Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Li Jkʼel osil ta toyole (sventa chichʼ chanel)  |  Avril ta 2015

Jaʼ yakʼobil ta ilel kʼanelal kʼalal chichʼ lokʼesel ta tsobobbail li jpasmulile

Jaʼ yakʼobil ta ilel kʼanelal kʼalal chichʼ lokʼesel ta tsobobbail li jpasmulile

«KʼALAL laj kaʼi laj yichʼ alel ta tsobobbail ti maʼuk xa stestigo Jeova li jbankilal keremkutike, solel chilaj xa laj kaʼi —xi chvul ta sjol li Juliane—. Solel koʼol toʼox jnaʼ kʼusi ta jpaskutik xchiʼuk lek toʼox xkil jbakutik. Toj lek toʼox ta chanbel stalelal, pe ta anil noʼox lik spas kʼusitik chopol. Solel tsmil sba ta okʼel jutuk mu skotoluk velta li kajnile, jaʼ yuʼun mu xa jnaʼ kʼusi ta jpas sventa jpatbe yoʼonton. La jakʼbe jbakutik kʼusi ti muʼyuk lek la jpaskutike.»

Kʼalal chichʼ lokʼesel ta tsobobbail li jpasmulile toj kʼux tajek. Jaʼ yuʼun, ¿kʼuxi xuʼ xichʼ alel ti jaʼ yakʼobil ta ilel kʼanelale? ¿Kʼu yuʼun chal Vivlia ti persa skʼan jech chichʼ pasel taje? ¿Kʼusitik chichʼ tsakel ta venta kʼalal ta xichʼ lokʼesel ta tsobobbail li jun jpasmulile?

¿BAKʼIN VAN SKʼAN XICHʼ LOKʼESEL TA TSOBOBBAIL?

Oy kʼusi chaʼtos skʼan tsakel ta venta kʼalal chichʼ lokʼesel ta tsobobbail li jun stestigo Jeovae. Li baʼyele, jaʼo kʼalal mi tsots la spas smule, li xchibale jaʼo kʼalal mi muʼyuk la sutes yoʼontone.

Akʼo mi snaʼoj Jeova ti mu junuk yajtuneltak ti tukʼ xa tajek kʼusitik tspasike, tskʼan onoʼox ti akʼo xchʼunik li mantaletik yakʼoj ta sventa talelaletike. Jech kʼuchaʼal liʼe, li stuke muʼyuk lek chil li mulivajele, li yichʼel ta mukʼ santoetike, li elekʼe, li skʼanel takʼin ta persae, li milvaneje xchiʼuk li spasel espiritismoe (1 Korintios 6:9, 10; Apokalipsis 21:8).

Anaʼoj onoʼox van ta melel ti xuʼ chchabiutik xchiʼuk ti oy lek srasonal li mantaletik chakʼbutik Diose. Yuʼun melel onoʼox ti jkotoltik ta jkʼan chijkuxiutik xchiʼuk krixchanoetik ti mu snaʼ saʼik kʼope, ti lek stalelalike xchiʼuk ti stakʼuk jpat koʼontontik ta stojolalike. Taje jaʼ jech li ta steklumal Diose. Ti jun noʼox koʼontontik te jchiʼuktik li kermanotaktike jaʼ ta skoj ti laj kakʼ jkuxlejaltik ta stojolal li Jeovae, laj kakʼ ketik ti ta jchʼunbetik li smantaltake.

Jaʼ yuʼun chaʼa, ¿kʼusi van chkʼot ta pasel mi tsots la spas smul jun yajtsʼaklom Kristo ta skoj ti jmulavil krixchanoe? Li yajtuneltak Dios ta voʼnee oy jech kʼot ta stojolalik, pe muʼyuk la spʼaj ta ora. Jun ti buchʼu jech kʼot ta stojolale jaʼ li Davide, yuʼun la xchiʼin ta vayel yan ants xchiʼuk milvan. Akʼo mi jech, xi albat ta jamal yuʼun li j-alkʼop Natane: «Li Mucʼul Diose muc [...] chayacʼbot atoj li amule» (2 Samuel 12:13).

¿Kʼu van yuʼun akʼbat perton yuʼun li Jeovae? Yuʼun la sutes yoʼonton ta melel li Davide (Salmo 32:1-5). Jech li avi eke, mi oy tsots la spas smul junuk yajtsʼaklom Kristo ti la sutes yoʼonton xchiʼuk ti mi laj yikta spasel li kʼusitik chopole, muʼyuk ta xichʼ lokʼesel ta tsobobbail (Echos 3:19; 26:20). Pe mi muʼyuk tsutses yoʼonton ta melele, persa chlokʼ ta tsobobbail yuʼunik li moletik ti chtunik ta komite sventa chapanvaneje.

