Kʼelo li kʼusi yichʼoje

Batan ta saʼobil

 MANTAL TA SLIKEBALTIK PAJINA: ¿KʼU YUʼUN SKʼAN SPOJUTIK LI JESUSE?

¿Kʼuxi ta jtabetik sbalil ti cham xchiʼuk chaʼkuxi li Jesuse?

¿Kʼuxi ta jtabetik sbalil ti cham xchiʼuk chaʼkuxi li Jesuse?

«Chʼuno li Cajvaltic Jesuse, jech chacol.» (Hechos 16:31).

Taje jaʼ laj yalik li jtakbol Pablo xchiʼuk Silas kʼalal jaʼo te tikʼilik ta chukel ta lum Macedonia yuʼun Filipose. Sventa jnaʼtik kʼu yuʼun tsots skʼoplal skʼan xkakʼ xchʼunel koʼontontik ta stojolal Jesús yoʼ xkichʼtik pojel li ta lajelale, baʼyel skʼan xkaʼitik ti kʼu yuʼun chijchamutike. Jkʼeltik kʼusi chal Vivlia ta sventa taje.

Li krixchanoe maʼuk laj yichʼ pasel sventa chcham

«Li Mucʼul Diose te laj yacʼ ta tsʼunubaltic Edén li vinique yuʼun jaʼ ta xchabi, xchiʼuc ta xabtelan. Jech laj yalbe mantal: ‹Xuʼ chaloʼ scotol li sat teʼetic liʼ oy ta tsʼunubaltique. Jaʼ noʼox mu xaloʼbe sat li jpets teʼ ti jaʼ sventa chacʼ ta naʼel cʼusi lec, xchiʼuc cʼusi chopole, yuʼun me chaloʼe, ta xacham›, xut.» (Génesis 2:15-17.)

Li Diose laj yakʼ ta nichimaltik Edén li baʼyel vinik Adane, ta jun kʼupil sba paraiso liʼ ta Balumil ti oy ep chonbolometik xchiʼuk tsʼiʼleletike. Ti bu laj yichʼ akʼel li Adane oy ep ta tos teʼetik ti chakʼ sate xchiʼuk ti xuʼ tslajese. Akʼo mi jech, li Jeovae laj yal ti oy jpets teʼ ti mu xuʼ tslobe sate, yuʼun mi la sloʼe ta xcham.

¿Mi laj van yaʼibe smelolal Adán li kʼusi albat yuʼun Jeovae? Li Adane snaʼoj kʼusi jaʼ li lajelale, yuʼun yiloj kʼu yelan chcham li chonbolometike. Ti koʼoluk yelan laj yichʼ meltsanel kʼuchaʼal chonbolom li Adane, muʼyuk sbalil jechuk li kʼusi albat yuʼun Diose, yuʼun ta onoʼox xcham ta tsʼakal. Pe mu jechuk, li baʼyel vinike laj yaʼibe lek smelolal ti chkuxi sbatel osil mi la xchʼunbe smantal li Diose xchiʼuk mi muʼyuk la slobe sat li jpets teʼe.

Oy buchʼutik tsnopik ti jaʼ la skʼoplal chiʼinejbail ta vayel li jpets teʼe. Pe mu meleluk maʼ taje, yuʼun li Jeovae, xi laj yalbe li Adán xchiʼuk Eva: «Bolanic; epajanic. Nojesic li banamile; ventainic o» (Génesis 1:28). Jaʼ skʼoplal jpets batsʼi teʼ. Li Jeovae laj yal «ti jaʼ sventa chacʼ ta naʼel cʼusi lec, xchiʼuc cʼusi chopole», yuʼun li jpets teʼe jaʼ svinajeb ti jaʼ noʼox Jeova xuʼ xal li kʼusi lek xchiʼuk li kʼusi chopole. Ti muʼyukuk la sloʼ Adán li sat teʼ taje, maʼuk noʼox laj yakʼ ta ilel ti chchʼun mantale, yuʼun laj yakʼ ta ilel xtok ti tstoj ta vokol skotol li kʼusitik akʼbat yuʼun li Jpasvaneje.

 Ta skoj ti muʼyuk la xchʼunbe smantal Dios li Adane cham

Li Diose xi laj yalbe li Adane: «Laj aloʼ li sat teʼ ti laj calbot mu xuʼ chaloʼe». Xchiʼuk xi to laj yale: «Ep chachiqʼuinaj cʼalal chata aveʼel. Jaʼ to chlaj avocol cʼalal me lapas ta lum yan veltae. Yuʼun ta lum onoʼox pasbilot, jech chacʼataj ta lum yan velta noxtoc» (Génesis 3:17, 19).

Li Adane la sloʼ li sat teʼ ti albil ti mu stakʼ sloʼe, pe li Diose mu teuk noʼox skʼeloj li kʼusi toj chopol la spase, yuʼun laj yakʼ ta ilel ti muʼyuk la stoj ta vokol skotol li kʼusi lek spasoj Jeova ta stojolale. Li Adane la stoy sba ta stojolal Jeova kʼalal la sloʼ li sat teʼe xchiʼuk la snop ti tspas li kʼusi tskʼan stuke, ta skoj taje toj ep kʼusitik chopol chkʼotanuk ta pasel.

