Kʼelo li kʼusi yichʼoje

Batan ta saʼobil

«Li jveʼele jaʼ ti ta jpasbe cʼusi tscʼan» li Diose

«Li jveʼele jaʼ ti ta jpasbe cʼusi tscʼan» li Diose

¿Kʼusitik chakʼbot muyubajel? ¿Mi jaʼ chakʼbot muyubajel ti lekuk xavil aba xchiʼuk li yantike o ti lek xavil aba xchiʼuk li anup achiʼile o ti oyuk avamigotake? Jech kʼuchaʼal liʼe, xuʼ van lek xakʼupin ti jmoj chaveʼ xchiʼuk li buchʼutik lek xavil aba achiʼuke. Pe akʼo mi jech, ta skoj ti jaʼot yajtunel Diose, ¿mi mu jaʼuk mas lek chavaʼi ti jaʼ chapas li kʼusi tskʼan yoʼonton Diose, ti xachanbe li Skʼope xchiʼuk ti xachol li lekil aʼyeje?

Li ajvalil David ta voʼneal Israele xi la smuyubta ta jun kʼejoj li Jpasvaneje: «Dios cuʼun, jaʼ lec chavil ti jpas cʼusi chacʼane, ti oy ta coʼnton ta jchʼun li amantale» (Sal. 40:8). Akʼo mi toj ep laj yil svokol ta xkuxlejal li Davide la skʼupin tajek spasel li kʼusi tskʼan yoʼonton Diose. Melel onoʼox ti maʼuk noʼox stuk David ti la skʼupin tajek spasel li kʼusi tskʼan yoʼonton li melel Diose.

Li jtakbol Pabloe te la stsakbe skʼoplal li Mesías o Cristo ta Salmo 40:8 kʼalal xi la stsʼibae: «Jaʼ yuʼun cʼalal jutuc xaʼox scʼan xtal liʼ ta banamil li Cristoe, jech laj yal: “Muc jaʼuc chacʼan li milbil matanaletic, xchiʼuc li cʼusitic yan chavichʼ acʼbel amotonine. Jech laj avacʼbun quichʼ jbecʼtal. Muc xcuxetuc xa avoʼnton yuʼun li chicʼbil matanal xchiʼuc li matanal sventa xchʼayubil mulil chaʼacʼbate. Jaʼ yuʼun jech laj cal: «Liʼ oyune, Dios cuʼun, yuʼun jech onoʼox tsʼibabil jcʼoplal ta balbil vun ti ta jpas cʼusi tscʼan avoʼntone», xacutot”, xi li Cristoe» (Heb. 10:5-7).

Kʼalal liʼ toʼox oy ta Balumil li Jesuse la skʼupin skʼelel li kʼusitik pasbile, ti chchiʼinan yamigotake xchiʼuk ti chchiʼinan ta veʼel li buchʼutik lek xil sba xchiʼuke (Mat. 6:26-29; Juan 2:1, 2; 12:1, 2). Pe li kʼusi mas tsots skʼoplal laj yaʼie xchiʼuk li kʼusi mas la skʼupine jaʼ ti tspas li kʼusi tskʼan yoʼonton li Stot ta vinajele. Yuʼun xi laj yal li Jesuse: «Li jveʼele jaʼ ti ta jpasbe cʼusi tscʼan li Bochʼo la stacun tale, xchiʼuc ti acʼo jvuʼesbe li yabtele» (Juan 4:34; 6:38). Li jtakboletike jaʼ la xchanbeik li jchanubtasvanej yuʼunik li kʼusi chakʼ muyubajel ta melele. Ta sjunul yoʼontonik xchiʼuk ta muyubajel laj yalik batel li lekil aʼyej ta sventa Ajvalilal yuʼun Diose (Luc. 10:1, 8, 9, 17).