Ta skoj li kʼusi kʼot ta nopel yuʼun li moletike xuʼ van chopol tajek chkiltik o chʼabal xkʼuxul yoʼontonik yilel, mas to me xuʼ jech chkiltik mi lek tajek xkil jbatik xchiʼuk li ermano o li ermanae. Akʼo mi jech, li Vivliae chakʼbutik lek srasonaltak sventa jnoptik ti jaʼ  yakʼobil ta ilel kʼanelal kʼalal oy buchʼu chichʼ lokʼesel ta tsobobbaile.

SBALILTAK CHICHʼ TAEL KʼALAL CHICHʼ LOKʼESEL TA TSOBOBBAILE

Li Jesuse laj yal ti pʼijilale chvinaj ti tukʼ skʼoplal ta skoj li yabteltake (Mateo 11:19). Ti chichʼik lokʼesel ta tsobobbail li jpasmuliletik ti mu sutes yoʼontonike toj pʼij xchiʼuk oy srasonaltak, yuʼun oy sbalil chichʼ tael. Jkʼeltik oxibuk sbaliltak:

Jaʼ sventa lekuk skʼoplal li Jeovae. Ta skoj ti jaʼutik stestigotak Jeovae, jaʼ te chvinaj kʼusi tsnopik ta stojolal Jeova li krixchanoetik kʼalal chilik ti kʼu yelan jtalelaltike (Isaías 43:10). Jech li ta stojolal alab nichʼnabiletik eke, xuʼ lek o chopol chbat skʼoplal yuʼun stot smeʼik. Yuʼun li krixchanoetike xuʼ lek o chopol kʼusi tsnopik ta stojolal Jeova ta skoj li jtalelaltike. Li ta skʼakʼalil Ezequiele, li yantik balumil ti te nopol oy ta Israele jaʼ onoʼox la snopik ta stojolal Jeova kʼalal jaʼ chalbeik skʼoplal li judaetike (Ezequiel 36:19-23). Li krixchanoetik eke anil chakʼik venta ti jaʼutik steklumal li Jeovae. Jaʼ yuʼun mi lek chkakʼ ta ilel jtalelaltike lek kʼusi chalik ta stojolal li Jeovae.

Mi lijmulivaje ta me xkikʼubtasbetik sbi li Diose. Jaʼ yuʼun xi laj yal mantal li jtakbol Pedroe: «Mu xa me jechuk xapasik jech kʼuchaʼal tskʼan toʼox avoʼontonik kʼalal mu toʼox xavojtikinik Diose, ti kʼusi mas leke, jaʼ ti lekuk chʼul skotol atalelalik jech kʼuchaʼal ti chʼul li Buchʼu la stakoxuk ta ikʼele, yuʼun xi tsʼibabile: ‹Skʼan me chʼulukoxuk, yuʼun chʼulun li voʼone›» (1 Pedro 1:14-16). Ta melel, mi lek tajek li jtalelaltike lek me chichʼ albel skʼoplal li Dios ti ta xkichʼtik ta mukʼe.

Jaʼ yuʼun chaʼa, kʼalal nopem xaʼi tspas kʼusitik chopol li jun stestigo Jeovae, persa onoʼox chkʼot ta xchikin li buchʼutik xojtikinane. Kʼalal jech taje, jaʼ te chvinaj ti lek sak slumal Jeova xchiʼuk ti tstsak ta venta li mantaletik yakʼoj ta Vivlia mi chichʼ lokʼesel ta tsobobbail li jpasmulile. Jkʼelbetik junuk skʼelobil. Jun vinik ta Suizae ay ta Salon sventa Tsobobbail, laj yal ti tskʼan chkʼot ta stestigo Jeovae. ¿Kʼu yuʼun? Yuʼun li xchiʼil ta vokʼele laj yichʼ lokʼesel ta tsobobbail ta skoj ti mulivaje, jech oxal tskʼan ch-och ta junuk organisasion «ti muʼyuk tstsʼikik li tsatsal mulile».

Jaʼ sventa chichʼ chabiel li tsobobbaile. Li jtakbol Pablo laj yalbe yajtsʼaklomtak Kristo ta Korinto ti toj xibal sba kʼusi chkʼot ta pasel mi te laj yichʼ iktael ta tsobobbail li buchʼutik tsots tspas smulik ti mu sutes yoʼontonike. Laj yal ti akʼo mi jutuk noʼox levadura yichʼoj li votsʼbil arinae «tspuk sba ta skotol», jaʼ jech li buchʼu mu sutes yoʼonton eke xuʼ sokesbe yoʼonton li tsobobbaile. Laje xi laj yal mantale: «Lokʼesik ta atojolalik li buchʼu toj chopole» (1 Korintios 5:6, 11-13).

