¿Kʼu yuʼun oy choplejal?

Oy ox buchʼu tskʼan ti akʼo spas kʼusi chopol li Jesuse. ¿buchʼu van? (Mateo 4:8-10)

Mi junuk buchʼu tskʼan chkʼot ta chopol krixchano, ta jutkʼop xchiʼuk ta simaron. Pe mi jeche, ¿kuʼ yuʼun oy tajek ilbajinel, milbail xchiʼuk choplejal? Kʼux ta alel ti nopolik noʼox chkiltik ta notisia li kʼusitik xibal sba chkʼotanuk ta pasele. ¿Buchʼu tstijbe yoʼonton ta spasel kʼusi chopol li krixchanoetike? (Kʼelo 1 Juan 5:19.)

¿Mi yuʼun jech la spasutik Dios ti oy ta koʼontontik spasel kʼusi chopole? Mu jechuk. Li stuke jaʼ slokʼol la spasutik. La spasutik sventa oyuk ta koʼontontik xijkʼanvan jech kʼuchaʼal li stuke (Génesis 1:27; Job 34:10). Pe laj yakʼ jnopbentik xtok sventa jnoptik ta jujuntal li kʼusi ta jpastike. Li baʼyel jtot jmeʼtike muʼyuk la skʼan la xchanbeik stalelal li Diose jaʼ la spasik li kʼusi chopole. Kʼalal jech la spasike pasik ta jmulavil krixchano. Vaʼun kʼalal laj yil yalab xnichʼnabike, oy ta yoʼontonik spasel kʼusi chopol ek. (Kʼelo Deuteronomio 32:4, 5.)

¿Mi ta van xlaj li choplejale?

Li Diose tskʼan ti akʼo jtsaltik li kʼusi chopol oy ta koʼontontike (Proverbios 27:11). Xchiʼuk chalbutik kʼusi skʼan jpastik sventa lekuk jtalelaltik. Mi chkakʼtik akʼo sbeiltasutik xchiʼuk mi ta jchanbetik stalelaltake, xuʼ me xijmuyubaj. Pe li avie mu xchanbe lek kuʼuntik skotol li stalelaltake. (Kʼelo Salmo 32:8.)

Ti kʼu yuʼun yakʼoj to oyuk choplejal li Diose jaʼ yoʼ xkakʼtik-o venta li kʼusitik vokolil chakʼ li choplejale. Pe muʼyuk me te skʼeloj-o sbatel osil (2 Pedro 3:7-9). Li Balumile poʼot xa chnoj ta krixchanoetik ti xmuyubajik noʼoxe xchiʼuk ti chchʼunbeik smantal Jeovae. (Kʼelo Salmo 37:9-11.)