Ta tsʼakale cham li Adane, jech kʼuchaʼal albil xa onoʼox yuʼun Jeovae. Li Diose ta tsʼubil lum onoʼox la smeltsan li vinike xchiʼuk laj yalbe ti chkʼataj ta tsʼubil lum yan veltae. Li baʼyel vinike muʼyuk kʼusi kuxul kom yuʼun xchiʼuk chʼabal bu jotukal bat kuxiuk. J-echʼel cham-o, mu xa kʼusi snaʼ kom jech kʼuchaʼal li tsʼubil lume (Génesis 2:7; Eclesiastés 9:5, 10).

Ta skoj ti jaʼutik snitilulal Adane chijchamutik

«Ta sventa jun vinic iʼoch li mulil liʼ ta banamile, xchiʼuc ti jaʼ ta sventa mulil iʼoch li lajele, jech scotol cristiano chchamic, yuʼun scotol cristiano jpasmulil icʼotic.» (Romanos 5:12.)

Ta skoj ti muʼyuk la xchʼun mantal li Adane, ti la saʼ smule, ep kʼusitik chopol kʼotanuk ta pasel yuʼun. Li baʼyele, jaʼ ti la xchʼay li xkuxlejale, pe maʼuk noʼox jun kuxlejal ti 70 o 80 jabil kʼuchaʼal chijkuxiutik avie, moʼoj, yuʼun jaʼ la xchʼay ti xuʼ ox chkuxi sbatel osile. Jech xtok, maʼuk xa tukʼil krixchano kom, jaʼ yuʼun jpasmulil xa skotol ayan li yalab xnichʼnabe.

Jkotoltik jaʼ te talem jtsʼunbaltik ta stojolal Adán, jaʼ yuʼun jkuchojtik talel mulil xchiʼuk chijchamutik. Li Pabloe, xi laj yal ta melel kʼu kelantike: «Li vuʼune beqʼuet noʼox quichʼoj. Jaʼ yuʼun mozoinbilun o yuʼun li mulile. ¡Toj abul jba! ¿Bochʼo chiscoltaun ta sventa li jbecʼtal sventa lajele?». Xi la stakʼ stuke: «Batsʼi coliyal Dios ti jaʼ la scoltaun ta sventa li Jesucristoe, jaʼ li Cajvaltique» (Romanos 7:14, 24, 25).

 Ta skoj ti laj yakʼ xkuxlejal ta jtojolaltik li Jesuse xuʼ xijkuxi sbatel osil

«La stac tal Xnichʼon li Jtotic Diose sventa tal scolta li cristianoetic liʼ ta banamile.» (1 Juan 4:14.)

Li Jeovae oy kʼusi la spas sventa xuʼ spojutik lokʼel li ta mulil ti yakʼoj ep vokolile xchiʼuk li ta lajelal sbatel osil ti jaʼ jun kastigoe. ¿Kʼusi la spas? La stak tal ta Balumil li skʼanbil Nichʼon sventa x-ayan kʼuchaʼal jun tukʼil krixchano ti xkoʼolaj kʼuchaʼal Adane. Pe li kʼusi jelelik-oe, jaʼ ti «me jutuc muʼyuc smul» li Jesuse (1 Pedro 2:22). Jaʼ yuʼun li stuke xuʼ ox chkuxi sbatel osil ti jechuke, yuʼun muʼyuk xkuchoj li mulile.

Akʼo mi jech, li Jeovae laj yakʼ ti akʼo xmilat yuʼun yajkontratak li Xnichʼone, pe li ta yoxibal kʼakʼale chaʼkuxesat. Li Jesuse chaʼkuxi kʼuchaʼal jun kuxlejal ti mu xvinaj ta kʼelele xchiʼuk ta mas tsʼakal jutuke sut batel ta vinajel. Kʼalal te xaʼox oy ta vinajel li Jesuse, laj yakʼbe ta stojolal Stot li sbalil stukʼil kuxlejal sventa xichʼ tael yan velta li kʼusi la xchʼay li Adane. Li Jeovae la xchʼam ti laj yakʼ sba ta matanal li Xnichʼone, vaʼun jaʼ jech xuʼ xa staik kuxlejal sbatel osil li buchʼutik chakʼ xchʼunel yoʼontonik ta stojolal li Jesuse (Romanos 3:23, 24; 1 Juan 2:2).

Vaʼun, li Jesuse jaʼ jech la sman ta xkuxlejal stuk li kʼusi la xchʼay li Adane. Cham ta jtojolaltik sventa jtatik li kuxlejal sbatel osile. Li Vivliae chal ti kʼalal laj yichʼ milel li Jesuse, «jaʼ sventa slequilal scotol [krixchanoetik], yuʼun toj ep slequil yoʼnton li Diose» (Hebreos 2:9).

