lek jamal albatike: «Vikʼiluk me lek asatik; kʼelo me abaik ta skoj slevadurail* jfariseoetik xchiʼuk ta skoj slevadurail li Erodese». 16  Te lik svulilan sbaik ta skoj ti chʼabal spanike. 17  Xi albatik kʼalal laj yakʼ ventae: «¿Kʼu yuʼun chavulilan abaik ta skoj ti chʼabal apanike? ¿Mi yuʼun mu to xavakʼik venta xchiʼuk mi yuʼun mu xavaʼibeik smelolal? ¿Mi yuʼun makal-o li avoʼontonik ti mu xavaʼibeik smelolale? 18  ‹¿Mi yuʼun mu xavilik akʼo mi oy sbekʼ asatik? ¿Mi yuʼun mu xavaʼiik akʼo mi oy achikinik?› ¿Mi mu xvul ta ajolik 19  kʼalal la jvokʼ voʼob pan ti lek noj-o xchʼutik voʼmil viniketike? ¿Jayib moch lek noj la atsobbeik li skomenale?». Xi laj yalbeike: «Lajcheb moch». 20  «¿Jayib to mukʼtik moch noj avuʼunik kʼalal la atsobbeik skomenal kʼalal la jvokʼ vukub pan ti veʼik-o chanmil viniketike?» Xi laj yalbeike: «Vukub moch». 21  Vaʼun xi albatike: «¿Mi yuʼun mu to xavaʼibeik smelolal chaʼa?». 22  Te une ochik batel ta Betsaida. Te laj yikʼbeik tal jun maʼsat vinik xchiʼuk la skʼanbeik vokol ti akʼo spike. 23  Vaʼun la stsakbe skʼob li maʼsat vinike, la snit lokʼel ta stiʼ bikʼit lum. Kʼalal laj xaʼox stubtabe li sbekʼ sate laj yakʼ skʼob ta stojolal xchiʼuk xi la sjakʼbee: «¿Mi xavil xa jutuk osil?». 24  La stoy sat li vinike xchiʼuk xi laj yale: «Xkil krixchanoetik, pe koʼol xchiʼuk teʼetik yilel, jaʼ noʼox ti kʼusie xvaʼlajetik». 25  Jaʼ yuʼun laj yakʼ skʼob yan velta ta sbekʼ sat li vinike, vaʼun xil xa lek osil, lekub li sbekʼ sate, jaʼ jech lik yil skotol li kʼusitike. 26  Jech oxal la stak batel ta sna xchiʼuk xi laj yalbee: «Mu me xa-och batel li ta bikʼit lume». 27  Te une batik ta bikʼit lumetik ta Sesarea yuʼun Filipo li Jesus xchiʼuk yajchankʼoptake, xi lik sjakʼbe li yajchankʼoptak kʼalal yakalik ta xanbale: «¿Buchʼuun la chalik li krixchanoetike?». 28  Xi laj yalbeike: «Voʼot la li Juan J-akʼ-ichʼvoʼe, li yantike chalik ti voʼot la li Eliase, li yantik xtoke chalik ti voʼot la junuk j-alkʼope». 29  Xi jakʼbatike: «Pe li voʼoxuke, ¿buchʼuun avalojik?». Xi la stakʼ li Pedroe: «Voʼot li Kristoote». 30  Laje tsots laj yal mantal ti mu me buchʼu xalbeik batele. 31  Jech xtok, jaʼo xa te lik yalbe tal yajchankʼoptak ti toj ep chil svokol li Xnichʼon krixchanoe xchiʼuk ti chpʼajat yuʼun li moletike,* li bankilal paleetike xchiʼuk li jchanubtasvanejetik ta Mantale, xchiʼuk ti chlaj ta milele, vaʼun ti chchaʼkuxi ta yoxibal kʼakʼale. 32  Jech onoʼox ta melel, lek jamal albatik taje. Pe li Pedroe parte laj yikʼ batel li Jesuse xchiʼuk tsots lik yalbe mantal. 33  Vaʼun li stuke joypʼij, la skʼel batel li yajchankʼoptake xchiʼuk tsots lik yalbe mantal li Pedroe: «¡Akʼo aba ta jpat Satanas!, yuʼun maʼuk chanop li snopben Diose, jaʼ chanop li snopben krixchanoetike». 34  Vaʼun la stak ta ikʼel li epal krixchanoetik xchiʼuk li yajchankʼoptake, xi laj yale: «Mi oy buchʼu tskʼan chtal ta jtojolale akʼo sten ta yoʼonton xkuxlejal, akʼo xkuch li jtel teʼ sventa vokolile* xchiʼuk akʼo stsʼakliun-o batel. 35  Yuʼun li buchʼu tspoj yaʼi xkuxlejale ta me xchʼay yuʼun, yan li buchʼu chchʼay xkuxlejal ta jkoj xchiʼuk ta skoj li lekil aʼyejetike jaʼ me tspoj. 36  Ta melel, ¿kʼusi lek tsta li jun krixchano mi laj yuʼunin skotol li kʼusi oy ta balumil, pe ti jaʼ chchʼay li xkuxlejale? 37  Ta melel, ¿kʼusi chakʼ ta xkʼexol li xkuxlejal jun krixchanoe? 38  Yuʼun li buchʼu chkʼexav ta jtojolal xchiʼuk ta sventa li kʼusi chkal li ta jkʼol kuxlejal ti muʼyuk tukʼ chakʼ sba ta stojolal Dios* xchiʼuk ti jpasmulile, li Xnichʼon krixchanoe jaʼ jech ta xkʼexav ta stojolal ek kʼalal mi vul tal xchiʼuk smukʼulal Stot xchiʼuk skotol li xchʼul anjeltake».

Tsʼibetik ta yok vun

Kʼelo glosario.
O: «la xetʼ»; «la xut».
O: «kanova».
Kʼelo glosario.
Kʼelo glosario.
Kʼelo glosario.
Kʼelo glosario.
Kʼelo glosario.
S.gr.: «sloʼlael nup chiʼilil».