Kʼelo li kʼusi yichʼoje

Batan ta saʼobil

¿Mi tsots skʼoplal ti xkaʼibetik lek smelolal li Vivliae?

¿Mi tsots skʼoplal ti xkaʼibetik lek smelolal li Vivliae?

Kʼalal laj yil chlokʼ chʼail ta jun favrika li jun kʼox tsebe, la snop ti jaʼ te chichʼ pasel li toketike. Li kʼusi tsta ta nopel li jun kʼox olol ti mu jechuke xuʼ van xakʼ tseʼej. Akʼo mi jech, oy kʼusi xuʼ xakʼ kʼotuk ta jtojolaltik kʼalal oy kʼusi mu xkaʼibetik smelolale. Jech kʼuchaʼal kʼalal muʼyuk lek ta jkʼeltik li svunal jun poxile xuʼ me oy kʼusi xibal sba chkʼot ta jtojolaltik.

Mi jaʼ muʼyuk lek chichʼ aʼibel smelolal li kʼusitik sventa mantale, mas to me toj tsots skʼoplal. Kalbetik junuk skʼelobil: oy buchʼutik ti muʼyuk laj yaʼibeik lek smelolal li chanubtaseletik yuʼun Jesuse (Juan 6:48-68). Kʼux ta alel, pe jaʼ noʼox la spʼajik skotol li chanubtasel taje, muʼyuk la sabeik mas skʼoplal.

¿Mi jaʼ sventa chasaʼ beiltasel kʼalal chachan li Vivliae? Toj lek mi jeche. Pe ¿mi anaʼoj ti oy krixchanoetik ti muʼyuk lek chaʼibeik smelolal junantik loʼiletik kʼalal chchanike? Jchanbetik batel skʼoplal oxtos li kʼusi muʼyuk lek yaʼiojbeik smelolale.

  • Junantik krixchanoetike mu xaʼibeik lek smelolal li mantal ti xie: «Xiʼtao ti Diose» (Eclesiastés 12:13Ch). Yalojike jaʼ skʼoplal jun chopol xiʼel. Pe li Diose mu lekuk chaʼi ti jechuk xaʼi sbaik li buchʼutik chtunik ta stojolale. Yuʼun xi chale: «Jaʼ yuʼun mu me xaxiʼ, yuʼun vuʼun chajchiʼinot; mu cʼu xal avoʼnton, yuʼun vuʼun Diosun avuʼun. Vuʼun chacacʼbot atsatsal, vuʼun chajcoltaot» (Isaías 41:10). Li xiʼtael Diose jaʼ skʼan xal ti lekuk xkalbetik skʼoplale xchiʼuk ti xkichʼtik ta mukʼe.

  • ¿Mi chichʼ van lajesel ta kʼokʼ li Balumile?

    Yan jkʼel vunetike muʼyuk lek yaʼiojbeik smelolal li kʼusi chal liʼe: «Scotol oy scʼacʼalil [...]. Oy yorail chijvocʼ; oy yorail chijcham» (Eclesiastés 3:1, 2). Chkʼot ta nopel yuʼunik ti Diose yakʼojbe skʼakʼalil kʼusi ora chcham li krixchanoetike. Pe li kʼusi chalbe skʼoplal li teksto liʼe, jaʼ li kʼusi chkʼot onoʼox ta pasel ta jtojolaltike, yuʼun chijcham jkotoltik. Li Skʼop Dios xtoke chchanubtasvan ti xuʼ jal xijkuxi yuʼun li kʼusi chkʼot ta nopel kuʼuntike. Jun skʼelobile, ta xal ti chnatub jkuxlejaltik mi la jxiʼtatik li Diose (Proverbios 10:27; Salmo 90:10; Isaías 55:3). ¿Kʼusi skʼan xal taje? Yuʼun li yichʼel ta mukʼ Diose tskoltautik sventa mu jpastik li kʼusitik chopole, jech kʼuchaʼal li yakubele xchiʼuk li mulivajele (1 Korintios 6:9, 10).

