Vuleso xa noʼox ta ajol ti sjunul abekʼtale jaʼ noʼox xuʼ tspasat ta mantal yuʼun li sbekʼ asate. Taje jaʼ jech li jchiʼil ta vokʼel ti Jairo sbie. Pe mu xanop ti muʼyuk chmuyubaje: li Jairoe yakʼoj venta ti oy tajek sbalil li kuxlejale akʼo mi oy vokolil. ¿Kʼuxi pas yuʼun? Ta jkʼan ta jloʼiltaboxuk li sloʼil xkuxlejale.

Kʼalal ayan li Jairoe tsakbil ta parálisis cerebral ti jaʼ sbi cuadriplejía espástica. * Ta skoj taje mu spas ta mantal yuʼun li sbekʼtale. Li xchinabe mu lekuk tspas ta mantal li xchʼuxuviltake, jaʼ yuʼun tstsʼotilan li yok skʼobe. Bakʼintike tslilin sba li Jairoe, vaʼun tsyayijes sba. Jech noʼox xtok mi chʼayal yoʼontonik li buchʼutik te nopol oyike xuʼ xtaatik ta majel. Kʼux ta alel, pe nopolik noʼox ta jchukbekutik yok skʼob li ta siya de rueda sventa mu kʼusi xkʼot ta pasele.

TOJ TSOTS TI KʼU YELAN CHʼI TALELE

Toj vokol laj yaʼi Jairo ti kʼalal chʼi tale. Kʼalal oxib toʼox u yichʼoje lik tsakatuk ta tupʼ ikʼ, vaʼun chʼayem ta x-iktaat. Ep ta velta li jmeʼe anil xa spetoj batel ta ospital yuʼun yaloj mi chamem xa.

Li sbakiltak Jairoe lik xotpʼijanuk ta skoj ti tstsinan sba li xchʼuxuviltake. Kʼalal yichʼoj xaʼox vaklajuneb jabile laj yichʼ pasbel operasion li ta sbakil yoʼe, li ta snekebe, li ta sbakil xchake xchiʼuk li ta stsʼakalul yoʼe yuʼun pitkʼuj li sbakiltake. Kʼalal yakal chkux tal li Jairoe mu xchʼay ta jol ti te x-avet ta akʼobaltik ta skoj li xkʼuxule.

Ta skoj ti solel mu kʼusi spas yuʼune, li Jairoe koltabil-o yuʼun li yantike akʼo mi mu tsotsuk li kʼusi tspase, jech kʼuchaʼal chveʼ, tslap skʼuʼ o chpuchʼi. Jaʼ tskoltaik li jtot jmeʼe. Pe li stukike jech-o ta svulesbeik ta sjol ti maʼuk noʼox xuʼ chkoltaat-o yuʼun li yantike, ti te chkoltaat yuʼun li Dios eke.

OY XA KʼUXI XUʼ JKʼOPON JBAKUTIK

Li jtot jmeʼe jaʼik stestigo Jeova, jaʼ yuʼun ta onoʼox skʼelbeik loʼiletik ta Vivlia kʼalal neneʼ toʼox li Jairoe. Snaʼojik ta melel ti kʼalal chkamigointik li Diose mas ta jkʼupin li jkuxlejaltike. Snaʼojik xtok ti xuʼ xkoltaat sventa oyuk melel spatobil yoʼonton ta jelavel li Jairoe, akʼo mi mu kʼusi stakʼ spas ta skoj ti kʼun ta jyalel li sbekʼtal xchiʼuk ti mu xpaj ti tslilin sbae. Manchuk mi jech, ta sjakʼilanbe-o sbaik mi xaʼibe smelolal li kʼusi chchanubtasvan li Vivliae.

Jun kʼakʼale, kʼalal kʼox toʼox li Jairoe, li jtote xi tsots laj yalbee: «¡Jairo avokoluk kʼoponun! Mi akʼanojune, chakʼoponun». Vaʼun jaʼ noʼox lik nojuk ta yalel sat li Jairoe. Tskʼan ox ta xal li kʼu yelan chaʼi  sbae, pe mu xkaʼitik li kʼusi chale. Toj chopol laj yaʼi sba li jtot ti laj yakʼ okʼuke. Pe akʼo mi jech, te vinaj ti yakal chaʼi li Jairoe, akʼo mi mu xkʼopoj.

