Kʼelo li kʼusi yichʼoje

Batan ta saʼobil

¿Kʼuxi xuʼ xavamigoin ta melel li Jeovae?

¿Kʼuxi xuʼ xavamigoin ta melel li Jeovae?

«Nopajanik ta stojolal Dios, vaʼun chnopaj tal ta atojolalik ek.» (SANTIAGO 4:8)

1. ¿Kʼu yuʼun skʼan jtsatsubtastik bu kʼalal xuʼ kuʼuntik ti kʼu yelan xkil jbatik xchiʼuk li Jeovae?

LI STESTIGOUTIK Jeovae oy jtaojtik jun mukʼta matanal. ¿Kʼusi jaʼ? Jaʼ ti kʼotem ta kamigotik li Jeovae. Tsots skʼoplal ti jtsatsubtastik ti bu kʼalal xuʼ kuʼuntik ti kʼu yelan xkil jbatik xchiʼuke. ¿Kʼu yuʼun? Yuʼun xuʼ xkʼunib ta skoj li sbalumil Satanase xchiʼuk li jchopoliltike.

2. ¿Kʼuxi xuʼ jtsatsubtastik mas ti kʼu yelan xkil jbatik xchiʼuk li Jeovae?

2 ¿Kʼuxi xuʼ xavamigoin ta melel li Jeovae? ¿Mi oy van ta avoʼonton xatsatsubtas mas ti kʼu yelan xavil aba xchiʼuke? Li ta Santiago 4:8 te chalbutik kʼusi xuʼ jpastik: «Nopajanik ta stojolal Dios, vaʼun chnopaj tal ta atojolalik ek». Kʼuchaʼal chkiltike, mi chanopaj ta stojolal li Jeovae, chnopaj ta atojolal ek. Jech xtok mi mas chanopaj ta stojolal li Jeovae, mas chachʼun ti jaʼ avamigoe xchiʼuk tstsatsub ti kʼu yelan xavil aba achiʼuke. Vaʼun, xuʼ jech chaval kʼuchaʼal laj yal Jesuse: «Kuxul ta melel li Buchʼu la stakun tale». Xi to laj yal xtoke: «Li voʼone xkojtikin» (Juan 7:28, 29). Jkʼeltik kʼusi skʼan  jpastik sventa xijnopaj ta stojolal li Jeovae.

¿Kʼuxi xuʼ jkʼopon jbatik xchiʼuk li Jeovae? (Kʼelo parafo 3)

3. ¿Kʼuxi xuʼ jchiʼin jbatik ta loʼil xchiʼuk li Jeovae?

3 Mi ta jkʼan chijnopaj ta stojolal li Jeovae, tsots skʼoplal ti jchiʼintik ta loʼile. ¿Kʼuxi xuʼ xkutik taje? Kalbetik junuk skoʼoltasobil. Jnoptik noʼox ti oy chaʼvoʼ krixchanoetik ti lek yamigo sbaike, ¿kʼusi van xuʼ spasik yoʼ skʼopon sbaik mi nom nakalike? Jaʼ ti stsʼibabe sbaike xchiʼuk ti skʼopon sbaik ta telefonoe. Jaʼ jech ti kʼu yelan xkil jbatik xchiʼuk Jeova eke. ¿Kʼuxi ta jkʼopon jbatik xchiʼuk? Jaʼo kʼalal nopolik noʼox ta jpastik orasione (kʼelo Salmo 142:2). ¿Kʼuxi tskʼoponutik li stuke? Ta Vivlia. Jaʼ yuʼun sventa jnaʼtik li kʼusi tskʼan chalbutike, skʼan nopolik noʼox jkʼeltik xchiʼuk jnopbetik skʼoplal li kʼusi ta jkʼeltike (kʼelo Isaías 30:20, 21). Jech kʼuchaʼal ta jkʼeltik li ta xchanobil liʼe, mi jech ta jpastike mas chlekub ti kʼu yelan xkil jbatik xchiʼuk li Jeovae.

LI JEOVAE TSKOPONUTIK TA VIVLIA

4, 5. 1) ¿Kʼusitik skʼan jpastik sventa skʼoponutik ta Vivlia li Jeovae? 2) Albo junuk skʼelobil ti kʼu yelan tskʼoponutike.

