Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Li Jkʼel osil ta toyole (sventa chichʼ chanel)  |  Avril ta 2015

¡Pato avoʼonton ta stojolal li Jeovae!

¡Pato avoʼonton ta stojolal li Jeovae!

«Acotolic jchiʼiltac, jaʼ noʼox pato avoʼntonic scotol cʼacʼal ta stojol li Diose.» (SALMO 62:8)

1-3. ¿Kʼu yuʼun lek spatoj yoʼonton Pablo ti chkoltaat yuʼun li Jeovae? (Kʼelo li lokʼol ta slikebale.)

LI YAJTSʼAKLOMTAK Kristo ta Roma li ta baʼyel sigloe tsots tajek kʼusitik la snuptanik. Sabilik tajek sventa ch-akʼbat svokolik. Tikʼbat smulik ti mu xichʼik ta mukʼ li krixchanoetike xchiʼuk ti jaʼ la la stsanbeik skʼakʼal li jteklume. Ep buchʼutik tstsakatik batel ta chukel, li yane chichʼik jipel ochel ti bu oy jtiʼval chonbolometike. Li yantik xtoke laj yichʼik jokʼanel ta jtel teʼ, vaʼun kuxul tstsanbeik skʼakʼal sventa xvinaj osil ta akʼobaltik li ta jteklume. Li yajtsʼaklomtak Kristoe snaʼojik ti buchʼuuk onoʼox xuʼ jech snuptan taje.

2 Li vaʼ kʼakʼaletik ti tsots tajek vokolile, jaʼo la xchukik jtakbol Pablo li jromaetike. Xuʼ van la snop mi ta van xkoltaat yuʼun li yan yajtsʼaklomtak Kristoe. ¿Kʼu yuʼun? Yuʼun jun veltae tsots kʼusi la snuptan, pe muʼyuk buchʼu xkoltaat. Akʼo mi jech, laj yal ti koltaat yuʼun Jeova ta stojolal li Jesuse xchiʼuk akʼbat stsatsal sventa xkuch yuʼun. Laj yal xtok ti laj yichʼ «koltael lokʼel ta ye  leon[e]» (2 Timoteo 4:16, 17). * (Kʼelo li tsʼib ta yok vune.)

3 Li Pabloe snaʼoj onoʼox lek ti xuʼ spat yoʼonton ta stojolal li Jeovae. ¿Kʼu yuʼun? Yuʼun jaʼ chvul ta sjol ti kʼu yelan koltaat tal ta voʼnee. Lek snaʼoj ti ch-akʼbat stsatsal yuʼun Jeova sventa stsal li svokol taje xchiʼuk yan vokoliletik ti xuʼ snuptan ta jelavele. Lek tajek xchʼunoj, jaʼ yuʼun xi laj yale: «Jaʼ tskoltaun Kajvaltik ta skotol li kʼusitik toj chopole» (2 Timoteo 4:18). Akʼo mi xuʼ van muʼyuk chkoltaat yuʼun li yermanotake, lek xchʼunoj ti chkoltaat yuʼun Jeova xchiʼuk Jesuse.

JAʼUK SVENTA JPAT KOʼONTONTIK TA STOJOLAL JEOVA

4, 5. 1) ¿Buchʼu ti ta onoʼox skoltautike? 2) ¿Kʼusi xuʼ xapas sventa mas lek xavil aba xchiʼuk li Jeovae?

4 ¿Mi oy anuptanoj tsots avokol xchiʼuk ti atuk laj avaʼi abae? Xuʼ van la slokʼesoxuk ta avabtel o laj avil avokol ta eskuela. O yikʼaluk mi la-ipaj o la anuptan yan vokolil ti tsots la avaʼie. Xuʼ van lachibaj ta skoj ti muʼyuk buchʼu tskoltaot yilele. Melel onoʼox, jlom vokoliletike toj echʼ noʼox tsots xchiʼuk mu xchapaj yuʼun li krixchanoetike. ¿Kʼusi xuʼ xapas un chaʼa? Xi chalbutik li Vivliae: «Jaʼ noʼox pato avoʼnton ta stojol li Mucʼul Diose» (Proverbios 3:5, 6). ¿Mi ta melel xuʼ jpat koʼontontik ta stojolal? ¡Xuʼ ta melel! Oy ep loʼiletik ta Vivlia ti jamal chakʼ ta ilel ti xuʼ jchʼuntik ti tskolta yajtuneltak li Jeovae.