Ta tsʼakal jutuke, li jtot jmeʼe laj yakʼik venta ti tsbakʼes ta anil sbekʼ sat li Jairoe. Koʼol kʼuchaʼal tskʼan ta xal ta sbekʼ sat li kʼusi tsnope xchiʼuk li kʼu yelan chaʼi sbae. Kʼalal muʼyuk chichʼ aʼibel li kʼusi chal yaʼie, chopol chaʼi sba. Kʼalal laj yaʼibeik kʼusi skʼan xal li senyail tspas ta sate xchiʼuk ti kʼalal chakʼbeik li kʼusi tskʼane, tstseʼin tajek li Jairoe. Jaʼ jech ta stoj ta vokol.

Jun terapeuta ti xchanojbe lek skʼoplal ti kʼu yelan ta jchiʼin jbatik ta loʼil xchiʼuk yantike laj yalbunkutik ti oy kʼusi stakʼ jpaskutik sventa jkʼopon jbakutik xchiʼuk li Jairoe, skʼan la oy kʼusi ta jakʼbekutik ti xuʼ xal tale, tana o moʼoj xchiʼuk ti xkakʼ li jkʼobkutik ta yelovale. Jaʼ jech, xuʼ skʼel batel ta batsʼi kʼob mi tana xie xchiʼuk ta tsʼet kʼob mi moʼoj xie.

OY KʼUSI TOJ LEK LA SPAS TA XKUXLEJAL LI JAIROE

Oxib velta ta jabil tspasik asamblea li stestigotak Jeovae, ti tstsob sbaik ta sienal o ta smilal noʼox krixchanoetike. Li Jairoe xmuyubaj onoʼox kʼalal chichʼ jelubtasel li mantal sventa li buchʼutik chichʼik voʼe. Jun velta kʼalal vaklajuneb toʼox sjabilale, li jtotkutike xi la sjakʼbe li Jairoe: «¿Mi chakʼan chavichʼ voʼ ek?». Ta anil la skʼelbe batel li sbatsʼi kʼob jtote. Vaʼun xi la sjakʼbee: «¿Mi apasoj xa orasion xchiʼuk mi avalojbe xa Dios ti chatun ta stojolal ta sjunul akuxlejale?». Yan velta xtok la skʼelbe ta anil li sbatsʼi kʼobe. Te laj yichʼ ilel ta melel ti yakʼoj xa xkuxlejal ta stojolal Jeovae.

Kʼalal oy xaʼox jayibuk velta laj kalbekutik Jairo li kʼusi chalbe skʼoplal Vivliae jamal vinaj ti chaʼibe smelolal ti tsots skʼoplal li ichʼvoʼe. Jaʼ yuʼun li ta sjabilal 2004 jakʼbat li kʼusi mas tsots skʼoplal ta xkuxlejale: «¿Mi avakʼoj xa akuxlejal sventa chapasbe li kʼusi tskʼan yoʼonton Diose?». Sventa stakʼ li Jairoe la skʼel muyel, yuʼun jech albil akʼo spas sventa xal ti tanae. Kʼalal vuklajuneb xaʼox sjabilale, laj yichʼvoʼ xchiʼuk pas ta stestigo Jeova li Jairoe.

TUKʼ SKʼELOJ BATEL LI KʼUSITIK SVENTA MANTALE

Li ta 2011, akʼbat li kʼusi xuʼ chtun yuʼun sventa chkʼopoj-oe: jun komputadora, ti jaʼ tspas ta mantal kʼalal tskʼel batele, ti jaʼ chbakʼ-o yuʼun li ta yuninal sate xchiʼuk xuʼ tstsan li kʼusi oy ta spantayaile. Kʼalal tsmutsʼilan sate o tukʼ tskʼel li kʼusi oy ta pantayae xkoʼolaj kʼuchaʼal chakʼbe klik li sratonal komputadorae. Ep kʼusitik yichʼoj akʼbel li ta spantayail sventa xuʼ xkʼopoje.  Li komputadorae xuʼ ta xal li kʼusi chal tal ta sbekʼ noʼox sat li Jairoe.

Li Jairoe la xchan batel mas li kʼusi chal Vivliae xchiʼuk chʼi tajek ta yoʼonton ti tskʼan chalbe batel yantik li kʼusi snaʼoje. Li ta xchanel Vivlia ta kutsʼ kalalkutik ta jujun xemanae tskʼelunkutik xchiʼuk tskʼel li skomputadorae. Jaʼ jech tskʼanbun ti akʼo jtsʼibabe li kʼusi chal ta jtsobajelkutik kʼalal jaʼo oy kʼusi chichʼ jakʼel xchiʼuk chichʼ takʼele. ¿Kʼuxi tspas taje?