4 Jnaʼojtik lek ti xuʼ skolta skotol krixchanoetik li mantaletik ta Vivliae. Pe jnaʼojtik xtok ti xuʼ skoltautik sventa xijnopajutik ta jujuntal ta stojolal li Diose. Pe sventa jech xkʼot ta pasel taje, skʼan jkʼeltik kʼu yelan chaʼi koʼontontik kʼalal jaʼo ta jkʼeltik xchiʼuk kʼalal ta jchantik li Vivliae. Jech xtok, skʼan jnoptik kʼuxi xuʼ xkakʼ ta jkuxlejaltik li kʼusi ta jkʼeltike. Mi ta jpastik li kʼusitik taje, xkoʼolaj kʼuchaʼal yakal tskʼoponutik Jeova li ta Vivliae. Kʼalal chkiltik kʼu yelan tskoltautik li Jeovae, mas to tstsatsub ti kʼu yelan xkil jbatik xchiʼuke (Evreos 4:12; Santiago 1:23-25).

5 Kalbetik jun skʼelobil. Li ta Mateo 6:19 xchiʼuk 20 xi laj yal li Jesuse: «Mu xa xatsob akʼulejalik liʼ ta sba balumil[e]». Taje jaʼ skʼan xal ti skʼan jaʼuk mas tsots skʼoplal chkaʼi ta jkuxlejaltik li Jeovae. Kʼalal ta jkʼeltik li teksto taje, ¿kʼu yelan chkaʼi jbatik? Mi yakal xa ta jpastik li kʼusi chal tekstoe, xuʼ xkaltik ti jun yoʼonton kuʼuntik li Jeovae. Pe, ¿mi laj kakʼtik venta ti persa to skʼan jutukajestik li kʼusitik ta jkuxlejaltik xchiʼuk ti skʼan mas xijtun ta stojolal li Jeova une? Kʼalal jech taje skʼan jnoptik ti yakal tskoltautik Jeova sventa xkakʼtik venta kʼusi skʼan jpastik yoʼ xijnopaj mas ta stojolal.

6, 7. 1) ¿Kʼusi chkʼot ta pasel kʼalal ta jchantik li Vivliae? 2) ¿Kʼusi skʼan oyuk ta koʼontontik kʼalal ta jchantik li Vivliae?

 6 Kʼalal ta jchantik li Vivliae, chkakʼtik venta kʼusitik skʼan jpastik sventa mas lek xuʼ xijtunutik ta stojolal li Diose. Jech xtok ta xkakʼtik venta kʼu yelan li stalelaltak ti alakʼik sbae xchiʼuk ti kʼutik yelan yakʼoj ta ilel ti chkʼanvane. Kʼalal ta jchantik skotol li kʼusitik taje mas to ta jkʼantik. Jech xtok, li stuke mas tskʼanutik ek. Ta skoj taje, mas tstsatsub ti kʼu yelan xkil jbatik xchiʼuke (kʼelo 1 Korintios 8:3).

7 Mi ta jkʼan chijnopaj ta stojolal Jeovae tsots skʼoplal ti oyuk lek srasonal kuʼuntik kʼalal ta jchantik li Vivliae. Li Jesuse laj yal ti sventa xijkuxi sbatel osile, skʼan xkojtikintik lek li Jeovae (Juan 17:3). Melel onoʼox ti ep kʼusitik labalik sba ta jchantik li ta Vivliae. Pe taje maʼuk li kʼusi mas oy ta koʼontontike. Li kʼusi skʼan oyuk ta koʼontontike jaʼ ti lekuk xkojtikintik li Jeovae (kʼelo Éxodo 33:13; Salmo 25:4).

8. 1) ¿Kʼusi van xuʼ snopik junantik kʼalal tskʼelbeik skʼoplal li kʼusi pasbat yuʼun Jeova li ajvalil Azariase? 2) ¿Kʼusi jnaʼojtik ta melel ta skoj ti lek xkojtikintik li Jeovae?

8 Mi jaʼ kamigotik chkiltik ta melel li Jeovae, muʼyuk ta jvul koʼontontik ti muʼyuk chal Vivlia ti kʼu yuʼun tsots stalelal yileluk la spas bakʼintike. Jech kʼuchaʼal liʼe, jnoptik ta stojolal li Azariase, jun ajvalil ta Juda. Kʼalal jaʼo ch-ajvalilaje, li jteklume chichʼik toʼox ta mukʼ jecheʼ diosetik. Pe jaʼuk li ajvalile mu jechuk la spas kʼuchaʼal li yantike, yuʼun «toj lec cʼusi la spas ta stojol Mucʼul Dios» xi li Vivliae (2 Reyes 15:1-5). Akʼo mi jech, li Diose «laj yacʼbe stoj smul li ajvalile», laj yakʼbe jun tsatsal chamel. ¿Kʼu yuʼun jech la spas ti muʼyuk srasonal yilele? Li ta loʼil taje muʼyuk bu chal. Jaʼ yuʼun junantike xuʼ van snopik ti muʼyuk tukʼ ti jech la spas Dios kʼalal laj yakʼbe stoj smul li ajvalil taje. Pe li voʼotike xkojtikintik lek li Jeovae xchiʼuk jnaʼojtik ta melel ti tukʼ skotol li kʼusitik tspase (Jeremías 30:11). Jaʼ yuʼun, akʼo mi mu jnaʼtik ti kʼu yuʼun jech la spasbe li ajvalile, jnaʼojtik ta melel ti oy srasonal yuʼune.