5 Mu me xavul avoʼonton ta anil mi oy avokol xchiʼuk mi muʼyuk buchʼu tskoltaot yileluke. Paso kʼuchaʼal li Pabloe, jaʼuk sventa mas xapat-o avoʼonton ta stojolal li Jeovae xchiʼuk kʼelo kʼuxi tskoltaot. Mi jech chapase mas me chapat avoʼonton ta stojolal Jeova xchiʼuk mas lek chavil aba xchiʼuk.

KʼALAL MU STAKʼ TA ANIL J-ORASIONTIK LI JEOVAE

6. ¿Kʼu yuʼun mu kʼunuk ti jpat koʼontontik ta stojolal Jeova kʼalal oy tsots jvokoltike?

6 Nopo noʼox ti chavul tajek avoʼonton ta skoj ti oy tsots avokole. Avakʼoj tajek persa ta xchapanel xchiʼuk laj xa akʼanbe koltael li Jeovae. Mi jech apasoj tale mu xa xavat avoʼonton, ta onoʼox skoltaot li Diose (kʼelo Salmo 62:8; 1 Pedro 5:7). Tsots me skʼoplal ti xapat mas avoʼonton ta stojolal Jeova mi chakʼan chakʼot ta yamigo ta melele. Taje mu kʼunuk ta pasel. ¿Kʼu yuʼun? Jun srasonale jaʼ ti bakʼintike mu aniluk tstakʼ j-orasiontik li Jeovae (Salmo 13:1, 2; 74:10; 89:46; 90:13; Habacuc 1:2).

7. ¿Kʼu yuʼun oy bakʼintik ti mu aniluk tstakʼ j-orasiontik li Jeovae?

7 ¿Kʼu yuʼun oy bakʼintik ti mu aniluk tstakʼ j-orasiontik li Jeovae? Sventa xkaʼibetik smelolale jvules ta joltik ti chal Vivlia ti jaʼ jtotik li Jeovae xchiʼuk ti jaʼ xnichʼonutike (Salmo 103:13). Bateltik li jun totile mu xakʼbe skotol li kʼusi chkʼanbat yuʼun xnichʼone. Pe mi chakʼbee, mu ta aniluk chakʼbe xtok. Bateltik xtoke oy ololetik ti oy kʼusi tskʼanike, pe ti mu xa skʼanik ta tsʼakale. Pe jech xtok, li totil meʼiletike snaʼojik mi xuʼ chil-o svokol yalab xnichʼnabik o yan krixchanoetik ta skoj li kʼusi chkʼanbatike. Mi anil noʼox chakʼbeik skotol li kʼusi chkʼanbatik li totil meʼiletike, xuʼ xkʼotik ta mosoil. Pe li totil meʼiletike snaʼojik lek kʼusitik chtun yuʼun yalab xnichʼnabik xchiʼuk bakʼin ti jaʼ lek yorail chakʼbeike. Jech tspas li Jeova eke. Snaʼoj lek kʼusi ora chakʼbutik li kʼusi chtun kuʼuntike, yuʼun skʼanojutik xchiʼuk snaʼoj li kʼusi mas lek chtun kuʼuntike. Jaʼ yuʼun skʼan jchantik smalael  xchiʼuk jkʼeltik kʼu yelan tstakʼ j-orasiontik li Jeovae (koʼoltaso xchiʼuk Isaías 29:16; 45:9).

8. ¿Kʼusi jamal chalbutik tspas li Jeovae?

8 Vuleso ta ajol xtok ti snaʼoj bu kʼalal xuʼ xkuch kuʼuntik li Jeovae (Salmo 103:14). Li Jeovae chakʼbutik onoʼox kipaltik sventa xuʼ xkuch kuʼuntik. Pe bateltike xuʼ van mu xa xuʼ kuʼuntik yaʼel. Akʼo mi jech, li Jeovae jamal chalbutik ti ‹xuʼ skoltautik sventa xkuch kuʼuntik› kʼalal ta jnuptantik junuk tsatsal vokolile (kʼelo 1 Korintios 10:13). Ta jpat koʼontontik ti Jeovae lek snaʼoj bu kʼalal xuʼ xkuch kuʼuntik, jaʼ yuʼun muʼyuk xa mas ta jvul koʼontontik.