  • Oy junantik xchʼunojik ti ta melel «kʼejbilik sventa kʼokʼ» li vinajel xchiʼuk Balumile; jaʼ yuʼun xchʼunojik ti tslajes Jbalumiltik li Diose (2 Pedro 3:7). Pe li Diose yaloj ta jamal ti muʼyuk chakʼ ta lajesel li Balumile. Yuʼun laj yakʼbe «lec yic ti banomile yoʼ jech jʼechʼel stsinanoj sba ta yavil» (Salmo 104:5, Ch; Isaías 45:18). Li chopol balumil liʼe, jaʼ xkaltik li kʼusitik oy li ta balumile, jaʼ li kʼusi chichʼ lajesel sbatel osile, ti xkoʼolaj kʼuchaʼal chichʼ lajesel ta kʼokʼe, maʼuk skʼoplal li batsʼi Balumile. Jech xtok, kʼalal chalbe skʼoplal li batsʼi vinajele, jaʼ skʼan xal li kʼusi chkil ta jsatike, li vinajelbalumile xchiʼuk li kʼanaletik o ti bu nakal li Diose. Skotol taje muʼyuk chichʼ lajesel.

¿KʼU YUʼUN MUʼYUK CHAʼIBEIK LEK SMELOLAL BAKʼINTIK LI VIVLIAE?

Jech kʼuchaʼal li skʼelobiltak ti laj xa kalbetik skʼoplale, li krixchanoetike muʼyuk chaʼibeik lek smelolal li junantik kʼusi chal li Vivliae. ¿Kʼu yuʼun jech chakʼ kʼotuk ta pasel li Diose? Oy van buchʼu xi chale: «Mi snaʼoj skotol li Diose xchiʼuk ti stuk noʼox mas pʼije, ¿kʼu yuʼun mu kʼunuk ta aʼiel la spas li Vivlia sventa xaʼibeik smelolal skotol li krixchanoetike?». Jkʼeltik oxtos srasonal ti kʼu yuʼun muʼyuk lek chichʼ aʼibel smelolale.

  1. Li Vivliae jaʼ laj yichʼ pasel sventa xaʼibeik smelolal li buchʼutik bikʼit chakʼ sbaike xchiʼuk ti oy ta yoʼonton tskʼan chchanike. Xi la yalbe stot li Jesuse: «Ta jkʼupil kʼoptaot ta stojolal krixchanoetik, Tot, Yajval vinajel xchiʼuk balumil, yuʼun li kʼusitik liʼe lek amukoj ta stojolal li buchʼutik pʼijik  xchiʼuk li buchʼutik lek snaʼike, vaʼun jaʼ avakʼojbe snaʼ li uni ololetike» (Lukas 10:21). Li Vivliae jaʼ laj yichʼ tsʼibael sventa jaʼ noʼox xaʼibeik smelolal li aʼyej li buchʼutik oy ta yoʼontonik tskʼan chchanike. Li «buchʼutik pʼijik xchiʼuk li buchʼutik lek snaʼike», ti jaʼik jtoybaetik bakʼintike muʼyuk onoʼox lek chaʼibeik smelolal li Vivliae. Yan li krixchanoetik ti bikʼit chakʼ sbaik xchiʼuk ti oy ta yoʼontonik xchanel li Vivliae, jech kʼuchaʼal «li uni ololetike», staojik li matanal ti xuʼ xaʼibeik smelolal li lekil aʼyej yuʼun Diose. Ta melel, li Diose toj lek la spas li Vivliae.

  2. Li Vivliae jaʼ sventa li buchʼutik ta sjunul yoʼonton tskʼan chkoltaatik yuʼun Dios ta yaʼibel smelolale. Li Jesuse laj yal ti tskʼan xichʼ koltael li krixchanoetik sventa xaʼibeik lek smelolal li chanubtaseletik yuʼune. Pe ¿kʼuxi chkoltaatik? xi laj yal li Jesuse: «Li jkoltavanej ti jaʼ li chʼul espiritue, ti jaʼ tstak tal ta jbi li Totile, jaʼ chchanubtasoxuk skotol» (Juan 14:26). Li Diose chakʼ xchʼul espiritu, jaʼ xkaltik, li yip ch-abtej ti toj tsotse, sventa tskolta li krixchanoetik ta yaʼibel smelolal li Vivliae. Pe muʼyuk chakʼbe xchʼul espiritu li buchʼutik muʼyuk tspat yoʼontonik li ta koltael chakʼe, jaʼ yuʼun muʼyuk kʼun ta aʼibel smelolal chaʼiik li Vivliae. Li xchʼul espiritu Dios xtoke, tstak batel yajtsʼaklomtak Kristo ti mas xtojobik sventa tskolta li buchʼutik chtun yuʼunik koltael ta yaʼibel smelolal li Vivliae (Echos 8:26-35).