9. ¿Kʼu yuʼun akʼbat stoj smul yuʼun Jeova li ajvalil Azariase?

9 Ta yan tekstoetik ta Vivliae, oy ta jtabetik mas yaʼyejal xkuxlejal li ajvalil Azariase ti ojtikinbil xtok kʼuchaʼal Usiase (2 Reyes 15:7, 32). Li ta 2 Crónicas 26:3 kʼalal ta 5 xchiʼuk 16 kʼalal ta 21 chal ti «tucʼ cʼusitic la spas ta stojol Mucʼul Dios» li Usiase. Pe chal xtok ti lik stoy sba ta jelavele. Jun kʼakʼale, laj ox skʼan spas li kʼusi jaʼ noʼox stakʼ spasik li paleetike. Talik 81 ta voʼ paleetik ti ta ox skʼan spajesike, laj yalbeik ti mu jechuk spase. Pe ta skoj ti stoyoj xa sba tajek li ajvalile muʼyuk la skʼan pajesel xchiʼuk kap-o tajek ta stojolal li paleetike. Li kʼusitik taje, tskoltautik ta yaʼibel smelolal ti kʼu yuʼun akʼbat stoj smul yuʼun Jeova li ajvalil taje.

10. 1) Alo kʼu yuʼun mu persauk skʼan jnaʼtik ti kʼu yuʼun laj yakʼbe stoj smul jlom krixchanoetik li Jeovae. 2) ¿Kʼusi xuʼ skoltautik sventa jnaʼtik ti lek skotol li kʼusitik tspas Jeova?

10 Oy kʼusi tsots skʼoplal chakʼ jchantik li sloʼilal Azariase. Yuʼun li kʼusitik kʼot ta pasel ta xkuxlejale chakʼ jnaʼtik kʼu yuʼun akʼbat stoj smul yuʼun li Diose. Pe li ta Vivliae oy to yan epal loʼiletik ti muʼyuk chalbe skʼoplal li kʼusitik xuʼ van la spasike. Kʼalal jech taje, ¿mi xijnaʼet van yuʼun li kʼusitik tspas Jeovae? O ¿mi jpatoj koʼontontik ti skotol ora tukʼ li kʼusitik tspase? (Deuteronomio 32:4). Li Vivliae ep kʼusitik chalbutik ta sventa Jeova yoʼ xkojtikintik lek xchiʼuk ti jpat  koʼontontik ta stojolale. Mi xkojtikintik xchiʼuk mi jkʼanojtik li Jeovae, mu persauk skʼan jnaʼtik skotol ti kʼu yuʼun jech tspase. Pe, ¿kʼusi xuʼ skoltautik sventa jnaʼtik ti lek skotol li kʼusitik tspas Diose? Jaʼ ti ta jchantik li Vivliae. Mi jech ta jpastike, ta xkamigointik ta melel li Jeovae (Salmo 77:12, 13).

JKʼOPONTIK TA ORASION LI JEOVAE

11-13. ¿Kʼuxi jnaʼojtik ti chchikinta j-orasiontik li Jeovae? (Kʼelo li lokʼol ta slikebale.)

11 Kʼalal ta jpastik orasione, xuʼ jkʼupil kʼoptatik li Jeovae, xuʼ xkalbetik kolaval xchiʼuk xuʼ jkʼanbetik koltael. Mi jech ta jpastike chijnopajutik ta stojolal (Salmo 32:8). Pe sventa xkamigointik ta melel li Jeovae, skʼan jchʼuntik ta melel ti chaʼibutik kʼalal ta jkʼopontike.

12 Junantike chalik ti muʼyuk la chchikinta ta melel j-orasiontik li Diose. Chalik ti jaʼ noʼox la chtun sventa mas jun koʼonton chkaʼi-o jbatike. Chalik xtok ti jaʼ la chtun sventa jnopbetik skʼoplal li jvokoltike xchiʼuk ti jnop jtuktik kʼu yelan xuʼ jchapantike. Melel onoʼox ti xuʼ jech skoltautik li orasione. Pe kʼalal ta jpastik orasione chaʼibutik ta melel li Jeovae. ¿Kʼuxi jnaʼojtik taje?