9. ¿Kʼusi skʼan xapas mi mu aniluk tstakʼbot a-orasion li Jeovae?

9 Oyuk me smalael avuʼun mi mu aniluk tstakʼbot a-orasion li Jeovae. Vuleso ta ajol ti tskʼan tskoltautike, jaʼ noʼoxe tsabe lek yorail. Xi chal li Vivliae: «Li Mucʼul Diose chasmalaoxuc, yuʼun tscʼan chaxcʼuxubinoxuc. Li stuque oy ta yoʼnton chacʼ avilic ti scʼanojoxuque, yuʼun li Mucʼul Diose jaʼ Dios ti tucʼ yoʼntone. Xcuxet noʼox yoʼntonic li bochʼotic jaʼ noʼox tspat yoʼntonic o ta stojole» (Isaías 30:18).

KʼALAL OY TSOTS JVOKOLTIKE

10-12. 1) ¿Kʼu yuʼun mu kʼunuk ta chabiel jun kutsʼ kalaltik ti tsots ipe? 2) Albo jun skʼelobil kʼusi chkʼot ta pasel mi ta jpat koʼontontik ta stojolal Jeova kʼalal jaʼo oy jvokoltike.

10 Li ta xchibal parafoe laj kaltik ti Pabloe laj yal ti laj yichʼ «koltael lokʼel ta ye leon[e]» (2 Timoteo 4:17). ¿Kʼusi skʼan xapas mi oy anuptanoj tsots vokol xchiʼuk jech chavaʼi aba kʼuchaʼal li Pabloe? Tsots skʼoplal ti xapat avoʼonton ta stojolal li Jeovae. Jech kʼuchaʼal liʼe, ¿mi yakal chachabi jun avutsʼ avalal ti tsots ipe? Mi jeche, oy xa la akʼanbe Jeova ti xakʼbot atsatsale xchiʼuk ti lekuk kʼusitik xkʼot ta nopel avuʼune. * (Kʼelo li tsʼib ta yok vune.) Xuʼ jun noʼox avoʼonton chavaʼi aba, yuʼun li Jeovae snaʼoj li avokole. Pato avoʼonton ti tskoltaot sventa xkuch batel avuʼune xchiʼuk sventa tukʼ-o xavakʼ aba ta stojolal (Salmo 32:8).

11 Akʼo mi jech, bateltike xuʼ van muʼyuk tskoltaot yilel li Jeovae. Li doktoretike xuʼ van mu xchap skʼopik kʼuxi ta skʼelik li avajchamele. Moʼoj xtoke, xuʼ ox van amalaoj tspat avoʼonton li avutsʼ avalale, pe ti kʼusie mas to chakʼik avokol. Kʼalal jech chkʼot ta pasel taje, tsots me skʼoplal ti xakʼanbe atsatsal li Jeovae xchiʼuk ti xanopaj-o batel ta stojolale (kʼelo 1 Samuel 30:3, 6). Kʼalal mi la avakʼ venta ta tsʼakal ti kʼu yelan la skoltaot li Jeovae, mas to me lek chavil aba xchiʼuk.

12 Jkʼeltik kʼu yelan kʼot ta xkuxlejal jun ermana ti Linda sbie. * (Kʼelo li tsʼib ta yok vune.) Jal tajek la xchabi li stot smeʼe, jaʼ to kʼalal chamike. Xi chal li ermanae: «Ep ta velta mu xa jnaʼkutik kʼusi ta jpaskutik xchiʼuk li jmalale xchiʼuk li jmuke. Mu xaʼox xkuch kuʼuntik yaʼel. Pe li avie lek chkakʼkutik venta ti jaʼ la skoltaunkutik talel li Jeovae. Lek jchʼunoj ti jaʼ la stsatsubtasunkutik kʼalal jech tun kuʼunkutike, mas to kʼalal mu xaʼox xkuchʼ kuʼunkutik yaʼele».

13. ¿Kʼuxi koltaat ti lek spatoj yoʼonton ta stojolal Jeova li ermana Rosae?