«BAT PASIC TA JCHʼUNOLAJEL [...] CRISTIANOETIC»

Xi laj yalbe yajtsʼaklomtak li Jesuse: «Jaʼ yuʼun batanic me; bat pasic ta jchʼunolajel cuʼun li cristianoetic ta jujun banamile. Acʼbo yichʼic voʼ ta sventa li Jtote xchiʼuc ta jventa vuʼun li Nichʼonilune xchiʼuc  ta sventa li Chʼul Espiritue. Chanubtasic lec ta xchʼunel scotol li jmantaltac laj calboxuc avaʼyique. Naʼic me, te jchiʼinojoxuc o scotol cʼacʼal cʼalal to ta slajebal cʼacʼal» (Mat. 28:19, 20). Sventa spas kuʼuntik taje, skʼan me jcholbetik mantal ta buyuk noʼox li krixchanoetike, xbat jchaʼvulaʼantik xchiʼuk ti jchanubtastik ta Vivliae. Li abtelal taje xuʼ me xakʼbutik muyubajel.

Li kʼanele jaʼ tstij koʼontontik sventa jcholtik batel mantal akʼo mi mu skʼan li krixchanoetike

Mi oy ta yoʼonton o mi muʼyuk li aʼyej chkichʼtik batele li kʼusi mas tsots skʼoplal sventa jkʼupintik li cholmantale, jaʼ ti kʼu yelan chkiltik li cholmantale. ¿Kʼu yuʼun ta jcholtik-o batel li lekil aʼyej akʼo mi mu skʼanik li krixchanoetike? Yuʼun jnaʼojtik ti kʼalal ta jcholtik mantal ta sventa li Ajvalilal yuʼun Diose xchiʼuk ti ta jpastik ta yajtsʼaklom Cristo li krixchanoetike, jaʼ ti chkakʼtik ta ilel ti jkʼanojtik li Diose xchiʼuk li jchiʼiltaktike. Yuʼun oy ta xiʼel xkuxlejal li krixchanoetike xchiʼuk li jkuxlejaltike (Ezeq. 3:17-21; 1 Tim. 4:16). Jaʼ yuʼun jkʼeltik junantik kʼusitik spasojan yantik sventa xmuyubajikuk noʼox ta cholmantal akʼo mi vokol ti bu chcholik mantale.

BUYUK XACHOL MANTAL

Kʼalal lek kʼusitik chichʼ jakʼel li ta cholmantale lek me kʼusitik chkʼot ta pasel. Li Amaliae te laj yil jun vinik ta parke ti yakal tskʼel speriodiko ta sobe. Vaʼun nopaj batel xchiʼuk la sjakʼbe mi oy junuk lekil aʼyej la skʼel li ta periodikoe. Kʼalal laj yal ti muʼyuke, xi laj yalbee: «Li voʼone kichʼojbot talel lekil aʼyej, jaʼ ta sventa li Ajvalilal yuʼun Diose». Li kʼusi albate toj labal sba laj yaʼi, jaʼ yuʼun la xchʼam jun chanubtasel ta Vivlia. Yuʼun onoʼox li Amaliae jaʼ jech slikesoj oxib chanubtaseletik ta Vivlia li ta parkee.

Jun ermana ti Janice sbie laj onoʼox xchol mantal kʼalal xuʼ laj yil ti bu ch-abteje. Kʼalaluk jun jchabivanej xchiʼuk xchiʼil ta abtel lek laj yaʼiik jun mantal ti laj yichʼ lokʼesel li ta revista Li Jkʼel osil ta toyole, li Janicee laj yalanbe ti chichʼbe batel li revistaetik ti mas achʼik toe. Jaʼ jech la spas xtok xchiʼuk yan xchiʼil ta abtel ti toj lek chil li jeltos mantaletik chichʼ talel li ¡Despertad! xchiʼuk Li Jkʼel osil ta toyole. Taje jaʼ laj yakʼ ti xkʼanbat revistaetik xchiʼuk yan xchiʼil ta abtele. «¡Toj ep yakʼojbun bendision li Jeovae!», xi chal li Janicee, ti chichʼbe batel revistaetik li buluchvoʼ xchiʼiltak ta abtele.