13 Jnoptik ta sventa li Jesuse. Kʼalal te toʼox oy ta vinajele, laj yakʼ venta kʼuxi tstakʼbe s-orasion krixchanoetik li Jeovae. Xchiʼuk kʼalal liʼ toʼox ta Balumile, li Jesuse la skʼopon Dios sventa xalbe li kʼusi tsnope xchiʼuk li kʼusi chaʼi ta yoʼontone. Jun veltae sjunul akʼobal la skʼopon li Diose (Lukas 6:12; 22:40-46). Jech xtok, la stijbe yoʼonton yajtsʼaklomtak ti akʼo spasik orasione. ¿Mi jech van la spas jechuk Jesus ti snaʼojuk ti muʼyuk chchikinta ta melel orasion li Diose? Mu jechuk. Lek xvinaj ti snaʼoj lek ti chchikinta ta melel orasion li Diose. Jaʼ yuʼun xi laj yalbee: «Tot, kolaval chkalbot ti laj avaʼi li jkʼope. Ta melel, jnaʼoj ti chavaʼibun jkʼop skotol veltae» (Juan 11:41, 42). Li voʼotik eke jnaʼojtik lek ti chchikinta j-orasiontik li Jeovae (Salmo 65:2).

14, 15. 1) Kʼalal ta jkʼopontik li Jeovae, ¿kʼu yuʼun skʼan jamaluk xkalbetik li kʼusi oy ta koʼontontike? 2) ¿Kʼuxi koltaat yuʼun orasion li jun ermanae?

14 Bakʼintike xuʼ van mu xkiltik lek  kʼuxi tstakʼbutik j-orasiontik li Jeovae. Pe mi jamal chkalbetik li kʼusi ta jkʼanbetike, xuʼ me xkiltik kʼuxi tstakʼbutik. Mi jech ta jpastike, chkʼot ta kamigotik ta melel li Jeovae. Mi chkalbetik skotol li kʼusi ta jvul-o koʼontontike, li Jeovae chnopaj ta jtojolaltik.

15 Jkʼeltik ti kʼu toʼox yelan tsnop jun ermana ti Carmen sbie. * (Kʼelo li tsʼib ta yok vune.) Chal ti akʼo mi mu skʼupin ta jyalel li cholmantale chlokʼilan onoʼox kʼalal skʼan toʼox spas juvilare. Kʼalal la spas juvilar une, tijbat yoʼonton yuʼun jun mol ta tsobobbail ti akʼo ochuk ta prekursora regulare. Xi ta xal li Carmene: «La jpas li kʼusi laj yalbune, pe lik jkʼanbe ta orasion Jeova jujun kʼakʼal ti akʼo skoltaun sventa jkʼupin li cholmantale». ¿Mi laj van yaʼi Dios li s-orasione? Li Carmen avie oxib xa jabil yakal chtun ta prekursora. Chal ti lekubem xa mas ti kʼu yelan chchol mantal koliyal ti chkoltaat yuʼun li yan ermanaetike xchiʼuk ti chlokʼilan ta cholmantale. ¡Tskʼupin xa tajek cholmantal li avie! Pe li kʼusi mas tsots skʼoplal chaʼie, jaʼ ti mas xa lek xil sba xchiʼuk li Jeovae. Kʼuchaʼal chkiltike, sventa lek xil sbaik ta melel xchiʼuk Jeova li ermana taje jaʼ koltaat yuʼun li orasione.

JPASTIK LI KʼUSI OY TA JBATIK SPASELE

16, 17. 1) ¿Kʼusi xuʼ jpastik sventa lek xkil jbatik jujun kʼakʼal xchiʼuk li Jeovae? 2) ¿Kʼusi ta jchantik li ta yan xchanobil chtale?

16 Ta sbatel osil xuʼ xijnopaj-o ta stojolal li Jeovae. Jaʼ yuʼun, jchikintatik li kʼusi tskʼan chalbutike, sventa taje, skʼan jkʼeltik jujun kʼakʼal li Vivliae xchiʼuk jpasulantik orasion. Mi jech ta jpastike, mas xa lek chkil jbatik jujun kʼakʼal xchiʼuk li Jeovae. Jech xtok, tskoltautik sventa xkuch kuʼuntik li vokoliletike.

Nopajkutik-o batel ta stojolal Jeova (Kʼelo parafo 16, 17)

17 Melel onoʼox, xuʼ to jnuptantik vokoliletik akʼo mi nopolik noʼox ta jkʼopontik li Jeovae. Kʼalal jech chkʼot ta pasel taje xuʼ van mu xa jpat koʼontontik ta stojolal li Jeovae. Xuʼ van xkʼot ta nopel kuʼuntik mi jaʼ to kamigotik o mi chaʼi to van li j-orasiontike. ¿Kʼusi xuʼ jpastik mi jech chkaʼi jbatik taje? Te ta jchantik li ta yan xchanobil chtale.

^ par. 15 Jelbil li sbie.