13 Mi ta melel ta jpat koʼontontik ta stojolal Jeovae, jaʼ tskoltautik sventa xkuch kuʼuntik kʼalal ta jnuptantik tsots vokoliletike. Taje jech kʼot ta stojolal jun ermana ti Rosa sbie. Li smalale maʼuk stestigo Jeova,  jech xtok yakal chtuchʼ snupunel ta registro civil sventa chikta li Rosae. Kʼalal jaʼo yakal chkʼot ta pasel taje, li smuk ermanae albat yuʼun doktoretik ti tsakbil ta jun tsatsal chamele. Ta sjayibaluk yual xtoke cham li yajnil smuke. Skotol taje tsots laj yaʼi li Rosae. Kʼalal jun xaʼox yoʼonton chaʼie, och ta prekursora regular. Pe jaʼo cham li smeʼ xtoke. ¿Kʼusi koltaat sventa xkuch yuʼun skotol taje? Xi chale: «Kʼalal ta jkʼopon skotol kʼakʼal li Jeovae jaʼ la skoltaun, akʼo mi jaʼ noʼox sventa xkalbe ti oy kʼusi ta jnop ta jpas ti mu tsotsuk skʼoplale. Kʼalal jech la jpase, kʼot ta kamigo ta melel li Jeovae. Jech xtok, la skoltaun sventa jaʼ jpat koʼonton ta stojolal, ti mu jaʼuk jpat koʼonton ta jtuke o ta stojolal li yan krixchanoetike. Laj kakʼ venta ti tskoltaun ta melel li Jeovae, yuʼun laj yakʼbun skotol li kʼusitik chtun kuʼune. Xkoʼolaj ti koʼol li-abtej xchiʼuk Jeovae».

Jlom kʼusitik chkʼot ta pasel ta kutsʼ kalaltike xuʼ xakʼutik ta preva sventa xvinaj bu to kʼalal jkʼanojtik li Jeovae (Kʼelo parafo 14-16)

14. ¿Kʼuxi xuʼ skoltaot Jeova mi lokʼ ta tsobobbail jun avutsʼ avalale?

14 Kalbetik skʼoplal yan kʼusi xuʼ xkʼot ta pasel ti toj vokole. Xuʼ van laj yichʼ lokʼesel ta tsobobbail junuk avutsʼ avalale. Anaʼoj ti chal Vivlia ti mu stakʼ jchiʼintik ta loʼil li buchʼutik lokʼemik ta tsobobbaile (1 Korintios 5:11; 2 Juan 10). Pe ta skoj ti ep akʼanoj li avutsʼ avalale, xuʼ van tsots chavaʼi xchʼunel li mantal taje. ¿Kʼuxi xuʼ skoltaot Jeova sventa taje? Xuʼ chakʼbot stsatsal avoʼonton sventa xachʼun li mantale xchiʼuk ti tukʼ xavakʼ aba ta stojolale. Pato avoʼonton ta stojolal li Jeovae xchiʼuk nopo ti jaʼ tskoltaot sventa mas lek chavil aba xchiʼuk kʼalal oy avokole.

15. ¿Kʼu yuʼun muʼyuk la xchʼunbe smantal Jeova li Adane?

15 Li vaʼ yelan taje xuʼ jkoʼoltastik xchiʼuk li kʼusi kʼot ta pasel ta stojolal Adane.  ¿Kʼu yuʼun la sloʼ li sat teʼ akʼbat yuʼun Evae? Maʼuk yuʼun la snop ti xuʼ stoy sba ta stojolal Diose xchiʼuk ti xuʼ to jech xkuxi-oe. Li Vivliae chal ti «maʼuk laj yichʼ loʼlael li Adane» (1 Timoteo 2:14). Mi jech taje, ¿kʼu yuʼun jaʼ la xchʼunbe smantal li yajnile, ti maʼuk la xchʼunbe li Jeovae? Yuʼun jaʼ mas skʼanoj li yajnile (Génesis 3:6, 17). ¿Kʼusi ta jchantik yuʼun taje?

16. ¿Buchʼu ti stuk noʼox jech skʼan akʼo jkʼantike, xchiʼuk kʼu yuʼun?