Kʼuchaʼal chkiltike, li buchʼu laj yalbe skʼoplal li Pabloe jaʼ jun vinik ti chmulivaje, ti maʼuk xa ta mukul tspase. Ta skoj taje, lik spak skʼoplalik li yantik ermanoetik ta tsobobbaile (1 Korintios 5:1, 2). Ti muʼyukuk la slokʼesik li vinik taje, xuʼ van lik spasik jech ek li ermanoetik ta tsobobbail li kʼusitik chopol nopem xaʼiik spasel te ta lum Korintoe. Jech li avi eke, mi muʼyuk ta slokʼesik ta tsobobbail li buchʼu tsots ta spas smule, xuʼ me muʼyuk xa tsots skʼoplal chilik yantik li smantaltak Diose (Eclesiastés 8:11). Li buchʼutik tspasik mulil xchiʼuk muʼyuk tsutes yoʼontonike xkoʼolajik kʼuchaʼal «tonetik ti nakʼajtik ta yut voʼ» ti xuʼ chakʼ jikʼavuk xchʼunel yoʼonton li yermanotakike (Judas 4, 12).

Sventa xuʼ xikta-o li kʼusitik chopol tspase. Li Jesuse laj yalbe skʼoplal jun kerem ti lokʼ batel ta snae xchiʼuk bat slajes skotol ta spasel kʼusitik chopol li sparte akʼbat yuʼun stote. Jaʼ to te vul xchʼulel kʼalal laj yakʼ venta ti nom oy ta stojolal li yutsʼ yalale xchiʼuk ti tsots laj yil svokole. Ta tsʼakale, laj yakʼ venta ti chopol kʼusitik la spas li jtoyba kereme, vaʼun la sutes yoʼonton xchiʼuk sut batel ta sna (Lukas 15:11-24). Li totil eke solel muyubaj tajek. Li kʼusi laj yal Jesus ta sventa li jkʼanvanej totil taje, jaʼ tskoltautik sventa xkaʼibetik smelolal ti kʼu yelan chaʼi sba li Jeovae. Xi chal ta Vivlia li kʼusi tsnop Jeovae: «Mu jcʼan ti te xcuchoj smul chcham li jpasmulile; jaʼ ta jcʼan ti acʼo scomtsan li chopol be stamoje yuʼun jech xuʼ chcuxi» (Ezequiel 33:11).

Jaʼ jech chkʼot ta stojolal ek li buchʼutik chichʼik lokʼesel ta tsobobbaile, yuʼun mu xa xuʼ xchiʼin li yermanotakike, kʼalal jech taje xuʼ me xakʼik venta ti chʼabal xa tskʼupinik taje. Xuʼ van chaʼibeik xkʼuxul ta skoj li kʼusitik la spasike. Yikʼaluk van tsvules ta sjolik kʼu toʼox yelan xmuyubajik kʼalal yamigoik toʼox li Jeovae xchiʼuk kʼalal xuʼ toʼox xchiʼinik li yermanotakike. Ta skoj taje, xuʼ me xvul-o xchʼulelik xchiʼuk xuʼ sutik talel ta stojolal Jeova.

 Sventa sutes yoʼonton li jun jpasmulile skʼan xichʼ akʼel ta ilel kʼanelal, pe skʼan tsots xichʼ albel mantal xtok. Xi laj yal li Davide: «Acʼo yacʼbun nucul li bochʼo tucʼ yoʼntone yuʼun jaʼ jun coltael. Me chiyutune, jaʼ jun cʼuxubinel chkaʼay; jaʼ jech chcʼot kuʼun jech chak cʼu chaʼal muil poxil» (Salmo 141:5). Sventa xkaʼibetik lek smelolal taje, jkʼeltik li jun skʼelobil liʼe. Jnoptik ta stojolal jun krixchano ti yakal chveʼe, vaʼun kakal kom sveʼel ta snukʼ, ta skoj taje mu xa xichʼ lek ikʼ xchiʼuk ta xa xkʼunib batel, jech xtok mu xa stakʼ xkʼopoj. Mi muʼyuk buchʼu xkoltaate xuʼ me xcham ta anil noʼox. Vaʼun tal majbatuk spat yuʼun jun yamigo sventa sjip lokʼel li kʼusi kakal kom ta snukʼe. Xuʼ van kʼux laj yaʼi ti majbat li spate, pe koliyal taje xuʼ mu xcham-o. Jaʼ jech kʼot ta stojolal li David eke, yuʼun solel la stoj ta vokol ti albat mantale, akʼo mi toj kʼux laj yaʼi, snaʼoj ti jaʼ onoʼox sventa slekilale.