  3. Oy junantik loʼiletik ta Vivlia ti jaʼ to chaʼibeik smelolal li krixchanoetik kʼalal mi kʼot yoraile. Jech kʼuchaʼal li j-alkʼop Daniele, albat ti akʼo stsʼiba li kʼusi chkʼot ta pasel ta tsʼakale. Xi albat yuʼun jun anjele: «Daniel, mu to me xavacʼ ta aʼyel li cʼusitic laj avaʼye. Acʼbo lec selloal noxtoc li vune, jaʼ to me la sta yorail slajebal cʼacʼale». Li ta epal jabiletik echʼem tale, li krixchanoetike xchanojik li slivroal Daniele, pe muʼyuk yaʼiojbeik smelolal. Li Daniel eke muʼyuk la yaʼibe smelolal li kʼusi la stsʼibae, jaʼ yuʼun bikʼit laj yakʼ sba kʼalal xi laj yale: «Laj caʼay li cʼusi laj yale, pero muc xcaʼibe smelol». Skʼan xjelav kʼuk sjalil sventa xaʼibeik smelolal li albil kʼop yaloj Diose, jaʼ to mi kʼot yorail chil li stuke. Li anjele xi la yalbe smelolale: «Daniel, acʼo persa batel, yuʼun li cʼusitic laj yichʼ alele mucul to, jaʼ to me la sta li slajebale». ¿Buchʼutik van xuʼ xaʼibeik smelolal? «Li bochʼotic chopolique me junuc mu xaʼibeic o smelol li cʼusi chcʼot ta pasele. Yan li bochʼotic bijique chaʼibeic smelol» (Daniel 12:4, 8-10). Jaʼ yuʼun li Diose jaʼ to chalbe smelolal junantik loʼiletik ta Vivlia mi sta yorail chile.

Li stestigounkutik Jeovae ¿mi oy junuk velta muʼyuk kaʼiojbekutik lek smelolal Vivlia ta skoj ti maʼuk toʼox yoraile? Oy. Pe kʼalal chkʼot yorail yuʼun Dios ti chalbe smelolal junantik chanubtaseletike, ta anil noʼox ta jchʼunkutik li kʼu yelan chichʼ aʼibel smelolale. Jaʼ jech ta jchanbekutik stalelal li yajtakboltak Jesuse, ti bikʼit laj yakʼ sbaike xchiʼuk ti la sjel li kʼu yelan tsnopik kʼalal akʼbatik iluk yuʼun Jesus ti muʼyuk lek li kʼu yelan tsnopik toʼoxe (Echos 1:6, 7).

Ta melel, li kʼusi la snop li kʼox tseb ta sventa li chʼaile mu meleluk. Jaʼ yuʼun, skʼan me tsotsuk skʼoplal xkaʼitik li chanubtaseletik ta Vivliae, li aʼyej yichʼoje toj tsots skʼoplal, jaʼ yuʼun kʼalal ta jchantike mu jsabetik smelolal ta jtuktik. Jaʼ yuʼun ta jtijkutik avoʼonton sventa xakʼan koltael ta yaʼibel smelolal li Vivliae. Saʼo li buchʼu bikʼit chakʼ sbaik kʼalal chchanik li Vivliae, ti spatoj yoʼontonik li ta beiltasel yuʼun li xchʼul espiritu Dios sventa xaʼibeik smelolale xchiʼuk ti xchʼunojik ti jaʼ xa yorail ti tskʼan Dios akʼo jnabetik skʼoplal li kʼusi melele. Mi chakʼane, chiʼino ta loʼil li stestigotak Jeovae o chano li vunetik xchiʼuk yan kʼusitik ti lek xchanojbeik skʼoplale, ti te chichʼ tael li ta jpajinakutik ta Internet ta jw.org. Li Vivliae xi chal ta jamale: «Me xavocolet ta scʼanel li abijile [...,] chlic avotquin batel cʼusi tscʼan li Diose» (Proverbios 2:3-5).