16 Li kʼusi chakʼ jchantik taje jaʼ ti muʼyuk buchʼu yan jech jkʼantik kʼuchaʼal li Jeovae (kʼelo Mateo 22:37, 38). ¿Kʼu yuʼun? Yuʼun jaʼ mas tstabeik sbalil li kutsʼ kalaltike, akʼo mi muʼyuk chtunik ta stojolal Jeova. Jaʼ yuʼun akʼo persa jujun kʼakʼal sventa mas chakʼan li Jeovae xchiʼuk ti mas chapat avoʼonton ta stojolale. Mi chavul avoʼonton ta skoj ti lokʼem ta tsobobbail jun avutsʼ avalale albo kʼu yelan chavaʼi aba li Jeovae (Romanos 12:12; Filipenses 4:6, 7). * (Kʼelo li tsʼib ta yok vune.) Akʼo mi toj tsots li avokole, nopo ti jaʼ tskoltaot sventa mas to lek chavil aba xchiʼuk li Jeovae. Mi jech la apase mas me chapat avoʼonton ti tskoltaot sventa lek chkʼot ta lokʼel avuʼun skotole.

YOʼ TO CHAMALAE

Mi mu xkiktatik li cholmantale, jech chkakʼtik ta ilel ti jpatoj koʼontontik ta stojolal Jeovae (Kʼelo parafo 17)

17. ¿Kʼusi xuʼ jchʼuntik ta melel mi chkakʼtik persa ta jcholtik mantale?

17 ¿Kʼu yuʼun laj yichʼ «koltael lokʼel ta ye leon» li Pabloe? Xi laj yal stuke: «Sventa lek tsʼakal xichʼ cholel mantal xchiʼuk ti akʼo yaʼiik skotol li jyanlumetike» (2 Timoteo 4:17). Li Jeova eke yalojbutik ti skʼan jcholtik mantale, yuʼun jaʼ jech ta jchiʼintik ta abtel (1 Korintios 3:9; 1 Tesalonisenses 2:4). Mi chkakʼtik persa ta jcholtik mantale, xuʼ jchʼuntik ta melel ti chakʼbutik Jeova skotol li kʼusitik chtun kuʼuntike (Mateo 6:33). Jech xtok, mu xa toj vokoluk chkaʼitik smalael stakʼobil li j-orasiontike.

18. ¿Kʼusi xuʼ jpastik sventa mas lek xkil jbatik xchiʼuk Jeova xchiʼuk sventa mas jpat koʼontontik ta stojolale?

18 Jujun kʼakʼal akʼo persa sventa mas lek xavil aba xchiʼuk li Jeovae. Kʼalal jaʼo oy avokole nopo ti jaʼ tskoltaot sventa mas lek chavil aba xchiʼuke. Kʼelo xchiʼuk chano li Avivliae, sabo yorail sventa chanopbe skʼoplal li kʼusi chachane. Mu xavikta spasel orasion xchiʼuk tunan-o batel ta stojolal li Jeovae. Mi jech la apas skotol taje xuʼ xachʼun ta melel ti tskoltaot sventa xatsal li vokoliletik chanuptan avie xchiʼuk li ta mas jelavele.

^ par. 2 Li Pabloe xuʼ van jaʼ laj yalbe skʼoplal batsʼi leon o junuk tsatsal vokolil.

^ par. 10 Li ta jrevistatike oy lokʼem mantaletik ti xuʼ skolta li jchameletik xchiʼuk li buchʼutik chchabivanike. Xuʼ te chata ta ¡Despertad! 8 yuʼun fevrero ta 1994, 8 yuʼun fevrero ta 1997, 22 yuʼun mayo ta 2000 xchiʼuk ta 22 yuʼun enero ta 2001.

^ par. 12 Li ta mantal liʼe jelbil li biiletike.

^ par. 16 Li ta jrevistatike oy lokʼem mantaletik ti chal kʼusitik stakʼ spasik li buchʼutik oy lokʼem yutsʼ yalalik ta tsobobbaile. Jlom li mantaletik taje te lokʼ ta La Atalaya 1 yuʼun septiembre ta 2006, pajina 17 kʼalal ta 21, xchiʼuk ta 15 yuʼun enero ta 2007, pajina 17 kʼalal ta 20.