Kʼalal chichʼ lokʼesel ta tsobobbail li jpasmulile xuʼ me jaʼ li kʼusi toj tunel yuʼune. Kʼalal lajuneb xaʼox jabil yichʼoj lokʼesel ta tsobobbail li xnichʼon Julian, ti laj kalbetik skʼoplal ta slikebale, laj yikta spasel li kʼusitik chopole xchiʼuk sut talel li ta tsobobbaile. Li avie jaʼ xa jun mol ta tsobobbail xchiʼuk xi chal ta jamale: «Ti laj kichʼ lokʼesel ta tsobobbaile, jaʼ laj yakʼ jnop ta persa ti toj chopol li kʼusitik kʼot ta pasel kuʼune. Ta melel toj jtunel kuʼun ti laj kichʼ tukʼibtasele» (Evreos 12:7-11).

TI KʼU YELAN XUʼ LEK XICHʼ KOLTAEL LI BUCHʼU YICHʼOJ LOKʼESEL TA TSOBOBBAILE

Akʼo mi kʼux tajek kʼalal oy buchʼu chichʼ lokʼesel ta tsobobbaile, oy onoʼox kʼusitik stakʼ pasel. Sventa stabe sbalil li buchʼu chichʼ lokʼesel ta mantale, xuʼ me jkolta jbatik ek.

Li moletik ta tsobobbaile chakʼik tajek persa skoltael sventa sutik talel ta stojolal Jeova li buchʼutik lokʼesbilik ta mantal ti sutesoj yoʼontonike

Li moletike skʼan me xakʼik ta ilel kʼu yelan chkʼanvan Jeova kʼalal ta xalbeik ti kʼot ta nopel yuʼunik ti ta xichʼ lokʼesel ta tsobobbail li jun krixchanoe. Jaʼ yuʼun, li moletike ta slekil yoʼontonik skʼan xalbeik kʼusi skʼan spas sventa x-och yan velta ta stestigo Jeova li jpasmulile. Jech xtok, chbat tsvulaʼanik junantikuk velta li buchʼu tskʼan chikta spasel li kʼusitik chopole xchiʼuk tsvulesbeik ta sjol li kʼusitik skʼan spas sventa sut talel ta stojolal li Jeovae. * (Kʼelo li tsʼib yok vune.)

Li yutsʼ yalal jpasmulile skʼan me xakʼik ta ilel kʼanelal ta stojolal li tsobobbaile xchiʼuk ti stsakik ta venta li kʼusi kʼot ta nopel yuʼun moletik ta stojolal li jpasmulile. Xi tsvules ta sjol li Juliane: «Muʼyuk onoʼox laj kikta skʼanel li jkereme, pe te xa lichʼakkutik-o ta skoj li xchopol talelale».

Li ermanoetik ta tsobobbaile xuʼ me xakʼik ta ilel kʼanelal kʼalal mu jsetʼuk chchiʼinik li buchʼu lokʼem ta mantale (1 Korintios 5:11; 2 Juan 10, 11). Kʼalal jech taje mas tstabe sbalil li tsitsel ta mantal chichʼ akʼbel li buchʼu lokʼesbil ta tsobobbail ti jaʼ chakʼ Jeova ta stojolal li moletike. Pe maʼuk noʼox skʼan jech xijkoltavan taje, skʼan xkakʼbetik ta ilel mas kʼanelal xtok li yutsʼ yalale, yuʼun yakal chil svokolik. Li yutsʼ yalale muʼyuk yichʼojik lokʼesel ta tsobobbail, jaʼ yuʼun skʼan mu stukuk xaʼi sbaik kuʼuntik (Romanos 12:13, 15).

Xi tstsutses sloʼil li Juliane: «Kʼalal chichʼ lokʼesel ta tsobobbail jun krixchanoe toj jtunel sventa jchʼunbetik li smantaltak Jeovae. Akʼo mi kʼux tajek, ta onoʼox xichʼ tabel sbalil. Ti lajuk jtsʼikbe li kʼusi chopol la spas li jkereme, muʼyuk tukʼib ta mantal ti jechuke».

^ par. 24 Kʼelo li revista La Atalaya 15 yuʼun avril ta 1991, pajina 21 kʼalal ta 23.