Kʼalal te xa oyunkutik li ta tsobajele, kʼun tskʼel batel li pantayae jaʼ to mi yakʼbe klik li bu sta-o chile. Vaʼun chkaʼibekutik li kʼusi chal ta komputadorae. Stseʼet xa li sate, yuʼun snaʼoj ti tspatbe yoʼonton li ermanoetike. Jun yamigo ti Alex sbie xi chale: «Jech-o chʼayal koʼonton chikom yuʼun kʼalal chkaʼibe junuk sloʼil ta Vivlia li Jairoe».

Li Jairoe tstunes jun komputadora ti tsbakʼes ta sbekʼ sate xchiʼuk ti te chkaʼitik li kʼusi tskʼan chal li ta tsobajeletike xchiʼuk kʼalal chchol mantale

Ta sbekʼ noʼox sat chalbe krixchanoetik li kʼusi xchʼunoje. Sventa taje chakʼbe klik yoʼ bu chvinaj slokʼol jun nichimaltik ti te oyik chonbolometike xchiʼuk krixchanoetik ti jeltos stsʼunbalik ti jun yoʼonton nakalike. Jaʼ yuʼun li yechʼomal eil ta komputadorae xi chale: «Li spatobil oʼontonal chakʼ Vivliae jaʼ ti tspas ta jun nichimaltik li Balumile ti bu chʼabal xa chamel mi jaʼuk lajele; Apocalipsis 21:4». Mi tskʼan tsnabe to mas skʼoplal li krixchanoe, li Jairoe chakʼbe klik yan velta vaʼun xi chal li komputadorae: «¿Mi chakʼan chachan Vivlia xchiʼuk voʼon?». Labal to sba laj kilkutik ti la xchʼam chanubtasel li jmukʼtotkutike. Toj lek laj kilkutik kʼalal yakal chchanubtas ta Vivlia li jmukʼtote, taje ta kʼunkʼun la spas xchiʼuk koltaat yuʼun yan ermano. Li jmukʼtote laj yichʼvoʼ ta jun asamblea ti laj yichʼ pasel ta Madrid, ta agosto ta 2014. ¡Li muyubajkutik tajek!

Li maestroetik ta s-eskuela li Jairoe chakʼik venta li xchʼunel yoʼontone. Li Rosario, ti jaʼ jun terapeuta ti jaʼ tskʼel li Jairoe, xi jamal laj yale: «Mi oy junuk velta ta jnop chi-och ta junuk relijione, jaʼ xchiʼuk li stestigotak Jeovae. Yuʼun kakʼoj venta ti jaʼ koltabil-o Jairo li chʼunel yoʼontone, ta skoj taje tskʼan chkuxi akʼo mi oy tsots svokol».

Li Jairoe chmuyubaj-o tajek kʼalal ta jkʼelbe li spatobil oʼontonal ta Vivlia ti xi chale: «Li coxoetique xbitubajic noʼox liquel jech chac cʼu chaʼal teʼtical chij; xcuxet noʼox yoʼnton tsots chlic qʼuejinicuc li umaʼetique» (Isaías 35:6). Oy onoʼox bakʼintik ti chat yoʼontone, pe mas jechtik-o ti xmuyubaj noʼoxe, taje jaʼ ta skoj ti chtun ta stojolal Jeova xchiʼuk ti oy yamigotake. Ti lek noʼox snopbenal xchiʼuk ti oy tajek xchʼunel yoʼontone chakʼ iluk ti kʼusiuk li vokolil ta jnuptantike, mi chijtunutik ta stojolal Jeovae oy sbalil li jkuxlejaltike.

^ par. 5 Li Parálisis cerebral jaʼ jech chichʼ biiltasel kʼalal mu lekuk li jchinabtik ti mu xijbakʼ yuʼune. Xuʼ xtupʼ kikʼtik, muʼyuk lek chijveʼ xchiʼuk mu lekuk chijkʼopoj yuʼun. Li cuadriplejía espástica jaʼ li parálisis mas tsotse, li buchʼu oy yuʼun taje mu xbakʼ li yok skʼobe xchiʼuk chʼabal yipal chkom li snukʼe.