Kʼelo li kʼusi yichʼoje

Batan ta saʼobil

 MANTAL TA SLIKEBALTIK PAJINA: LI KʼUSI MU XANAʼ TA SVENTA LI STESTIGOTAK JEOVAE

¿Kʼu yelan xkuxlejalik?

¿Kʼu yelan xkuxlejalik?

Jaʼunkutik jun organisasion ti jventainoj jba jtukutike, ta jeltos lumetik likemunkutik xchiʼuk muʼyuk jmoj jolkutik xchiʼuk yan relijionetik. Li smeʼ nail abtelal kuʼunkutike te oy ta Estados Unidos. Akʼo mi jech, li yan kermanotakutike ta jeltos lumetik bu nakajtik. Li ta spʼejel Balumile oyunkutik van jutuk mu vaxakibuk miyon xchiʼuk chkakʼkutik chanubtasel ta Vivlia mas ta 230 mukʼtik lumetik. Taje jaʼ jech ta jchʼunkutik li kʼusi laj yal komel Jesukristo liʼe: «Li lekil aʼyejetik ta sventa li Ajvalilal liʼe ta xichʼ cholel ta spʼejel balumil sventa xaʼi skotol li jteklumetike» (Mateo 24:14).

Mu ventauk bu nakalunkutik, ta jchʼunkutik xchiʼuk chkichʼkutik ta mukʼ li smantaltak ajvalil ta jujun lume, pe jaʼ noʼoxe muʼyuk ta jtikʼ jbakutik ta politikaetik. Vaʼun jaʼ jech ta jchʼunkutik li mantal ti xi laj yal komel li Jesuse: «Li voʼoxuke maʼuk te akʼoplalik ta balumil». Jaʼ yuʼun muʼyuk ta jtikʼ jbakutik ta politika xchiʼuk ta paskʼop (Juan 15:19; 17:16). Ta skoj taje ep stestigotak Jeova laj yichʼik tikʼel ta chukel, laj yilik tsatsal vokoliletik xchiʼuk lajik ta milel li ta Xchibal Mukʼta Paskʼop ta spʼejel Balumile. Li pasaro ovispo ti likem ta Alemaniae, laj yal ti jaʼik noʼox li buchʼutik muʼyuk la spasik li kʼusi mu x-akʼbat spas yuʼun sjol yoʼontonik kʼalal jaʼo yorail ch-ajvalilaj ta Alemania li Adolfo Hitlere.

«[Li stestigotak Jeovae] toj echʼ xa noʼox slekil yoʼontonik. Li buchʼutik jech stalelalik taje xuʼ xichʼik akʼbel mas tsots yabtelik ta politika ti jechuke, pe mi jsetʼuk onoʼox chchʼamik. [...] Chichʼbeik ta mukʼ yabtel li ajvaliletike, pe xchʼunojik ti jaʼ noʼox xuʼ slajesbe svokoltak krixchanoetik li Ajvalilal yuʼun Diose.» (Li periodiko Nová Svoboda, ta República Checa)

Pe taje maʼuk skʼan xal ti muʼyuk ta jchiʼinkutik ta loʼil li krixchanoetike. Li Jesuse xi laj skʼanbe Dios ta stojolal li yajchankʼoptake: «Maʼuk ta jkʼanbot vokol ti akʼo xalokʼes ta balumile» (Juan 17:15). Jaʼ yuʼun, jech kʼuchaʼal tspasik li jlakʼnatakutike chi-abtejkutik, chibatkutik ta manolajel xchiʼuk chibatkutik ta chanun.