MU XAVAKʼ AKʼO SMAKOT

Jun jkʼelvanej ta sirkuito laj yalbe jcholmantaletik ti kʼalal chcholik mantal ta jujupʼej nae, mu xalik ta anil ti jaʼ mas lek ch-echʼik ta yan kʼakʼale. Laj yalbe ti jaʼ mas lek ti xi sjakʼbeike: «¿Mi xuʼ xkakʼbot avil kʼu yelan ta chanel li Vivliae?». O xie: «¿Kʼusi van kʼakʼal xchiʼuk kʼusi ora mas xokolot sventa xijloʼilaj?». Li jkʼelvanej ta sirkuitoe laj yal ti kʼalal la svulaʼan jun tsobobbail ti jaʼ la stunesik taje, la slikesik 44 chanubtaseletik ta Vivlia ta jun noʼox xemana.

Li kʼusi mas lek xtoke jaʼ ti xijsut noʼox ta anile mi jeche ta jayibuk noʼox kʼakʼal. ¿Kʼu yuʼun? Yuʼun jaʼ jech chakʼik venta krixchanoetik ti tskʼan chchanik Vivlia ti yuʼun ta sjunul koʼontontik ta jkʼan ta jkoltatik sventa xaʼibeik smelolal li kʼusi chal Vivliae.  Kʼalal laj yichʼ jakʼbel jun ants ti kʼu yuʼun la xchʼam chanubtasel ta Vivlia xchiʼuk li stestigotak Jeovae, xi la stakʼe: «Lik jchan Vivlia ta skoj ti chkil ti skʼanojikune xchiʼuk ti oyun ta yoʼontonike».

Xuʼ xi xajakʼbe li yajval nae: «¿Mi xuʼ xkakʼbot avil kʼu yelan ta chanel li Vivliae?»

Kʼalal mu to jaluk yechʼel ay ta Chanob vun sventa Abtelal ta Prekursore, li Madaie voʼlajuneb xaʼox krixchanoetik chchanubtas ta Vivlia xchiʼuk voʼob xaʼox yetʼesojbe yan jcholmantaletik. Junantik li buchʼutik chchanubtas ta Vivliae nopoltik lik kʼotikuk li ta jtsobajeltike. ¿Kʼusi koltaat Madaí sventa slikes epal chanubtaseletik ta Vivlia? Li ta chanob vune chanubtasatik ti toj tsots skʼoplal skʼan xchaʼvulaʼanik li buchʼutik lek laj yaʼiik li mantale jaʼ to mi la staike. Yan stestigo Jeova ti ep buchʼu skoltaoj ta yojtikinel li kʼusi melele xi chale: «Laj xa jchan ti sventa jkoltatik li buchʼutik tskʼan chojtikinik li Jeovae jaʼ ti mu xkikta jbatike».

Kʼalal ta jchaʼvulaʼantik li krixchanoetike jaʼ chkakʼtik ta ilel ti oy ta koʼontontik ta melel li buchʼutik tskʼan chaʼibeik smelolal li kʼusi chal Vivliae

Sventa xichʼ chaʼvulaʼanel xchiʼuk ti xichʼik chanubtasel ta Vivlia li buchʼutik lek laj yaʼiik mantale, skʼan xkakʼbetik yipal. Akʼo mi jech, li bendisionetik ta jtatike toj ep, jaʼ xkom to li kip chkakʼtike. Kʼalal chkakʼ jkuxlejaltik spasel li abtelal ta sventa li Ajvalilal yuʼun Diose, xuʼ jkoltatik yantik sventa xlik «yotquinic li cʼusi melele», kʼalal jech chichʼ pasele xuʼ me xkolik (1 Tim. 2:3, 4). Chakʼbutik jun oʼontonal xchiʼuk epal muyubajel spasel taje.