Kʼelo li kʼusi yichʼoje

Batan ta saʼobil

 KʼUXI CHCHAPAJ LI VOKOLILE

Li Ajvalilal yuʼun Diose chakʼ talel jun oʼontonal

Li Ajvalilal yuʼun Diose chakʼ talel jun oʼontonal

Li Ajvalilal yuʼun Dios ti tspas mantal ta spʼejel balumil ti voʼne xa onoʼox tajek jmalaojtik ti akʼo xtale, jutuk xa skʼan xkʼot ta pasel yuʼun sventa junuk noʼox koʼontontik xchiʼuk ti jmojuk oyutike. Jech kʼuchaʼal liʼe, li ta Salmo 72:7 chal ti oy jun oʼontonal ta balumil ta mas jelavele. Pe ¿bakʼin o kʼusi ora ch-ajvalilaj tal ta balumil li Ajvalilal yuʼun Diose? ¿Kʼuxi tspas yuʼun? ¿Kʼuxi van chatabe sbalil li ajvalilal taje?

¿BAKʼIN O KʼUSI ORA CHTAL LI AJVALILAL YUʼUN DIOSE?

Li Vivliae yaloj xa onoʼox li kʼusitik chkʼot ta pasel ti jaʼ «senyail» ti poʼot xa skʼan xtal li Ajvalilal yuʼun Diose. Taje te tsakal skʼoplal li paskʼopetik ta spʼejel balumile, li viʼnale, li chameletike, li epal nikeletike xchiʼuk ti yantik ch-epaj li choplejale (Mateo 24:3, 7, 12; Lukas 21:11; Apokalipsis 6:2-8).

Xi chal yan albil kʼope: «Chtal tsots vokolil li ta slajebal xa kʼakʼale, toj echʼ noʼox xibal sba. Yuʼun tskʼan sba stuk li krixchanoetike, batem ta yoʼontonik takʼin, [...] mu xchʼunbe smantal stot smeʼik, mu kʼusi snaʼ stojik ta vokol, muʼyuk stukʼil yoʼontonik, muʼyuk xa kʼanbail kʼuchaʼal stalel onoʼox jeche, mi jsetʼuk oy ta yoʼontonik tspas ta jmoj skʼopik, chchopol loʼiltavanik, mu snaʼ spajes sbaik, simaronik, muʼyuk skʼanojik li kʼusi leke, [...] xtoyet xa tajek chaʼi sbaik, jaʼ skʼanojik li kʼusi kʼupil sba chaʼi stukike jaʼ muʼyuk skʼanojik li Diose» (2 Timoteo 3:1-4). Jech kʼuchaʼal chal li tekstoe oy onoʼox krixchanoetik ti jech stalelalike, pe li avie mas to ep ti buchʼu jech stalelale.

Li albil kʼope lik kʼotuk ta pasel ta sjabilal 1914. Jlom j-al-loʼiletik, jpolitikoetik xchiʼuk jtsʼibajometike jaʼ jech chalik ek ti jaʼo te lik sokuk tal li balumil li vaʼ jabile. Jech kʼuchaʼal liʼe, xi la stsʼiba li j-al-loʼil Peter Munch ta Dinamarcae: «Li tsatsal paskʼop ta 1914 jaʼ te lik talel svokol li krixchanoetike. Lek toʼox tajek xbat skotol, [...] pe ta tsʼakale sok li kuxlejale, oy kʼusitik ti xibalik sbae, oy pʼajbail xchiʼuk buyuk noʼox ti muʼyuk jun oʼontonale».

Pe oy lekil aʼyejetik xtok. Mi echʼ xa ox li vokolile, tsʼijil chkom skotol. Li senyailtak laj kalbetik skʼoplale chakʼ ta ilel ti poʼot xa spas mantal liʼ ta balumil li Ajvalilal yuʼun Diose. Li Jesuse laj yalbe skʼoplal jun senyail ti lek kʼusi chkʼot ta pasele, xi laj yale: «Li lekil aʼyejetik ta sventa li Ajvalilal liʼe ta xichʼ cholel ta spʼejel balumil sventa xaʼi skotol li jteklumetike, vaʼun ta xtal li slajebe» (Mateo 24:14).

Li stestigounkutik Jeovae jaʼ chkalbekutik batel skʼoplal li lekil aʼyejetike. Li jrevistakutik ti mas ojtikinbile jaʼ sbi Li jkʼel osil ta toyole. Yakal chalbe skʼoplal li Ajvalilal yuʼun Jeovae. Li avie oy mas ta 338 kʼopetik xchiʼuk jaʼ chalbe skʼoplal li kʼusi tspas li Ajvalilal yuʼun Dios liʼ ta balumile xchiʼuk li kʼusi tspas ta stojolal li krixchanoetike.