Taje toj ep kʼusitik chakʼ jchantik ta stojolal Jeova. Ta skoj ti jpas mulil skotol li krixchanoetike mu xuʼ spoj sbaik lokʼel stukik li ta mulil xchiʼuk lajelale, yuʼun li smantaltak Jeovae toj echʼ noʼox tukʼik. Akʼo mi jech, ta skoj ti oy xkʼuxul yoʼonton xchiʼuk ti jkʼanvaneje, oy kʼusi la spas stuk sventa spojutik lokʼel. Pe toj echʼ noʼox toyol stojol li kʼusi tspase, yuʼun laj yakʼ ta matanal li Xnichʼon sventa tspojutik lokʼel li ta lajelale (Romanos 5:6-8).

Li Jesuse laj yichʼ chaʼkuxesel, jech chchaʼkuxiik li yantik xtoke

«Li Cristoe ichaʼcuxi loqʼuel ta smuquinal. Jaʼ sba sat icʼot yuʼunic li bochʼotic ichamic xae. Ta sventa jun vinic iʼoch li lajele; jaʼ jech ta sventa jun vinic oy chaʼcuxesel noxtoc. Jech chac cʼu chaʼal ta sventa Adán chijchamutic jcotoltique; jaʼ jech ta sventa Cristo chijchaʼcuxiutic jcotoltic.» (1 Corintios 15:20-22.)

Jnaʼojtik lek ti ay ta Balumil xchiʼuk cham li Jesuse, pe ¿kʼuxi jnaʼojtik ti laj yichʼ chaʼkuxesele? Jun sprevaile, jaʼ ti laj yakʼ sba ta ilel ta stojolal epal krixchanoetik ta buyuk noʼox xchiʼuk ta jeltos yoraile. Jun veltae laj yakʼ sba ta ilel ta stojolal mas ta voʼob sien krixchanoetik. Kʼalal la stsʼibabe batel karta li jchʼunolajeletik ta Corinto li jtakbol Pabloe, te laj yalbe skʼoplal ti ep ta velta laj yakʼ sba ta ilel li Jesuse. Jech xtok, laj yal ti oy toʼox la buchʼutik kuxulik ti laj yilik li Jesuse, jaʼ xkaltik ti xuʼ xalik ta melel li kʼusi laj yilike xchiʼuk li kʼusi yaʼiojike (1 Corintios 15:3-8).

Li Pabloe laj yal ti jaʼ «sba sat» kʼotem li Cristoe, jaʼ xkaltik, ti jaʼ baʼyel laj yichʼ chaʼkuxesele. Taje jaʼ skʼan xal ti oy to buchʼu yan chichʼ chaʼkuxesele. Li Jesuse laj yal ti tsta skʼakʼalil ti ch-aʼibat yechʼomal ye yuʼun «scotol li bochʼotic oyic ta smuquinalique» (Juan 5:28, 29).

 Mi ta jkʼan chijkuxiutik sbatel osile, skʼan xkakʼ xchʼunel koʼontontik ta stojolal Jesús

«Yuʼun toj ep la xcʼuxubin scotol cristianoetic ta banamil li Diose, jech laj yacʼ li jun noʼox Xnichʼon oye, yuʼun jech mu chʼayeluc chbat li bochʼotic ta xchʼunic ti jaʼ Jcoltavanej yuʼunique; jaʼ ta xcuxiic o sbatel osil.» (Juan 3:16.)

Li ta slikebaltik pajina ta Vivliae, te chal kʼuxi ayan talel li lajelale xchiʼuk ti kʼuxi chʼay li nichimaltik Edene. Li ta slajebaltik pajinae, chal ti chichʼ tupʼbel skʼoplal li lajelale xchiʼuk ti tskʼatajes ta paraiso spʼejel Balumil li Diose. Kʼalal mi kʼot yorail taje, li krixchanoetike xuʼ skʼupin lek xkuxlejalik xchiʼuk xmuyubajik ta sbatel osil. Li ta Apocalipsis 21:4 chal ta melel ti «muʼyuc xa bochʼo [chchame]», pe sventa jpat koʼontontik ti chkʼot ta pasel li kʼusi yaloj Dios taje, li versikulo 5, xi chale: «Li jcʼop liʼi jaʼ melel scotol; persa chcʼot ta pasel». Skotol li kʼusi chal Jeovae, chkʼot ta pasel ta melel.

¿Mi achʼunoj ti ‹jaʼ melel skotol liʼe xchiʼuk ti persa chkʼot ta pasele›? Mi jeche, chano batel mas ta stojolal Jesús xchiʼuk akʼo xchʼunel avoʼonton ta stojolal, vaʼun lek me chilot li Jeovae. Li stuke maʼuk noʼox chakʼbot epal bendision li avie, yuʼun chakʼ ti xakuxi sbatel osil ta jun paraiso liʼ ta Balumile, ti bu «muʼyuc xa bochʼo chat yoʼnton, muʼyuc xa bochʼo ch-ocʼ, muʼyuc xa bochʼo cʼusi cʼux chaʼay».