¿KʼUXI CHLIK SVENTAIN BALUMIL LI AJVALILAL YUʼUN DIOSE?

Sventa jtakʼtik li sjakʼobil taje, jkʼeltik batel chantos li kʼusitik tsots skʼoplal chkʼot ta pasele:

  1. Li Ajvalilal yuʼun Diose muʼyuk chakʼ ti akʼo jmojuk x-abtejik xchiʼuk li jpolitikoetike.

  2. Li jnitvanejetik ta politika ta spʼejel balumile chakʼik persa sventa jaʼuk-o x-ajvalilajik xchiʼuk tstsakik ta kʼop li Ajvalilal yuʼun Diose (Salmo 2:2-9).

  3. Li Ajvalilal yuʼun Diose persa tslajesbe skʼoplal li ajvaliletike, yuʼun jaʼ li buchʼutik tskʼan tspojik li abtelale (Daniel 2:44; Apokalipsis 19:17-21). Li Vivliae chal ti jaʼ sbi Armajedon li slajeb paskʼop ta spʼejel balumile (Apokalipsis 16:14, 16).

  4.   Li buchʼutik tskʼan chventainatik yuʼun li Ajvalilal yuʼun Diose jaʼ noʼox kuxul chkomik li ta Armajedone xchiʼuk jun yoʼonton chkuxiik liʼ ta balumile. Taje jaʼ li «epal krixchanoetik» chal ta Vivliae, jaʼ xkaltik, yikʼaluk van ta smiyonal noʼox (Apokalipsis 7:9, 10, 13, 14).

¿KʼUXI XUʼ XATABE SBALIL LI AJVALILAL YUʼUN DIOSE?

Li kʼusi baʼyel skʼan kuʼuntik sventa sventainutik li Ajvalilal yuʼun Diose jaʼ li yojtikinobile. Xi laj yalbe Dios ta orasion li Jesuse: «Jaʼ skʼoplal kuxlejal sbatel osil liʼe, ti ta xojtikinikote, li jun noʼox melel Diosote xchiʼuk ti chojtikinik ek li buchʼu la atak tale, li Jesukristoe» (Juan 17:3).

Ep sbalil ta jtabetik kʼalal xkojtikintik li Diose. Kalbetik skʼoplal chaʼtosuk. Li baʼyele, jaʼ tskoltautik sventa xkakʼ mas xchʼunel koʼontontik ta stojolal li Diose. Ta skoj ti oy lek sprevail kuʼuntik li kʼusi jchʼunojtike mas to chakʼ jchʼuntik ti yuʼun oy ta melel li Ajvalilal yuʼun Diose xchiʼuk ti poʼot xa chtale (Evreos 11:1). Li xchibale, jaʼ tskoltautik sventa masuk to jkʼantik li Diose xchiʼuk li jchiʼiltaktike. Kʼalal jkʼanojtik li Diose jaʼ tstij koʼontontik xchʼunbel smantal, jech xtok, kʼalal jkʼanoj li jchiʼiltaktike jaʼ tstij koʼontontik ta xchʼunel li tojobtasel laj yal Jesus ti ojtikinbil kʼuchaʼal li Mukʼul Lekil Mantale: «Li kʼusitik chakʼan akʼo spasboxuk li krixchanoetike jechuk me xapasbeik ek» (Lukas 6:31).

Jech kʼuchaʼal li jun lekil totil ti tskʼan lek chbat xkuxlejal li xnichʼnabtake, li Jpasvanej kuʼuntike tskʼan ti lekuk xbat jkuxlejaltik eke xchiʼuk tskʼan ti akʼo jkʼupintik «li batsʼi mero kuxlejale» (1 Timoteo 6:19). Li jkuxlejaltik avie, maʼuk jaʼ li mero kuxlejale, yuʼun ta smiyonal noʼox krixchanoetik vokol tajek chaʼiik. Pe ¿kʼu yelan li batsʼi mero kuxlejale? Jkʼeltik batel jaytosuk li kʼusitik kʼupilik sba tspas li Ajvalilal yuʼun Dios ta stojolal li krixchanoetike.

Li Ajvalilal yuʼun Diose jaʼ chakʼ ti junuk koʼonton xijkuxie xchiʼuk ti oyuk jveʼel jkotoltike.